MOLAO WA MOLAOTHEO
MOLAOTHEO WA REPABLIKI YA AFRIKA BORWA, 1996
(Leina le lekopana, peleng e be e le 'Molaotheo wa Repabliki ya Afrika Borwa, Molao wa 108 wa 1996', wo o tšeetšwego legato ke karolwana ya 1 (1) ya Molao wa 5 wa 2005)
[O DUMELETŠWE KA LA 16 DISEMERE 1996]	[
LETŠATŠIKGWEDI LA GO THOMIŠA: 4 FEBERWARE 1997]
	(Ntle le ge go hlagišitšwe – bona gape karolo ya 243(5))
(Sengwalwa sa Seisemane se saennwe ke Mopresitente)
ka ge o fetošitšwe ke
Molaotheo wa Repabliki ya Afrika Borwa, 1996
Molao wa Mathomo wa Go fetoša Molaotheo wa 1997
Molao wa Bobedi wa Go fetoša Molaotheo wa 1998
Molao wa Boraro wa Go fetoša Molaotheo wa 1998
Molao wa Bone wa Go fetoša Molaotheo wa 1999
Molao wa Bohlano wa Go fetoša Molaotheo wa 1999
Molao wa Botshelela wa Go fetoša Molaotheo wa 2001
Molao wa Bošupa wa Go fetoša Molaotheo wa 2001
Molao wa Boseswai wa Go fetoša Molaotheo wa 2002
Molao wa Bosenyane wa Go fetoša Molaotheo wa 2002
Molao wa Bolesome wa Go fetoša Molaotheo wa 2003
Molao wa Bolesometee wa Go fetoša Molaotheo wa 2003
Molao wa Bolesometee wa Go fetoša Molaotheo wa 2007
Molao wa Bolesomenne wa Go fetoša Molaotheo wa 2008
Molao wa Bolesomehlano wa Go fetoša Molaotheo wa 2008
Molao wa Bolesometshela wa Go fetoša Molaotheo wa 2009
Melao ka fase ga Molao wo
MELAO YEO E LAOLAGO 'TIRO YA TIRELO YA GO PUTSWA 
MELAO YA KGOROTSHEKO YA MOLAOTHEO 
MOLAO
Go tsebagatša Molaotheo wo mofsa wa Repabliki ya Afrika Borwa le go hlagiša ditaba tšeo di tlago ka morago.
DIKAGARE
	Matseno
Dikarolo
KAROLO YA 1
1-6	Mabakatheo
KAROLO YA 2
7-39	Molao wa Ditokelo
KAROLO YA 3
40-41	Mmušo wa Mohlakanelwa
 KAROLO YA 4
42-82	Palamente
KAROLO YA 5
83-102	Mopresitente le Khuduthamaga
KAROLO YA 6
103-150	Diprofense
KAROLO YA 7
151-164	Mmušoselegae
KAROLO YA 8
165-180	Dikgorotsheko le Tshepedišo ya Toka
KAROLO YA 9
181-194	Dihlongwa tša Mmušo Tšeo di Thekgago Temokrasi ya Molaotheo
KAROLO YA 10
195-197	Taolo ya Merero ya Setšhaba
KAROLO YA 11
198-210	Ditirelo tša Tšhireletšo
KAROLO YA 12
211-212	Baetapele ba Setšo
KAROLO YA 13
213-230A	Ditšhelete
KAROLO YA 14
231-243	Dipeakanyetšokakaretšo
Šetulo 1	Folaga ya Setšhaba
Šetulo 2	Dikano le Maitlamo a Mmakgonthe
Šetulo 3	Ditshepedišo tša dikgetho
Šetulo 4	Makalatirišwa a Mošomo wa Mmušo wa Sammaletee wa Setšhaba le wa Profense 
Šetulo 5	Makalatirišwa a Mošomo wa Mmušo wa Profense Fela
Šetulo 6	Dithulaganyo tša Nakwana
Šetulo 6A	Tšwetšopele ya boleloko bja Kopano ya Maloko ka Moka a Palamente a Lekgotlapeamelao la Profense, ka morago ga Phetošo ya Boleloko bja Phathi, Kopanyo ya Diphathi, Karoganyo ya Diphathi le Karoganyo le Kopanyo ya Diphathi
[Šetule 6A e tsentšwe ke karolwana 6 ya Molao wa Bolesome wa Go fetoša Molaotheo wa 2003 gomme ya fedišwa ke karolwana  6 ya Molao wa Bolesomenne wa Go fetoša Molaotheo wa 2008.]
Šetule 6B	Go loba goba Tšwetšopele ya Boleloko bja Dikhansele tša Dipušoselagae, ka morago ga phetošo ya Boleloko bja Phathi, Kopanyo ya Diphathi, Karoganyo ya Diphathi le Karoganyo le Kopanyo ya Diphathi, le Go tlatšwa ga Dikgoba
[Šetule 6B, peleng e be e le šetule 6A, e tsentšwe ke karolwana 2 ya Molao wa Bolesomeseswai wa Go fetoša Molaotheo gomme ya fedišwa ke karolwana ya 5 ya Moolao wa Bolesome wa Go fetoša Molaotheo wa 2008.
Šetule 7 Melao ye e Phumotšwego
Matseno
Rena, batho ba Afrika Borwa,
Re elelwa ditlhokatoka tša rena tša maloba;
Re tlotla bao ba ilego ba hlokofaletšwa toka le tokologo nageng ya gaborena;
Re hlompha bao ba ilego ba katanela go aga le go hlabolla naga ya gaborena; ebile
Re dumela gore Afrika-Borwa ke ya batho bohle ba ba dulago go yona, re le ngata e tee le ge re fapana ka ditšo. 
Ka fao, ka baemedi ba rena bao ba kgethilwego ntle le kgapeletšo, re amogela molaotheo wo bjalo ka molaomogolo wa Repabliki gore re tlo-
Fediša diphapano tša kgale mme re bope setšhaba seo se theilwego godimo ga dikelo tša temokrasi, toka setšhabeng le ditokelomotheo tša batho;
Aga metheo ya setšhaba se se lokologilego sa temokrasi moo mmušo o theilwego godimo ga thato ya batho moo moagi yo mongwe le yo mongwe a šireleditšwego ke molao;
Kaonafatša maemo a bophelo bja baagi ka moka le go lokolla mabokgoni a motho o mongwe le o mongwe; le go
Aga Afrika-Borwa ye e kopanego ya temokrasi yeo e ka kgonago go tšea maemo a yona a maswanedi bjalo ka setšhaba se se ikemetšego ka noši ditšhabeng tša lefase ka bophara.
	Eke Morena a ka boloka setšhaba sa gešo.
	Nkosi Sikelel' iAfrika. Morena boloka setjhaba sa heso. 
	God seën Suid-Afrika. God bless South Africa. 
	Mudzimu fhatutshedza Afurika. Hosi katekisa Afrika.
KGAOLO YA 1
MABAKATHEO (krl 1-6)
1	Repabliki ya Afrika Borwa
	Repabliki ya Afrika Borwa ke naga e tee yeo e ikemetšego ya temokrasi yeo e theilwego godimo ga dikelo tše di latelago:
(a)	Seriti sa setho, phihlelelo ya tekano le tšwetšopele ya ditokelo	tša botho le ditokologo.
(b)    Go se kgetholle batho go ya ka mmala le bong.
(c)	Bogolo bja Molaotheo le pušo ya molao.	
(d)	Ditshwanelo tša batho ka moka ba bagolo tša go bouta, lenaneo la bakgethi le le swanago ka bophara, dikgetho tša ka mehla le pušo ya temokrasi ya makgotlantši, go kgonthiša maikarabelo, boikarabelo le tokologo.
2 Bogolo bja Molaotheo
Molaotheo wo ke molaomogolo wa Repabliki; molao goba maitshwaro ao a thulanago le wona ga a amogelege, gomme ditlemo tšeo di tšweletšwago ke wona di swanetše go phethagatšwa.
3	Boagi
(1)	Go na le boagi bjo bo swanago bja Afrika Borwa. 
(2)	Baagi ka moka ba-
(a)	lebanwe ke ditokelo, ditshwanelo le dikholego tša boagi ka go lekana; le
(b)	go phetha mediro le maikarabelo a boagi ka go lekana.
(3)	Molao wa setšhaba o swanetše go beakanyetša khwetšagalo, tlahlegelo le pušetšo ya boagi.
4	Koša ya Setšhaba
	Koša ya setšhaba ya Repabliki e laolwa ke Mopresidente ka tirišo ya kgoeletšo.
5	Folaga ya Setšhaba
	Mebala ya fologa ya Repabliki ke boso, gauta, talamorogo, bošweu, bohwibidu le botalalerata bjalo ka ge go hlalošitšwe ebile go thadilwe šetulong ya 1.
6	Maleme
(1)	Maleme a semmušo a Repabliki ke Sesotho sa Leboa, Sesotho, Setswana, Seswati, Sevenda, Setsonga, Seafrikanse, Seisimane, Setebele, Sethosa le Sezulu. 
(2)	Ka go lemoga tirišo ya fase ye e hlotšego ke histori le maemo a maleme a setšo a batho	ba rena, mmušo o swanetše go tšea magato a maleba a a bonalago go phagamiša maemo le go tšwetšapele tirišo ya maleme a.
(3)(a)	Mmušo wa setšhaba le dipušo tša diprofense di ka šomiša maleme a a itšego a semmušo mabakeng a mmušo, gomme go elwa hloko tirišo, kgonagalo, ditshenyegelo, mabaka a selete le tekatekano ya dinyakwa le dikganyogo tša setšhaba ka moka goba tša profense ye e amegago; eupša mmušo wa setšhaba le pušo ye nngwe le ye nngwe ya profense	di swanetše go šomiša bonyane maleme a mabedi a semmušo. 
(b)	Mebušo ya selegae e swanetše go ela hloko tirišo ya polelo le dikganyogo tša baagi ba yona.
(4)	Mmušo wa setšhaba le dipušo tša diprofense, ka go šomiša magato a semolao le a mangwe, di swanetše go laola le go hlokomela tirišo ya tšona ya maleme a semmušo. Ntle le go phaela thoko mabaka a karolwana ya (2), maleme ka moka a semmušo a swanetše go fiwa maemo a a swanago gomme a dirišwe ka tekatekano.
(5)	Boto ya Maleme ka Moka a Afrika Borwa (Pan South African Language Board) yeo e theilwego ka molao wa setšhaba e swanetše-
(a)	go tšwetšapele, le go hlola mabaka a tlhabollo le tirišo ya-
(i)	maleme ka moka a semmušo;
(ii)	maleme a MaKhoi, MaNama le a MaSan; le
(iii)	polelo ya dika (ya dimumu le difoa); le
(b)	go tšwetšapele le go tiišetša tlhompho ya-
(i)	maleme ka moka a tlwaelo ao a šomišwago ke ditšhaba ka Afrika Borwa go akaretšwa Sejeremane, Segerika, Segujarati, Sehindi, Sepotokisi, Setamil Setelegu, Seurdu; le
(ii)	Searabiki, Seheberu, Sanskrit le a mangwe a a	dirišetšwago mabaka a sedumedi ka Afrika-Borwa.
KGAOLO YA	2
MOLAO WA DITOKELO (krl 7-39)
7	Ditokelo
	 (1)	Molao wo wa ditokelo ke leswika la motheo la temokrasi Afrika Borwa. O akaretša ditokelo tša batho ka moka nageng ya rena gomme o tiišetša dikelo tša temokrasi tša tlhompho ya setho, tekatekano le tokologo.
(2)	Mmušo o swanetše go hlompha, go šireletša, go tšwetšapele le go phethagaša ditokelo tšeo di lego ka go Molao wa Ditokelo.
(3)	Ditokelo tšeo di lego ka Molaong wa Ditokelo di angwa ke mellwane yeo e hwetšwago goba yeo e ukangwego karolong ya 36 goba, goba go gongwe Molaong.
8	Tirišo
(1)	Molao wa Ditokelo o ama melao ka kakaretšo gomme o tlama peomolao, khuduthamaga, lekgotlatoka, le makala ka moka a mmušo.
(2)	Molawana wa Molao wa Ditokelo o tlama motho wa tlhago goba wa semolao ge,	le go fihla, ge go kgonagala, go hlokomelwa mohuta wa tokelo goba mohuta wa tshwanelo ye nngwe le ye nngwe yeo	e gapeletšwago ke tokelo. 
(3)	Ge go dirišwa melawana ya Molao wa Ditokelo go motho wa tlhago goba wa semolao go ya ka mabaka a karolwana (2), kgorotsheko-
(a)	 gore e tle e diragatše tokelo ka Molaong, e swanetše go kgontšha, goba ge go hlokega e dire, molaosetlwaedi go fihla moo e lego gore peomolao ga e kgone go diragatša	tokelo yeo; gomme
(b)	e ka dira melao ya molaosetlwaedi go fokoletša tokelo, ge e le gore phokoletšo e sepelelana le karolo ya 36(1).
 (4)	 Motho wa semolao o swanetše ke ditokelo tšeo di lego ka go Molao wa Ditokelo go ya ka mohuta wa ditokelo le mohuta wa motho yoo wa semolao.
9	Tekatekano
(1)	Batho bohle ba a lekana pele ga molao, gape ba na le tokelo ya tšhireletšo le kholego ya tša molao tše di lekanago
(2)	Tekatekano e akaretša go ba le boipshino bjo bo tletšego bja ditokelo ka	moka le ditokologo. Go tšwetšapele phihlelelo ya tekano, magato a semolao le a mangwe ao a hlamilwego ka nepo ya go šireletša le go tšwetšapele batho goba dihlopha tša batho, tšeo di hlokišitšwego ke kgethollo ya go se loke a ka tšewa.
(3)	Mmušo ga wa swanela go kgetholla thwii goba ka mokgwa wa tharedi motho mang goba mang, lebakeng le itšego goba mabakeng ao a akaretšago mohlobo, bong, kamano, boimana, seemo mabapi le lenyalo, morafe goba setšo, mmala, tshekamelo ya bong, bogolo, bogole, bodumedi, letswalo, tumelo, šetšo, polelo le matswalo.
(4)	 Ga go motho yo a swanetšego go kgetholla thwii goba ka mokgwa wa tharedi motho yo mongwe ka lebaka le tee goba a mantši go ya ka karolwana ya (3). Molao wa setšhaba o swanetše go dirišwa gore o thibele goba go iletša kgethollo ya go se loke
(5)	Kgethollo go ya ka lebaka le tee goba a mantši ao a tšweleditšwego go karolwana ya (3)	ga se ya loka, ntle le ge go tšweleditšwe gore kgethollo yeo e lokile.
10	Seriti sa botho
Motho mang le mang o na le seriti sa gagwe sa seng, le tokelo ya gore seriti sa bona se hlomphiwe le go šireletšwa.
11	Bophelo
 Motho mang le mang o na le tokelo ya go phela.
12	Tokologo le tšhireletšo ya motho
 (1)	Mang le mang o na le tokelo ya tokologo le tšhireletšo bjale ka ge e le motho, yeo e akaretšago tokelo ya –
(a)	go se amogwe tokologo ka go rata goba ntle le lebaka la go kwagala;
(b)	go se golegwe ntle le tsheko;
(c)	go se angwe ke mehuta yohle ya dintwa e ka ba go tšwa setšhabeng goba mathokong a praebete;
(d)	go se hlorišwe ka mokgwa ofe goba ofe; le
(e)	go se swarwe goba go se hlokofatšwe ka mokgwa wa sehlogo, wa go hloka botho goba wa go nyefola.
(2)	Mang le mang o na le tokelo ya maemo a mmele le a monagano, yeo e akaretšago tokelo ya-
(a)	go tšea diphetho mabapi le tša pelegi;
(b)	 tšhireletšo le taolo ya mebele ya bona; le
(c)	go se dirwe diteko tša kalafo goba tša saense ntle le tsebo le tumelo ya bona.
13	Bokgoba, bohlanka le go šomišwa ka kgapeletšo
Ga go motho yoo a swanetšego go dirwa lekgoba, mohlanka goba go šomišwa ka kgapeletšo.
14	Sephiri
Mang le mang o na le tokelo ya sephiri, yeo e akaretšago tokelo ya gore go se be le-
(a)	phuruphutšo ya bona goba ya magae a bona;
(b)	phuruphutšo ya dithoto tša gagwe;
(c)	go amogwa diphahlo tša gagwe; goba
(d)	tsenatseno dikgokaganong tša bona tša sephiri.
15	Tokologo ya bodumedi, tumelo le kgopolo
(1)	Mang le mang o na le tokelo ya tokologo ya letswalo, bodumedi, maikutlo, tumelo le kgopolo
(2)	Merero ya bodumedi e ka phethagatšwa ditlhongweng tša mmušo goba ditlhongweng tšeo di thušwago ke mmušo, ge fela ele gore-
(a)	merero yeo e latela melao yeo e beilwego ke ditaolo tša maleba tša setšhaba;
(b)	e phethagatšwa ka mokgwa wa go lekana; le
(c)	tsenelo ya yona ga se ya kgapeletšo ebile ke ya boithaopo.
(3)(a)	Karolo ye ga e thibele molao wo o amogelago- 
(i)	manyalo ao a phethagatšwago ka fase ga setšo sefe goba sefe, goba tshepedišo ya sedumedi, molao wa motho ka nama goba wa lapa; goba 
(ii)		ditshepedišo tša molao wa motho ka boyena le molao wa lapa ka fase ga setšo sefe goba sefe, goba seo se latelwago ke batho bao ba latelago tumelo ye itšego.
(b)	Kamogelo go ya ka temana ya (a)	e swanetše go sepedišana le	karolo ye gammogo le melawana e mengwe ya Molaotheo.
16	Tokologo tlhagišong ya maikutlo
(1)	Mang le mang o na le tokelo ya go ntšha maikutlo, yeo e akaretšago-
(a)	tokologo ya kgašo le diphatlalatši tše dingwe;
(b)	tokologo ya go amogela goba go abela tshedimošo goba dikgopolo;
(c)	tokologo ya boithomelo bja tša bokgabo; le
(d)	tokologo ya tša thuto le dinyakišišo tša saense.
