﻿

Kgopelo ya go bula akhaonte ya Mzansi ya panka 




Tlhalošo

Akhaonte ya Mzansi ke tirelo yeo e laolwago ke SAPO ya batho. Ke tsela ye bonolo ya go amogela le go ntšha tšhelete goba go lefela ditefelo. O ka tshepišwa gore tšhelete ya gago e bolokegile le gona ka gore ga go na ditefelo tša tirelo tša kgwedi ka kgwedi, seo o se bolokago se tla ba le ditseno fela. Ga go na ditefelo tšeo di beilwego, o lefela fela seo o se dirišago. Ga o hloke setlankana sa mogolo ge o bula akhaonte ya Mzansi. Motho yo mongwe le yo mongwe a ka bula akhaonte ye, ka ge go se na maemo a a itšego a tumelelo go swana le minimamo wa mogolo. O ka dira ditshedišano go makala a 1300 a Kantoro ya Poso le Metšhene ya go feta 8000 ya Saswitch.

Dipeeletšo ka moka dikhaonthareng tša Kantoro ya Poso ga di lefelwe.

Ela tlhoko: Bana bao ba ratago go bula diakhaonte ba swanetše ba felegetšwe ke bahlokomedi ba molao goba batswadi.

Ge o nyaka tshedimošo ka botlao, eya kwa Posong

Tsela ye e latelwago

Go bula akhaonte, o hloka go dira tše di latelago:

E ya go Kantoro ya kgauswi ya Poso ya Afrika Borwa gomme o kgopele mothuši wa thelara gore a go fe foromo ya kgopelo.
Tlatša foromo ya kgopelo.
Bontšha pukwana ya gago ya boitsebišo.
Fana ka bohlatse bja aterese ya gago ya bodulo. Bjalo ka karolo ya  Financial Intelligence Centre Act, bakgopedi ka moka ba swanetše ba fane ka bohlatse bja aterese ya bodulo. Se e ka ba ka mokgwa wa mokitlana wa tirišo . Ge eba o hirile, khopi ya tumelelano ya khiro e a nyakega. Ge eba o dula le batswadi ba gago, afitabiti yeo e laetšago se e a nyakega.
Bana bao ba ratago go bula diakhaonte ba swanetše ba tle le bahlokomedi ba bona ba molao goba batswadi.
Dira peeletšo ya mathomo ya R10.
Ela hloko: O ka tshediša go makala a 1300 a Kantoro ya Poso le diATM tša go feta 8000 tša Saswitch.

Molao



Post Office Act, 1998  

Nako

Metsotso ye 10 go iša go ye 20, go ya ka gore lekala leo la Kantoro ya Poso le swaregile ga kaakang.

Tefelo

Minimamo wa peeletšo ya R10 e a nyakega.

Diforomo tšeo di tlatšwago

Diforomo tša kgopelo di gona Dikantorong tša Poso ka moka ka nageng.



Mafelo le diaterese

Bolela le Molaodi wa Lekala la Kantoro ya Poso goba o letšetše 0800 53 54 55



