Journey (Maize) 								Sesotho sa Leboa

Go sepela tsela ye e išago tšweletšongkgwebo



Instructions: 

Folio strap: Lenaneotlhabollo la Balemi

Byline: Jane McPherson, molaodi wa Lenaneotlhabollo la Balemi la Grain SA



Malebiša a Lenaneotlhabollo la Balemi ke go hlabolla batšweletšikgwebo ba baso ba ba kgonago le gona ba kgotlelelago. Lenaneo le ke karolo ya mafelelo ya leeto le le išago tšweletšongkgwebo. 



Merero yohle ye e fapafapanego yeo e bopago karolo ya lenaneo la rena e lebišitšwe phethagatšo ya dinepo tša rena – dikopano tša dihlophathuto, ditekotaetšo (demonstration trials), matšatši a balemi, popo ya ditirišano, phadišano ya Molemi wa Ngwaga, Lenaneo la Balemi ba ba tšwetšego pele (advanced producers), dithuto, dikgašo tša seyalemoya le Pula/Imvula. 





Dilekanyo mabapi le tlhaolo ya batšweletši ba ba tšwetšego pele 

Tsenelo ya nagatemego ye botse ye e swanelago tšweletšo ya mabele, ka kgonagalo ya go hwetša naga ye nngwe gape yeo e ka mo kgontšhago go fihlela maemo a motšweletšikgwebo yo a tšweletšago ditone tše di sego ka fase ga 250. (Tirišo ya naga e swanetše go ba ye e bolokegilego, le ge re sa ele hloko ge eba motšweletši ke mongnaga goba o a hira goba o lema nagakopanelo). 

Fao go kgonegago, motšweletši o swanetše go šoma a noši, ke go re ga a swanela go ba leloko le sehlopha. Seo re se lemogilego ke gore fao batho ba šomago ka sehlopha go hlwa go eba le diphapang tše kgolo tšeo di šitišago tšwelopele. Batho bao ga ba kgone go nepiša tšweletšo. 

Ditrekere le didirišwa tše di lekanego. Nnete ke gore o ka se kgone go fetoga motšweletšikgwebo ge o sa kgone go diriša ditrekere le didirišwa. (Ka nako ye nngwe motšweletši a ka hloka thušo ya mokontraka go phatša mmu (rip) goba go buna mabele, bjalobjalo, eupša o swanetše go kgona go phetha bontši bja mešomo, ge e se yohle, ka boyena). 

Motšweletši o swanetše go ba a kile a ba leloko la sehlophathuto le gona a tsene dithuto tše di swanelago tše di sego ka fase ga tše tharo/nne tša Grain SA. Dihlophengthuto batšweletši ba thoma go hwetša tsebišo ka ga tšweletšo. Dithuto tšohle di thuša go maatlafatša motšweletši mme o swanetše go di tsena ke moka a thušwa go diriša tšeo a ithutilego tšona polaseng ya gagwe. 

Motšweletši o swanetše go dumela go amogela dikeletšo, o swanetše go rata polasa le gona o swanetše go ba le moya wa boineelo. Go ba motšweletši wa mabele motho o swanetše go ineela le go ba le mafolofolo mme re lemogile gore bontši bja batšweletši ba motšwaoswere bo a palelwa. Tlhabollo ya motšweletši go mo fihliša maemong a motšweletšikgwebo wa nnete e tšea nako ye telele mme ka fao ke peo ye kgolo kudu ya tšhelete – go ntšha tšhelete ye kaakaa go hlabolla motho yo a sa ineelego bolemi ka botlalo, ga se taba ye e ka lokafatšwago. 

Ge motšweletši a se na le tšhelete ya go lekana yeo e mo kgontšhago go tšwela pele ntle le kadimo, o swanetše go ba maemong ao a tlogo mo dumelela go hwetša kadimo (molao wo mofsa mabapi le khodi (credit) o thatafaditše maitekelo a batšweletši a go hwetša kadimo go fetiša, seo se ba šitišago go tšwela pele). 

Dikgwebo tše dingwe tšeo motšweletši a ka bago le tšona tšeo le tšona di mo tlišetšago ditseno di mo tšwela mohola, eupša motšweletši o swanetše go ba gona polaseng le gona o swanetše go kgatha tema mešomong ya gona – ga re dirišane le motšweletši yoo a hlokegago polaseng. 