(2)	Tokelo karolwaneng ya (1)	ga e akaretše -
(a)	tlhohleletšo ya ntwa;
(b)	tlhohleletšo ya kgaruru ye e okaokago; goba
(c)	khuetšo ya lehloyo leo le itshamilego godimo ga mohlobo, morafe, bong goba bodumedi, leo le tsošago tlhohleletšo ye e ka hlolago kotsi.
17	Kgobokano, tšhupetšo, kgwabo le ngongorego
Mang le mang o na le tokelo, ka khutšo ka ntle le go itlhama, go kgobokana, go dira ditšhupetšo, go gwaba, le go tliša dingongorego.
18	Tokologo ya kwano
Mang le mang o na le tokelo ya tokologo ya go kwana le ba bangwe.
19	Ditokelo tša dipolitiki
(1)	Moagi yo mongwe le yo mongwe o lokologile go dira dikgetho tša dipolitiki, tšeo di akaretšago tokelo ya -
(a)	hlama phathi ya dipolitiki;
(b)	kgatha tema medirong ya, goba go kalatša maloko legatong la phathi ya dipolotiki; le
(c)	go dira lesolo la phathi ya dipolitiki goba lebakeng la yona.
(2)	Moagi yo mongwe le yo mongwe o na le tokelo ya go kgatha tema dikgethong tše di lokologilego tša ka mehla tša lekgotlatheramelao leo le hlomilwego go ya ka Molaotheo.
(3)	Moagi o mogwe le o mongwe o mogolo o na le tokelo ya-
(a)	go bouta dikgethong tša lekgotlatheramelao lefe goba lefe leo le hlomilweng go ya ka Molaotheo, le go dira bjalo sephiring; le
(b)	go ba nkgetheng ditirelong tša setšhaba gomme, ge a kgethilwe, a tšee maemo ao.
20	Boagi
	Ga go na moagi yo a swanetšego go amogwa boagi.
21	Tokologo ya mosepelo le madulo
(1)	Mang le mang o na le tokologo ya mosepelo.
(2)	Mang le mang o na le tokelo ya go tloga Repabliking.
(3)	Moagi yo mongwe le yo mongwe o na le tokelo ya go tsena, go ba gona le go dula kae le kae ka Repabliking.
(4)	Moagi mang le mang o na le tokelo ya go ba le pasporoto.
22	Tokologo ya go gweba, mošomo le profešene
	Moagi yo mongwe le yo mongwe o na le tokelo ya go ikgethela kgwebo ya gagwe, mošomo goba profešene ka tokologo. Ditiro tša kgwebo, mošomo goba profešene di ka laolwa ke molao.
23	Dikamano medirong
(1)	Mang le mang o na le tokelo ya go swarwa gabotse dikamanong tša modiro.
(2)	Mošomi yo mongwe le yo mongwe o na le tokelo ya -
(a)	go hloma le go ba leloko la yunione ya bašomi;
(b)	go kgatha tema mererong le mananeong a yunione ya bašomi; le
(c)	go ngala mošomo.
(3)	Mongmošomo yo mongwe le yo mongwe o na le tokelo ya go-
(a)	hloma le go ba leloko la mekgatlo ya bengmešomo; le
(b)	kgatha tema medirong le mananeong a mekgatlo ya bengmešomo.
(4)	Yunione ye nngwe le ye nngwe ya bašomi le mokgatlo wo mongwe le wo mongwe wa bengmešomo o na le tokelo ya -
(a)	go laola tshepedišo ya yona, mananeo le mediro;
(b)	go beakanya; le
(c)	go hloma le go ba maloko a fetereišene.
(5)	Yunione ye nngwe le ye nngwe ya bašomi, mokgatlo wa bengmešomo le mongmošomo ba na le tokelo ya go tsenela ditherišano ka seboka. Molao wa setšhaba o ka bewa go laola ditherišano ka seboka. Bogolo bjoo molao o ka direlago tokelo mollwane mo Kgaolong ye, mollwane woo o swanetše go sepelelana le karolo ya 36 (1). 
(6)	Molao wa setšhaba o ka amogela dipeakanyo tša tšhireletšo tša yunione tšeo di hwetšwago ka ditumelelanong tša seboka. Bogolo bjoo molao o ka direlago tokelo mollwane mo Kgaolong ye, mollwane woo o swanetše go sepelelana le karolo ya 36 (1).
24	Tikologo
	Mang le mang o na le tokelo -
(a)	go ba tikologong yeo e se nago le kotsi bophelong bja gagwe goba go pheleng gabotse ga gagwe; le
(b)	go šireletša tikologo, kholegong ya meloko ya bjale le ya ka moso, ka magato a melao ya maleba le e mengwe yeo e -
(i)	thibelago tšhilafatšo ya tikologo le phokodišo ya tlhago;
(ii)	tšwetšago pele pabalelo ya tlhago; le
(iii)	lotago le go hlabolla tlhago ye e tlogo tšea lebaka le letelele le tšhomišo ya methopo ya tlhago ka nepo ya go tšwetšapele tlhabollo ya maleba ya ekonomi ya setšhaba 
25	Thoto
(1)	Ga go motho yo a swanetšego go tšeelwa thoto ntle le go ya ka molao woo o amago mang le mang, le gona ga go molao woo o swanetšego go dumelela go tšeelwa ga thoto ka go rata.
(2)	Thoto e ka amogwa fela ka go latela molao wo o amago mang le mang –
(a)	morerong wa setšhaba goba go phetha dikgahlego tša setšhaba; le
(b)	 	go ya ka go lefa, seroto seo e lego gore nako le mokgwa wa tefo wo e lego gore o ka ba o kwanetšwe ke bao ba amegago goba o rerilwe goba o amogetšwe ke kgorotsheko.
(3)	Seroto sa tefo le nako le mokgwa wa tefo di swanetše go ba tša toka le tše lekanago, di bontšha tekatekano gare ga dikgahlego tša setšhaba le dikgahlego tša bao ba amegago, go šetšwa mabaka a a swanetšego, go akaretšwa -
(a)	tšhomišo ya bjale ya thoto;
(b)	histori ya khwetšo le tšhomišo ya thoto; 
(c)	boleng bja mmaraka bja thoto;
(d)	maemo a dipeeletšothwii tša mmušo le dithušo khwetšong le tlhabollong ya mohola ya kapitale ya thoto; le
(e)	 lebaka la kamogo 
(4)	Mabakeng a karolo ye -
(a)		kgahlego ya setšhaba e akaretša boikgafo bja setšhaba kabongleswa ya naga, le dikabongleswa tšeo di tla tlišago tekatekano phihlelelong ya methopo ya tlhago ya Afrika-Borwa; le gore
(b)	thoto ga e ame naga fela.
(5)	Mmušo o swanetše go tšea magato ao a kwagalago a peomolao le a	mangwe, ka maatla a wona, go tliša maemo ao a tla kgontšhago baagi go ikhweletša lefase ka go lekana.
	(6)	Motho goba setšhaba seo bodulo bja sona bo tekatekišwago ke melao ya peleng ya kgethollo ya semorafe goba ditiro, se swanetše, go ya ka Molao wa Palamente, go hwetša bodulo bjo bo tiišitšwego ke molao goba go hwetša thušo e nngwe yeo e swanago ya peakanyoleswa.
(7)	Motho goba setšhaba seo se amogilweng naga morago ga la 19 Juni 1913 ka lebaka la melao ya peleng ya kgethollo ya semorafe goba ditiro, se swanetše, go ya ka Molao wa Palamente, go bušetšwa naga yeo goba go hwetša peakanyoleswa ye e lekanego.
(8)	Ga go tlhagišo efe goba efe ya karolo ye yeo e ka thibelago mmušo go tšea magato a semolao le a mangwe go hwetša naga, meetse le dikaboleswa tše dingwe tša go swana le tšona, nepo e le go bekanyaleswa dipoelo tša kgethollo ya semorafe, ge fela e le gore phapogo efe goba efe ditlhagišong tša karolo ye di sepelelana le ditlhagišo tša karolo ya 36(1).
(9)	Palamente e swanetše go bea molao wo o ukangwego karolwaneng ya (6).
26	Dintlo
(1)	Mang le mang o na le tokelo ya go ba le ntlo ya maleba 
(2)	Mmušo o swanetše go tšea magato a maleba a molao le a mangwe, ka maatla a wona, go fihlela phethagatšo ya kgato ka kgato ya tokelo ye
(3)	Ga go motho yo a swanetšego go ntšhwa ka ngwakong wa gagwe goba ngwako wa gagwe o phušulwe ntle le taelo ya kgorotsheko yeo e dirilwego ka morago ga go ela hloko mabaka ka moka a a amegago. Ga go molao wo o swanetšego go dumelela go ntšhiwa ga batho magaeng ka boithatelo.
27	Tlhokomelo ya tša maphelo, dijo, meetse le tšhireletšo ya leago
(1)	Mang le mang o na le tokelo ya phihlelelo ya -
(a)	ditirelo tša tlhokomelo ya tša maphelo, go akaretšwa le tlhokomelo ya maphelo go tša pelegi;
(b)	dijo le meetse tše di lekanego; le
(c)	 	tšhireletšo ya tša leago, go akaretšwa, ge e le gore ga ba kgone go ithuša ka bobona le bao ba ba tshepilego, thušo ya selegae yeo e swanetšego. 
(2)	Mmušo o swanetše go tšea magato a maleba a semolao le a mangwe, ka maatla a wona, go fihlela phethagatšo ya kgato ka kgato ya ye nngwe le ye nngwe ya ditokelo tše.
(3)	Ga go motho yo a swanetšego go ganwa ka kalafo ya tšhoganyetšo.
28	Bana
(1)	Ngwana yo mongwe le yo mongwe o na le tokelo ya-
(a)	go ba le leina le bosetšhaba go tloga pelegong;
(b)	tlhokomelo ya ka lapeng goba tlhokomelo ya batswadi, goba tlhokomelong ye swanetšego ge a tlošitšwe tlhokomelong ya tikologo ya;
(c)	go hwetša phepo ya motheo, bodulo, tlhokomelo ya tša maphelo ya motheo le ditirelo tša leago;
(d)		go šireletšwa tlhorišong, tlhokomologong, tlaišong goba kgobošong;
(e)	go šireletšwa ditlwaelong tše mpe tša;
(f)	go se nyakwe goba go dumelelwa go dira mošomo goba go aba ditirelo tšeo -
(i)	di sa swanelago motho wa bogolo bja ngwana yoo; goba
 (ii)	go bea kotsing go phela gabotse ga ngwana, thuto, boitekanelo bja mmele le monagano, goba semoya, maitshwaro goba tšwelopele setšhabeng;
(g)		go se golegwe, ntle le ge seo e le kgato fela yeo e ka tšewago, gomme ge go le bjalo, godimo ga ditokelo tšeo ngwana yoo a di fiwago ka fase ga dikarolo tša 12 le 35, ngwana yoo a ka golegwa fela nakwana e nnyane ya maleba; le gona o na le tokelo ya go - 
(i)	hlaolwa bagolegweng bao ba nago le mengwaga ya ka godimo ga 18; gomme 
(ii)	a swarwe ka mokgwa wo, a bewe maemong ao a tšeago šedi ya bogolo bja ngwana;
(h)	 gore ngwana yoo a be le ramolao wa mmušo yoo ebilego a lefša ke mmušo, melatong yeo e amago ngwana, ge e le gore tlhokego ya toka e ka tšwelelela; le
(i)	 go se šomišwe thwii dithulanong tšeo go itlhamilwego gape le go šireletšwa mabakeng a dithulano tšeo go itlhamilwego. 
 (2)	Dikgahlego tša ngwana di bohlokwa kudu mererong e mengwe le e mengwe ye e amago ngwana yoo.
(3)	Mo karolong ye lentšu le “ngwana” le šupa motho yo a lego ka fase ga mengwaga e 18.
29	Thuto
(1)	Mang le mang o na le tokelo ya -
(a)	go hwetša thuto ya motheo, go akaretšwa thutomotheo ya ba bagolo; le
(b)	go tšwetša pele thuto yeo mmušo, go ya ka mabaka a a kwešišegago, o swanetšego go tšea magato a maswanedi go dira gore e hwetšwagale le go fihlelelwa. 
(2)	Mang le mang o na le tokelo ya go hwetša thuto ka leleme la semmušo goba maleme a boikgethelo bja bona dihlongweng tša thuto tša setšhaba moo thuto yeo e tlogago e kgonagala. Go kgonthišiša phihlelelo le phethagatšo ya tokelo ye, mmušo o swanetše go hlokomela maano ka moka a thuto, go akaretšwa dihlongwa tša thuto ya go rutwa ka polelo e tee, go hlokometšwe-
(a)	tekatekano;
(b)	kgonagalo; le
(c)	phišegelo ya go nyaka go beakanyaleswa ditlamorago tša melao ya maloba ya kgethollo ya semorafe le mekgwa.
(3)	Motho yo mongwe le yo mongwe o na le tokelo ya go hloma le go lota, ka ditshenyegelo tša gagwe, dihlongwa tša thuto tše di ikemetšego tšeo di-
(a)	sa kgethollego ka lebaka la morafe; 
	 (b)	ngwadišitšwego le mmušo; le
(c)	go lota maemo a thuto ao a sego ka fase ga ao a lego dihlongweng tša thuto tša setšhaba.
(4)	Karolwana ya (3)	ga e thibele dithušo tša mmušo dihlongweng tše di ikemetšego tša thuto.
30	Leleme le setšo
	Mang le mang o na le tokelo ya go šomiša leleme la gagwe le go kgatha tema bophelong bja setšo sa kgetho ya gagwe, efela ga go yo a diragatšago ditokelo tše a ka dirago bjalo ka tsela ye e lego kgahlanong le mabaka a itšego a Molao wa Ditokelo.
31	Ditšhaba tša setšo, bodumedi le tša maleme
(1)	Batho ba e lego ditho tša setšhaba sa setšo, bodumedi goba sa leleme ga ba swanela go ganetšwa tokelo, le maloko a mangwe a setšhaba seo -
go ipshina ka setšo sa bona, go latela bodumedi bja bona le go šomiša leleme la bona; le
go hloma, go itswalanya le go lota setšo, bodumedi le ditlemagano le mekgatlo e mengwe ya setšhaba. 
(2)	Ditokelo karolwaneng ya (1)	di ka no se šomišwe ka tsela yeo e tla bago kgahlanong le ditlhagišo tše dingwe tša Molao wa Ditokelo. 
32	Phihlelelo ya tshedimošo
(1)	Mang le mang o na le tokelo ya go fihlelela -
(a)	tshedimošo efe goba efe yeo e swerwego ke mmušo; le
 (b)	tshedimošo efe goba efe yeo e swerwego ke motho o mongwe yeo e tsomegago gore go phethagatšwe goba go šireletšwe tokelo efe goba efe.
(2)	Molao wa setšhaba o swanetše go bewa gore go phethagatšwe tokelo ye gomme o ka fa magato a maleba go imolla mmušo mathateng a taolo le a ditšhelete.
33	Kgatotaolo ye e lokilego
(1)	Mang le mang o na le tokelo ya go hwetša kgatotaolo yeo e lego molaong, ye e kwalago, yeo e sepedišwago ka tsela ya maleba. 
(2)	Mang le mang yo ditokelo tša gagwe di amilwego gampe ke kgatotaolo o na le tokelo ya go fiwa mabaka ao a ngwadilwego.
(3)	Molao wa setšhaba o swanetše go bewa go maatlafatša ditokelo tše, gomme o swanetše-
(a)	go hlagiša tekololefsa ya kgatotaolo ke kgorotsheko goba, ge e le gore go swanetše, kgoro ya go ikemela ya go se tšee lehlakore;
(b)	 go bea maikarabelo go mmušo go maatlafatša ditokelo tšeo di beilwego dikarolwaneng tša(1)	le (2); le
(c)	go tšwetšapele taolo ye e šomago gabotse.
34	Tumelelo go dikgorotsheko
	Mang le mang o na le tokelo ya gore phapano efe goba efe yeo e ka rarollwago ka tirišo ya molao, e theetšwe phatlalatša pele ga kgoro ya tsheko goba, moo go kgonegago, lekgotla goba foramong e nngwe ye e ikemetšego ya go se tšeye lehlakore. 
35	Batho bao ba swerwego, ba golegilwego le ba latofatšwago 
(1)	Mang le mang yo a swerwego ka go oba molato o na le tokelo ya-
(a)	go homola;
(b)	go tsebišwa ka bonako -
(i)	 ka tokelo ya gagwe ya go homola; le
(ii)	go lemošwa ka ditlamorago tša go se homole;
(c)	go se gapeletšwe go dira boipobolo bofe goba bofe goba go dumela se sengwe seo se ka šomišwago bjalo ka bohlatse kgahlanong le yena;
(d)	go tlišwa pele ga kgorotsheko ka pela ka mo go ka kgonegago, fela e sego ka morago ga -
(i)	 	diiri tše 48 ka morago ga go swarwa; goba
(ii)	mafelelong a letšatši la pele la tsheko morago ga ge diiri tše 48 di fetile, ge e le gore diiri tše 48 di fela ka ntle ga diiri tša tlwaelo tša kgorotsheko goba ka letšatši leo e sego la tlwaelo la tsheko;
(e)	ka letšatši la mathomo la go tšwelela pele ga kgorotsheko, a latofatšwe goba a tsebišwe lebaka leo le dirago gore go golegwa ga gagwe go tšwelepele goba a lokollwe; le
(f)	go lokollwa kgolegong ge dikgahlego tša toka di dumela, go ya ka mabaka a a kwalago.
(2)	Mang le mang yo a golegilwego, go akaretšwa le mogolegwa yo a ahlotšwego, o na le tokelo ya -
(a)	go tsebišwa ka pele lebaka leo le mo dirilego gore a swarwe;
(b)	go kgetha le go boledišana le ramolao, le go tsebišwa ka tokelo ye ka bonako;
(c)	gore mmušo o mo fe ramolao o a lefšago ke mmušo, ge go hloka toka go ka tšwelela, le go tsebišwa ka tokelo ye ka bonako;
(d)	go ganetšana le go ba molaong ga go swarwa ga gagwe pele ga kgorotsheko gomme, ge go swarwa go se molaong, a lokollwe;
(e)	go mabaka a kgolego ao a sepelelanago le seriti sa botho, go akaretšwa bonnyane go diragatša le tlhagišo, ka ditshenyegelo tša mmušo, tša bodulo bjo bo lekanego, phepo, ditlabelo tša go bala le kalafo; le
(f)	go kgokagana le go etelwa ke - 
(i)	mogatša goba molekane;
(ii)	ba leloko;
(iii)	moeletši yo a ikgethetšego yena wa sedumedi; le 
(iv)	ngaka yeo a ikgethetšego yona.
