Molaetša go tšwa go Mošireletši wa Setšhaba

Ga bjale ke nnete yeo e tsebegago kudu gore naga ya rena , go swana le tše dingwe go ralala le lefase, e semmušo ka gare ga phuhlamo ya ekonomi. Phuhlamo ga bjale ke lentšu le le mpsha leo go bolelwago ka lona e bile ka tsela e tee goba ye nngwe re a amega ka moka ga rena ke tiragalo ye.

Ge re ntše re tšwelapele go kwa boima bjo bja masetlapelo a ekonomi , bjo bo re nyakago gore re šireletšege ka tšhelete , kantoro ya ka e tšwelapele go šogana le dingongorego tša go fegwa ga ditšhelete tša phenšene ya botšofadi. Baamogedi ba ditšhelete tše tša thušo ke batho ba bagolo, bao ba lego magareng ga dihlopha tšeo di lego kotsing ka mo nageng ya rena e bile gantši ba phela ka gare ga bodiidi.  

Ye nngwe ya mathata a bjalo a go fegwa ga tšhelete ya thušo ya botšofadi ke ya motšofadi wa mengwaga e 86 Vho Mphephu wa Limpopo Profense, yoo tšhelete ya gagwe ya botšofadi e ilego ya fegwa sebaka sa mengwaga e meraro ka mabarebare a gore o hlakanetše nomoro ya boitšhupo le motho o mongwe go la Profense ya Foreistata.  

Go latela tseno ka gare ya kantoro ya ka, tšhelete ya phenšene ya Vho Mphephu e ile ya bušetšwa morago e bile o hweditše tšhelete ka moka yeo e bego e šaletše morago. Go tšwelapele ke ile ka digela gore Eitšensi ya Tšhireletšo ya Leago ya Afrika Borwa , go la Limpopo, e thwale sehlopha tšhomo seo se tla go dira dinyakišišo ka ga ditaba tša go fegwa ga ditšhelete tša thušo, ka lebaka la mabarebare a go hlakanela dinomoro tša boitšhupo ka ge go bonala o ka re ke bothata bjo bo ipoeletšago. Phethagatšo ya ditigelo tše e tla lebelelwa ka leihlo la ntšhotšho.

Mola e le gore mmušo o bile le tšwelopele mabapi le kabo ya dintlo tša theko ya fase go bahloki mo mengwageng ye e fetileng, go sa na le ditlhohlo ka lehlakoreng lona leo.  Kantoro ya ka ga bjale e nyakišišitše ngongorego ya badudi ba Diyuniti tša R le S go la Lebowakgomo, kgahlanong le Kgoro ya Mmušo wa Selegae le Mengwako ya  Limpopo, ka go palela ke go aga le go fetša mengwako ya RDP ya setšhaba.  

Ditigelo go tšwa kantorong ya ka e bile gore Kgoro e swanetše go aga le go fetša mengwako ya baamogedi ka moka bao dikgopelo tša bona di bego di šetše di dumeletšwe go ya le ka molao.  Ka tlaleletšo, palo ya ditšhelete tša thušo go tšwa go mmušo tšeo e lego gore ga bjale di a fiwa di swanetše go šomišwa go thuša balli bjalo ka ge ele gore theko ya didirišwa tša go aga e oketšegile mo mengwageng yeo e fetileng.

Go bega bosenyi ka nnete go tla tliša dipoelo tša metse yeo e bolokegilego ka ge kantoro ya ka e nyakišišitše ngongorego ka molomatsebe kgahlanong le Ditirelo tša Maphodisa a Afrika Borwa (SAPS) ka go palela ke go hlompha tshepišo ya bona ya go lefa moputso wa R75 000 ka morago ga gore a fane ka tshedimošo yeo e ilego ya dira gore go be le tshwaro le kahlolo go molato wa bohodu. Ka morago ga nyakišišo, ke ile ka digela gore SAPS e lefe molli moputso wa go tlala bjalo ka ge ba tshepišitše le gore ka moso, SAPS e hlomphe ditefo tša meputso moo e lego gore ditshepišo di dirilwe.

Hle tlišang dingongorego tša lena, kantoro ya ka e ya hwetšagala mo mafelong a go fapana ka mo nageng e bile gape re na le nomoro ya mogala wa go se lefelwe, 0800 11 20 40 yeo o ka e šomišago go tsenya dingongorego. Re lebeletše go ba le kamano yeo e šomago le wena go tiiša temokrasi ya molaotheo wa rena.



Go fihlela nako ye e tlago  



Adv ML Mushwana





