

Heart (Maize)								Sesotho sa Leboa

		

Grain SA – kokwane ya intasteri ya mabele 



Instructions: 

Folio strap: Koketšamohola

Byline: Jenny Mathews, modulasetulo wa Lenaneotlhabollo la Balemi la Grain SA 



Grain SA e laola Lenaneotlhabollo la Balemi leo le lefelwago ke Maize Trust, Oil and Protein Seeds Development Trust, Sorghum Trust le Winter Cereals Trust ka nepo ya go hlama batšweletši ba Afrika-Borwa ka tsebo ye e hwetšwago ka thuto le gona ka tirelo yeo e thekgwago ka dibopego tša thušo tšeo di tsenelwago gabonolo. 



Ka ge Grain SA e na le sehlopha sa ditsebi tšeo di kgonago go hlama batšweletši ba bafsa ba Afrika-Borwa ka bokgoni le thuto ya boleng bjo bo tsenelelago, e šetše e lemogwa go ba moetapele lehlakoreng la Tlhabollo ya Batšweletši nageng ye. Maloko a Grain SA a holofela gore lenaneo le le tla thuša tshepetšong ya phetolo ka go hlama bao peleng ba bego ba hloka ditokelo tša temo ka bokgoni bja go ba kgontšha go phadišana ka go lekana le ba bangwe intastering ya mabele. Le ge go le bjalo go bohlokwa go kwešiša gabotse seo Grain SA e lego sona le ge e ka ba tema yeo e e kgathago temong ka bophara mono Afrika-Borwa. 



Grain SA ke eng?

Grain SA ke mokgatlo wa boithatelo woo o nepišago intasteri ya mabele ya gae le ya ditšhabatšhaba ka botsebitsebi. O nepiša tšwetšopele ya dikgahlego tša batšweletši bohle ba Afrika-Borwa. 



Motšweletšamabele ofe le ofe yo a sa šomago, yo a dumelanago le dinepo tša Grain SA, o na le tokelo le gona o hlohleletšwa go ba leloko la mokgatlo wo ka go lefa tefo ya boleloko yeo e nyakegago. 



Grain SA e kgatha tema efe temong ya Afrika-Borwa?

Grain SA ke setsebitsebi sa intasteri ya mabele ya gae le ya ditšhabatšhaba mme nepo ya mokgatlo wo ke go ba lentšu la batšweletšamabele bohle mono Afrika-Borwa ka mokgwa wa go tšwetša pele dikgahlego tša batšweletšamabele le ge e ka ba tša intasteri ya mabele ka bophara. 



Grain SA e šoma bjalo ka moleti intastering ya mabele mme e ikamantšha le ditshepetšo tša go thea maikemišetšo le go tšea diphetho tšeo di amago dikgahlego tša batšweletšamabele, legatong la maloko a yona. Grain SA e kgatha tema ka mafolofolo go fetišetša ditebelelo le dikgopolo tša batšweletšamabele go mmušo le go dirišana le mmušo go rarolla mathata le go bea melaokakanywa (draft legislation). 



Nepišokgolo ya Grain SA ke go hlohleletša tšweletšo ye e kgontšhago le tikologopapatšo (marketing environment) ye botse ya mabele. Go feta fao mokgatlo wo o amane kudu le bakgathatema ba bangwe tlhomaganyong ya mohola (value chain) go kaonafatša maatlaphegišano (competitiveness) a intasteri ya mabele ka bophara fao e phadišanago le bakgathatema ba bagolo ba ditšhabatšhaba ba go swana le Amerika (USA) le Brazil.



Grain SA e diriša Dihlopha tša Ditsebitsebi (Specialist Working Groups) 

Dihlopha tše di akaretša badiredi ba Grain SA, ditsebitsebi le batšweletši bao ba bopago Khuduthamaga. Mešomo ya ditsebitsebi tše, gare ga ye mengwe, e akaretša:



Go hlahloba phetolo ya tikologotemo (argricultural environment) bjalo ka taba ye bohlokwa le go kgatha tema dikomitingkeletšo tša Tona ya Temo ka nepo ya go kgonthiša tshepelo ye botse le go fa batšweletšamabele bohle nageng ye sebaka sa go lekana;

Go lekola ditshenyegelo mabapi le dinyakwapšalo (input) le tšweletšo ya mabele ohle; 

Go šoma bjalo ka seletamotse (watchdog body) mabapi le boleng bja ditirelo le ditšweletšwa tšeo di amogelwago ke batšweletšamabele;

Go rerišana le dikgwebo tša agri tšohle tše di amegilego, legatong la batšweletši;

Go fatišiša tikologokgwebo ya lefase (global trading environment) le go hlohleletša mmušo (lobby) go tiiša tšhireletšo ya batšweletšamabele go kgonthiša dibaka tše di lekanago;

Go kgonthiša gore go dirwe dinyakišišo tše di lebanego gore batšweletšamabele ba Afrika-Borwa ba dule ba hlamilwe ka tsebo le theknolotši yeo e ka ba kgontšhago go phadišana le ba bangwe; le

Go hlahloba tikologo go hwetša batšweletši ba bafsa le go phegelela go ba thuša go tsenela tšweletšo le papatšo ya mabele. Go feta fao sehlopha se se lekola mošomo wa Lenaneotlhabollo la Balemi. 



Go molaleng gore le ge Grain SA e sa thuše maloko a yona ka tšhelete, e thekga motšweletšamabele yo mongwe le yo mongwe nageng ye ka thušo le botsebitsebi bjoo bo hlokegago kudu. Ditiro tša mokgatlo wo di kgontšha batšweletši go nepiša seo ba tsebago go se dira bokaone – e lego go tšweletša le go bapatša mabele! Go bohlokwa gore batšweletšamabele bohle ba kwešiše gore godimo ga thuto Grain SA e ka ba direla tše dingwe gape! 



Motšweletšamabele yo mongwe le yo mongwe mono Afrika-Borwa o swanetše go phegelela go ba leloko le le feletšego (fully-fledged member) la Grain SA le le nago le maatla a a tletšego a go bouta (full voting powers). Grain SA ke mahlo, ditsebe le molomo wa motšweletšamabele tikologongtemo ye e raranago go ya pele le gona ye e kwago kgatelelo ye e golelago godimo ya maatla a ka ntle a go swana le phadišano ya lefase (global competition). Ge phadišano mmarakeng matšatšing a lehono e le tlhohlo go motšweletšamabele yo a theilwego gabotse, na bothata bja batšweletši ba bafsa bja go itlhoma bjalo ka batšweletšikgwebo ba ba atlegilego le gona ba kgotlelelago, bjona ke bjo bokaakang? Ntle le thušo ya mokgatlo wo o tiilego wa setsebitsebi wa go swana le Grain SA, tlhohleletšo le tšhireletšo ya dikgahlego tša batšweletšamabele bohle nageng ye e tlo ba kotsing. 