(3)	Mang le mang yo a latofatšwago o na le tokelo ya go šekišwa ka tsela ya toka, yeo e akaretšago tokelo ya-
(a)	go tsebišwa ka ga tatofatšo ya gagwe le dintlha tše di lekanego go mo kgontšha go fetola tatofatšo yeo;
(b)	go fiwa nako le ditlabelo tšeo di lekanego gore a kgone go itokišetša tsheko;
(c)	go sekišwa phatlalatša pele ga kgoro ya tsheko ya mehleng;
(d)	go ba le tshekišo yeo e thomago e bile e felago ka ntle le titelo yeo e sa kwešišagalego;
(e)	go ba gona ge a sekišwa; 
(f)	go kgetha, le go emelwa ke ramolao, le go tsebišwa ka tokelo ye ka pela;
(g)	gore mmušo o mo fe ramolao o a lefšago ke mmušo, ge go hloka toka go ka tšwelela, le go tsebišwa ka tokelo ye ka bonako;
(h)          go tšewa bjalo ka motho yo a se nago molato, go homola, le go se fe bohlatse nakong ya tshepedišo ya tsheko;
(i)	go fa bohlatse, le go ganetšana le bohlatse;
(j)	go se gapeletšwe go fa bohlatse bjo a ka ipofago ka bjona;
(k)	 	go sekišwa ka leleme leo yena molatofatšwa a le kwešišago goba, ge e le gore seo ga se kgonagale, go dira gore ditshepedišo di hlathollelwe lelemeng leo;
go se bonwe molato ka tiro goba go se phethagatše moo go sego gwa ba tlolo ya molao ka fase ga molao wa setšhaba goba wa ditšhabatšhaba ka nako yeo o sego wa dirirwa goba o sego wa phethagatšwa;
	 (m)	go se sekišwe tlolong ya molao ka lebaka la tiro goba go se phethagatše moo e lego gore mosekišwa o šetše a kile a se bonwe molato goba a ilego a golegelwa yona; 
	(n)	go holegeng ga dikotlo tše di sego tše kgolo tšeo di laetšwego, ge dikotlo tše di laetšwego tša tlolo ya molao di fetošitšwe gareng ga nako yeo tlolo ya molao e dirilwego le nako ya go kwebja; le
	(o)	go dira boipiletšo bja, goba go lekola lefsa ka kgorokgolo ya tsheko.
(4)	Neng le neng ge karolo ye e nyaka gore tshedimošo e fiwe motho, tshedimošo yeo e swanetše go fiwa ka leleme leo motho a yoo a le kwešišago.
(5)	Bohlatse bjo bo hweditšwego ka tsela yeo e ganetšanago le tokelo efe goba efe ye e lego ka go Molao wa Ditokelo bo swanetše go phaelwa thoko ge e le gore go amogela bohlatse bjoo go tla dira gore tsheko e se be le toka goba mohlomongwe bo be kgahlanong le tirišo ya toka.
36	Mollwane wa ditokelo
(1)	Ditokelo tše di lego ka Molaong wa Ditokelo di ka ba le mellwane fela go ya ka molao wo o akaretšago mang le mang ge e le gore mollwane wo o a kwala e bile o molaong setšhabeng seo se lokologilego sa temokrasi seo se theilwego ka seriti sa botho, tekatekano le tokologo, go elwa hloko mabaka ka moka ao a amegago, go akaretšwa -
(a)	mohuta wa tokelo;
(b)	bohlokwa le maikemišetšo a mollwane;
(c)	mohuta le bogolo bja mollwane;
(d)	kamano magareng ga mollwane le maikemišetšo a yona; le
(e)	mokgwa woo o sa šitišego phihlelelo ya maikemišetšo ao.
(2)	Ka ntle le ge go hlagišitšwe karolwaneng ya (1)	goba ditlhagišong tše dingwe tša Molaotheo, ga go molao wo o swanetšego go direla tokelo yeo e tiišeditšwego ka go Molao wa Ditokelo mollwane.
37	Maemo a tšhoganetšo
(1)	Maemo a tšhoganetšo a ka goeletšwa fela go ya ka Molao wa Palamente, le gona fela ge -
(a)	bophelo bja setšhaba bo tšhošetšwa ka ntwa, tlhaselo, tsogelokakaretšo, tlhakatlhakano, masetlapelo a tlhago goba maemo a mangwe tšhoganetšo a setšhaba; le
(b)	kgoeletšo e hlokega go tliša khutšo le kagišo.
(2)	Kgoeletšo ya maemo a tšhoganetšo, le molao ofe goba ofe woo o dirilwego goba magato a mangwe ao a tšerwego go latela kgoeletšo yeo, di ka šoma fela-
(a)	kholofelong; le
(b)	mo matšatšing ao a sa fetego 21 go tloga letšatšing la kgoeletšo, ntle le ge Kopano ya Maloko a Palamente ka Moka e ka tšea sephetho sa go katološa kgoeletšo. Kopano ya Maloko a Palamente ka Moka e ka tšea sephetho sa go katološa maemo a tšhoganetšo ka dikgwedi tše sa fetego tše tharo ka nako e tee. Katološo ya mathomo ya kgoeletšo ya tšhoganetšo e swanetše go tšewa ka sephetho seo go dumelelwanego ka sona ke bontši bja dibouto tša maloko a Kopano ya Maloko a Palamente ka Moka. Katološo ye nngwe le ye nngwe yeo e latelago e swanetše go tšewa ke bouto ya bonyane diperesente tše 60 tša maloko a Kopano ya Maloko a Palamente ka Moka. Sephetho seo se tšewago go ya ka temana ye se swanetše go tšewa fela morago ga ngangišano ya phatlalatša ya setšhaba Kgobokanong ya Palamente.
(3)	Kgoro efe goba efe ya tsheko e ka ahlola go ba molaong ga-
(a)	kgoeletšo ya maemo a tšhoganetšo;
(b)	katološo efe goba efe ya kgoeletšo ya maemo a tšhoganetšo; goba
(c)	molao ofe goba ofe wo o dirilwego goba kgato ye e tšerwego go latela kgoeletšo ya maemo a tšhoganetšo.
(4)	Molao wo mongwe le wo mongwe wo o dirwago go latela kgoeletšo ya maemo a tšhoganetšo o ka fapoga go Molao wa Ditokelo go fihla fela ge-
(a)	go fapoga go tlogago go tsomega ka kgoeletšo ya tšhoganetšo; le ge
(b)	molao-
(i)	o sepelelana le ditlamego tša Repabliki go ya ka molao wa boditšhabatšhaba woo o šomišwago ge go na le kgoeletšo ya maemo a tšhoganetšo;
(ii)	o kwana le karolwana ya(5); ebile
(iii)	o phatlaladitšwe ka Kuranteng ya Mmušo wa setšhaba ka pela ka mo go kgonegago morago ga go bewa.
(5)	Ga go Molao wa Palamente woo o dumelelago kgoeletšo ya tšhoganetšo, ebile ga go molao woo o dirwago goba kgato efe goba efe yeo e ka tšewago go latela kgoeletšo ya tšhoganetšo, yeo e ka dumelago goba go dumelela go-
(a)	go lebalela mmušo, goba motho mang goba mang yo a dirilego tiro ye e sego molaong;
(b)	go fapoga go gongwe le go gongwe karolong ye; goba
(c)	go fapoga go gongwe le go gongwe karolong yeo e ukamilwego kholomong ya 1 ya Lenaneo la Ditokelo tšeo Go sego gwa Swanelwa go Fapoga go Tšona, go bogolo bjo bo bontšhwago go lebana le karolo ya kholomo ya 3 ya lenaneo.
Lenaneo la Ditokelo tšeo Go sego gwa Swanelwa go Fapoga go Tšona
1
Nomoro ya karolo
2
Leina la karolo
3
Bogolo bjoo tokelo e sego ya swanelwa go fapoga go yona
9
Tekatekano
Mabapi le kgethollo ye e sa lokago ka mabaka fela a mohlobo, mmala, morafe goba tlhago, bong, bodumedi
goba polelo
10
Tlhompho ya setho 
Ka moka
11
Bophelo
Ka moka
12
Tokologo le tšhireletšo ya motho
Mabapi le dikarolwana (1)(d)	le (e)	and 2 (c)
13
Bokgoba, bohlanka le kgapeletšo ya mošomo
Mabapi le bokgoba le bohlanka 
28
Bana
Mabapi le:
-	dikarolwana tša (1)(d)	le (e)	;
-	ditokelo ditemaneng tša (i)	le (ii) tša karolwana (1)(g); le
-	karolwana tša (1)(i)	mabapi le bana ba mengwaga e 15 le ka fase.
35
Batho bao ba swerwego, ba golegilwego le bao ba latofatšwago
Mabapi le :
-	dikarolwana tša (1)(a)	, (b)	le (c)	le (2)(d)	;
-	ditokelo ditemaneng tša (a)	go fihla go (o) goba karolwana ya (3), go sa akaretšwe temana ya (d)	;
-	karolwana ya (4); le
-	karolwana ya(5)	mabapi le tlogelo ya bohlatse ge e le gore go amogela bohlatse bjoo go tla dira gore tsheko e se be le toka. 
(6)	Ge motho mang goba mang a golegilwe ntle le tsheko go latela phapogo go ditokelo tša gagwe ka lebaka la kgoeletšo ya maemo a tšhoganetšo, mabaka a a latelago a swanetše go hlokomelwa:
(a)	Leloko la lapa la motho o mogolo goba mogwera wa motho yo a golegilwego o swanetše go tsebišwa ka pela ka moo go kgonegago, a tsebišwe gore motho yoo o golegilwe..
(b)	Tsebišo e swanetše go gatišwa ka Kuranteng ya Mmušo ya setšhaba pele ga ge matšatši a mahlano a morago ga ge motho a swerwe	a fela, a bolela leina la mogolegwa le lefelo la kgolego le go bolela ka magato a tšhoganetšo ao motho yoo a golegilwego ka fase ga wona.
(c)	Mogolegwa o swanetše go dumelelwa go ikgethela, le go etelwa nako ye nngwe le ye nngwe ye e kwalago, ke ngaka.
(d)	Mogolegwa o swanetše go dumelelwa go ikgethela, le go etelwa nako ye nngwe le ye nngwe ye e kwalago, ke ramolao.	
(e)	Kgorotsheko e swanetše go lekodišiša mabaka a kgolego ka pele ka moo go kgonegago, e fela e sego morago ga matšatši a 10 morago ga gore motho yoo a golegwe, gomme kgorotsheko e swanetše go lokolla mogolegwa ka ntle le ge go hlokega go tšwelapele ka go golega go tliša khutšo le molao.
Mogolegwa yo a sa lokollwego go ya ka tekolo ya ka fase ga temana ya (e), goba yoo a sa lokollwego go ya ka tekolo ya temana ye, a ka dira kgopelo go kgorotsheko go lekodišiša lefsa go tšwelapele ka kgolego ya gagwe nako ye nngwe le ye nngwe morago ga ge matšatši a 10 a tekolo ya pele a fetile, gomme kgorotsheko e swanetše go lokolla mogolegwa ntle le ge go sa hlokega go tšwelapele ka kgolego go tliša khutšo le toka.
 Mogolegwa o swanetše go dumelelwa go tšwelelapele ga kgorotsheko efe goba efe ka sebele pele kgorotsheko yeo e lekodišiša maemo a gagwe a go golegwa, go emelwa ke ramolao tshekong yeo, le go dira dikgopelo kgahlanong le go tšwetšwapele ga kgolego ya gagwe.
Mmušo o swanetše go tšweletša mabaka ao a ngwadilwego pele ga kgorotsheko ao ka ona o hlalošago mabaka a go tšwetšapele kgolego ya mogolegwa yoo, ebile o swanetše go fa khopi ya mabaka ao go mogolegwa bonyane matšatši a mabedi pele kgorotsheko e lekola lefsa go swarwa ga motho yoo.	
(7)	Ge kgorotsheko e lokolla mogolegwa, motho yoo ga a swanela go golegwa gape mabakeng ao a swanago le ao a bego a golegilwe ka ona, ntle le ge mmušo o ka tliša mabaka a go kwagala a go golega motho yoo gape.
(8)	Dikarolwana tša (6)	le (7)	ga di šomišwe bathong bao e sego baagi ba Afrika Borwa bao ba golegilwego ka lebaka la phapano ya ntwa ya boditšhabatšhaba. Eupša mmušo o swanetše go obamela maemo ao a tlamago Repabliki ka fase ga molao wa setho wa boditšhabatšhaba mabapi le kgolego ya batho bao.
38	Phethagatšo ya ditokelo
	Mang le mang yoo a ngwadilwego karolong ye o na le tokelo ya go ya go kgorotsheko ya maswanedi moo a tlogo bega gore tokelo ya ka Molaong wa Ditokelo e tshetšwe goba e nyaditšwe, le kgorotsheko e ka mo fa kimollo yeo e swanetšego, go akaretšwa le go tsebagatšwa ga ditokelo tšeo. Batho bao ba ka boledišanago le kgoro ke- 
(a)	mang le mang yoo a emelago dikgahlego tša gagwe ka nama;
(b)	mang le mang yoo a emelago batho ba bangwe bao ba palelwago ke go ikemela ka bobona;
(c)	mang le mang yoo a emego bjalo ka leloko la, goba a emetšego dikgahlego tša sehlopha goba legoro la batho;
(d)	mang le mang yoo a emelago dikgahlego tša setšhaba; le
(e)	mokgatlo wo o emelago dikgahlego tša maloko a wona.
39	Tlhathollo ya Molao wa Ditokelo
(1)	Ge go hlathollwa Molao wa Ditokelo, kgorotsheko, lekgotlatshekišo la setšo goba foramo-
(a)	e swanetše go tšwetšapele melao yeo e laolago setšhaba seo se lokologilego sa temokrasi se se theilwego godimo ga seriti sa botho, tekatekano le tokologo;
(b)	e swanetše go hlokomela molao wa boditšhabatšhaba; le
(c)	 go ka no diriša molao wa dinaga tše dingwe.
(2)	Ge go hlathollwa molao ofe goba ofe, le ge go dirwa molaotlwaelo goba molao wa setšo, kgorotsheko efe goba efe, kgorotshekišo efe goba efe ya setšo goba foramo di swanetše go tšwetšapele phišego, sephetho le maikemišetšo a Molao wa Ditokelo.
(3)	Molao wa Ditokelo ga o ganetše go ba gona ga ditokelo tše dingwe goba ditokologo tšeo di amogelwago goba di fiwago ke molaotlwaelo, molao wa setšo goba molao, ge fela di nyalelana le Molao wo.
KGAOLO YA 3
MMUŠO WA MOHLAKANELWA (krl 40-41)
40	Mmušo wa Repabliki
(1)	Mo Repabliking, mmušo o theilwe e le wa setšhaba, wa profense le wa selegae, yeo e ikemego, e šomišanago ebile e tswalanego.
(2)	Makala ka moka a mmušo a swanetše go obamela le go latela melao yeo e lego Kgaolong ye gomme a sepediše mediro ya ona ka gare ga mellwane ya Kgaolo ye.
41	Melao ya mmušo wa mohlakanelwa le dikamano tša semmušo
(1)	Makala ka moka a mmušo le mekgatlo ka moka ya mmušo ye e lego ka gare ga lekala le lengwe le le lengwe di swanetše go -
(a)	lota khutšo, botee bja setšhaba le go se aroganyege ga Repabliki;
(b)	go babalela boiketlo bja batho ba Repabliki;
(c)	go aba mmušo wa go šoma gabotse, wa phatlalatša, wa maikarabelo le wa tšhomišano Repabliking ka bophara;
(d)	botegela Molaotheo, Repabliki, le batho ba yona;
(e)	hlompha maemo a molaotheo, dihlongwa, maatla le mediro ya mmušo makaleng a mangwe;
(f)	se iphe maatla a itšego goba mediro ka ntle le yeo ba e filwego go ya ka Molaotheo;
šomiša maatla a tšona le go dira mediro ya wona ka tsela yeo e sa tshwenyanego le seriti sa tikologo, sa mediro goba sa dihlongwa tša mmušo makaleng a mangwe; le
	(h)	go šomišana gotee ka go tshepana le ka moya o mobotse ka go-
(i)	tliša kamano ya segwera;
	(ii	thušana le go eletšana;
(iii)	tsebišana ka ga, le go rerišana ditabeng tšeo e lego tša kgahlego ya tšona ka moka;
(iv)	kopanya ditiro le melao ya tšona mmogo;
(v)	obamela ditshepedišo tšeo go kwanwego ka tšona; le
(vi)	go efoga go tšeelana dikgato tša semolao magareng ga tšona.
(2)	Molao wa Palamente o swanetše go-
(a)	hloma goba go beakanyetša dibopego le dihlongwa go tšwetšapele le go nolofatša dikamano magareng ga	dikgoro tša mmušo; le
(b)	go beakanyetša mekgwa le ditshepedišo tša maswanedi tša go nolofatša tharollo ya diphapano magareng ga dikgoro tša mmušo.
(3)	Setho sa mmušo seo se nago le phapano ya gareng ga dikgoro tša mmušo se swanetše go leka ka moo se ka kgonago go rarolla phapano yeo ka go tšea mekgwa le ditshepedišo tšeo di beetšwego mabaka ao, gomme se tšee matsapa ka moka pele ga ge se ka kgopela kgorotsheko go rarolla phapano yeo.
(4)	Ge kgorotsheko e se ya kgotsofala gore ga se go phethwe dinyakwa tša karolo ya (3), e ka bušetša phapano yeo morago go ditho tša mmušo tšeo di amegago.
KGAOLO YA 3
MMUŠO WA MOHLAKANELWA (krl 40-41)
40	Mmušo wa Repabliki
(1)	Mo Repabliking, mmušo o theilwe e le wa setšhaba, wa profense le wa selegae, yeo e ikemego, e šomišanago ebile e tswalanego.
