Kemelo e telele ya dintlo tša RDP e ya bofelong

Badudi ba Diyuniti tša R le S ba lokheišene la Lebowakgomo go la Limpopo, ba bangwe ba bona ke kgale ba emetše dintlo tša lenaneo la Kagoleswa le Tlhabollo (RDP) go tloga ka 1996, kgauswinyana ba ka bona go ema nako e telele ga bona ba emetše bodulo go etla bofelong. 

Se se latela nyakišišo ka Kantoro ya Mošireletši wa Setšhaba (OPP) ka ga go palela ga Kgoro ya Mmušo wa Selegae le Dintlo wa Limpopo go phethagatša tlemo ya yona ya go aga dintlo tša RDP go motse o.

Taba ye e tlišitšwe la mathomo gore e tle e lebelelwe ke OPP ke mokhanselara wa selegae, Mna Frans Letwaba, a tšea kgato legatong la badudi.

Balli ba dirile dikgopelo tša thušo tša dintlo ka 1996 go fihla ka 2006. Dikgopelo tša bona di ile tša dumelelwa ke Kgoro ka fase ga lenaneo la thušo ka tšhelete la dintlo leo le bitšwago Project Linked Subsidy. 

Protšeke e abetšwe khamphani yeo e bitšwago COMDEV, yeo e paletšego ke go aga dintlo goba go fana ka didirišwa tša go aga. Go utolotšwe gore dintlo tše dingwe di be di agilwe ka go se felele e bile seripa fela sa didirišwa se be se abetšwe ba bangwe ba baamogedi.

Mabarebare a re Kgoro e paletše ke go aga dintlo goba go aba didirišwa tša go aga go balli gore ba kgone go aga dintlo tša bona.

Nyakišišo ya OPP e utolotše gore dikgopelo tša balli tša thušo ka tšhelete ya dintlo di be di dumeletšwe go tloga ka 1997 go fihla ka 2006.

Balli ba bangwe ba ile ba tšea sephetho sa go aga madulo ka ditšhelete tša bona, mola ba bangwe ba feleleditše dintlo tšeo di bego di se tša feleletšwa ka go šomiša didirišwa tša bona.

Mošireletši wa Setšhaba o digetše gore Kgoro e swanetše go agela baamogedi ka moka dintlo bao dikgopelo tša bona di bego di dumeletšwe ka goba pele ga 2006.

Kgoro e swanetše go fetša dintlo tšeo di bego di tlogetšwe le go aba didirišwa tša go aga go baamogedi ka moka bao ba bego ba dumeletšwe. 

Go tšwelapele go ile gwa digelwa gore Kgoro e thuše balli bao ba šetšego ba thomile go aga dintlo tšeo e lego tša bona, eupša ba paletše ke go di feleletša le gore gape e lefe balli ka moka bao ba agilego dintlo tša bona ka ntle le thušo ya Kgoro, ka morago ga gore ba dumelelwe bjalo ka baamogedi.



