Weeds											Sepedi



Re ikemišeditše go lwantšha MENGWANG



Instructions:

Folio strap: Taolongwang

Byline: Jane McPherson, molaodi wa Lenaneotlhabollo la Balemi la Grain SA 



Lenaba le legolo la motšweletši wa dibjalo ke mengwang mme lenaneongtlhabollo la rena re phethile gore lenyaga re ikemišetša go lwantšha mengwang ka maatla! 



Mafelong a mantši fao go tšweletšwago dibjalo tša selemo sehla se e be e le se sebotse kudu. Madimabe ke gore ge mabaka a swanela dibjalo, go ra go re a swanela le mengwang. Lenyaga go bile le mašemo ao mo go ona dibjalo di bego di sa bonale gabotse ka baka la mengwang, mme tahlego yeo e hlolwago ke seemo se ke ye e boifišago. Mengwageng e se mekae ye e fetilego balemi ba ile ba goga boima ka ge go be go se bonolo go hwetša dipoelo tše kaone – ga re a swanela go lahlegelwa ke mabele afe kapa afe ntle le lebaka. 



O ka botšiša gore na o swanetše go itshwenya ka mengwang kgweding ya Aprele ka lebaka lang? Gonabjale go ka se thuše go leka go laola mengwang dibjalong tše di lego tšhemong ka ge e šetše e sentše (ge e se fela go thiba gore e enye peu ye e tlogo mela le go senya dibjalo ngwaga wo o tlago). Le ge go le bjalo, ge o nyaka go lwantšha lenaba ka moo go kgontšhago o swanetše go le tseba ka go tsenela – ga o kgone go lwantšha selo seo o sa se tsebego le gona o sa kgonego go se lemoga. Gonabjale e tloga e le nako ye botse ya go hlahloba mašemo a gago go bona mengwang ye e melago go ona – go na le kgonagalo ye kgolo ya gore yeo e melago fao gonabjale e tlo ba gona gape ngwaga wo o tlago (le ngwaga wo o latelago ge o sa tšee dikgato tša go e laola ka bjako). 

Hlaola mengwang;

Ngwala mengwang yeo e melago ka bontši le mašemo ao e melago go ona;

Nyakišiša mengwang ye o e bonego – na ke mohuta wa:

Tlakalaphara?

Tlakalatshesane (sekabjang)?

E tswala bjang? – ka peu, medu goba digwere, bjalobjalo;

Mokgwa wo mokaone wa go lwantšha mengwang yeo dibjalong ke ofe (phetošopšalo, taolo ya semotšhene goba taolo ya sekhemikhale)?

Mengwang ye e swanetše go hlaselwa neng mo ngwageng? (e ka ba marega pele ga ge o bjala gape);

Ke dibolayangwang (dikhemikhale) dife tše di ngwadišitšwego go bolaya mengwang yeo?

Na dikhemikhale di swanetše go tšhelwa/gašetšwa neng mengwanyeng goba mmung? 



Ge o na le tshedimošo ye e feletšego mabapi le mengwang yeo e hlolago mathata o tla kgona gabotse go e laola go fokotša bothata sehleng se se latelago – itokiše gore o kgone go fediša mathata mme mafelelong o fenye ntweng ya go lwantšha mengwang! 