(2)	Makala ka moka a mmušo a swanetše go obamela le go latela melao yeo e lego Kgaolong ye gomme a sepediše mediro ya ona ka gare ga mellwane ya Kgaolo ye.
41	Melao ya mmušo wa mohlakanelwa le dikamano tša semmušo
(1)	Makala ka moka a mmušo le mekgatlo ka moka ya mmušo ye e lego ka gare ga lekala le lengwe le le lengwe di swanetše go -
(a)	lota khutšo, botee bja setšhaba le go se aroganyege ga Repabliki;
(b)	go babalela boiketlo bja batho ba Repabliki;
(c)	go aba mmušo wa go šoma gabotse, wa phatlalatša, wa maikarabelo le wa tšhomišano Repabliking ka bophara;
(d)	botegela Molaotheo, Repabliki, le batho ba yona;
(e)	hlompha maemo a molaotheo, dihlongwa, maatla le mediro ya mmušo makaleng a mangwe;
(f)	se iphe maatla a itšego goba mediro ka ntle le yeo ba e filwego go ya ka Molaotheo;
šomiša maatla a tšona le go dira mediro ya wona ka tsela yeo e sa tshwenyanego le seriti sa tikologo, sa mediro goba sa dihlongwa tša mmušo makaleng a mangwe; le
	(h)	go šomišana gotee ka go tshepana le ka moya o mobotse ka go-
(i)	tliša kamano ya segwera;
(ii)	thušana le go eletšana;
(iii)	tsebišana ka ga, le go rerišana ditabeng tšeo e lego tša kgahlego ya tšona ka moka;
(iv)	kopanya ditiro le melao ya tšona mmogo;
(v)	obamela ditshepedišo tšeo go kwanwego ka tšona; le
(vi)	go efoga go tšeelana dikgato tša semolao magareng ga tšona.
(2)	Molao wa Palamente o swanetše go-
(a)	hloma goba go beakanyetša dibopego le dihlongwa go tšwetšapele le go nolofatša dikamano magareng ga	dikgoro tša mmušo; le
(b)	go beakanyetša mekgwa le ditshepedišo tša maswanedi tša go nolofatša tharollo ya diphapano magareng ga dikgoro tša mmušo.
(3)	Setho sa mmušo seo se nago le phapano ya gareng ga dikgoro tša mmušo se swanetše go leka ka moo se ka kgonago go rarolla phapano yeo ka go tšea mekgwa le ditshepedišo tšeo di beetšwego mabaka ao, gomme se tšee matsapa ka moka pele ga ge se ka kgopela kgorotsheko go rarolla phapano yeo.
(4)	Ge kgorotsheko e se ya kgotsofala gore ga se go phethwe dinyakwa tša karolo ya (3), e ka bušetša phapano yeo morago go ditho tša mmušo tšeo di amegago.
KGAOLO YA 4
PALAMENTE (krl 42-82)
42	Sebopego sa Palamente
(1)	Palamente e bopša ke - 
(a)	Kopano ya Maloko a Palamente ka Moka; le
(b)	Khansele ya Setšhaba ya Diprofense.
(2)	Kopano ya Maloko a Palamente ka Moka le Khansele ya Setšhaba ya Diprofense mo go hlangweng ga melao go ya ka tshepedišo yeo e beakantšwego ka Molaotheong. 
(3)	Kopano ya Maloko a Palamente ka Moka e kgethelwa go emela batho le go kgonthišiša pušo ka batho ka tlase ga Molaotheo. E dira seo ka go kgetha Mopresitente, ka go hloma lekgotla la setšhaba moo go ahlaahlwago merero ya setšhaba, ka go hlama melao le go sekaseka le go hlokomela ditiro tša khuduthamaga.
(4)	Khansele ya Setšhaba ya Diprofense e emela diprofense go kgonthišiša gore dikgahlego tša tšona di elwa hloko makaleng a mmušo wa naga. E dira se ka go kgatha tema tlhamong ya melao ya setšhaba le ka go hloma foramo ya setšhaba moo go ahlaahlwago merero ya setšhaba yeo e amago diprofense.
(5)	Mopresidente a ka bitša Palamente go tsenela pitšo yeo e sego ya mehleng nako ye nngwe le ye nngwe go ahlaahla merero ye bohlokwa.
(6)	Tulo ya Palamente ke Cape Town, e fela Molao wa Palamente, wo o hlamilwego go ya ka karolo ya 76 (1)	le ya(5)	o ka tšea sephetho sa gore tulo ya Palamente e be lefelong le lengwe.
43	Maatla a go hlama melao ya Repabliki
	Mo Repabliking, maatla a go hlama melao -
(a)	a mmušo wa naga ka bophara, a magetleng a Palamente, bjalo ka ge go hlagišitšwe karolong ya 44;
(b)	a mmušo wa diprofense a magetleng a	makgotlapeamelao a profense bjale ka ge go hlagišitšwe	karolong ya 104; le
(c)	a mebušoselegae, a magetleng a Dikhansele tša Bommasepala, bjalo ka ge go hlagišitšwe karolong ya 156.
44	Maatla a go hlama melao ya naga 
(1)	Maatla a go hlama melao ya naga bjalo ka ge a beilwe magetleng a Palamente -
(a)	go fa Kopano ya Maloko a Palamente ka Moka maatla a go-
(i)	fetola Molaotheo ;
(ii)	bea molao mabapi le morero ofe goba ofe, go akaretšwa taba ya lehlakore la tirelo leo le beilwego ka Šetulong ya 4, eupša go sa akaretšwe, go ya ka karolwana ya (2), taba ya lehlakore la tirelo le le beilwego ka Šetulong ya 5; le 
(iii)	go aba maatla afe goba afe a yona a go hlama melao, ka ntle le maatla a go kgona go fetola Molaotheo, go lekgotla lefe goba lefe la go hlama melao lekaleng le lengwe la mmušo; le 
(b)	go fa Khansele ya Setšhaba ya Diprofense maatla a -
(i)	a go kgatha tema phetolong ya Molaotheo go ya ka karolo ya 74;
(ii)	a go fetiša, go ya ka karolo ya 76, melao mabapi le morero ofe goba efe wa tiragatšo wo o welago ka go Šetulo 4, le morero ofe goba ofe wo o nyakwago ke Molaotheo gore o hlangwe go ya ka karolo ya 76; le
(iii)	go šetša, go ya ka karolo ya 75, molao ofe goba ofe wo o hlamilwego ke Kopano ya Maloko a Palamente ka Moka.
(2)	Palamente e ka tsenagare, ka go hlama molao go ya ka karolo ya 76 (1), mabapi le taba yeo e welago ka gare ka lehlakore la modiro leo le tšweleditšwego Šetulong ya 5, ge go - 
(a)	go boloka tšhireletšo ya setšhaba; 
(b)	go boloka botee bja ekonomi; 
(c)	go boloka maemo a bohlokwa a setšhaba; 
(d)	go hloma maemo a mannyane ao a tsomegago phethagatšong ya ditirelo; goba 
(e)	go thibela tiro ya go se kwagale ye e tšerwego ke profense mme e ka amago gampe dikgahlego tša profense e nngwe goba naga ka bophara.
(3)	Molao mabapi le taba yeo e tlogago e tsomega go, goba ka sewelo go, tiragatšo e kaone ya maatla ao a amago morero ofe goba ofe wo o tšweleditšwego Šetulong ya 4 ke, go mehola ka moka, molao mabapi le morero wo o tšweleditšwego Šetulong ya 4.
(4)	Ge e šomiša maatla a yona a go hlama melao, Palamente e tlengwa fela ke Molaotheo, gomme e swanetše go šoma go ya ka, le ka gare ga mellwane ya Molaotheo
45	Melawana ya mohlakanelwa le ditaelo le dikomiti tša mohlakanelwa 
(1)	Kopano ya Maloko a Palamente ka Moka le Khansele ya Setšhaba ya Diprofense di swanetše go hloma komiti ya mohlakanelwa ya go hlama melawana le ditaelo tša mabapi le merero ya mohlakanelwa ya Kopano ya Maloko a Palamente ka Moka le ya Khansele, go akaretšwa melawana le ditaelo- 
(a)	tša go beakanya mokgwa wa go sepediša tsela ya go dira melao, go akaretšwa go bewa ga mellwane ya dinako tšeo go swanetšego go phethwa kgato ye nngwe le ye nngwe tshepedišong yeo; 
(b)	go hloma dikomiti tša mohlakanelwa tšeo di bopšago ke baemedi ba ba tšwago go Kopano ya Maloko a Palamente ka Moka le Khansele gore di lekodišiše le go bega ka ga Melaokakanywa yeo e ukangwego	dikarolong tša 74 le 75 yeo e amago dikomiti tšeo;
(c)	go hloma komiti ya mohlakanelwa go lekodišiša Molaotheo, bonyane ngwaga ka ngwaga; le	
(d)	go laola merero ya- 
(i)	komiti ya mohlakanelwa ya melawana; 
(ii)	Komiti ya Poelanyo; 
(iii)	Komiti ya go sekaseka Molaotheo; le 
(iv)	dikomiti dife goba dife tša mohlakanelwa tše di hlomilwego go ya ka temana ya (b).
(2)	Maloko a Kabinete, maloko a Kopano ya Maloko a Palamente ka Moka le baemedi ba Khansele ya Setšhaba ya Diprofense ba na le ditokelo le dikgahlego pele ga komiti ya mohlakanelwa ya Kopano ya Maloko a Palamente le Khansele bjalo ka ge ba na le tšona pele ga Kopano ya Maloko a Palamente ka Moka goba le Khansele. 
Kopano ya Maloko a Palamente ka Moka (krl 46-59)
46	Sebopego le dikgetho
(1)	Go eya ka Šetulo ya 6A, Kopano ya Maloko a Palamente ka Moka	e bopša ke basadi le banna bao ba sego ka fase ga 350 le 400, bao ba kgethilwego go ba maloko go ya ka mabaka a lenaneokgetho leo le- 
(a)	beilwego ka molao wa naga;
(b)	theilwego godimo ga lenaneo la bakgethi la mang le mang;
(c)	hlagišago bogolo bja mengwaga ya go bouta e 18; le 
(d)	hlolago, ka kakaretšo, boemedi bja go lekalekana 
[Karolwana ya (1)	e fetotšwe ke karolwana ya Molao wa Bolesome wa Go fetoša Molao wa 2003 le karolo 1 ya Molao wa Bolesomehlano wa Go fetoša Molao wa 2008.]
(2)	Molao wa Palamente o swanetše go hlagiša molao wa go bala woo o laolago palo ya maloko a Kopano ya Setšhaba ya Maloko a Palamente. 
 [Karolwana ya (1)	e fetotšwe ke karolwana ya 1 ya Molao wa 2 wa 2003.]
47	Boleloko
(1)	Moagi yo mongwe le yo mongwe yo a nago le ditshwanelo tša go boutela Kopano ya Maloko a Palamente ka Moka o na le tshwanelo ya go ba leloko la Kopano ya Maloko a Palamente ka Moka; ka ntle le	-
(a)	mang le mang yo a kgethilwego ke, goba a lego tirelong ya, mmušo gomme a amogela moputso mabapi le maemo ao goba tirelo yeo, ntle le-
(i)	Mopresidente, Motlatšamopresitente, Ditona le Batlatšatona; le 
(ii)	bahlankedi ba bangwe bao mešomo ya bona e sepelelanago le mešomo ya leloko la Kopano ya Maloko a Palamente ka Moka, gomme e bonwe bjalo ka ge e sepelelana le mešomo yeo go ya ka molao wa naga;
(b)	baemedi ba go ya go ile ba Khansele ya Setšhaba ya Diprofense, goba maloko a lekgotlapeamelao la profense goba Khansele ya Mmasepala; 
(c)	bakoloti bao ba sego ba fiwa thušo ya tsošološo;
(d)	mang le mang yo a bonwego ke kgorotsheko ya Repabliki gore ga se a felela monaganong; goba 
(e)	mang le mang, morago ga ge karolwana ye ya molao e se no tsena tirišong, a ka bonwago molato gomme a romelwa kgolegong nako ya go feta dikgwedi tše 12 ka ntle le kgetho ya go lefa faene, Repabliking goba ka ntle ga Repabliki ge e le gore tiro yeo e be e ka ba molato Repabliking; efela go se na yoo a swanetšego go tšewa bjalo ka motho yo a golegilwego go fihla ge boipiletšo bja gagwe kgahlanong le kotlo bo šetše bo kwelwe goba go fihla ge nako ya boipiletšo e fetile. Go se sa dumelelwa go ya ka temana ye go fela ka morago ga mengwaga e mehlano morago ga ge kgolego e fedile.
(2)	Motho yo a se nago ditshwanelo tša go ba leloko la Kopano ya Maloko a Palamente ka Moka go ya ka karolwana ya (1)(a)	goba ya (b)	a ka ba nkgetheng wa Kopano ya Maloko a Palamente ka Moka, go e ya ka mellwane ye itšego goba mabaka ao a beilwego ke molao wa setšhaba. 
(3)	Motho o lahlegelwa ke boleloko bja Kopano ya Maloko a Palamente ka Moka ge motho yoo a- 
(a)	a kgaotša go ba le ditshwanelo;	
(b)	a sa be gona Kopanong ya Maloko a Palamente ka Moka ntle le tumelelo mabakeng ao melawana le ditaelo tša Kopano ya Maloko a Palamente ka Moka	di laelago go lahlegelwa ke boleloko; goba
(c)	a tlogela go ba leloko la phathi yeo e kgethilego motho yoo bjalo ka leloko la Kopano ya Maloko ka Moka a Palamente, ntle le ge leloko leo ebile leloko la phathi	e nngwe go ya ka Šetulo ya 6A.
[Karolwana ya (3)	e tšeetšwe legato ke karolwana ya 2 ya Molao wa 2 wa 2003.]
(4)	Dikgoba ka go Kopano ya Maloko a Palamente ka Moka di swanetše go tlatšwa go ya ka molao wa naga.
48	Boikano goba boitlamo
	Pele maloko a Kopano ya Maloko a Palamente ka Moka a ka thoma go phethagatša mešomo ya ona ka Kopanong ya Maloko a Palamente ka Moka, a swanetše go ikana goba go itlama go botegela Repabliki le go obamela Molaotheo go ya ka Šetulo 2. 
49	Lebaka la Kopano ya Maloko a Palamente ka Moka
(1)	Kopano ya Maloko a Palamente ka Moka e kgethwa lebaka la mengwaga e mehlano. 
(2)	Ge Kopano ya Maloko a Palamente ka Moka e ka phatlalatšwa go ya ka Karolo ya 50, goba ya phatlalala ge lebaka la yona le fedile, Mopresitente, ka kgoeletšo, o swanetše go bitša le go bea matšatšikgwedi a dikgetho, tšeo di swanetšego go swarwa ka gare ga matšatši a 90 ka morago ga ge Kopano ya Maloko a Palamente ka Moka e se no phatlalalatšwa goba ge lebaka la yona le fedile. Kgoeletšo yeo e	ipeletšago goba e beago matšatšikgwedi a dikgetho e ka dirwa pele goba morago ga go fela ga lebaka la Kopano ya Maloko a Palamente ka Moka.
 [Karolwana ya (2)	e tšeetšwe legato ke karolwana ya 1 ya Molao wa 2 wa 1999.]
(3)	Ge dipoelo tša dikgetho tša Kopano ya Maloko a Palamente ka Moka di sa begwe ka gare ga nako ye e beilwego go ya ka Karolo ya 190, goba ge dikgetho di ka phaelwa thoko ke kgorotsheko, Mopresitente, ka kgoeletšo, o swanetše go bitša le go bea letšatši la dikgetho tše dingwe, tšeo di swanetšego go swarwa ka gare ga matšatši a 90 a go fela ga nako yeo goba ga letšatšikgwedi leo dikgetho di phaetšwego thoko ka lona. 
(4)	Kopano ya Maloko a Palamente ka Moka e dula e na le maatla a go šoma go tloga letšatšing leo e phatlaladitšwego ka lona, goba ge lebaka la yona le fedile, go fihla letšatši la pele ga letšatši la mathomo la dikgetho tša Kopano ya Maloko a Palamente ka Moka.
50	Phatlalatšo ya Kopano ya Maloko a Palamente ka Moka pele ga go fela ga lebaka la yona 
(1)	Mopresitente o swanetše go phatlalatša Kopano ya Maloko a Palamente ka Moka- 
(a)	Kopano ya Maloko a Palamente ka Moka e tšere sephetho sa go phatlalala, ka thekgo ya bouto ya bontši bja maloko a yona; le ge 
(b)	mengwaga e meraro e fetile morago ga go kgethwa ga Kopano ya Maloko a Palamente ka Moka.
(2)	Mopresitente wa Monaoswere o swanetše go phatlalatša Kopano ya Maloko a Palamente ka Moka ge- 
(a)	go na le sekgoba ka ofising ya Mopresitente; gomme 
(b)	Kopano ya Maloko a Palamente ka Moka e palelwa ke go kgetha Mopresidente o mofsa ka gare ga matšatši a 30 morago ga ge sekgoba se tšweletše. 
51	Dinako tša go dula le tša maikhutšo 
(1)	Morago ga dikgetho, go dula la mathomo ga Kopano ya Maloko a Palamente ka Moka go swanetše go direga nakong le letšatšikgwedi leo le beilwego ke Moahlodimogolo, efela e sego go feta matšatši a 14 morago ga pego ya dipoelo tša dikgetho. Kopano ya Maloko a Palamente ka Moka e ka ipeela dinako tša yona tša go dula le tša maikhutšo. 
 [Karolwana ya (1)	e tšeetšwe legato ke karolwana ya 1 ya Molao wa 34 wa 2001.]
(2)	Mopresitente a ka bitša Kopano ya Maloko a Palamente ka Moka go tla tulong ye e sego ya mehleng nakong ye nngwe le ye nngwe go tla go rera ditaba tšeo e sego tša mehleng. 
(3)	Go dula ga Kopano ya Maloko a Palamente ka Moka di dumeletšwe mafelong a mangwe ao e sego tulong ya Palamante fela ge go lebeletšwe dikgahlego tša setšhaba, tšhireletšo goba boiketlo, le fela ge se se hlagišitšwe melawaneng le ditaelong tša Kopano ya Maloko a Palamente ka Moka. 
