Mistakes (329)



Na o ithutile eng sehleng se se fetilego? 



Instructions: 

Folio strap: Tšweletšo

Byline: Jane McPherson, molaodi wa Lenaneotlhabollo la Balemi la Grain SA 

Photos:



Ge o ka dira diphošo išago, a e be diphošo tše mpsha! Elelwa tše di latelago mabapi le sehla se se latelago:



Nnete ke gore ge pula e sa ne (go swana le mafelong a mmalwa ngwagola) molemi a ka se bune. Le ge go le bjalo, ge pula e ka na, go na le kgonagalo ye kgolo ya gore o ka ba le poelo. 

Botebo bja mmu wo o lengwago bo sepelelana le kgonagalo ya kotsi temong – kgonagalokotsi e fokotšega go ya ka go oketšega ga botebo. 

Balemi bao ba lemago mašemo a bona ka moo go nepagetšego marega le gona pele ga ge ba bjala, ba atiša go hwetša poelo ya botse go phala bao ba sa dirego bjalo. 

Ge o ka tšea dišupommu mme wa diriša monontšha wo o lebanego o tla hwetša poelo ye kaone. 

Ngwang ke lenaba la molemi – mengwang e amoga dibjalo tša gago monola, phepo, seetša le moya – lwantšha mengwang ge o nyaka go ba molemi wa go atlega. 

Matšatši a ‘go fatafata le go bjala’ a ile – ditshenyegelo tša temo di nameletše kudu mme ga go na molemi yo a ka tšwelago pele ge a diriša mekgwa ye e fokolago ya go lema. 

Papatšo ye e nepagetšego ya puno ya gago e bohlokwa – keletšo ye botse e ka go thuša go rekiša puno ya gago ka thekišo ye kaone. Ga go na motho yo a tsebago se sengwe le se sengwe ka ga dilo tšohle – kgopela keletšo mabapi le papatšo. 

Elelwa – go hwetša poelo o swanetše go lema mašemo, wa reka tše di nyakegago, wa bjala peu, wa tšhela monontšha wa ka godimo (ka tlwaelo), wa lwantšha mengwang le disenyi, wa reka inšorense ya dibjalo tša gago mme wa buna. Go bohlokwa kudu gore o akanyetše [“budget”] ka nepagalo – o ipakela mathata ge o ka bjala tšhemo ye e fetago yeo o ka kgonago go e laola. Go kaone kudu go bjala tšhemo ye nnyane ye o ka kgonago go e šoma ka tshwanelo. 

Go adima tšhelete go a thuša, eupša e swanetše go bušetšwa. Go lema tšhemo ye nnyane ka tšhelete ya gago go phala go lema mašemo a magolo ka tšhelete ya motho yo mongwe – tswalo e a bolaya! 

