﻿

Ditirelo tša Botseta

Tlhalošo
Tsela e latelwago
Molao o šomišwago
Nako ya tšweletšo ya mošomo
Tefelo
Diforomo tšeo di tlatšwago
Mafelo le diatrese

Tlhalošo

Lefaphakgolo la Ditirelo tša Botseta la Kgoro ya Merero ya ka Ntle le Dikarolo tša Botseta tša Baemedi ba Afrika Borwa dinageng tša ka ntle di aba ditirelo go badudi ba Afrika Borwa bao ba šomago, ba dulago le go eta dinageng tša ka ntle.

Naa ke ditirelo dife tše badudi ba Afrika Borwa ba ka di emelago go bahlankedi ba Ditirelo tša Botseta?

Ditirelo tša tšhoganetšo:


Thušo ka ga peakanyo ya go tšhabiša badudi ba Afrika Borwa bao ba lego dinageng tša ka ntle nakong ya dintwa tša sepolotiki, ya masetlapelo a tlhago goba a go bakwa ke batho.
Kgokagano le ba lapa ka Afrika Borwa le/goba bagwera legatong la badudi ba Afrika Borwa bao ba lego dinageng tša ka ntle nakong ya tšhoganetšo.
Kabo ya thušo ye e sego ya ditšhelete ya go ba romela gae le kabo ya tša kalafo ya tšhoganetšo goba ya profešenale.
Go kgokagana le ba taolo ba ka nageng ya ka ntle go nyaka le go hwetša badudi ba Afrika Borwa bao ba lego dinageng tša ka ntle, go sa akaretšwe badudi bao ba nyakelwago melato ka ditshepedišong tša semolao.
Thušo ya malapa ka go nolofatša phetišetšo ya ditšhelete go ya go malapa ao a lego masetlapelong.
Kabo ya ditirelo tša thekgo le go fa keletšo maemong a ge ba thopilwe goba ge ba fihlilwe.


Sebopego sa tiragalo  le polokego ya bahlankedi go ka huetša bokgoni bja rena bja go fetola maemong ao.

Go golega:


Ikgokaganya le malapa a batho bao ba swerwego goba bao ba golegilwego dinageng tša ka ntle ge re kgopelwa ke motho yo a swerwego goba yo a golegilwego.
Nolofatša phetišetšo ya ditšhelete go bagolegwa ba Maafrika Borwa bao ba lego dinageng tša ka ntle, mola ka go le lengwe re obamela melao le melawana ya naga yeo e ba golegilego gammogo le melawana ya Pankakgolo ya Afrika Borwa mabapi le go fetišetša ga ditšhelete go ya dinageng tša ka ntle.
Nolofatša go romelwa ga mangwalo le dihlare go badudi ba Afrika Borwa bao ba golegilwego dinageng tša ka ntle. Se se laolwa ke ditšhelete tša bjale tše di beilwego tša Kgoro ya merero ya ka Ntle le go obamela melao le melawana ya naga yeo e ba golegilego. Ditšhelete di ka fetošwa nako le nako


Ditirelo tša semolao le tša dingwalwa tša semolao:


Nolofatša go romela dingwalwa tša semolao go batho bao ba sekišwago dinageng tša ka ntle ka ditshepedišo tša semolao.
Nolofatša dikgopelo tša go romela basenyi dinageng tše ba sentšego go tšona, mangwalo a tshwaollo, dingwalwa tša taelo le bohlatse bja khomišene ka ditshepedišo tša semolao.
Go tsenya diaphostili le disetifikeiti tša tiišetšo ka go dingwalwa tša semmušo tše di phatlalatšwago setšhabeng.
Aba thušo ye e sego ya ditšhelete go batšwasehlabelo ba bosenyi.
Aba keletšo, tlhahlo le thekgo go motswadi goba mohlokomedi, ka tirišano le Ofisi ya Baboleledi ba Malapa melatong ya go thopa ga bana ba Maafrika Borwa ka dinageng tša ka ntle. Ge go na le bohlatse bja go bontšha gore maphelo le polokego ya ngwana di kotsing, taba yeo e tšewa bjalo ka maemo a tšhoganetšo.
Aba lenaneo la boramelao ba ka nageng yeo.


