Mechanisation 								Sepedi

Didirišwa: na o swanetše go ithekela tšona goba wa di hira goba wa kgopela thušo ya mokontraka?



Instructions: 

Folio strap: Tirišometšhene

Byline: Taodišwana ye e beakantšwe ke Jane McPherson go tšwa go Mošupatsela wa Agribusiness



Molemi wa matšatši a o dula a katana le go diriša ditrekere, metšhene ya go fola le ye mengwe ye e sepelelanago le yona bokaone le ka moo go kgontšhago.  



Taba ye e tloga e le nnete, kudu malebana le mešomo ya go lema. Tšwelopele ya metšhene ye mefsa, yeo e ka bogelwago ngwaga le ngwaga Letšatšing la Puno la NAMPO, e bontšha kokeletšo ya maatla, ke gore ya maatlapere goba dikilowate, ya dientšene tša metšhene ye e dirišwago polaseng. Se se akaretša bogolo le maatla a metšhene; e ka ba trekere, motšhene wo o šilago furukepelwa wo o itshepedišago (dedicated self driven silage maker), mogoma wo o gogwago wa mekero ye e okeleditšwego (drawn implement plough with more furrows) goba megoma ye e katolotšwego ya dipapetlasediko tše di lokologanego (wider tandem disc ploughs). 



Ditshenyegelo tše di sepelelanago le bong bja metšhene, go reka ye mefsa le ge e ka ba mešomo ya go lema, di namelela godimo ka lebelo. Tshenyo ye e ka hlolwago ge molemi a sa hlagole ka nako e ka ba puno ye e folotšago goba poelo yeo e lego fase ga ya palogare. 



Go phethagatša dinepo tša puno le tše dingwe tšeo di amago tšweletšo, bjalo ka ge go šupeditšwe leanong la polasa mabapi le methopo le tšhelete, go bohlokwa gore leano leo le sepelelane le maatla goba bokgoni bja didirišwa tšeo di lego gona polaseng. Ge molemi a feditše go ngwala lenaneo la diphahlo/didirišwa o tla tseba mohuta le bogolo bja ditrekere tše di lego gona gammogo le maatla (dikilowate) a ye nngwe le ye nngwe. 



Bogolo bja ditrekere le bokgoni bja tšona bja go goga bo swanetše go lekanywa le bogolo le maatla a didirišwa tše di lego gona. Morago ga fao, molemi a ka ela nako yeo e hlokegago mabapi le go lema, go phatša mmu (ripping), go lema ka mogoma wa dipapetlasediko, go hlagola le go bjala. 



Bjale molemi a ka phetha ge eba o na le didirišwa tše di lekanego goba aowa. Mohlamongwe o tla swanela go reka tše dingwe goba go hira bakontraka gore ba mo phethele mešomo ye e itšego ye bohlokwa. Mohlala: mohlamongwe molemi a ka boloka tšhelete ka go hira mokontraka yo a nago le trekere ye kgolo le didirišwa tša yona gore a mo phethele mešomo ya temo ya motheo, go phatša mmu go ya fase (deep ripping) goba go lema ka mogoma wa dipapetlasediko. Morago ga fao molemi a ka phetha mešomo ya go lema ye e latelago ka didirišwa tša gagwe tšeo e ka bago tše nnyane ge di bapišwa le tša mokontraka. (Ge o nyaka tshedimošo godimo ga ye e filwego lekola “Thuto ya Bakontraka”).  



Molemi o swanetše go kgetha ge eba o nyaka go ithekela didirišwa tšohle go phetha mešomo ye e akantšwego ka nako, go hira didirišwa tšeo a di hlokago goba go diriša bakontraka. Balemi, kudu bao ba sa thomago, ba swanetše go ela ditshenyegelotii hloko tše di akaretšago konalo (depreciation), metšhelo, pabalelo, inšorense le tswalo ya tšhelete ye e adimilwego, tšeo di sepelelanago le go ithekela didirišwa tšohle. Pušetšo ya tšhelete yeo e adimilwego go reka didirišwa tše di hlokegago e ka gogiša kgwebo ya gago boima le go e wetša mathateng. Le ge go le bjalo, go hlokega ga didirišwa tše di nyakegago go ka šitiša molemi go bjala goba go buna ka nako. 