52	Spikara le Motlatšaspikara
(1)	Ge e dula la mathomo morago ga go kgethwa, goba ge go tsomega go tlatša sekgala se se itšego, Kopano ya Maloko a Palamente ka Moka e swanetše go kgetha Spikara le Motlatšaspikara go tšwa malokong a yona.	
(2)	 Moahlodimogolo o swanetše go swara marapo ge go kgethwa Spikara, goba a kgethe moahlodi o mongwe go dira seo. Spikara sona se swara marapo ge go kgethwa Motlatšaspikara. 
[Karolwana ya (2)	e tšeetšwe legato ke 2 ya Molao wa 34 wa 2001.]
(3)	Tshepedišo yeo e beilweng go Karolo ya A ya Šetulo 3 e šomišwa ge go kgethwa Spikara le Motlatšaspikara. 
(4)	Kopano ya Maloko a Palamente ka Moka e ka tloša Spikara goba Motlatšaspikara mošomong ka go tšea sephetho se se bjalo. Bontši bja maloko a Kopano ya Maloko a Palamente ka Moka bo swanetše go ba gona ge go tšewa sephetho. 
(5)	Go ya ka melawana le ditaelo tša yona, Kopano ya Maloko a Palamente ka Moka e ka kgetha batho bao ba ka swarago marapo go tšwa malokong a yona go thuša Spikara le Motlatšaspikara. 
53	Diphetho
(1)	Ka ntle le ge Molaotheo o laela ka tsela e nngwe -
(a)	bontši bja maloko a Kopano ya Maloko a Palamente ka Moka bo swanetše go ba gona pele ga ge bouto e ka tšewa mabapi le Molaokakanywa goba go fetolwa ga Molaokakanywa;
(b)	bonyane bja maloko a teetharong bo swanetše go ba gona pele ga ge go ka boutelwa taba efe goba efe Kopanong ya Maloko a Palamente ka Moka; gomme 
(c)	ditaba ka moka tšeo di lego pele ga Kopano ya Maloko a Palamente ka Moka di phethwa ka bontši bja dibouto tšeo di dirilwego.
(2)	Leloko la Kopano ya Maloko a Palamente ka Moka leo le swerego marapo kopanong ya Kopano ya Maloko a Palamente ka Moka ga le na bouto ya ngangišano, efela- 
(a)	le swanetše go dira bouto ya makgaolakgang ge go na le palo ya diboutu tša go lekana mahlakoreng ka moka a taba; gomme
(b)	a ka dira bouto ya ngangišano ge taba e swanetše go phethwa ka thekgo ya dibouto tša bonyane bja peditharong ya maloko a Kopano ya Maloko a Palamente ka Moka 
54	Ditokelo tša maloko a itšego a Kabinete le Batlatšatona ka go Kopano ya Maloko a Palamente ka Moka 
	Mopresitente le leloko le lengwe le le lengwe la Kabinete leo e sego leloko la Kopano ya Maloko a Palamente ka Moka ba ka, go e ya ka melawana le ditaelo tša Kopano ya Maloko a Palamente ka Moka, tsenela le go bolela ka Kopano ya Maloko a Palamente ka Moka, efela ga se ba swanela go bouta. 
[Karolo ya 54 e tšeetšwe legato ke karolwana ya 3 ya Molao wa 34 wa 2001.]
55	Maatla a Kopano ya Maloko a Palamente ka Moka 
(1)	Ge e šomiša maatla a yona a go hlama melao, Kopano ya Maloko a Palamente ka Moka e ka- 
(a)	hlokomela, hlama, fetola goba go gana molao wo itšego pele ga Kopano ya Maloko a Palamente ka; le
(b)	thoma goba go rulaganya melao, ka ntle le Melaokakanywa ya ditšhelete.
(2)	Kopano ya Maloko a Palamente ka Moka e swanetše go loga maano a-
(a)	go kgonthišiša gore ditho ka moka tša khuduthamaga ya mmušo lekaleng la mmušo wa setšhaba di ikarabela go yona; le 
(b)	go dula e hlokometše diphošo tša- 
(i)	tirišo ya maatla a khuduthamaga ya setšhaba,	go akaretšwa tiragatšo ya melao; le	
(ii)	lefapha le lengwe le le lengwe la mmušo.
56	Bohlatse goba tshedimošo pele ga Kopano ya Maloko ka Moka a Palamente 
	Kopano ya Maloko a Palamente ka Moka goba e nngwe ya dikomiti tša yona e ka-
(a)	bitša motho yo mongwe le yo mongwe go tla pele ga yona go fa bohlatse ka boikano goba ka go itlama, goba go tliša ditokumente; 
(b)	nyaka gore motho yo mongwe le yo mongwe goba sehlongwa go bega go yona; 
(c)	gapeletša, go ya ka molao wa naga goba ka melawana le ditaelo, motho yo mongwe le yo mongwe goba sehlongwa se sengwe go obamela dipitšo goba senyakwa go ya ka temana ya (a)	goba ya (b); le 
(d)	go amogela dingongorego, dikgopelo goba ditšhišinyo go tšwa go batho ba bangwe bao ba nago le kgahlego goba dihlongwa.
57	Dithulaganyo tša ka gare, ditherišano le ditshepedišo tša Kopano ya Maloko a Palamente ka Moka 
(1)	Kopano ya Maloko a Palamente ka Moka e ka-
(a)	beakanya le go laola dithulaganyo tša yona tša ka gare, ditshepetšo le ditshepedišo; le go 
(b)	hlama melawana le ditaelo tšeo di amago mešomo ya yona, go lebeletšwe temokrasi ya kemedi le go kgatha tema, maikarabelo, ponagatšo le go ba le seabe setšhabeng. 
(2)	Melawana le ditaelo tša Kopano ya Maloko a Palamente ka Moka di swanetše go beakanyetša-
(a)	go hlongwa, tlhamo, maatla, mešomo, tshepedišo, le lebaka la dikomiti tša yona;
(b)	go kgathatema ditshepedišong tša Kopano ya Maloko a Palamente ka Moka le dikomiti tša yona tša diphathi ka moka tše nnyane tše di emetšwego Kopano ya Maloko a Palamente ka Moka, ka tsela yeo e sepelelanago le temokrasi;
(c)	thušo ya ditšhelete le ya taolo go phathi ye nngwe le ye nngwe yeo e emetšwego ka Kopanong ya Maloko a Palamente ka Moka go ya ka tekatekano ya boemedi, go dira gore phathi le moetapele wa yona e phethe mediro ya yona ka Kopanong ya Maloko a Palamente ka Moka tshwanelo; le
(d)	 	kamogelo ya moetapele wa phathi e kgolo ya kganetšo ka Kopanong ya Maloko a Palamente ka Moka bjalo ka Moetapele wa Kganetšo. 
58	Tshwanelo
(1)	Maloko a Kabinete, Batlatšatona le maloko a Kopano ya Maloko a Palamente ka Moka -
a na le tokologo ya go bolela ka Kopanong le ka dikomiting tša yona, ge fela go šetšwa melawana le ditaelo tša yona; gomme
ba ka se išwe tshekong ka melato ya segae goba ya bosenyi, go swarwa, go golegwa goba ditshenyo tša- 
(i)	se sengwe le se sengwe seo ba se boletšego, ba se tšweleditšego pele goba ba se išitšego Kopanong ya Maloko a Palamente ka Moka goba go e nngwe ya dikomiti tša yona; goba	
(ii)	se sengwe le se sengwe seo se utullotšwego ka lebaka la seo ba se boletšego, ba se tšweleditšego pele goba ba se išitšego Kopanong ya Maloko a Palamente ka Moka goba go e nngwe ya dikomiti tša yona; goba 
[Karolwana ya (1)	e fetotšwe ke karolwana ya 4 ya Molao wa 34 wa 2001.]
(2)	Ditshwanelo le ditokologo tša Kopano ya Maloko a Palamente ka Moka, maloko a Kabinete le maloko a Kopano ya Maloko a Palamente ka Moka di tla laolwa ke molao wa naga. 
(3)	Meputso, diputseletšo le mehola tšeo di lefelwago maloko a Kopano ya Maloko a Palamente ka Moka di dirwa thwii go tšwa Sekhwameng sa Ditseno tša Setšhaba. 
59	Phihlelelo le go tšea karolo ga setšhaba ka go Kopano ya Maloko a Palamente ka Moka 
(1)	Kopano ya Maloko a Palamente ka Moka e swanetše go-
(a)	nolofatša go tšea karolo ga setšhaba go hlameng ga melao le ditshepedišo tše dingwe tša Kopano ya Maloko a Palamente ka Moka le dikomiti tša yona; le 
(b)	go dira mediro ya yona phatlalatša le go dula ga yona, le tša dikomiti tša yona pepeneneng, eupša go ka tšewa magato a go kwala- 
(i)	go laola go tsena ga batho, go akaretšwa le go tsena ga boraditaba ka Kopanong ya Maloko a Palamente ka Moka le ka dikomiting tša yona; le	
(ii)	go beakanyetša go phuruphutšwa ga motho o mongwe le o mongwe, mo go swanetšego, kganetšo ya go tsena ka, goba go ntšhiwa ga motho ofe goba ofe.	
(2)	Kopano ya Maloko a Palamente ka Moka e ka se kgetholle batho, go akaretšwa boraditaba, tulong ya komiti ka ntle le ge seo se kwešišega ebile go le molaong go dira bjale setšhabeng seo se lokologilego sa temokrasi. 
Khansele ya Setšhaba ya Diprofense (karolwana 60-72)
60	Sebopego sa Khansele ya Setšhaba 
(1)	Khansele ya Setšhaba ya Diprofense e bopša ke boemedi botee go tšwa
profenseng ye nngwe le ye nngwe bjoo bo nago le maloko a lesome. 
(2)	Baemedi bao ba lesome ke-
(a)	ba bane ba e sego ba mehleng ba akaretša-
(i)	Tonakgolo ya profense goba, ge Tonakgolo a se gona, leloko le lengwe le le lengwe la Lekgotlapeamelao la Profense leo le kgethilwego ke Tonakgolo go ba gona dinakong tšohle goba lebakeng le itšego Khanseleng ya Setšhaba ya Diprofense; le 
(ii)	baemedi ba bangwe ba bararo ba ba kgethegilego; le
(b)	maloko a go ya go ile a tshelelago ao a kgethilwego go ya ka karolo ya 61 (2). 
(3)	Tonakgolo ya profense goba ge Tonakgolo a se gona, leloko la kemedi ya profense leo le kgethilwego ke Tonakgolo, le etapele kemedi. 
61	Kabo ya baemedi
(1)	Diphati tšeo di emetšwego ka lekgotlapeamelaong la profense di na le tokelo ya go ba le baemedi boemeding bja profense go ya ka dipalapalo tšeo di beilwegoo go Karolo ya B ya Šetulo 3. 
(2)(a)	Lekgotlapeamelao la profense le swanetše, ka gare ga matšatši a 30 ka morago ga dipoeleo tša dikgetho tša lekgotlapeamelao la-
(i)	 	laola, go ya ka melao ya naga, gore ke maloko a makae a phathi ye nngwe le ye nngwe ao e tlogo ba baemedi ba go ya go ile le gore ke a makae ao e tlogo ba baemedi ba ba kgethegilego; le 
(ii)	go kgetha baemedi ba go ya go ile go ya ka ditšhišinyo tša diphathi. 
(b)	Ge sebopego sa lekgotlapeamelao la profense le fetošwa mabakeng a diphetogo tša boleloko bja diphathi, go kopana ga diphathi, karoganyo ya diphathi go karoganyo le go kopana ga diphathi ka gare ga lekgotlapeamelao leo, le swanetše gore ka gare ga matšatši a 30 ka morago ga phetošo yeo-
(i)	laola, go ya ka melao ya naga yeo go boletšwego ka yona temaneng ya (a)	gore ke maloko a makae a phathi ye nngwe le ye nngwe ao e tlogo ba baemedi ba go ya go ile le gore ke a makae ao e tlogo ba baemedi ba ba kgethegilego; le 
(ii)	kgetha baemedi ba go ya go ile go ya ka ditšhišinyo tša diphathi.
[Temena (b) e phumotšwe ke karolo 2 ya Molao wa Bolesomenne wa Go fetoša Molao wa 2008 gomme ya emelwa ke karolo 2 ya Molao wa Bolesomenne wa Go fetoša Malao wa 2008] le karolwana 4 ya Molao wa Bolesomenne wa Go fetoša Molao wa 2008 le karolo 3 ya Molao wa Bolesomehlano wa Go fetoša Molao wa 2008]
(3)	Molao wa naga wo o ukangwego karolwaneng ya (2)(a)	o swanetše go netefatša go kgathatema ga diphathi tše dinnyane go bobedi go bopeng ga boemedi bja go ya go ile le bjo bo kgethegilego go ya ka mokgwa wo o sepelelanago le temokrasi. 
(4)	Lekgotlapeamelao, ka tumelelo ya Tonakgolo le baetapele ba diphathi tšeo di nago le tshwanelo ya go ba le baemedi bao ba kgethegilego baemeding ba profense, le swanetše go kgetha baemedi bao e ba kgethegilego, go ya ka moo go tlogo nyakega nako le nako, go tšwa go maloko a lekgotlapeamelao.
62	Baemedi ba go ya go ile
(1)	Motho yo a kgethilwego go ba moemedi wa go ya go ile o swanetše go ba le tokelo ya go ka ba leloko la lekgotlapeamelao la profense. 
(2)	Ge motho yoo e lego leloko la theramelao la profense a kgethwa go ba moemedi wa go ya go ile, motho yoo o lahlegelwa ke boleloko bja lekgotlapeamelao. 
(3)	Baemedi ba go ya go ile ba kgethwa lebaka le le felago- 
ka bonako pele ga tulo ya mathomo ya lekgotlapeamelao la profense ka morago ga dikgetho tše di latelago; goba
letšatši pele ga go kgethwa ga baemedi ba go ya go ile go ya ka karolo ya 61 (2)(b)(ii) ge e dirišwa.
[Karolwana ya (3)	e tšeetšwe legato ke karolwana ya 2 ya Molao wa 21 wa 2002.]
(4)	Motho o felelwa ke go ba leloko la go ya go ile ge motho yoo -
a se a hlwe a na le tshwanelo ya go ba leloko la lekgotlapeamelao la profense ka lebaka lefe goba lefe ka ntle le la gore o kgethetšwe go ba moemedi wa go ya go ile;
a eba leloko la Kabinete;
a lahlegetšwe ke thekgo ya lekgotlapeamelao la profense gomme a bušeditšwe morago ke phathi ya go mo kgetha;
a se sa hlwa e le leloko la phathi yeo e mo kgethilego gomme a bušeditšwe morago ke phathi yeo; goba
a se gona Khanseleng ya Setšhaba ya Diprofense,	ka ntle le tumelelo moo e lego gore melawana le ditaelo tša Khansele di laela go lahlegelwa ke setulo sa go ba moemedi wa go ya go ile. 
(5)	Dikgoba tšeo di bago gona gare ga baemedi ba go ya go ile di swanetše go tlatšwa go ya ka mabaka a melao ya naga. 
(6)	Pele ga ge baemedi ba go ya go ile ba ka thoma go phetha mešomo ya bona Khanseleng ya Setšhaba ya Diprofense, ba swanetše go ikana goba go itlama go botegela Repabliki le go obamela Molaotheo, go ya ka Šetulo 2. 
63	Ditulo tša Khansele ya Setšhaba
 (1)	Khansele ya Setšhaba ya Diprofense e ka rulaganya dinako le lebaka la ditulo tša yona le mabaka a yona a maikhutšo.
(2)	Mopresidente a ka bitša Khansele ya Setšhaba ya Diprofense, go tla tulong yeo e sego ya mehleng go tlo rera ditaba tše e sego tša mehleng.
(3)	Go dula ga Khansele ya Setšhaba ya Diprofense mafelong a mangwe ntle le Palamenteng go ka dumelelwa fela mabakeng a dikgahlego tša Setšhaba, tšhireletšo goba boiketlo, gape ge fela seo se dumeletšwe go ya ka melawana le ditaelo tša Khansele. 
64	Modulasetulo le Batlatšamodulasetulo 
(1)	Khansele ya Setšhaba ya Diprofense e swanetše go kgetha Modulasetulo le Batlatšamodulasetulo ba babedi go tšwa baemeding ba yona.
(2)	Modulasetulo le o tee wa Batlatšamodulasetulo ba kgethwa go tšwa go baemedi ba go ya go ile lebaka la mengwaga e mehlano ka ntle le ge lebaka la bona la go ba baemedi le fela pejana ga moo.
(3)	Motlatšamodulasetulo o mongwe o kgethwa lebaka la ngwaga o tee, gomme o swanetše go latelwa ke moemedi yo a tšwago profenseng e nngwe, gore profense ye nngwe le ye nngwe e emelwe ka go šielana. 
(4)	Moahlodimogolo o swanetše go swara marapo kgethong ya Modulasetulo, goba a ka kgetha moahlodi o mongwe go phethagatša modiro woo. Modulasetulo o swara marapo kgethong ya Batlatšamodulasetulo.
[Karolwana ya (4)	e tšeetšwe legato ke karolwana ya 5 ya Molao wa 34 wa 2001.]
(5)	Tsela ya tshepedišo ye e beilwego go Karolo ya A ya Šetulo 3 e dirišwa kgethong ya Modulasetulo le Batlatšamodulasetulo.
(6)	Khansele ya Setšhaba ya Diprofense e ka tloša Modulasetulo goba Motlatšamodulasetulo setulong.
	(7)	Go ya ka melawana le ditaelo tša yona, Khansele ya Setšhaba ya Diprofense e ka kgetha, go tšwa go baemedi, badulasetulo go thuša Modulasetulo le Batlatšabadulasetulo.
65	Diphetho
 (1)	Ka ntle le ge seo se dumelelwa ke Molaotheo-
(a)	profense ye nngwe le ye nngwe e na le bouto e tee yeo e šomišwago ke hlogo ya boemedi legatong la profense; gomme	
(b)	ditaba ka moka tšeo di lego pele ka Khansele ya Setšhaba ya Diprofense di dumelelwa ge bonyane bja diprofense tše hlano bo boutetše go amogela taba yeo. 
