Communicate (Maize)											Sepedi



Go neelana le motšweletši

	

Instructions:

Folio strap: Lenaneotlhabollo la balemi

Byline: Jane McPherson, molaodi wa Lenaneotlhabollo la Balemi la Grain SA 



Rena ba Lenaneotlhabollo la Balemi re phegelela go neelana le wena, motšweletši. Re leka ka mekgwa ye e fapafapanago go ikgokaganya le batšweletši, bjalo ka go diriša lengwalotaba la Pula/Imvula, dikgašo tša seyalemoya, DVD, difoka (pull-out banners), mangwalo a tsebišo (posters) le ditlankanatshedimošo.



Pula/Imvula



Re beakanya lengwalotaba la kgwedi le kgwedi ka maleme a a šupago, e lego Seisimane, Seafrikanse, Sesotho, Setswana, Sesotho sa Leboa, Sethosa le Sezulu, ra e kopiša ra ba ra e phatlalatša (matlakala a 8 a mebalabala). 



Pula/Imvula ke morero wo o tšwelelago wo o phethegago go ya ka leboo la tšweletšo – ditaodišwana di thoma go ngwalwa ka Seisimane, tša romelwa go Infoworks fao thalo (lay-out) ya kgatišo ya Seisimane e phethwago. Ditaodišwana di beakanywa ka sebopego seo se swanelago phetolelo mme di romelwa go bafetoledi ba ba selelago. Diphetolelo di bušetšwa go Infoworks gore di beakanyetšwe kgatišo ka maleme ao a boletšwego. Morago ga ge dipeakanyo tše di dumeletšwe, di romelwa go gatišwa le go phatlalatšwa. Phethego ya leboo le e tšea lebaka le e ka bago dikgwedi tše pedi. 



Lenyaga re godišitše Pula/Imvula gore e akaretše le dibjalo tše dingwe – gane ka ngwaga, e lego ka Desemere, Matšhe, June le Setemere re oketša matlakala a mane mabapi le Tšweletšo ya Korong kua Freistata-Bohlabela, ao a lefelwago ke Trasete ya Dithoro tša Marega (Winter Cereals Trust). Ka Janaware, Aprele, Julae le Oktoboro re oketša matlakala a mane mabapi le Tšweletšo ya Sonoplomo ao a lefelwago ke Trasete ya Tšwetšopele ya Dipeu tša Oli le Proteine (Oil and Protein Seeds Development Trust). 



Ditlankanatshedimošo le mangwalo a tsebišo (posters) 



Go phatlalatša tshedimošo ka ga intasteri ya temo gore e fihlele bohle bao ba nago le kgahlego le gona ba amegilego lenaneong la balemi, ditlankana tše di swanetše go gatišwa ka maleme a a šupago (go na le balemiši le batšwelediši (producer officers) ba mmalwa bao ba swanetšego go tsebišwa lenaneo le, seo le se akaretšago le ge e ka ba bao ba ka ikgokaganyago le bona ge ba nyaka tshedimošo). 



Ditlankanatshedimošo di beakanywa le go kopišwa ka maleme a a šupago (Seisimane, Seafrikanse, Sesotho, Setswana, Sesotho sa Leboa, Sethosa le Sezulu). Dikhopi tša ditlankana tše di rometšwe diofising tšohle tša profense mme di fiwa bohle bao ba nago le kgahlego. Ditlankana tše di be di hwetšagala go NAMPO mme go tlo tšwelwa pele go di diriša ngwaga wohle. 



DVD 

DVD ya metsotso ye seswai e ile ya beakanywa mme e dirišitšwe ka katlego ngwaga wo. Ka nako ya kopano ya NAMPO re ile ra laletša “bagwera ba lenaneo” go ba gona ge DVD e bontšhwa la mathomo, mme e ile ya ba kgahla kudu. Dikhopi tša DVD ye di filwe balomaganyi bohle ba tšwetšopele diprofenseng le ge e ka ba bafahloši ba lenaneo mme e bogelwa neng le neng ge sebaka se iponagatša. Kopanong ye nngwe ya sehlophathuto kua Freistata, Johan Kriel o ile a e bontšha mme batšweletši ba kgopela gore a e boeletše gararo – ba ile ba thabišwa ke go bona tšeo di akareditšwego lenaneong. 



Difoka (Pull-out banners)



Tšona di sa gatišwa mme di tla dirišwa ke Molaodi yo mongwe le yo mongwe wa Profense dikopanong tša dihlophathuto le matšatšing a tšweletšo (producer days). 



Dikgašo tša seyalemoya 



Re diriša dikgašo tša beke le beke diteišeneng tše nne go fetišetša tshedimošo ka ga intasteri ya temo go batheeletši ba bantši go feta. 