Ditirelo tše dingwe:


Thuša ka go ba fa diphasepote tše dingwe go tšeo di lahlegilego, di utswitšwego, di senyegilego goba di feletšwego ke nako ya go šoma dinageng tša ka ntle .
Aba loune ye nnyane ya tšhoganetšo .
Tsebiša ba leloko la kgauswi lebakeng la ge go ka ba le lehu, bolwetši bjo kotsi bophelong goba kgobalo go badudi ba Afrika Borwa bao ba lego dinageng tša ka ntle. Thušo ye e sego ya ditšhelete le keletšo mabapi le mašaledi a ditopo tša Maafrika Borwa ao a hlokofetšego dinageng tša ka ntle le yona e tla fiwa.
Kgopela ba ka nageng yeo go nyakišiša mahu le bosenyi bjo bo gononelwago kgahlanong la badudi ba Afrika Borwa bao ba lego dinageng tša ka ntle.
Aba tlhahlo le keletšo ka ga go godiša bana ka tirišano le Kgoro ya Tlabollo ya Setšhaba.
Aba thušo le tlhahlo go baemedi ba dinageng tša ka ntle mabapi le badudi ba Afrika Borwa bao ba lego dinageng tša ka ntle.
Go hlokomela dikgopelo tša tshedimošo goba go dira maitekelo a go romela mokgopedi yoo wa tshedimošo go lefapha la maleba.


Naa ke ditirelo dife tšeo di sa abiwego ke bahlankedi ba Botseta?

go hwetša gore ba lokollwe kgolegong
go tsenatsena ka ditshepedišong tša kgorotsheko dinageng tša ka ntle
go aba keletšo ya semolao
go tsenatsena goba go thomiša ditshepedišo tša kgorotsheko
go kgopela ba taolo go swara Maafrika Borwa gabotse ka go ba kgetholla
go nyakišiša bosenyi goba mahu
go hwetša tekolo ya pego ya bosenyi legatong la gago
go lefela go tšhungwa ga bahu, dipoloko goba go bušetša ditopo gae Afrika Borwa
go hwetša ngwana yo a thopilwego
go sepediša tumelelano ya kgodišo ya ngwana ya Afrika Borwa dinageng tša ka ntle goba go gapeletša naga yeo go tšea sephetho se itšego mabapi le molato wa kgodišo ya ngwana
go lefa dipili tša hotele, tša molao, tša kalafo goba dipili tše dingwe
go lefa ditshenyegelo tša maeto
go dira mošomo wo o dirwago ke dietšentshi tša maeto, tša difofane, tša dipanka, bjalobjalo
go hwetša madulo, mošomo goba diphemiti tša mošomo legatong la gago
go beya dithoto tša gago goba go go nyakela dilo tša gago tše di timetšego
go amogela poso ya gago
go fa ditšhelete tša phenšene le tša dikholego tša thušo ya tša leago
go thuša badudi ba dinaga tše pedi ka nageng ya bona ya bobedi yeo ba dulago ka go yona.

Godimo

Tsela e latelwago

Dikgato tšeo o ka di latelago

Ikgokaganye le Moemedi wa Afrika Borwa wa kgauswi goba le Lefaphakgolo: Ditirelo tša Botseta ka go Kgoro ya Merero ya Dinaga tša ka Ntle ka Pretoria. Go eya ka tirelo yeo o e nyakago, mokgwa wa maleba wa boitšhupo o ka nyakega. Ge o belaela se sengwe, letša mogala wa go dira dinyakišišo pele.

Ditirelo tša botseta di šoma diiri tše 24 ka letšatši, matšatši a šupa ka beke. Mo mafelelong a beke le ka morago ga dinako tša tlwaelo tša mošomo, thušo e fiwa ka tirišano le Phapoši ya Ditshepedišo ya Kgoro ya Merero ya ka Ntle ka Pretoria.

Godimo

Molao o šomišwago

Vienna Convention on Consular Relations  

Godimo

Nako ya tšweletšo ya mošomo