(2)	Molao wa Palamente, wo o dirišwago go ya ka tshepedišo ye e beilwego go ya ka karolwana ya (1)	goba karolwana ya (2)	tša karolo ya 76, o swanetše go tliša tshepedišo ya go swana moo e lego gore makgotlapeamelao a diprofense a fa baemedi ba tšona maatla a go bouta legatong la tšona. 
66	Go kgatha tema ga maloko a khuduthamaga ya Setšhaba 
(1)	Maloko a Kabinete le Batlatšatona ba ka tsenela le gona ba ka bolela ka Khanseleng ya Setšhaba ya Diprofense, eupša ba ka se boute. 
(2)	Khansele ya Setšhaba ya Diprofense e ka nyaka gore leloko la Kabinete, Motlatšatona goba mohlankedi wa khuduthamaga ya naga goba wa khuduthamaga ya profense go tsenela kopano ya Khansele goba komiti ya Khansele.
67	Go kgatha tema ga baemedi ba dipušoselegae
	Baemedi ba nakwana ba ba sa fetego lesome bao ba kgethilwego ke dipušoselegae go ya ka karolo ya 163, go emela magorwana a go fapana a bommasepala, ba ka kgatha tema ge go nyakega mo ditherišanong tša Khansele ya Setšhaba ya Diprofense, eupša ba ka se boute. 
68	Maatla a Khansele ya Setšhaba
	Mo tšhomišong ya yona ya maatla a go hlama melao, Khansele ya Setšhaba ya Diprofense e ka- 
(a)	 	lekola, fetiša, fetoša, ya akanya diphetošo go goba ya gana molao ofe goba ofe woo o lego pele ga Khansele, go ya ka Kgaolo ye; 
(b)	 	ya thoma goba ya rulaganya go hlama molao wo o welago ka gare ga lefelo la tirišo leo le lego Šetulong 4 goba melao e mengwe yeo e ukangwego karolong ya 76(3), eupša e ka se kgone go thoma le go rulaganya Melaokakanywa ya ditšhelete. 
69	Bohlatse goba tshedimošo pele ga Khansele ya Setšhaba 
	Khansele ya Setšhaba ya Diprofense goba e nngwe ya dikomiti tša yona e ka-
(a)	bitša motho yo mongwe le yo mongwe go tšwelela pele ga yona goba go fa bohlatse a ikanne goba a itlamile goba go ntšha ditokumente;
(b)	nyaka gore sehlongwa sefe goba sefe goba motho go fa pego pele ga yona; 
(c)	gapeletša, go ya ka molao wa naga goba melawana le ditaelo, motho yo mongwe le yo mongwe goba sehlongwa go obamela dipitšo goba dinyakwa go ya ka temana ya (a)	goba (b); le 
(d)	go amogela dingongorego, dikgopelo goba ditšweletšwa bathong bafe goba bafe goba sehlongweng sefe goba sefe	seo se nago le kgahlego. 
70	Dithulaganyo tša ka gare, ditherišano le ditshepedišo tša Khansele ya Setšhaba
(1)	Khansele ya Setšhaba ya Diprofense e ka-
(a)	beakanya le go laola dithulaganyo tša yona tša ka gare, ditherišano le ditshepedišo; le go 
(b)	hlama melawana le ditaelo tšeo di amago mešomo ya yona, go lebeletšwe temokrasi ya kemedi le go kgatha tema, maikarabelo, ponagatšo le go ba le seabe setšhabeng. 
(2)	Melawana le ditaelo tša Khansele ya Setšhaba ya Diprofense e swanetše go beakanyetša-
(a)	go hlongwa, tlhamo, maatla, mešomo, tshepedišo, le lebaka la dikomiti tša yona;
(b)	go kgatha tema ga diprofense ka moka ditherišanong tša yona ka tsela yeo e sepeplelanago le temokrasi; le
(c)		go kgathatema ditherišanong tša Khansele ya Setšhaba ya Diprofense le dikomiti tša yona tša diphathi ka moka tše nnyane tše di emetšwego Khansele ya Setšhaba ya Diprofense, ka tsela yeo e sepelelanago le temokrasi, nako le nako ge taba e swanetše go phethwa go ya ka karolo ya 75.
71	Tshwanelo
(1)	Baemedi ba Khansele ya Setšhaba ya Diprofense, le batho bao ba ukangwego dikarolong tša 66 le 67 -
ba na le tokologo ya go bolela ka Khansele ya Setšhaba ya Diprofense le ka dikomiting tša yona, ge fela go šetšwa melawana le ditaelo tša yona; gomme
ba ka se išwe tshekong ka melato ya segae goba ya bosenyi, go swarwa, go golegwa goba ditshenyo tša- 
(i)	se sengwe le se sengwe seo ba se boletšego, ba se tšweleditšego pele goba ba se išitšego Khansele ya Setšhaba ya Diprofense goba go e nngwe ya dikomiti tša yona; goba	
(ii)	se sengwe le se sengwe seo se utullotšwego ka lebaka la seo ba se boletšego, ba se tšweleditšego pele goba ba se išitšego Khansele ya Setšhaba ya Diprofense goba go e nngwe ya dikomiti tša yona; 
(2)	Ditshwanelo le ditokologo tša Khansele ya Setšhaba ya Diprofense, tša baemedi ba Khansele ya Setšhaba ya Diprofense le tša batho ba ba ukangwego ka dikarolong tša 66 le 67 di tla laolwa ke molao wa naga. 
(3)	Meputso, diputseletšo le mehola tšeo di lefelwago maloko a Khansele ya Setšhaba ya Diprofense a go ya go ile di dirwa thwii go tšwa Sekhwameng sa Ditseno tša Setšhaba. 
72	Phihlelelo le go tšea karolo ga setšhaba ka go Khansele ya Setšhaba ya Diprofense 
(1)	Khansele ya Setšhaba ya Diprofense e swanetše go-
(a)	nolofatša go tšea karolo ga setšhaba go hlameng ga melao le ditshepedišo tše dingwe tša Khansele ya Setšhaba ya Diprofense le dikomiti tša yona; le 
(b)	go dira mediro ya yona phatlalatša le go dula ga yona, le tša dikomiti tša yona pepeneneng, eupša go ka tšewa magato a go kwala- 
(i)	go laola go tsena ga batho, go akaretšwa le go tsena ga boraditaba ka go Khansele ya Setšhaba ya Diprofense le ka dikomiting tša yona; le	
(ii)	go beakanyetša go phuruphutšwa ga motho o mongwe le o mongwe, mo go swanetšego, kganetšo ya go tsena ka, goba go ntšhiwa ga motho ofe goba ofe.	
(2)	Khansele ya Setšhaba ya Diprofense e ka se kgetholle batho, go akaretšwa boraditaba, tulong ya komiti ka ntle le ge seo se kwešišega ebile go le molaong go dira bjale setšhabeng seo se lokologilego sa temokrasi. 
Tshepedišo ya go bea Molao wa Naga (krl 73-82)
73	Melaokakanywa ka Moka 
(1)	Molaokakanywa wo mongwe le wo mongwe o ka tšweletšwa Kopanong ya Maloko a Palamente ka Moka.
(2)	Ke fela leloko la Kabinete goba Motlatšatona, goba leloko, goba komiti ya Kopano ya Maloko a Palamente ka Moka, ye e ka tšweletšago Molaokakanywa mo Kopanong, gomme ke fela leloko la Kabinete le le rwelego maikarabelo a merero ya ditšhelete tša setšhaba le le ka tšweletšago Melaokakanywa ye e latelago ka Kopanong ya Maloko a Palamente ka Moka:
(a)	Molaokakanya wa ditšhelete; 
(b)	Molaokakanywa wo o hlagišago melao ye e ukangwego karolong ya 214.
[Karolwana ya (2)	e tšeetšwe legato ke karolwana ya 1 (a)	ya Molao wa 61 wa 2001.]
(3)	Molaokakanywa wo o ukangwego Karolong ya 76(3), ka ntle le Molaokakanywa wo o ukangwego dikarolwaneng tša (2)(a)	goba (b)	ya karolo ye, o ka tšweletšwa Khanseleng ya Setšhaba ya Diprofense. 
[Karolwana ya (3)	e tšeetšwe legato ke karolwana ya1 (b)	ya Molao wa 61 wa 2001.]
(4)	Ke fela leloko goba komiti ya Khansele ya Setšhaba ya Diprofense ye e ka tšweletšago Molaokakanywa ka Khanseleng.
(5)	Molaokakanywa wo o amogetšwego ke Kopano ya Maloko a Palamente ka Moka o swanetše go fetišetšwa go Khansele ya Setšhaba ya Diprofense ge e le gore o swanetše go lekolwa ke Khansele. Molaokakanywa wo o amogetšwego ke Khansele o swanetše go fetišetšwa go Kopano ya Maloko a Palamente ka Moka. 
74	Melaokakanywa ya go fetola Molaotheo
(1)	Karolo ya 1 le Karolwana ye di ka fetošwa ke molao wo o fetišitšwego ke-
(a)	Kopano ya Maloko a Palamente ka Moka, ka thekgo ya dibouto tša bonyane dipersente tše 75 tša maloko a yona; le 
(b)	Khansele ya Setšhaba ya Diprofense, ka thekgo ya dibouto tša diprofense tša bonyane diprofense tše tshelelago. 
(2)	Kgaolo ya 2 e ka fetošwa ke Molao wo o fetišitšwego ke- 
(a)	Kopano ya Maloko a Palamente ka Moka, ka thekgo ya dibouto tša bonyane bja peditharong ya maloko a yona; le
(b)	Khansele ya Setšhaba ya Diprofense, ka thekgo ya dibouto tša bonyane diprofense tše tshelelago.
(3)	Ditlhagišo tše dingwe tša Molaotheo di ka fetošwa ke Molao wo o fetišitšwego ke-
(a)	Kopano ya Maloko a Palamente ka Moka, ka thekgo ya dibouto tša bonnyane bja peditharong ya maloko a yona le;
(b)	gape ka go Khansele ya Setšhaba ya Diprofense, ka thekgo ya dibouto tša diprofense tša bonyane diprofense tše tshelelago, ge phetošo-
(i)	 	e amana le morero wo o amago Khansele; 
(ii)	e fetoša mellwane ya profense, maatla, mehola goba dihlongwa; goba 
(iii)	e fetoša tlhagišo ye e amago thwii taba ya profense. 
(4)	Molaokakanywa wo o fetošago Molaotheo o ka se akaretše ditlhagišo tše dingwe ka ntle le diphetošo tša Molaotheo le ditaba tše di sepelelanago le diphetošo. 
(5)	Bonyane matšatši a 30 pele ga ge Molaokakanywa woo o fetošago Molaotheo o begwa go ya ka Karolo ya 73(2), motho goba komiti ye e ikemišetšago go tsebiša Molaokakanywa woo, e swanetše go- 
(a)	gatiša ka Kuranteng ya Mmušo ya setšhaba, le go ya ka melawana le ditaelo tša Kopano ya Maloko a Palamente ka Moka, ditlhalošo tša phetošo ye e šišinywago gore batho ba swayaswaye ka ga wona; 
(b)	hlagiša, go ya ka melawana le ditaelo tša Kopano ya Maloko a Palamente ka Moka, ditlhalošo tšeo go lekgotlapeamelao la profense go kwa dikgopolo tša lona; le 
(c)	go hlagiša, go ya ka melawana le ditaelo tša Khansele ya Setšhaba ya Diprofense, ditlhalošo tšeo go Khansele go tla go ngangišanwa ka tšona setšhabeng, ge e le gore phetošo yeo e šišinywago ga se phetošo yeo e nyakago go amogelwa ke Khansele. 
(6)	Ge Molaokakanywa wo o fetošago Molaotheo o tsebišwa, motho goba komiti ye e tsebišago Molaokakanywa e swanetše go hlagiša ditshwayatshwayo tše dingwe le tše dingwe tše di ngwadilwego go tšwa go batho le makgotlapeamelao a diprofense- 
(a)	go Sepikara go hlagišwa pele ga Kopano ya Maloko a Palamente ka Moka; le
(b)	go ya ka diphetošo tšeo di ukangwego karolwaneng ya (1), (2), goba (3)(b), go Modulasetulo wa Khansele ya Setšhaba ya Diprofense go hlagišwa Khanseleng.
(7)	Molaokakanywa wo o fetošago Molaotheo o ka se boutelwe ka go Kopano ya Maloko a Palamente ka Moka ka gare ga matšatši a 30 a- 
(a)	Tsebišo ya wona, ge e le gore Khansele e dutše ge Molaokakanywa o tsebišwa; goba 
(b)	tlhagišo ya wona ka go Kopano ya Maloko a Palamente ka Moka, ge e le gore Kopano ya Maloko a Palamente ka Moka e maikhutšong ge Molaokakanywa o tsebiša. 
(8)	Ge e le gore Molaokakanywa wo go bolelwago ka wona mo karolwaneng ya (3)(b), goba karolong ye nngwe le ye nngwe ya Molaokakanywa, o ama fela profense goba diprofense tše itšego, Khansele ya Setšhaba ya Diprofense e ka se fetiše Molaokakanywa goba karolo ye e lebanego ya wona ka ntle le ge o dumeletšwe ke lekgotlapeamelao goba makgotlapeamelao a profense goba diprofense tše amegago. 
(9)	Molaokakanywa wo o fetošago Molaotheo woo o šetšego o fetišitšwe ke Kopano ya Maloko a Palamente ka Moka gomme, moo go hlokegago, ke Khansele ya Setšhaba ya Diprofense, o swanetše go fetišetšwa go Mopresitente go amogelwa. 
75	Melaokakanywa ya tlwaelo ye e sa amego diprofense
(1)	Ge Kopano ya Maloko a Palamente ka Moka e fetiša Molaokakanywa ka ntle ga Molaokakanywa wo o angwago ke ditshepedišo tše hlagišitšwego karolong ya 74 goba 76, Molaokakanywa woo o swanetše go fetišetšwa go Khansele ya Setšhaba ya Diprofense gomme o ahlaahlwe go ya ka tshepedišo ye e latelago: 
(a)	Khansele e swanetše go- 
(i)	fetiša Molaokakanywa;
(ii)	fetiša Molaokakanywa go ya ka diphetošo tše di šišintšwego ke yona; goba 
(iii)	gana Molaokakanywa woo.
(b)	Ge Khansele e ka fetiša Molaokakanywa ka ntle le go šišinya diphetošo, Molaokakanywa woo o swanetše go romelwa go Mopresitente go amogelwa. 
(c)	Ge Khansele e ka gana Molaokakanywa goba ya o fetiša go ya ka diphetošo, Kopano ya Maloko a Palamente ka Moka e swanetše go lekola Molaokakanywa lefsa, gomme e ele hloko diphetošo tšeo itšego tšeo di šišintswego ke Khansele, e bile e ka- 
(i)	fetiša Molaokakanywa gape, ka diphetošo goba ka ntle le diphetogo; goba go 
(ii)	tšea sephetho sa go se tšwelepele ka Molaokakanywa woo. 
(d)	Molaokakanywa wo o fetišitšwego ke Kopano ya Maloko a Palamente ka Moka go ya ka temana ya (c)	o swanetše go romelwa go Mopresidente go amogelwa. 
(2)	Ge Khansele ya Setšhaba ya Diprofense e boutela taba go ya ka karolo ye, gona karolo ya 65 ga e šomišwe; legatong leo- 
(a)	moemedi yo mongwe le yo mongwe kemeding ya profense o na le bouto e tee; 
(b)	bonyane teetharong ya baemedi e swanetše go ba gona pele ga ge go ka boutelwa taba yeo; gomme 
(c)	taba yeo e phethwa ka bontši bja dibouto tšeo di dirilwego, eupša ge go na le tekano ya palo ya dibouto mahlakoreng ka moka a taba, moemedi yo a swerego marapo o swanetše go dira boutu ya makgaolakgang. 
76	Melaokakanywa ya tlwaelo ye e amago diprofense
(1)	Ge Kopano ya Maloko a Palamente ka Moka e fetiša Molaokakanywa wo go ukangwego ka wona mo karolwaneng ya (3), (4)	goba(5), Molaokakanywa woo o swanetše go romelwa go Khansele ya Setšhaba ya Diprofense o lekolwe go ya ka tshepedišo ye elatelago:
(a)	Khansele e swanetše go- 
(i)	fetiša Molaokakanywa; 
(ii)	fetiša Molaokakanywa wo o fetotšwego; goba 
(iii)	gana Molaokakanywa.
(b)	Ge Khansele e fetiša Molaokakanywa ka ntle le diphetošo, Molaokakanywa o swanetše go romelwa go Mopresitente go amogelwa. 
(c)	Ge Khansele e ka fetiša Molaokakanywa woo o fetotšwego, Molaokakanywa woo o fetotšwego o swanetše go fetišetšwa go Kopano ya Maloko a Palamente ka Moka, gomme Kopano ya Maloko a Palamente ka Moka e ka fetiša Molaokakanywa woo o fetotšwego, o swanetše go romelwa go Mopresitente gore o amogelwa. 
(d)	Ge Khansele e ka gana Molaokakanywa, goba ge Kopano ya Maloko a Palamente ka Moka e ka gana go fetiša Molaokakanywa wo o fetotšwego, wo o ukangwago ka go ya ka temana ya	(c), Molaokakanywa le, mo go kgonegago, gape le Molaokakanywa wo o fetotšwego,	o swanetše go romelwa Komiting ya Bolamodi, yeo e kwanago ka- 
(i)	Molaokakanywa bjalo ka ge o fetišitšwe ke Kopano ya Maloko a Palamente ka Moka; 
(ii)	Molaokakanywa wo o fetotšwego bjalo ka ge o fetisitšwe ke Khansele; goba	
(iii)	sebopego se sengwe sa Molaokakanywa. 
(e)	Ge Komiti ya Bolamodi e sa kgone go dumelelana ka gare matšatši a 30 morago ga ge Molaokakanywa o fetišeditšwe go yona, Molaokakanywa woo o tla felelwa ke mošomo ka ntle le ge Kopano ya Maloko a Palamente ka Moka e ka fetiša Molaokakanywa woo gape, e fela ka thekgo ya dibouto tša bonyane peditharong ya maloko a yona. 
