Ditaba ka Bokopana



GEPF e lefa morago lephodisa la mehleng



Lephodisa la mehleng la mosadi le be le swanetše go lefelwa morago tšhelete yeo e gogilwego go tšwa go sekhwama sa gagwe sa phenšene bjalo ka karolo ya go hwetša morago sekoloto sa kgoro. Mošireletši wa Setšhaba Lawrence Mushwana o digetše gore molli a lefiwe tšhelete yeo e ena le lešokotšo, yeo e tla go balwa go tloga ka letšatšikgwedi leo e gogilwego ka lona go fihla ka letšatšikgwedi la tefo.



Se se tlile ka morago ga nyakišišo ke Kantoro ya Mošireletši wa Setšhaba e utolla gore tshepedišo yeo e beilwego ke Sekhwama sa Phenšene ya Bašomi ba Mmušo (GEPF) ka gare ga Manyuale wa Tshepedišo wa yona wa go hwetša morago sekoloto sa kgoro go ya le ka karolo 21(3) ya Molao wa Phenšene ya Bašomi ba Mmušo, 1996 (Molao wa GEP) ga se wa obamelwa.  



Go tšwelapele go ile gwa utollwa gore sephetho sa go hwetša tšhelete morago ya sekoloto sa kgoro go tšwa go mehola ya phenšene ya molli ga se ya sepelelana le dinyakwa tša Karolo 3 tša Molao wa Tšwetšopele ya Taolo ya Toka ,2000 bjalo ka gona “tshepedišo ga se ya ba ya maleba”. 





Sepikara se kgopelwa go tšea magato kgahlanong le Motlatšatona



Sepikara sa Seboka sa Maloko a Palamente o ile a kgopelwa go tšea magato kgahlanong le Motlatšatona wa Kgoro ya Merero ya Legae, Malusi Gigaba, go ba a se a obamela tlemo ya gagwe ya molaotheo ya go šomišana le Kantoro ya Mošireletši wa Setšhaba (OPP).



Se se tlile ka morago ga gore Mna. Gigaba a palele ke go šomišana ka nyakišišo le OPP ka go mabarebare a gore o rometše mogatša wa gagwe matšoba ka go šomiša tšhelete ya mmušo le gore o lefetše dithekethe tša sefofane le difatanaga tša go hirišwa go batho ba mmalwa mo mabakeng a mmalwa.



Go latela dinyakišišo, Mošireletši wa Setšhaba Lawrence Mushwana o digetše gore Sepikara se tšee magato a maleba go dira bonnete bja gore go palelwa ke go šomišana ga Mna Gigaba go a lebelelwa.



Mola e le gore nyakišišo e utolotše gore tshenyagalelo yeo e dirilego ke kantoro ya Gigaba mabapi le matšoba ao a rometšego mogatša wa gagwe e be e se ya maleba, e utolotše gore mabarebare a mabapi le ditshenyagalelo tša maeto tšeo di dirilego ke Kantoro ya Motlatšatona ga di na bohlatse.  



Adv. Mushwana go tšwelapele o digetše gore Molaodikakaretšo wa Kgoro, Mavuso Msimang, a kaonafatše mekgwa ya taolo ya matlotlo ya kantoro ya Mna Gigaba.



Palamente e tlile go hlokomela phethagatšo ya ditigelo tša NERSA ka ga ‘phokotšo ya nakwana ya kabo ya mohlagase’



Komiti ya Photfolio ya Palamente yeo e nago le maikarabelo go enetši e swanetše go hlokomela le go bega ka nako e botse le go lebelela phethagatšo yeo e šomago ya ditigelo tšeo di dirilego ke Molaodi wa Bosetšhaba wa Enetši wa Afrika Borwa (NERSA) ka Mei 2008 go latela nyakišišo ka go tlhaelelo ya mohlagase.  



Ge a digela ka ga kgato ya tharollo go latela nyakišišo yeo e dirilego ke bona yeo e tlilego pele ka go ditiragalo tša ditlhaelelo tša mohlagase le go tšhaba ga nakwana ga mohlagase ka lebaka la “phokotšo ya nakwana ya mohlagase” ke setho sa mmušo sa kabo ya mohlagase, Eskom, Mošireletši wa Setšhaba Lawrence Mushwana o kgopetše Sepikara sa Seboka sa Maloko a Palamente go tšea magato maleba le se.



Karolo e kgolo ya Afrika Borwa  e ile ya itemogela ditlhaelelo tša mohlagase le go tšhaba ga nakwana ga mohlagase ka lebaka la phokotšo ya nakwana ya kabo ya mohlagase go tloga ka Nofemere 2007 go fihla ka Janaware 2008. 



“Dikelo hloko le dikakaretšo tšeo di dirilwego go tšwa go dinyakišišo e ile ya ba gore go ile gwa ba le go diega ka lehlakoreng la mmušo go kaonafatša bokgoni bja Eskom bja  go fehla mohlagase e sa le ka nako le gore kgopelo ya tshwarelo go setšhaba e ile ya dirwa mabapi le se, go matshwenyego ao a hlotšego ke phokotšo ya nakwana ya kabo ya mohlagase,” Adv. Mushwana a realo. 



O tlaleleditše ka gore NERSA, bjalo ka mohlokomedi le modiragatši wa tlhako ya taolo yeo e beilwego ke Molao wa Taolo ya Mohlagase, 2006, e na le maatla le taolelo ya go dira bonnete bja gore ditigelo tšeo di dirilwego ka gare ga pego ya yona di a phethagatšwa le gore Eskom e obamela dipeelano tša laesense ya yona le dineelo tša maleba tša Molao.







 

