﻿
Kgopelo ya tokelo ya go nyakišiša go ba gona ga diepša
Tlhalošo

Tokelo ya go nyakišiša go ba gona ga diepša ke phemiti ye e dumelelago khamphani goba motho go dira dinyakišišo naga malebana le kgonagalo ya go epa dimenerale. Motho mang le mang yo a ratago go dira kgopelo ya mohuta wo o swanetše go romela kgopelo go ofisi ya Molaodi wa Selete moo naga ye e amegago e lego gona.

Tokelo ya go nyakišiša go ba gona ga diepša e šoma lebaka la mengwaga ye mehlano, empa ka morago ga gore nako yeo e fele, mokgopedi a ka dira kgopelo ya gore tumelelo yeo e tsošološwe gore a kgone go tšwela pele go šoma lebaka la go se fete mengwaga ye meraro.

Tokelo ya go nyakišiša go ba gona ga diepša e tlo fiwa ge e le gore dinyakwa tše di latelago di kgotsofaditšwe:

Mokgopedi o na le tšhelete le mabokgoni a go tšwela pele ka mošomo wa go epa diepša
Leano la matlotlo le bontšha gabotse gore le tlo kgona go šoma mo lebakeng leo le beilwego.
Go ka se be le tšhilafatšo ya tikologo ye e sego ya letelwa ka lebaka la mošomo wo o tla bego o dirwa
Mokgopedi o kgona go kgotsofatša dinyakwa tša Molao wa Maphelo le Polokego ya Meepong 
Mokgopedi ga a tshele Molao wa Dimerenale le Tlhabollo ya Ditlabelwa tša Petroleamo .
Ga go na le motho yo mongwe yo a nago le tokelo goba phemiti ya go epa dimenerale gona moo lefelong leo le amegago



Ge o nyaka tshedimošo ka botlalo, eya go Kgoro ya Dimenerale le Enetši
Tsela e latelwago
Dira kgopelo ofising ya Molaodi wa Selete wa Kgoro ya Dimenerale le Enetši mo seleteng seo lefase leo le amegago le lego gona
Tlatša Foromo ya B: Kgopelo ya tokelo ya go nyakišiša go ba gona ga diepša, gomme o romele mmogo le dilo ka moka tše di nyakegago go Molaodi wa Selete wa Kgoro ya Dimenerale le Enetši mo seleteng seo naga ye e amegago e lego gona.
Romela foromo mmogo le tšhelete ye e beilwego gomme yona tšhelete ye e ka se bušetšwe go mong.
Ge Molaodi wa Selete a ka dumelela kgopelo ya gago, o tlo go laela gore o fane ka lenaneo la gago la taolo ya tikologo, le gore o ikopanye le mong wa naga yeo e amegago le bao ba dulago nageng yeo ka semolao mmogo le ba bangwe bao ba ka bego ba tlo amegaga.
Romela dipoelo tša dikopano tšeo go Molaodi wa Selete mo matšatšing a 30.
Ge dinyakwa tše ka moka di kgotsofaditšwe, Molaodi wa Selete o tlo romela kgopelo go Tona gore le yena a e lekole.

Molao o šomišwago

Mineral and Petroleum Resources Development Act, 2002  
Regulations to the Mineral and Petroleum Resources Development Act the Mineral and Petroleum Resources Development Act, 2002  
Broad Based Socio Economic Empowerment Charter for the South African Mining Industry 
A Guide for a Prospecting Work Programme to be Submitted for Applications for Prospecting Rights in terms of the Mineral and Petroleum Resources Development Act, 2002 
Nako ya tšweletšo ya mošomo
Ge Molaodi wa Selete a sa dumelele kgopelo, o swanetše go go tsebiša ka lengwalo mo matšatšing a 14 gomme a go bušetše kgopelo yeo.
Ge Molaodi wa Selete a dumelela kgopelo, o swanetše go go tsebiša ka lengwalo mo matšatšing a 14 gore o romele leano la taolo ya tikologo le gore o ikopanye le mong wa naga le badudi ba naga yeo mmogo le ba bangwe bao ba ka bego ba amega.
O swanetše go romela Molaodi wa Selete dipoelo tša dikopano tše o bilego le tšona mo matšatšing a 30.
Ge dinyakwa tše ka moka di kgotsofaditšwe, Molaodi wa Selete o swanetše go romela kgopelo go Tona gore le yena a e lekole.

Tefelo

Tefelo e tla bewa ke Molaodi wa Selete go ya ka mohuta wa menerale woo o nyakago go o epa.

Diforomo tšeo di tlatšwago

Kgopelo ya tokelo ya go kopola.pdf

Mafelo le diatrese



