Maintenance									Sepedi



Na pabalelo e ile kae?



Instructions:

Folio strap: Pabalelo

Byline: Jane McPherson, molaodi wa Lenaneotlhabollo la Grain SA

Diswantšho tše tša kgogo ye e alamago ka seswarong sa plantere le mae a a lego ka lepokising la dithulusi la trekere di gogela šedi ya rena go taba ya pabalelo ya metšhene. Tshenyego ye ga e hlolege lebakeng la letšatši fela – ke sephetho sa tlhokomologo ya dikgwedi le ge e ka ba mengwaga.



Tirišometšhene ke ntlha ye bohlokwa ya temokgwebo – ntle le yona re ka tshepa fela mošomo woo motho o tee a ka o phethago ka letšatši. Pabalelo ya metšhene e swanetše go ba ntlha ya mokgwa wa go phela – tlhokomelo ye nnyane letšatši ka letšatši e ka šitiša mathata.



Ka tlwaelo trekere goba sedirišwa se sengwe se senyega mola se šoma – ke go re ka nako yeo molemi a se hlokago go fetiša. Ka fao, ge o ka ela pabalelo yeo e ka thibago tshenyego hloko, o ka ipolokela tšhelete le nako ye ntši. Tshenyego ya didirišwa sehleng sa mešomo ye bohlokwa e ka senyetša molemi kudu.



Pula-Imvula ye ke ya Desemere – ye nngwe ya dikgwedi tšeo ka tšona balemi ba bantši ba šomago ka maatla mašemong a bona – go feleletša pšalo ya lehea, go hlagola mašemo go laola mengwang, go gašetša sebolayakhunkhwane go laola dibokophehli le go buna korong ya bona.



Dikeletšo tše di latelago di ka go tšwela mohola:

Pabalelo ya ka mehla ya trekere e bohlokwa kudu. Mohlala: ge o ka tlogela go lekola goba go babalela trekere letšatši le letšatši, tše di latelago di ka diragala:

Sehlwekišamoya se ka farega ka baka la ditšhila, seo se ka dirago gore trekere e je makhura go feta ka mehla le gona e lahlegelwe ke maatla.

Sehlwekišamoya se ka phunywa mašobana mme ditšhila tša tsena ka entšeneng, seo se ka hlolago tshenyego ya ka pela.

Oli ya krenke (crankcase oil) e ka fokotšega go fetiša, seo se ka senyago entšene o šoro ka baka la go hloka oli ya go lekana.

Oli ya krenke e ka tšhilafala, seo se ka hlolago tshenyego ya go fetiša ya dikarolwana tša ka gare ga entšene.

Setšidifatši (cooling system) se ka lahlegelwa ke seo se tšidifatšago entšene (coolant) mme entšene ya fiša go fetiša, seo se ka senyago dipering, diphistene, le dibelefe o šoro.

Karolwana ye e bitšwago “fuel sediment bowl” e ka farega ka baka la ditšhila le ruse ya dira gore entšene e palelwe ke go sepela ka tshwanelo goba e time.

Dikarolwana tše di bofologilwego goba tše di sego tša beakanywa ka tshwanelo di ka gana go šoma goba di ka wa goba di ka senyega, seo se ka dirago gore trekere e hlole kotsi ge e sepedišwa.



Šitiša tshenyego ye e turago ya mohuta wo ka go tšea metsotswana e se mekae tšatši le lengwe le le lengwe pele ga ge o thomiša trekere go phetha dikgato tše di latelago tša pabalelo:

Lekola sehlwekišamoya o se lokiše (sebise).

Lekola tekanetšo ya oli ya krenke (crankcase oil level).

Lekola tekanetšo ya seela sa setšidifatši.

Kirisa fao kirisi e nyakegago.

Lekola “fuel sediment bowl”.

O ka gopola gore tše re di boletšego ka godimo di ra mošomo wo mogolo, eupša ge o ka phetha dikgato tšeo ka mehla trekere ya gago e tla dula e go šomela mme o tla kgona go buna mabele a gago mafelelong a sehla.



Mafelelong a sehla sa selemo didirišwa tše ntši di bolokwa go fihla sehla se se latelago. Pele ga ge o boloka sedirišwa sa gago, ela tše di latelago hloko:

Tloša ditšhila, mmu le kirisi ye e tšhilafetšego motšheneng.

Penta fao pente e tlogilego.

Penta dikarolwana tšeo di kopanago le mmu ge di šoma goba di tlotše kirisi ye koto go thiba ruse.

Kirisa motšhene wohle bjalo ka ge go šišinywa mo go mošupatsela wa modiriši.

Ge go kgonega boloka didirišwa ka ntlong/setorong go šitiša tshenyego ye e ka hlolwago ke boso.

Kukela sedirišwa godimo o se thekge ka dikota goba ditena gore maotwana a lekelele go boloka dithaere. Khupetša dithaere ka mekotla go di šireletša letšatšing ge sedirišwa se bolokwa ka ntle.

Ge sedirišwa e le sa mohuta wa haedroliki, bea sekgonyotšhireletšo (safety lock) madulong a sona mme o fokotše kgatelelo disilintereng tša haedroliki, goba o theoše motšhene gore o robale fase. Gogela disilintere godimo ka botlalo (fully retract cylinders) go šireletša ditshipi tša disilintere (cylinder rods) gore di se ruse.



Ka nako ye diplantere di tla be di le kgauswi le go feleletša mošomo wo bohlokwa wa tšona wa go tsenya peu le monontšha mmung – dikgato tše di latelago di ama pabalelo ya tšona:

Kgotholla diteng tša diswaramonontšha, diswarasebolayangwang le diswarasebolayakhunkhwane mme o hlwekiše diswaro tše gammogo le “seed hopper bottoms”, go šitiša ruse.

Lekola ge eba go na le dikarolwana tše di fedilego goba tše di senyegilego mme o tsenye tše mpsha pele ga ge sehla se sefsa se thoma.

Tlotša dibulaforwana (furrow openers), dišireletšathipa goba dišireletšapapetla (knife or disk coverers) gammogo le mafelo ohle a a phadimago (polished areas) ka oli goba kirisi go šitiša ruse.

Kirisa dipering tšohle.

Bušetša diswai (markers) seemong sa thoto (transport position) mme o boloke plantere ka ntlong/moagong.

Thekga plantere ka dikota goba ditena gore maotwana a lekelele mme dithaere di se kgwathe fase.







