Maintenance (OPOT)									Sepedi



Tlhokomelo ya plantere



Instructions:

Folio strap: 

Byline: Tshedimošo ye e tšwa mo go thuto ya Dikontraka tša Temo 



Tlhokomelo ya kgonthe ya plantere e ka dira gore molemi a hwetše poelo ye botse bakeng sa tahlego ye kgolo. Kgetho, peo, khupetšo le tiišo ya peu mmung ke ditiro tše bohlokwa go feta tše dingwe tšweletšong ya dibjalo. Ge plantere e sa šome gabotse ka baka la go se hlokomelwe ka tshwanelo, sephetho e ka ba poelo ya fase ga yeo e letetšwego. 



Plantere ye e bjalago direi (row-crop planter) ke sedirišwa se se šomago ka nepagalo mme go swana le motšhene wo mongwe le wo mongwe woo o šomago ka nepagalo, plantere ye e swanetše go hlokomelwa ka šedi ye kgolo. A re boneng gore re ra eng ge re realo. 



Tlhokomelo mathomong a sehla sa go bjala

Hlwekiša plantere gabotse. 

Kgonthiša gore go se be le mapheko dikarolong tša plantere tšeo di ka e šitišago go šoma ka tshwanelo.

Hlahloba karolwana ye e bitšwago “finger-pickup mechanism” go bona ge eba go na le fao e senyegilego; lokiša dikarolwana tše di senyegilego goba tsenya tše mpsha.

Lekola sefokišamoya plantereng ye e šomago ka moya o hlahlobe ditiišo (seals), kudu tšeo di rarelago papetlasediko (disk) goba toromo (drum).

Hlahloba botlase bja diswarapeu tša mohuta wa poleite (plate-type seed hopper bottoms). 

Ntšha dikarolo tše di onetšego goba di senyegilego o tsenye tše mpsha, go swana le tše di latelago: cut-off pawl, knockout pawl, dipring, le poleite ya botlaseng bja seswarapeu (hopper bottom base plate).

Lekola ge eba dipoutu tšohle di tiile; lekola gape ge eba mathopo a sa kgokagane gabotse le gore ditiišo (gaskets) tša sehlomelwa sa monontšha wa seela (liquid fertiliser attachment) di sa dutše gabotse. 

Phumula oli yeo e ka bego e tloditšwe dihlomelweng tša monontšha wa go oma, sebolayangwang le sebolayakhunkhwane go di boloka mafelelong a sehla se se fetilego. 



Poloko sehleng sa pšalo

Sehleng sa pšalo boloka plantere ka ntlongpolokelo bošego goba e khupetše go šitiša kgobelo ya monola ka ditšhelong tša go bolokela (materials storage hoppers).



Go kirisa goba go tlotša oli

Kirisa goba tlotša plantere oli ka dinako tšeo di bontšhwago mošupatseleng wa modiriši. 

Diriša setlotši se se lebanego. 

Phumula dihlomelwa (fittings) ka mehla pele ga ge di tlotšwa kirisi goba oli go thiba gore ditšhila di tsenele 

dipering.



Pele ga poloko mafelelong a sehla sa pšalo

Ntšha monontšha, sebolayangwang le sebolayakhunkhwane seo se šetšego o hlwekiše ditšhelo gammogo le botlase bja diswarapeu go šitiša ruse. 

Lekola ge eba go na le dikarolo tše di onetšego goba di senyegilego mme o tsenye tše mpsha pele ga sehla se

 se tlago sa pšalo. 

Tlotša disegamokero (furrow openers), dikhupetšathipa goba dikhupetšapapetlasediko (knife or disk coverers), le ge e ka ba dikarolo tše dingwe tše di “phadimišitšwego” (polished areas) oli goba kirisi go šitiša ruse. 

Tlotša dipering tšohle kirisi goba oli. 

Swinelela dišupetši (markers) seemong sa thwalo (transport position) mme o boloke plantere ka 

ntlongpolokelo. Thekga plantere ka dikota gore maotwana a tloge fase.



ELA HLOKO: Se boloke plantere mola go sa na le kgatelelo ya haedroliki ka silintereng ya kgakala (remote cylinder). Go fokotša kgatelelo ya haedroliki, tima entšene ya trekere mme o gogele dilebara tša haedroliki pele le morago gammalwa. Morago ga fao bofolla mathopo a haedroliki mme o tloše silintere ya haedroliki madulong a yona ge go hlokega. 



DIKELETŠO MABAPI LE BOITŠHIRELETŠO

Mešupatsela ya badiriši ba trekere le plantere e akaretša dikeletšo tše di itšego mabapi le boitšhireletšo. Mo re tšweletša dikgopolokakaretšo di se kae. Tše di latelago ke dikakanyetšo tša ka mehla tše di amanago le go diriša plantere ye e bjalago direi (row-crop planter) ka mokgwa wa go phema kgonagalo ya dikgobalo goba lehu:

Dudiša plantere fase ka mehla ge e sa dirišwe. Moo go kgonegago plantere e swanetše go dudišwa fase ge e lokišwa goba ge e beakanywa. 

Thekga plantere ka ditshipi (jack stands) goba dikota ge o tsena ka fase ga yona go e lokiša go thiba gore e 

wele godimo ga gago. 

Dumelela motho tee fela, e lego mootledi, godimo ga trekere ge e goga plantere. 

Ge o ka hlwekiša motšhene goba wa o beakanya goba wa o tlotša oli mola o sepela o ka gobala. Ge o ka ema goba wa sepela godimo ga plantere mola e sepela o ka wa.

Ge o šoma ka dikhemikhale tša temo o swanetše go apara diaparo tša go šireletša. Kgetho goba tirišo ye e sa swanelego ya dikhemikhale e ka gobatša batho, diruiwa, dibjalo, mabu goba phahlo ye nngwe. Ela ditšhupetšo tša badiri ba khemikhale hloko. 