(f)	Ge komiti ya Bolamodi e dumelalana ka Molaokakanywa ka ge o fetišitšwe ke Kopano ya Maloko a Palamente ka Moka, Molaokakanywa woo o swanetše go fetišetšwa go Khansele, ge Khansele e ka fetiša Molaokakanywa woo, gona Molaokakanywa woo o swanetše go romelwa go Mopresitente go amogelwa. 
(g)	Ge komiti ya Bolamodi e dumelelana ka Molaokakanywa ka ge o fetišitšwe ke Khansele, Molaokakanywa woo o swanetše go fetišetšwa go Kopano ya Maloko a Palamente ka Moka, ge o ka fetišwa ke Kopano ya Maloko a Palamente ka Moka, o swanetše go romelwa go Mopresitente go amogelwa.
	(h)	Ge komiti ya Bolamodi e dumelelana ka sebopego se sengwe sa Molaokakanywa, sebopego seo sa Molaokakanywa se swanetše go fetišetšwa go bobedi Kopano ya Maloko a Palamente ka Moka le go Khansele, ge o ka fetišwa ke Kopano ya Maloko a Palamente ka Moka le Khansele, gona o swanetše go romelwa go Mopresitente go amogelwa. 
(i)	Ge Molaokakanywa wo o fetišeditšwego go Khansele go ya ka temana ya (f)	goba (h)	o sa fetišwe ke Khansele, Molaokakanywa woo o felelwa ke mošomo ka ntle ga ge Kopano ya Maloko a Palamente ka Moka e ka o fetiša gomme ka thekgo ya bonyane bja dibouto tše e ka bago peditharong tša maloko a yona. 
	(j)	Ge Molaokakanywa wo o fetišeditšwego go Kopano ya Maloko a Palamente ka Moka go ya ka temana ya (g)	goba (h)	o sa fetišwe ke Kopano ya Maloko a Palamente ka Moka, Molaokakanywa woo o felelwa ke mošomo, e fela Molaokakanywa ka ge o fetišitšwe ke Kopano ya Maloko a Palamente ka Moka peleng o ka fetišwa gape ke Kopano ya Maloko a Palamente ka Moka, e fela ka thekgo ya bonyane bja dibouto tše e ka bago peditharong tša maloko a yona. 
	(k)	Molaokakanywa wo o fetišitšwego ke Kopano ya Maloko a Palamente ka Moka go ya ka temana ya (e),(i)	goba (j)	swanetše go romelwa go Mopresitente go amogelwa.
(2)	Ge Khansele ya Setšhaba ya Diprofense e fetiša Molaokakanywa wo go ukangwego ka wona karolwaneng ya (3), Molaokakanywa woo o swanetše go fetišetšwa go Kopano ya Maloko a Palamente ka Moka go lekolwa go ya ka ditshepedišo tše di latelago: 
(a)	Khansele e swanetše go- 
(i)	fetiša Molaokakanywa; 
(ii)	fetiša Molaokakanywa wo o fetotšwego; goba 
(iii)	gana Molaokakanywa.
(b)	Molaokakanywa woo o fetišitšego ke Kopano ya Maloko a Palamente ka Moka go ya ka temana ya (a)(i)	o swanetše go romelwa go Mopresitente go amogelwa. 
(c)	Ge Kopano ya Maloko a Palamente ka Moka e ka fetiša Molaokakanywa woo o fetotšwego, Molaokakanywa woo o fetotšwego o swanetše go fetišetšwa go Khansele, gomme	ge Kopano ya Maloko a Palamente ka Moka e ka fetiša Molaokakanywa woo o fetotšwego, o swanetše go romelwa go Mopresitente gore o amogelwa. 
(d)	Ge Kopano ya Maloko a Palamente ka Moka e ka gana Molaokakanywa, goba ge Khansele e ka gana go fetiša Molaokakanywa wo o fetotšwego	wo o fetišeditšwego go yona go ya ka temana ya	(c), Molaokakanywa le, mo go kgonegago, gape le Molaokakanywa wo o fetotšwego	o swanetše go romelwa Komiting ya Bolamodi, yeo e kwanago ka- 
(i)	Molaokakanywa bjalo ka ge o fetišitšwe ke Khansele; 
(ii)	Molaokakanywa wo o fetotšwego bjalo ka ge o fetisitšwe ke Kopano ya Maloko a Palamente ka Moka; goba	
(iii)	sebopego se sengwe sa Molaokakanywa. 
(e)	Ge Komiti ya Bolamodi e sa kgone go dumelelana ka gare matšatši a 30 morago ga ge Molaokakanywa o fetišeditšwe go yona, Molaokakanywa woo o tla felelwa ke mošomo. 
(f)	Ge Komiti ya Bolamodi e dumelalana ka Molaokakanywa ka ge o fetišitšwe ke Khansele, Molaokakanywa woo o swanetše go fetišetšwa go Kopano ya Maloko a Palamente ka Moka, ge Kopano ya Maloko a Palamente ka Moka e ka fetiša Molaokakanywa woo, Molaokakanywa woo o swanetše go romelwa go Mopresitente go amogelwa. 
(g)	Ge Komiti ya Bolamodi e dumelelana ka Molaokakanywa wo o fetošitšwego ka ge o fetišitšwe ke Kopano ya Maloko a Plamenete ka Moka, Molaokakanywa woo o swanetše go fetišetšwa go Khansele, ge o ka fetišwa ke Khansele, o swanetše go romelwa go Mopresitente go amogelwa.
	(h)	Ge Komiti ya Bolamodi e dumelelana ka sebopego se sengwe sa Molaokakanywa, sebopego seo sa Molaokakanywa se swanetše go fetišetšwa go bobedi Khansele le go Kopano ya Maloko a Palamente ka Moka, ge o ka fetišwa ke Khansele, o swanetše go romelwa go Mopresitente go amogelwa. 
(i)	Ge Molaokakanywa wo o fetišeditšwego go Kopano ya Maloko a Palamente ka Moka go ya ka temana ya (f)	goba (h)	o sa fetišwe ke Kopano ya Maloko a Palamente ka Moka, Molaokakanywa woo o felelwa ke mošomo.	
(3)	Molaokakanywa o swanetše go lekolwa go ya ka tshepedišo yeo e beilwego ke karolwana ya (1)	goba karolwana ya (2)	ge e le gore o wela ka gare ga lefelo la tirišo leo le beilwego ka Šetulong ya 4 goba o hlagiša melao yeo e ukangwago go ye nngwe ya dikarolo tše di latelago: 
(a)	karolo ya 65 (2); 
(b)	karolo ya163; 
(c)	karolo ya 182; 
(d)	 karolo ya 195 (3)	le (4); 
(e)	karolo ya 196; le 
(f)	karolo ya 197.
(4)	Molaokakanywa o swanetše go lekolwa go ya ka tshepedišo yeo e beilwego ke karolwana ya (1)	ge e le gore e hlagiša melao yeo e- 
(a)	ukangwego karolong ya 44 (2)	goba 220 (3); goba
(b)	ukangwego Kgaolong ya 13, yeo e akaretšago tlhagišo ye nngwe le ye nngwe yeo e amago dikgahlego tša ditšhelete tša lekala la profense la mmušo.
[Temana ya (b)	e tšeetšwe legato ke 1 ya Molao wa 3 wa 2003.]
(5)	Molaokakanywa wo o ukangwego karolong ya 42 (6)	o swanetše go lekolwa go ya ka tshepedišo yeo e beilwego ke karolwana ya (1)	ka ntle le ge e le gore- 
(a)	ge Kopano ya Maloko a Palamente ka Moka e boutela Molaokakanywa, ditlhagišo tša karolo ya (53)(1)	ga di šome; lebakeng le, Molaokakanywa o ka no fetišwa fela ge e le gore dibouto tše dintši tša maloko a Kopano ya Maloko a Palamente ka Moka di o thekga; le 
(b)	ge Molaokakanywa o ka fetišetšwa go Komiti ya Bolamodi, melawana ye e latelago e a šoma:
(i)	Kopano ya Maloko a Palamente ka Moka e tšea Molaokakanywa bjalo ka ge o ukangwa karolwaneng ya (1)(g)	goba (h), Molaokakanywa woo o ka fetišwa fela ge bontši bja dibouto tša maloko a Kopano ya Maloko a Palamente ka Moka di o thekga.
(ii)	ge Kopano ya Maloko a Palamente ka Moka e lekola le go lekodišiša Molaokakanywa wo o ukangwago karolwaneng (1)(e), (i)	goba (j), Molaokakanywa woo o ka no fetišwa fela ge e le gore peditharong ya dibouto tša maloko a Kopano ya Maloko a Palamente ka Moka di o thekga.
(6)	Karolo ye ga e ame Melaokakanywa ya ditšhelete.
77	Melaokakanywa ya Ditšhelete
(1)	Molaokakanywa ke Molaokakanywa wa ditšhelete ge o- 
(a)	lekanyetšago ditšhelete;
(b)	lefiša metšhelo ya setšhaba, makgetho, metšhelo ya dithoto goba metšhelo ya tlaleletšo; 
(c)	fediša le go fokotša, go se sa amogela dithekgo go tšwa go, metšhelo e mengwe le e mengwe ya setšhaba makgetho, metšhelo ya dithoto goba goba metšhelo ya tlaleletšo; goba
(d)	o dumelela ditefedišothwii go tšwa go Sekhwama sa Setšhaba sa Ditšhelete, ntle le ge Molaokakanywa wo o ukangwego	karolong ya 214 o dumelela ditefedišo thwii.
(2)	Molaokakanywa wa ditšhelete ga se wa swanela go šoma ka taba ye itšego ka ntle le ge-
(a)	taba yeo e sepelelana le tekanyetšo ya tšhelete;
(b)	e gapeletša, e fediša goba e fokotša metšhelo ya setšhaba, makgetho, metšhelo ya dithoto le metšhelo ya tlaleletšo;
(c)	go se sa amogela dithekgo go tšwa go metšhelo ya setšhaba, makgetho, metšhelo ya dithoto le metšhelo ya tlaleletšo; goba
(d)	go dumelela ditefedišothwii go tšwa go Sekhwama sa Setšhaba sa Ditšhelete.
(3)	Melaokakanywa ka moka e swanetše go lekolwa go ya ka tshepedišo ye e beilwego ke karolwana ya 75. Molo wa Palamente o swanetše go hlagiša tshepedišo Go fetoša Melaokakanywa ya ditšhelete pele ga Palamente.
[Karolo ya 77 e tšeetšwe legato ke karolwana ya 2 ya Molao wa 61 wa 2001.]
78	Komiti ya Bolamodi
(1)	Komiti ya bonamodi e bopša ke-
(a)	maloko a senyane a Kopano ya Maloko a Palamente ka Moka ao a kgethilwego ke Kopano ya Maloko a Palamente ka Moka go latela tshepedišo yeo e beilwego go ya ka melawana le ditaelo tša Kopano ya Maloko a Palamente ka Moka gomme e tlišago kemelo ya diphathi ka tekatekano ya go swan le yeo diphathi di emetšwego ka gona, ka go Kopano ya Maloko a Palamente ka Moka; le 
(b)	moemedi o tee go tšwa boemeding bja profense ye nngwe le ye nngwe ka go Khansele ya Setšhaba ya Diprofense, yo a kgethilwego ke boemedi. 
(2)	Komiti ya Bolamodi e dumelelane ka sebopego se itšego sa Molaokakanywa goba e feditše ka taba, ge sebopego seo, goba lehlakore le tee la taba le thekgwa ke- 
(a)	bonyane bja baemedi ba bahlano go tšwa go Khansele ya Setšhaba; le 
(b)	bonnyane bja baemedi ba bahlano ba Khansele ya Setšhaba ya Diprofense.
79	Kamogelo ya Melaokakanywa
(1)	Mopresitente o swanetše go amogela le go saena Molaokakanywa wo o fetišitšwego go ya ka Kgaolo ye goba, ge Mopresitente a na le kgonono ka go ba molao ga Molaokakanywa, a o bušetše morago go Kopano ya Maloko a Palamente ka Moka gore o lekolwe lefsa.
(2)	Melawana le ditaelo tšeo di kopanetšwego di swanetše go hlagiša tshepedišo ya go lekola Molakakanywa gape ke Kopano ya Maloko a Palamente ka Moka le go kgatha tema ga Khansele ya Setšhaba ya Diprofense ka tsepedišong.
(3)	Khansele ya Setšhaba ya Diprofense e swanetše go kgatha tema go lekoleng lefsa ga Molaokakanywa wo Mopresitente a o bušeditšego morago ka go Kopano ya Maloko a Palamente ka Moka, ge- 
(a)	dikgonono tša Mopresidente ka ga go ba molaong ga Molaokakanywa go amana le mokgwa wa tshepedišo wo o amago Khansele; goba	
(b)	karolo ya 74(1), (2)	goba 3(b)	goba 76 e be e dirišitšwe go fetišweng ga Molaokakanywa.
(4)	Ge e le gore ka morago ga go lekola lefsa, Molaokakanywa o akaretša ka botlalo dikgonono tša Mopresitente, gona Mopresitente o swanetše go amogela le go saena Molaokakanywa woo, ge go se bjalo, Mopresitente o swanetše go-
(a)	amogela le go saena Molaokakanywa; goba 
(b)	a o fetišetše go Kgorotsheko ya Molaotheo go tšea sephetho ka ga go ba molaong ga wona. 
(5)	Ge Kgorotsheko ya Molaotheo e ka fetša ka gore Molaokakanywa o mo molaong, Mopresidente o swanetše go o amogela le go o saena. 
80	Kgopelo ya maloko a Kopano ya Maloko a Palamente ka Moka go Kgorotsheko ya Molaotheo
(1)	Maloko a Kopano ya Maloko a Palamente ka Moka a ka dira kgopelo go Kgorotsheko ya Molaotheo go fiwa taelo ya gore Molao wa Palamente, wo o fetišitšwego ke Kgobokano, ka moka ga wona, goba karolo ya wona ga e molaong. 
(2)	Kgopelo -
(a)	e swanetše go thekgwa ke bonyane teetharong ya maloko a Kopano ya Maloko a Palamente ka Moka; gape 
(b)	e swanetše go dirwa matšatšing a 30 morago ga ge Mopresidente a amogetše le go saenela molao woo. 
(3)	Kgorošotsheko ya Molaotheo laela gore Molao ka moka goba karolo ya wona e lego yona taba ya kgopelo go ya ka karolwana ya (1)	ga o na le maatla go fihla ge Kgorotsheko e tšere sephetho ka kgopelo ge-
(a)	kgahlego ya toka e nyaka se; le	
(b)	kgopelo e na le kgonagalo ye e bonalago ya katlego.
(4)	Ge kgopelo e se ya atlega, ebile e ile ya se be le kgonagalo ye e bonalago ya katlego, Kgorotsheko ya Molaotheo e ka laela gore bakgopedi ba lefe ditshenyegelo. 
81	Phatlalatšo ya Melao
	Molaokakanywa wo o amogetšwego le go saenelwa ke Mopresidente e ba Molao wa Palamente, ebile o swanetše go phatlalatšwa ka pela gomme o thoma go šoma le seemetseng ge o phatlaladitšwe goba go tloga nakong yeo o beilwego ke Molao. 
82	Go lota ga Melao ya Palamente
	Khopi ya Molao wa Palamente yeo e saennwego ke bohlatse bjo bo feletšego bja ditlhagišo tša Molao gomme, morago ga go phatlalatšwa, o swanetše go išwa go Kgorotsheko ya Molaotheo go lotwa.
KGAOLO YA 5
MOPRESITENTE LE KHUDUTHAMAGA YA SETŠHABA (krl 83-102)
83	Mopresitente
	Mopresitente-
(a)	ke Hlogo ya Mmušo le hlogo wa khuduthamaga ya setšhaba;
(b)	o swanetše go obamela, go šireletša le go hlompha Molaotheo bjalo ka molaomogolo wa Repabliki; ebile
(c)	o tšwetšapele botee bja setšhaba le seo se ka tšwetšago	Repabliki pele.
84	Maatla le mešomo ya Mopresitente
(1)	Mopresidente o na le maatla ao a a filwego ke Molaotheo le melao, go akaretšwa yeo e nyakegago go phethagatša mešomo ya go ba Hlogo ya Mmušo le hlogo ya khuduthamaga ya setšhaba.
(2)	Mopresidente o na le maikarabelo a-
(a)	go amogela le go saena Melaokakanywa;
(b)	go bušetša Molaokakanywa go Kopano ya Maloko a Palamente ka Moka gore o lekolwe lefsa go kgonthišiša gore o molaong; 
(c)	go fetišetša Malaokakanywa go Kgorongtsheko ya Molaotheo gore e fe sephetho sa gore Molaokakanywa o molaong;
(d)	go bitša Kopano ya Maloko a Palamente ka Moka, le ya Khansele ya Setšhaba ya Diprofense goba Palamente go tlo tsenela tulo ye e sego ya mehleng go tlo rera ditaba tše di ikgethilego;
(e)	go thwala batho bao Molaotheo goba melao e nyakago gore Mopresidente a ba thwale, ntle le go ba hlogo ya khuduthamaga ya setšhaba;
(f)	go hloma dikomišene tša dinyakišišo;
(g)	go goeletša referentamo ya setšhaba go ya ka Molao wa Palamente;
	(h)	go amogela le go hlokomela batseta ba dinaga dišele ba diplomate le ba bokhonsole; 
(i)	go kgetha baambasatara; batsetaphethi, le batseta le baemedi ba bokhonsole; 
	(j)	go lebalela goba go gaugela basenyi goba go tloša ditefo tše itšego, dikotlo goba dikamogo; le 
	(k)	Go aba diala tša tlhompho.
[Tsebišo: Diala tša tlhompho di abilwe ka gare ga Kuranta ya Mmušo 24155 ya 6 Desemere, 2002 le Kuranta ya Mmušo 25213 ya 25 Julae, 2003.]
85	Maatlaphetiši a Repabliki
(1)	Maatlaphetiši a Repabliki	a filwe Mopresitente.
