Tšhelete ya thušo ya motšofadi e bušeditšwe ka morago ga tseno ka gare ya Mošireletši wa Setšhaba

Motšofadi wa mengwaga e 86 wa go tšwa Limpopo, yoo tšhelete ya gagwe ya botšofadi e ilego ya fegwa mengwaga e meraro ya go feta ka lebaka la go hlakanela nomoro ya boitšhupo le motho yo mongwe go la Foreistata, ga bjale o wa nywanywa ge a le mo tseleng ya go ya lefelong la tefo, ditebogo go tseno ka gare ya Mošireletši wa Setšhaba.  

Ms Nyasedza Sophia Mphephu wa motse wa Thononda go la Venda, tšhelete ya gagwe ya botšofadi e ile ya fegwa ke Eitšensi ya Tšhireletšo ya Leago ya Afrika Borwa (SASSA) ka Oktobere 2005 ka ntle le tlhalošo efe goba efe go yena. O ile a no fela a etela lefelo la tefo mengwaga e meraro, a boela morago a se a sware selo nako e nngwe le e nngwe.  

Seemo, le ge go le bjalo, se ile sa fetoga go ba se se kaone go latela tseno ka gare ya Adv. Mushwana ka ge tšhelete ya phenšene ya Ms Mphephu e ile ya bušetšwa morago. O ile a hwetša tšhelete ka moka ya mengwaga e meraro yeo e bego e šaletše morago e bile go tšwelapele Mošireletši wa Setšhaba o ile a digela gore a be a lefelwe lešokotšo go tšhelete yeo e bego e šaletše morago. Ms Mphephu gape o ile a hwetša kabo ya diphuthana tša dijo dikgwedi tše tharo ka naka ya ge SASSA e be e rarolla bothata bja gagwe.

Bothata bja gagwe bo lemogilwe ke Kantoro ya Mošireletši wa Setšhaba(OPP) ka Mei 2008 ka morago ga gore kuranta ya selete go la Limpopo, Capricorn Voice, e phatlalatše taba ya gagwe. OPP ka tšhoganetšo e ile ya taboga ka go tšea kgato ya go hloma dinyakišišo tša yona ka go taba yeo. 

Dinyakišišo di utolotše gore maitshwaro a SASSA e be se ao a amogelegago ka ge e le gore go be go se na lebaka leo le kwagalago la phego ya tšhelete ya thušo ya moamogedi. Go hweditšwe gape gore ga se gwa ba le mekgwa e mengwe ya go iphediša yeo e ilego ya bewa gore e phediše moamogedi le ba lapa la gagwe sebaka sa ge tšhelete ya thušo e fegilwe.

Go latela dikutollo, Adv. Mushwana o ngwaletše Mohlankedimogolophethiši wa SASSA, a digela gore phenšene ya Ms Mphephu e lefelwe le gore tšhelete yeo e bego e šaletše morago ya mengwaga e meraro e lefelwe le lešokotšo. 

“Molaodiphethiši wa Selete wa SASSA go la Limpopo o swanetše go thwala sehlopha tšhomo , bjalo ka ge go šetšwe go thomilwe, go tla go nyakišiša ka ponyo ya leihlo taba ya ditšhelete tša leago tšeo di fegilwego ka lebaka la go hlakanela dinomoro tša boitšhupo,” Adv. Mushwana a realo. 

Gape o ile a digela ka gore SASSA e fe baamogedi, bao ditšhelete tša bona tša thušo di fegilwego, diphuthana tša dijo sebaka ka moka sa dinyakišišo gore ba kgone go iphediša ge eitšensi e sa rarolla bothata bjo bo hlotšego phego ya tšhelete ya thušo.

Adv. Mushwana gape o digetše gore SASSA e tle ka mekgwa ya go phetha dinyakišišo tša yona mo dikgweding tše tharo ka morago ga phego ya tšhelete ya thušo. 

   

