Maphelo le polokego dikolong, dikholetšheng le diyunibesithing
Matseno
Lefelo la mošomo le na le seabe se segolo maphelong le polokegong ya batho. Taolompe ya maphelo le polokego lefelong la mošomo e ka hlola malwetši, dikgobalo le mahu. Dikolo, dikholetšhe le diyunibesisthi di swanetše go ba le mafelo a mešomo a a tšwetšago pele maphelo a mabotse le bašomedi ba ba phetšego gabotse ge e ba di nyaka go neelana ka ditirelo tša maemo a godimo. Taolo ya maleba ya maphelo le polokego ke ntlha e bohlokwa go fihleleleng se.
Go šomiša didirišwa go thibela batho go tsenwa ke malwetši mošomong goba go se be gona mošomong ka lebaka la malwetši le go bea šedi go tshwaollong le go bušetša batho mešomong go ka hola bengmešomo le bašomedi. Go neelana ka dikholo tše, re swanetše go hlola mafelo a mešomo moo bophelo bjo bo botse le polokego di hlohleletšwago le go šireletšwa.  
Na ke molao ofe wo o šomišwago?
Molao wa Maphelo le Polokego Mešomong wa 1993.
Na ke ka lebaka la eng go na le molao wa maphelo le polokego?
Ka lebaka la gore maphelo le polokego mošomong di bohlokwa. Go na le melao ye e nyakago gore rena ka moka re se bee maphelo a rena le a batho ba bangwe kotsing. Molao o gona gape go šireletša setšhaba kgahlanong le dikotsi tše di hlolwago ke mešomo. 
Na molao wa maphelo le polokego o šomišwa go nna?
Ee, o šomišwa dikolong, dikholetšheng le diyunibesithing ka moka.
Na ke mang wo a netefatšago gore molao wa maphelo le polokego o a phethagatšwa?
Bahlahlobi go tšwa Kgorong ya Mešomo.
Na bahlahlobi ba netefatša bjang gore molao o a phethagatšwa?
Ba etela mafelo a mešomo go lekola ge e ba batho ba latela melao. Ba nyakišiša dikotsi le dillo/dipelaelo kudukudu ba thuša bengmešomo le bašomedi go kwišiša seo ba swanetšego go se dira. 
Na dikolo, dikholetšhe le diyunibesithi di na le baemedi le dikomiti tša maphelo le polokego? 
Mo go thwetšwego bašomedi ba 20, go swanetše go be le moemedi wa tša maphelo le polokego ebile go be le moemedi o tee go emela bašomedi ba 100. 
Ge go e na le moemedi o tee wo a kgethilwego, go swanetše go be le komiti ya maphelo le polokego.
Na ditiragalo di a begwa?
Ditiragalo tše dingwe le tše dingwe tše di diregago dikolong, dikholetšheng le diyunibesithing goba ditiragalong tša thuto ka ntle oa sekolo di swanetše di begwe go Molaodimogolo wa Profense ka profenseng ya geno. Lebelela lenaneo la dinomoro tše o ka di šomišago go ikgokaganya le yena. 
O tla hwetša tshedimošo ka botlalo mabapi le ditiragalo tše di begwago karolong ya 24 le 25 ya Molao wa Maphelo le Polokego Mešomong. Ditiragalo tše di amanago le dintwa ga di begwe go Molaodimogolo wa Profense. 
Na ke dikotsi tša mohuta mang tše di ka diregago meagong ya dikolo, dikholetšhe le diyunibesithi?
Mehuta ya dikotsi e akaretša:
Mabato goba ditsejana tša maoto tše di thedimogago 
Dikotsi tše di hlolwago ke go thetšwa
Mafasetere/matsikangope a go pšhatlega
Mabone a a sego a tlemelewa gabotse le disiling tše di wago
Mabala a dipapadi ao a sego a bolokega
Dieksperimente tša dikhemikhale tše di sa laolwego
Lepokisana la mohlagase le le sego la khurumelwa 
Ditepisi tše di robegilego goba tše di senyegilego
Metšhene ye e sepedišwago bjalo ka motšhene wa go ripa bjang
Dikhapote tše di bulegilego
Go imelwa ga dipolaka tša mohlagase 
Go šutišwa ga dilo tše boima 
Go hloka mabone a a gotetšwago nakong ya tšhoganetšo
Diheke tše di dukologago tše di sego tša bolokega
Ditulo tše di robegilego
Go amega lefelong le le nago le ditšweletšwa tše di nago le lerojana la malera. 
Na ke eng se ke swanetšego go se dira ka dikotsi tše?
Ge fela o hlathile dikotsi tše di ka hlagago, o swanetše go di fediša goba go di fokotša. Ge go sa kgonagale gore o ka di fediša, o swanetše go hlaola mekgwa ya tšhireletšo ye e ka šomišwago go šireletša batho kgahlanong le dikotsi tšeo. 
Thušo go tšwa go mohlahlobi
O ka ikgokaganya le bahlahlobi dikantorong tše di latelago tša Kgoro ya Mešomo:
Word count: 507
