Financial (Maize)								Sesotho sa Leboa

Go kwešiša FICA ge o bula akhaonto pankeng

Instructions: 

Folio strap: Ditaba tša tšhelete

Byline: Tshedimošo ye e beakantšwe go tšwa inthaneteng



Batšweletši ba bantši ba ile ba nolega moko ge ba leka go bula diakhaonto tše mpsha pankeng. Lebaka ke gore molao wa Financial Intelligence Centre Act (FICA) wa 2001 o gapeletša dipanka le dikgwebo tša Agri go swara tshedimošo ye e itšego mabapi le dikhastamo goba badiredi bohle, le go lekodiša le go tsebiša ditshedišano (transactions) tšohle tše di belaetšago tšeo di ka bego di hlotšwe ke ditiro tša bonokwane. 



Lefase le fetogile. Koketšo ya bosenyi le botšhošetši e gapeleditše dinaga tše ntši go dirišana ka maitekelo a go fediša bobe bjo. Ka baka la melao ye mefsa le tirišano ya ditšhabatšhaba mebušo gonabjale e kgona go laola dinokwane ka go di šitiša go hwetša tšhelete. Dinokwane le batšhošetši ba hloka tšhelete go phetha ditiro tša bona. Ba phela ka go fetola tšhelete “ye e tšhilafaditšwego” (dirty cash) – yeo ba e golago ka boradia, thekišo ya diokobatši (drug trafficking), kgogotšo le tlhakolo (bohodu) – go ba tšhelete “ye e hlwekilego” (clean money), ka go diriša boitšhupo bja maaka goba maina a batho bao ba se nago molato, ba go swana le wena. Se se bitšwa money laundering, ke go re “go hlatswa tšhelete”, mme ga se hlolele dinaga tahlego ya dibilione ka ngwaga fela, se godiša le botšhošetši bja ditšhabatšhaba ka go bo bopela mothopo wa tšhelete. Go fediša bokebeke bjo mmušo o thomile go diriša molao wa Financial Intelligence Centre Act 38 of 2001.

Go sepelelana le molao wo mofsa wo dipanka tšohle di gapeletšwa go diriša dikgato tše di tiilego go feta pele mabapi le pulo ya diakhaonto tše mpsha. Se se ra gore go ya ka molao wo dipanka di nyaka gore re ba tlišetše bohlatse bjo bo tlaleletšago bja boitšhupo ge re bula diakhaonto tše mpsha. Molao wo o nyaka gape gore tshedimošo ka ga motho (personal information) e swanetše go mpshafatšwa ka mehla. Panka ye nngwe le ye nngwe e tlamegile go latela tshepedišo ye.

Moagi wa Afrika-Borwa o tlamegile go fa panka goba kgwebo ya Agri tshedimošo ye e latelago: 

Leina goba maina a a feletšego; 

Letšatšikgwedi la matswalo; 

Nomoro ya boitšhupo (moagi wa Afrika-Borwa) goba nomoro ya pasporoto le mohlobo (mošele); 

Atrese ya bodulo; le 

Tshedimošo mabapi le kgokagano (contact particulars). 



Go tiiša boitšhupo bja gago panka goba kgwebo e nyaka:

Pukwana ya gago ya boitšhupo (ye tala ye e nago le bar-code) goba ge pukwana ya gago ya boitšhupo e utswitšwe goba e lahlegile, go nyakega kenongwalwa (sworn affidavit) goba pego ya sephodisa, bohlatse bja gore o kgopetše pukwana ye mpsha ya boitšhupo Kgorong ya Ditaba tša Gae; goba

Pasporoto ya gago ya nnete (valid); goba 

Karatalaesense ya gago ya nnete ya go otlela. 

Gore panka goba kgwebo ya Agri e kgone go kgonthiša atrese ya gago ya bodulo, o swanetše go ba tlišetša lengwalo leo le dumeletšwego leo le bontšhago leina le atrese ya gago ya bodulo (nomoro ya lepokisiposo ga e nyakege), goba nomoro ya jarata le leina la motsanasetoropo fao o dulago. 

