﻿
Bega tlhorišo ya batšofadi
Tlhalošo
Tsela e latelwago
Molao o šomišwago
Nako ya tšweletšo ya mošomo
Tefelo
Diforomo tšeo di tlatšwago
Mafelo le diatrese

Tlhalošo

Tirelo ye e hlaloša ka moo o ka tšeago magato kgahlanong le tlhorišo le go thoma go thibela tlhorišo ya batšofadi. Go na le mehuta ya go fapana yeo batšofadi ba hlorišwago ka yona. Yona ke:

Tlhorišo ya diatla: Tiragalo ye nngwe le ye nngwe ye e hlolago kgobalo goba lehu la motšofadi. Mohlala, go betha, go kgorometša, go swara makgwakgwa, go ripa, tšhomišo ya dkhemikhale, go fa motšofadi dihlare tše e sego tšona goba tša go fetiša tekano goba tiragalo ya go hlola kgobalo goba lehu.
Tlhorišo ka thobalano: Tiragalo ye nngwe le ye nngwe yeo phetho ya yona e bago tšhomišompe ya motšofadi ka maikemišetšo a thobalano ntle le tsebo, kwešišo goba tumello ya bona.
Tlhorišo ya monagano, maikutlo goba polelo: Maitshwaro a go tlontlolla  batšofadi ao a hlolago gore monagano goba maikutlo a motho a se hlwe a šoma gabotse. Mohlala, go hlokomologwa, kgatello, go se fiwe lerato, go fiwa mainaina, go rogiwa.
Tlhorišo ka matlotlo goba tšhomišompe: Tšhomišo ye e sego ya semolao ya tšhelete ya motšofadi, thoto, matlotlo, ntle le tumelelo goba tsebo y among wa yona.
Tlhokomologo: Go se fe motšofadi tlhokomelo goba dinyakwa tša motheo tšeo di nyakegago. Mohlala, go hloka dijo, legae, diaparo, dihlare, thekgo moyeng, bj.bj.
Kgatako ya ditokelo tša botho: Go se fe motšofadi ditokelo tša motheo tše bjalo ka tlhompho, seriti, sephiri, tokologo ya dikgopolo, tumelo, kakanyo, polelo le mosepelo. Mohlala, boloi , tšeo di ka dirago gore motho a hlaswe, a gobatšwe goba a bolawe.

Ke mangy o a ka begago tlhorišo?

Mang le mang yo a lemogago go hlokomologwa, tšhomišompe goba tlhorišo, goba a na le mabaka a mabotse a go hlatsela gore ditiragalo tšeo di a direga goba di diregile.

Godimo

Tsela e latelwago

Bega tlhorišo goba pelaelo ya tlhorišo go Modirelaleago yo Mogolo ofising ya Tlhabollo ya Leago goba seteišeneng sa maphodisa sa kgauswi le mo o dulago.
Goba, bega tlhorišo yeo ntle le go bolela maina a gago go HEAL  mo go 0800 003 081.

Godimo

Molao o šomišwago



Aged Persons Act, 1967  
Constitution of the Republic of South Africa, 1996  
Aged Persons Amendment Act, 1998  
Domemestic Violence Act, 1998  
AU Policy Framework on Ageing 

Godimo

Nako ya tšweletšo ya mošomo

Mo nakong ya diiri tše 48 morago ga go begwa, modirelaleago o tlo nyakišiša tiragalo yeo gomme a ngwala pego.
Ge e le gore motho yo a dirago tsebišo ke modirelaleago o swanetše go tšwela pele go dira dinyakišišo le go romela pego ya go ngwalwa go Tlhabollo ya Leago mo nakong ya dibeke tše 4.
Ge e le gore motho yo a dirago tsebišo ga se modirelaleago, e tlo ba maikarabelo a Modirelaleago yo Mogolo ofising ya Tlhabollo ya Leago go romela taba ye mo e swanetšego go ya gona le go emela pego mo dibekeng tše 4.
Ge tlhorišo e ama Legae la Batšofadi, mokgahlo wo e sego wa mmušo goba mokgahlo wa setšhaba, mohlankedi ofising ya kgauswi o swanetše go šomana le taba yeo.
Ge e le gore motho yo a hlorišwago ga a nyake go šuthišwa legaeng leo la batšofadi, o swanetše go saenela afitabiti ya go laetša gore o hlalošeditšwe ka botlalo ditlamorago tša go se šuthišwe legaeng leo.
Ge e le gore ga go le e tee ya tše tša ka godimo ye e šomago, nyakišiša gore motho yoo a amegago yena o nyaka eng. Tona ya Tlhabollo ya Leago goba Molekgotlaphethiši  o swanetše go thala motho yo mongwe go tsena taba ye ka bogare.

Godimo

Tefelo

Tirelo ye ga e lefelwe.

Godimo

Diforomo tšeo di tlatšwago

Difomo tša kgopelo di hwetšagala ofising ya kgauswi le wena ya Tlhabollo ya Leago.

Godimo

Mafelo le diatrese

Mogala wa Thibelo ya Tlhorišo ya Batšofadi  - 0800 003 081
Mogala wa go se lefelwe wa Tlhabollo ya Leago- 0800 60 10 11


