Tyres 2 (Maize)									Sepedi



Dithaere: Tharollo ya polabolo



Instructions: 

Folio strap: Dithaere

Byline: Taodišwana ye ke ya Goodyear

Use Goodyear logo



Ka tlhago sebopego sa dithaere se raragane mme se akaretša dintlha tša go swana le makgwakgwa a a fapanago ka popego (various tread designs), mehuta ya popego, ditekanyetšo tša morwalo le lebelo gammogo le bogolo. 



Taodišwana ye nngwe kgatišong ye e bolela ka theko ya dithaere tša maleba tše di dirišwago polaseng, go ya ka tirišo ya tšona mabakeng a a fapafapanago. Bjale o lebane le dintlhatheknikhale tše mmalwa tše o swanetšego go di ela hloko. Mo tlase re hlaloša dintlhatheknikhale tše bohlokwa tša dithaere. 



Popo ya dithaere

Ge re lebelela popo ya dithaere, re bona gore go na le mehuta ye mebedi: wa moraro (bias) le wa radiale (radial). Mohuta wa “bias” (wo gape o bitšwago “cross-ply” goba pholae-putlani) o na le dithapo tše di o tiišago tše di putlago thaere ka khutlo ya ditikrii tše 30 go ya go tše 40, mme pholae goba llaga ye nngwe le ye nngwe ye e latelago e lebeletše thoko ye e fapanago le ya llaga ye e tlilego pele ga yona. Ka mokgwa wo go bopša patrone ya dithapo tše di putlaganyago yeo e fihlilwego ka fase ga makgwakgwa a thaere – mošomo wa patrone ye ke go kaonafatša go goga ga thaere le go šireletša sebopego sa yona.



Ge re lebelela thaere ya radiale, re bona gore dipholae goba dillaga tša thapo ye e tiišago thaere di beilwe ka khutlo ya ditikrii tše 90 go tloga mathokong go ya mothalonggare (centreline) wa thaere. Dillaga di kgokelwa merumong ya thaere (beads), yeo e šomago go dudiša le go tiišetša thaere riming, le go e šitiša go šuta. Godimo ga dillaga (dipholae) tša radiale, ka fase ga makgwakgwa, go beilwe lepanta leo le dirilwego ka dillaga (dipholae) tše mmalwa tša thapo goba setala, leo le rarelago le sedika sa thaere. 



Diphapano tše di lego molaleng gare ga mehuta ye mebedi ye ya dithaere tša trekere ke gore mohuta wa “bias” o na le popego ya semenya (rounded shape), seo se hlolago phatlalatšo ye e sa lekanelego ya kgatelelo gammogo le kgohlagano ya go fetiša ya mmu thaereng. Mohuta wa radiale wona o na le popego ya sekwere (square shape). Se se dira gore karolo ye kgolo ya makgwakgwa a thaere e kgwathe fase, phatlalatšo ya kgatelelo e lekanele le gona kgohlagano ya mmu e fokotšege. 



Ge re lebelela go šoma ga tšona, re lemoga gore dithaere tša mohuta wa “bias” tša go swana le Dyna Torque II ya Goodyear, di menega gabonolo (very flexible) le gona di ka lokišwa ntle le bothata – ntlha ye bohlokwa ge o lokiša dilo tša gago ka bowena. Popego ye e raraganego ya mohuta wa radiale wa go swana le mohlwaela (range) wa Optitrac wa Goodyear, e nyaka bokgoni bjo bo itšego go lokiša thaere ya mohuta wo. Le ge go le bjalo thaere ya radiale e phala ya “bias” ka go swara, go tia, go se phunyege gabonolo, go dikologa bokaone, go se fele ka pela le go sepediša trekere ka boiketlo. 



Ela hloko: o se ke wa diriša dithaere tša radiale le tša “bias” aseng e tee. Lebaka ke gore ga di sepele ka go swana, ka fao di šikinya ase yeo e ka senyago gammogo le dikarolo tše dingwe. 



Dithaere tšohle tše di sa bontšhego gore di ka dirišwa ntle le tšhupu (tubeless) di swanetše go tsenywa tšhupu. Le ge dithaere tše di ka lokišwa gabonolo ka go petšhwa, tharollo ye e swanetše go ba ya motšwaoswere ka ge petšhe e ka swamologa ya dira gore kgatelelo ya moya e fokotšege ganyane ganyane goba ka potlako, seo se ka hlolago kotsi. Ditšhupu di ka dirišwa dithaereng tše di sa nyakego tšhupu ge go na le lešoba riming goba ge moya o lahlega ka baka la go senyega ganyane ga mafelo a tiišo merumong ya thaere (beads). 



Tshedimošo ye e tšweletšwago lehlakoreng la thaere

Dintlha tše di raranego tše di ngwadilwego lehlakoreng la thaere di bohlokwa kudu go hlaola bogolo bja thaere le ditšhupetšo mabapi le tirišo ya yona. Dintlha tše ke tše di latelago:



Goodyear Optitrac DT812 480/70R24 138 A8

Goodyear Optitrac DT812 – leina la mmopi (leswao la kgwebo), mohlwaela le mmotlolo;

480 – bophara bja boputlo (cross-section width) bja thaere ka dimilimetara (di ka bontšhwa le ka dinoko);

70 – Sebopego (aspect ratio or profile). Palo ye e šupa bogodimo bja lehlakore (sidewall) la thaere bjoo bo beilwego bjalo ka sephesente sa bophara bja thaere; 

R – Popego ya radiale;

24 – Kgaolagare ya rimi ka dinoko;

138 A8 – Tšhupane ya morwalo (load index), 138 (2 360 kg) ka lebelo la 40 km/h (A8), seo se šupago lebelo leo thaere e ka rwalago morwalo wo o itšego ka lona. Ela hloko gore ditšhupetšo mabapi le morwalo di ka fapana go ya tirišo ya thaere, ge eba e dirišwa go goga morwalo goba go sepediša sedirišwa ka tokologo. 



Ge o na le pelaelo mabapi le ntlha efe kapa efe ye e amago dithaere, ikgokaganye le setsebi sa dithaere sa Goodyear gore o thušwe. 





