﻿

Dira kgopelo ya taelo ya tšhireletšo kgahlanong le dikgaruru tša ka malapeng 


Tlhalošo

Dikgaruru tša ka Malapeng ke eng?

Go ya ka Molao wa Dikgaruru tša ka Malapeng  dikgaruru tšeo ke:

mohuta ofe goba ofe wa tlhorišo wo o akaretšago tlhorišo ka go betha, ka thobalano, moyeng, ya monagano goba ka tšhelete
tlaišo
tshenyo ya thoto
go ja leonyane
go tsena lefelong la motho ntle le tumelelo ya gagwe
maitshwaro a tlhorišo
moo e lego gore maitshwaro a motho a hlola kotsi goba a ka hlolela bophelo bja gago kotsi.

Ge e le gore mehuta ye ya tlhorišo e a go diragalela goba e diragalela motho yo mongwe yo o mo tsebago, oka dira kgopelo ya taelo ya tšhireletšo. Taelo ya tšhireletšo kgahlanong le dikgaruru tša ka malapeng ke lengwalo le le ntšhwago ke kgorotsheko leo le thibelago mohloriši go:

hloriša motho yo mongwe
hwetša thušo ya motho yo mongwe go dira mediro ye mebjalo
tsena lefelong leo le šomišwago mmogo ke mohlorišwa le mohloriši
tsena karolong ye nngwe ya lefelo leo go dulago mohlorišwa le mohloriši gona;
tsena motseng wa mohlorišwa;
tsena lefelong la mošomo wa mohlorišwa;
thibela mohlorišwa yo a dulago goba a bego a dula lefelong le tee le mohloriši go tsena goba go dula lefelong leo goba karolong ye nngwe ya lefelo leo; goba
dira ditiro tše dingwe bjalo ka ge di hlalošitšwe ka gare ga taelo ya tšhireletšo.

Ke mang yo a ka dirago kgopelo ya taelo ya tšhireletšo?



Mang le mang yo a hlorišwago goba a kile a hlorišwa
Motho yo monnyane a ka dira kgopelo ntle le go fegeletšwa ke motho yo mongwe
Mang le mang yo a tshwenyegago ka bophelo bja molli. Batho ba ba latelago ba ka dira kgopelo ka tumelelo ya lengwalo la molli, ntle le ge e le gore molli ke motho yo monnyane, o na le bothata bja monagano, o idibetše goba ge kgorotsheko e kgotsofetše gore motho yoo ga a kgone go fa tumelelo ye e nyakegago:
Mokhanselara
Mohlankedi wa maphelo
Lephodisa
Modirelaleago
Morutiši/morutišigadi.


Go hwetša tshedimošo ka botlalo eya go Kgoro ya Toka le Tlhabollo ya Molaotheo 

Tsela ye e latelwago

Dira kgopelo ya tealo ya tšhireletšo Kgorotshekong ya Masetrata ye e lego kgauswi le mo o dulago ebile o šoma gona, nako efe le efe, diiring tša mošomo le ka morago ga diiri tša mošomo mmogo le ka matšatši a maikhutšo goba mafelelo a beke.
La mathomo, dira kgopelo ya Taelo ya Tšhireletšo ya Lebakanyana ka go tlatša Foromo 6: Taelo ya Tšhireletšo ya Lebakanyana Kgorotshekong ya Masetrata goba Kgorotshekong ya Godimo ya kgauswi le wena.
Tlatša Foromo 2: Kgopelo ya Taelo ya Tšhireletšo Kgorotshekong ya Masetrata goba Kgorotshekong ya Godimo ya kgauswi le wena.
Kgopelo e swanetše go dirwa ka afitabiti yeo e hlalošago:
Mabaka ao kgopelo yeo e theilwego go ona
Mohuta wa taelo ya tšhireletšo ye e kgopelwago
Leina la seteišene sa maphodisa moo molli a ka lebago gona ge mohloriši a ka tshela taelo yeo.

Ge kgopelo e tlišitšwe ke motho yo mongwe legatong la mohlorišwa, afitabiti e swanetše go hlaloša:
Mabaka ao a dirilego gore yena motho yoo a be le kgahlego mo bophelong bja molli
Mošomo wa motho yoo yo mongwe le gore yena motho yoo o tliša kgopelo ye yena e le mang
Tumelelo ya lengwalo la molli, ntle le ge molli e le motho:


yo monnyane
yo a golofetšego monaganong
yo o idibetše
yo kgorotsheko e kgotsofetšego gore ga a kgone go fana ka tumelelo yeo e nyakegago.


Sethifaya foromo le klereke ya kgorotsheko gomme o e romele.
Ge e amogetše foromo, klereke e tlo romela foromo ya gago go masetrata yoo a tlogo bea letšatši leo o swanetšego go boa ka lona gore kgopelo ya gago e tle e theeletšwe.
Gape masetrata o tlo ngwala lengwalo go tsebiša mohloriši wa gago ka ga taelo yeo ya tšhireletšo le gore o swanetše go tla neng kgorotshekong.
Ka morago ga theeletšo ya kgorotsheko, masetrata a ka ntšha taelo ya tšhireletšo.

Molao

Molao wa Dikgaruru tša ka Malapeng Domestic Violence Act, 1998 , related Regulations and National Instructions 

Nako

Mo mabakeng a tšhoganetšo, tirelo ye e hwetšagala diiring tše 24 ka letšatši
Taelo ya tšhireletšo e ka hwetšwa ka lona letšatši leo kgopelo ya yona e dirilwego, empa ka kakaretšo, nako e laolwa ke mohuta wa molato.
Taelo ye e tlo šoma go fihlela ge motho yo a hlorišwago a e phumula.
Ge mohloriši a ka dira boipelaetšo, taelo e tlo šoma go fihlela ge Kgorotsheko ya Boipelaetšo e e phumula.

Tefelo

Tirelo ye ga e lefelwe

Diforomo tšeo di tlatšwago



Form 2: Application for Protection Order 
Form 4: Interim Protection Order  
Form 6: Protection order  
Form 7: Protection order 


