Machinery (Maize)						 	Sesotho sa Leboa
Go hlokomela metšhene ge lephakuphaku le fetile 
Instructions:
Folio strap: Tlhokomelo
Byline: Tshedimošo ye e tšwa mo go Thuto ya Tlhokomelo ya Trekere le Didirišwapolaseng
Sehleng sa selemo ge mešomo e sa fele go dula go eba lephakuphaku la go leka go phetha mešomo ka nako yeo e lego gona. Kudu selemo se se fetilego dipula di nele morago ga nako, ka fao nako e be e hlaela go feta dihleng tše di fetilego. 
Ka tlwaelo nakong ye ya lephakuphaku tlhokomelo le tlhwekišo ya ditrekere le didirišwa ga e elwe hloko ka tshwanelo. Gonabjale, mola lephakuphaku le fetile, o swanetše go tšea nako go hlokomela didirišwa tša gago. 
Tlhokomelo ya didirišwa
Dira tše di latelago mabapi le didirišwa tšohle:
Tloša mmu, ditšhila le krisi ye e kgobetšego didirišweng mme o pente fao go kgobogilego goba go onetšego. Se se šitiša ruse go senya sedirišwa mme se lelefatša tirišo ya sona. 
Tlotša motšhene oli goba krisi ka moo go nyakegago go ya ka mošupatsela wa modiriši. 
Ge go na le dikarolo tše di phuthegago, di theošetše fase go nolofatša poloko ye e lotegilego. 
Šireletša botlase bja mogoma le ge e ka ba ditshipi tša “coulters” go ruse ka go di tlotša krisi ye ntši goba ka go di penta ka pente ye e šitišago ruse ye e lebanego botlase bja mogoma. 
Ngwala dikarolwana tše di senyegilego goba fao go swanetšego go lokišwa. Reka dikarolwana tše di nyakegago mme o di hlomele pele ga ge sehla se sefsa se thoma. 
Boloka sedirišwa ka bobolokelong ge go kgonega le gona tloša boima dithaereng ka go lekeletša maotwana. 
Go šitiša ruse boloka megoma ka go bea botlase godimo ga mapolanka gore bo se kgwathe fase. 
Tloša disilintere tša haedroliki goba di hunyele ka botlalo go šireletša ditshipi (rods) go ruse. 
Tlhokomelo ya plantere 
Tlhokomelo ye e nepagetšego ya plantere ye e bjalago direi e ka thea phapano gare ga poelo ye botse ya dibjalo le tahlego ye kgolo. Kgetho, peo, khupetšo le tiišo ya peu ke ditiro tše bohlokwa go feta tšohle tšweletšong ya dibjalo. Ge plantere e sa šome gabotse ka baka la go se hlokomelwe ka tshwanelo, sephetho e ka ba poelo ya fase ga yeo e letetšwego. Tše di latelago di swanetše go dirwa: 
Kgothola diteng tša mapokisi a monontšha, sebolayangwang le sebolayakhunkhwane o a hlwekiše o be o hlwekiše le botlase bja dintšhapeu (seed hopper bottoms) go šitiša ruse le tshenyego. 
Lekola ge eba go na le dikarolwana tše di senyegilego goba di onetšego mme o tsenye tše mpsha pele ga ge sehla se sefsa sa go bjala se thoma. 
Tlotša dikgolamekero (furrow openers), dikhupetšasegi (knife coverers) goba dikhupetšapapetla (disk coverers) le ge e ka ba mafelo afe le afe ao a phadimišitšwego (polished areas) oli goba krisi go šitiša ruse. 
Tlotša dipering tšohle oli goba krisi. 
Swinelela dilekanyi (markers) boemong bja thoto (transport position) mme o boloke plantere ka moagong. E bee godimo ga dikota goba ditena gore maotwana a tloge fase. 