(2)	Mopresitente o diragatša maatlaphetiši, gammogo le maloko a mangwe a Kabinete, ka go-
(a)	diragatša melao ya naga ka ntle le ge Molaotheo goba molao wa Palamente o hlagiša ka	tsela e nngwe; 
(b)	hlabolla le go phethagatša morero wa setšhaba; 
(c)	kgokaganya mediro ya dikgoro tša mmušo le ditaolo; 
(d)	go rulaganya le go thoma melao; le 
(e)	 	phethagatša mediro e mengwe le e mengwe ya phethišo yeo e hlagišwago ka go Molaotheo goba ka go melao ya setšhaba.
86	Go kgethwa ga Mopresitente
(1)	Tulong ya yona ya mathomo morago ga go kgethwa ga yona, le ge go tsomega go tlatša sekgoba, Kopano ya Maloko a Palamente ka Moka e swanetše go kgetha mosadi goba monna go tšwa malokong a yona go ba Mopresitente.
(2)	Moahlodimogolo o swanetše go sepediša dikgetho tša Mopresidente, goba a kgethe moahlodi o mongwe go dira bjale.	Tshepedišo ye e beilwego go Karolo ya A ya Šetulo 3 e šomišwa ge go kgethwa Mopresitente.
[Karolwana ya (2)	e tšeetšwe legato ke karolwana ya 6 ya Molao wa 34 wa 2001.]
(3)	Dikgetho tša go tlatša sekgoba mo kantorong ya Mopresitente di swanetše go swarwa nakong le letšatšikgwedi leo le beilwego ke Moahlodimogolo, eupša e sego matšatši a go feta a 30 ka morago ga ge sekgoba se bile gona. 
[Karolwana ya (3)	e tšeetšwe legato ke karolwana ya 6 ya Molao wa 34 wa 2001.]
87	Go thoma modiro ga Mopresitente
	Ge a kgethilwe go ba Mopresitente, motho o lahlegelwa ke go ba leloko la Kopano ya Maloko a Palamente ka Moka gomme mo matšatšing a mahlano, o swanetše go amogela modiro wa gagwe ka go ikana goba go itlama gore o tla botegela Repabliki le go obamela Molaotheo go ya ka Šetulo 2. 
88	Pakatiro ya Mopresitente
(1)	Pakatiro ya Mopresitente e thoma ge a thoma modiro gomme e felela ge go eba le sekgoba goba ge motho yo a latelago a kgethilwe go ba Mopresitente a thoma modiro.
(2)	Ga go motho yo a swanetšego go dula setulo sa Bopresitente makga a go feta a mabedi, eupša ge motho a kgethwa go tlatša sekgoba ka kantorong ya bopresitente; sebaka sa magareng a go kgethwa ga gagwe le go kgethwa ga Mopresidente yo a latelago ga se tšewe bjalo ka pakatiro.
89	Go tlošwa ga Mopresitente 
(1)	Kopano ya Maloko a Palamente ka Moka ka sephetho sa bontši bja bonnyane bja peditharong ya maloko a yona, e ka tloša Mopresitente setulong fela ka mabaka a latelago-	
(a)	go tlola Molaotheo le melao mo go šiišago; 
(b)	maitshwaro ao a tlogago a le bohlaswa;	
(c)	go šitwa ke go phethagatša mešomo ya setulo sa gagwe. 
(2)	Mang le mang yo a tlošitšwego setulong sa Bopresitente go ya ka karolwana ya 1(a)	goba (b)	a ka se neelwe ditshwanelo tša kantoro yeo, le gona ga a swanela go šoma mošomo ofe goba ofe wa setšhaba. 
90	Mopresitente wa Motšwaoswere 
(1)	Ge Mopresitente a se gona Repabliking goba a šitišwa ke mabaka a mangwe go phetha mešomo ya gagwe ya Bopresitente, goba nakong yeo go nago le sekgoba setulong sa Bopresitente, mohlankedi go ya ka tatelano ye e latelago, o tla šoma bjalo ka Mopresitente:
(a)	Motlatšamopresitente.
(b)	Tona yeo e kgethilwego ke Mopresidente.
(c)	Tona yeo e kgethilwego ke maloko a mangwe a Kabinete 
(d)	Spikara, go fihlela ge Kopano ya Maloko a Palamente ka Moka e kgethile le lengwe la maloko a yona.
(2)	Mopresidente wa Motšwaoswere o na le maikarabelo, maatla le mešomo ya Mopresitente. 
(3)	Pele a tšea maikarabelo, maatla le mediro ya Mopresitente, Mopresitente wa Motšwaoswere o swanetše go ikana goba go itlama gore o tla botegela Repabliki le go obamela Molaotheo go ya ka Šetulo 2. 
(4)	Motho yoo, bjalo ka Motlatšamopresitente a ikannego goba go itlama go botegela Repabliki o swanetše go boeletša tshepedišo ya kano go itlama nako ye nngwe le ye nngwe ya go latelana bjalo ka Motlatšamopresitente	nakong yeo e felelago ge motho yo a kgethilwego bjalo ka Motlatšamopresitente yo a latelago a thoma modiro.
[Karolwana ya (4)	e okeditšwe ke karolwana ya 1 ya Molao wa 35 wa 1997.]
91	Kabinete
(1)	Kabinete e bopša ke Mopresidente, bjalo ka hlogo ya Kabinete Motlatšamopresitente le Ditona.
(2)	Mopresitente o kgetha Motlatšamopresitente le ditona go tšwa malokong a Kopano ya Maloko a Palamente ka Moka, o ba nea maatla le mešomo gomme o kgona le go ba raka mošomong. 
(3)	Mopresidente-
(a)	o swanetše go kgetha Motlatšamopresitente go tšwa malokong a Kopano ya Maloko a Palamente ka Moka;
(b)	a ka kgetha palo efe goba efe ya Ditona go tšwa malokong a Kopano ya Maloko a Palamente ka Moka; gomme 
(c)	a ka kgetha Ditona tše di sa fetego tše pedi go tšwa ka ntle ga Kopano ya Maloko a Palamente ka Moka.
(4)	Mopresitente o swanetše go kgetha leloko la Kabinete go ba moetapele wa merero ya mmušo ka go Kopano ya Maloko a Palamente ka Moka. 
(5)	Motlatšamopresitente o swanetše go thuša Mopresitente go phetheng ga mešomo ya mmušo.
92	Maikarabelo le mešomo
(1)	Motlatšamopresidente le Ditona ba na le maikarabelo a maatla le mešomo ya phetišo yeo ba e filwego ke Mopresitente.
(2)	Maloko a Kabinete a na le maikarabelo a mohlakanelwa le ka bonoši phethagatšong ya mešomo ya bona.
(3)	Maloko a Kabinete a swanetše go- 
(a)	šoma go ya ka Molaotheo; le 
(b)	fa Palamente dipego ka botlalo le gona nako le nako, ka ga merero ye e welago taolong ya bona. 
93	Batlatšatona
(1)	Mopresidente a ka thwala-
(a)	palo ye nngwe le ye nngwe ya Batlatšatona go tšwa malokong a Kopano ya Maloko a Palamente ka Moka; le 
(b)	e sego go feta Batlatšatona ba babedi go tšwa ka ntle ga Kopano ya Maloko a Palamente ka Moka, go thuša maloko a Kabinete,
ebile a ka ba raka.
(2)	Batlatšatona bao ba kgethilwego go ya ka karolwana ya (1)(b)	ba na le maikarabelo go Palamente go diragatšeng ga maatla a bona le go diriša mediro ya bona.
[Karolo ya 93 e tšeetšwe legato ke karolwana ya 7 ya Molao wa 34 wa 2001.]
94	Tšwetšopele ya Kabinete ka morago ga dikgetho
	Ge dikgetho tša Kopano ya Maloko a Palamente ka Moka	di swarwa, Kabinete, Motlatšamopresitente, Ditona le Batlatšatona ba dula ba na le maatla a go šoma go fihla motho yoo a kgethilwego go ba Mopresitente ke Kopano ya Maloko a Palamente ka Moka	ye e latelago a thoma modiro.
95	Keno goba boitlamo
	Pele ga ge Motlatšamopresitente, Ditona le Batlatšatona ba ka thoma go phethagatša mešomo ya bona, ba swanetše go ikana le go itlama go botegela Repabliki le ka go obamela Molaotheo go ya ka Šetulo 2. 
96	Maitshwaro a maloko a Kabinete le Batlatšatona 
(1)	Maloko a Kabinete le Batlatšatona ba swanetše go itshwara go ya ka mokgwa wa boitshwaro woo o beilwego ke molao wa naga. 
(2)	Maloko a Kabinete le Batlatšatona ga ba swanela go-
(a)	amogela mošomo o mongwe o ba lefiwago go wona; 
(b)	itshwara ka tsela yeo e lego kgahlanong le mešomo ya bona goba go ipea maemong ao a ka tlišago kotsi ya thulano magareng a maikarabelo a bona a semmušo le dikgahlego tša bona tša ka ntle; goba 
(c)	go šomiša maemo a bona goba tshedimošo yeo ba e filwego go ikhumiša goba go hola motho yo mongwe ka tsela yeo e sa lokago. 
97	Phetišetšo ya mediro 
	Mopresitente ka kgoeletšo, a ka fetišetša go leloko le lengwe la Kabinete-
(a)	tiragatšo ya molao ofe goba ofe woo o lego matsogong a leloko le lengwe; goba
(b)	maatla goba mošomo ofe goba ofe woo filwego leloko le lengwe ke molao. 
98	Kabo ya nakwana ya mešomo
	Mopresitente a ka abela leloko la Kabinete maatla a itšego goba mošomo wo mongwe le wo mongwe wa leloko le lengwe leo le sego gona mošomong goba leo le šitwago ke go diragatša maatla ao goba go phetha mošomo woo. 
99	Kabo ya mešomo
	Leloko la Kabinete le ka abela maatla a itšego goba mošomo ofe goba ofe wo o swanetšego go diragatšwa goba go phethagatšwa go ya ka Molao wa Palamente go leloko la Khansele ya Khuduthamaga ya profense goba go Khansele ya Mmasepala. Kabo- 
(a)	e swanetše go ba bjalo ka tumelelano magareng ga leloko leo la Kabinete le leloko la Khansele ya Khuduthamaga goba Khansele ya Mmasepala;
(b)	e swanetše go sepelelana le Molao wa Palamente woo maatla le mešomo ya maswanedi di dirwago le go phethagatšwa go latela wona; gomme 
(c)	o thoma go šoma ge Mopresitente a se no dira kgoeletšo. 
100	Tsenogare ya mmušo wa gare taolong ya diprofense
(1)	Ge profense e sa kgone goba e sa phethagatše mešomo ya yona ya phetišo go ya ka Molaotheo goba molao, khuduthamaga ya setšhaba e tla tsena taba yeo ka go tšea magato a go swanela go kgonthišiša phethagatšo ya mošomo woo, go akaretšwa- 
(a)	go ntšha taelo yeo e lebišitšwego go khuduthamaga ya profense, moo go hlalošwago bogolo bja go palelwa go phetha mešomo ya yona le go bolela ka magato ao a swanetšego go tšewa phethagatšong ya tshwanelo yeo; le	
(b)	go tšea maikarabelo a go phethagatša mošomo woo profenseng yeo, go fihlela moo go swanetšego go-	
(i)	tšwetšapele maemo a bohlokwa a naga goba go beya maemo a bonyane go phetheng ga ditirelo;	
(ii)	tšwetšapele botee bja ekonomi; 
(iii)	go tšwetšapele tšhireletšo ya naga; goba 
(iv)	go thibela profense yeo go tšea magato ao a sa kwagalego ao e ka bago ditšhitišo go dikgahlego tša profense ye nngwe goba nageng ka moka. 
[Karolwana ya (1)	e fetošitšwe ke karolwana ya 2 (b)	ya Molao wa 3 wa 2003.]
(2)	Ge khuduthamaga ya setšhaba e ka tsena taba ya profense ka bogare go ya ka karolwana ya (1)(b)	– 
(a)	e swanetše go romela Tsebišo ya tsenogare ye e ngwadilwego go Khansele ya Setšhaba ya Diprofense mo matšatšing a 14 morago ga ge tsenogare e thomile; 
(b)	tsenogare e swanetše go fela ge Khansele e sa dumele tsenogare yeo mo matšatšing a 180	morago ga ge tsenogare e thomile goba mafelelong nako yeo ge e se ya dumelelwa tsenogare yeo; gomme 
(c)	Khansele e swanetše, ge tsenogare e ntše e tšwelapele, go lekola lefsa tsenogare nako le nako e bile e ka dira ditigelo tše itšego tša maleba go khuduthamaga ya setšhaba.
[Karolwana ya (2)	e tšeetšwe legato ke 2 (c)	ya Molao wa 3 wa 2003.]
(3)	Molao wa setšhaba o ka laola tshepedišo yeo e theilwego karolong ye.
[Karolo 100 fetošitšwe ke 2 (a)	ya Molao wa 3 wa 2003.]
101	Diphetho tša phetišo
(1)	Sephetho se se tšerwego ke Mopresitente se swanetše go ba se se ngwadilwego ge se- 
(a)	tšerwe go latela molao; goba	
(b)	se na le ditlamorago tša semolao.
(2)	Sephetho se se ngwadilwego sa go tšewa ke Mopresitente se swanetše go saenelwa gape ke leloko le lengwe la Kabinete ge e le gore sephetho seo se ama mošomo wo o abetšwego leloko leo la Kabinete. 
(3)	Dikgoeletšo, melawana le didirišwa tše dingwe tša melawana ye mengwe di swanetše go hwetšwagala setšhabeng ka moka.	
(4)	Melao ya setšhaba e ka laetša ka mokgwa wo e lego gore, goba bokgole bjo, didirišwa tše di ukangwego karolwaneng ya (3)	di swanetše go-
(a)	ahlaahlwa ka Palamenteng; le go
(b)	amogelwa ke Palamente.
102	Ditšhišinyo tša go hloka kholofelo 
(1)	Ge Kopano ya Maloko a Palamenete ka Moka, ka bouto ye e thekgwago ke bontši bja maloko a yona e ka fetiša tšhišinyo ya go hloka kholofelo go Kabinete, go sa akaretšwe Mopresitente, Mopresitente o tla swanela ke go bea Kabinete lefsa. 
(2)	Ge Kopano ya Maloko a Palamente ka Moka ka bouto ye e thekgwago ke bontši bja maloko a yona e ka fetiša tšhišinyo ya go hloka kholofelo go Mopresitente, Mopresitente le maloko a mangwe a Kabinete le Batlatši ka moka ba bona, ba swanetše go rola modiro.
KGAOLO YA	6
DIPROFENSE (krl 103-150)
103	Diprofense
(1)	Repabliki e na le diprofense tše di latelago:
(a)	Kapa-Bohlabela;
(b)	Freistata;
(c)	Gauteng;
(d)	KwaZulu-Natala;
(e)	Mpumalanga;
(f)	Kapa-Leboa;
(g)	Limpopo;
(h)	Leboa-Bodikela;
(i)	Kapa-Bodikela.
[Temana ya (g) e tšeetšwe legato ke karolwana ya 3 ya Molao wa 3 wa 2003.]
(2)	Mellwane ya diprofense ke yeo e bilego gona ge Molaotheo o thoma go šoma.
Makgotlapeamelao a Diprofense (krl 104-124)
104	Maatla a go beya melao a diprofense
(1)	Maatla a profense a go dira melao a beilwe godimo ga lekgotlapeamelao la yona, gomme a fa lekgotlapeamelao la profense maatla a- 
(a)	go amogela molaotheo wa profense yeo goba go fetola molaotheo ofe goba ofe wo o fetišitšwego ke lona go ya ka ditaelo tša dikarolo tša 142 le 143; 
(b)	go fetiša melao legatong la profense ya lona mabapi le- 
(i)	taba ye nngwe le ye nngwe ya tirišo yeo e lego lefelong la mošomo ka lenaneong la Šetulo 4;
(ii)	taba ye nngwe le ye nngwe ya tirišo yeo e lego lefelong la mošomo ka go Šetulo 5;	
(iii)	taba ye nngwe le ye nngwe yeo e welago ka ntle ga mafelo a mošomo gomme e, filwego profense thwii ke molao wa setšhaba; le 
(iv)	taba ye nngwe le ye nngwe yeo tlhagišo ya Molaotheo e ukangwago go diriša ga melao ya profense; le 
(c)	go abela maatla a mangwe le a mangwe a molao wa yona go Khansele ya Mmasepala profenseng yeo. 
(2)	Lekgotlapeamelao la profense, ka sephetho seo se tšerwego ka thekgo ya bonyane bja doboutu tša peditharong ya maloko a yona, e ka kgopela Palamente go fetoša leina la profense yeo. 
(3)	Lekgotlapeamelao la profense le tlangwa ke Molaotheo fela, gomme ge le fetišitše molaotheo wa profense ya yona, gona e tlangwa le gape ke molaotheo woo, ebile e swanetše go ya ka, ka gare ga mellwane ya Molaotheo le ya Molaotheo wa profense.
(4)	Molao wa profense mabapi le taba yeo e tlogago e le bohlokwa, goba e lebanego le phethagatšo ya maleba ya maatla ao a amago taba efe goba efe yeo e lego go Šetulo 4, mabakeng ka moka ke molao woo o amago taba ye e lego go Šetulo 4. 
(5)	Lekgotlatheramelao la profense le ka digela Kopano ya Maloko a Palamente ka Moka molao woo o amago taba ye e lego ka ntle ga maatla a lekgotlapeamelao, goba taba yeo e lego gore Molao wa Palamente o laola molao wa Profense. 
105	Sebopego le dikgetho tša makgotlapeamelao a diprofense
(1)	Go ya ka Šetulo 6A, Lekgotlapeamelao la Profense le bopilwe ke basadi le banna bao ba kgethilwego bjalo ka maloko go ya ka lenaneo la dikgetho leo-
(a)	le beilwego ke molao wa naga;
(b)	le theilwe godimo ga karolo ya Profense yeo ya lenaneo la tlwaelo la bakgethi la setšhaba; 
(c)	leo le hlagišago bonyane bja mengwaga ya go bouta e 18; le 
(d)	o feleletša, ka kakaretšo, ka boemedi bja tekatekano.
[Karolwana ya (1)	e fetošitšwe ke karolwana ya 3 ya Molao wa 2 wa 2003.]
(2)	Lekgotlapeamelao la profense le bopša ke maloko a magareng ga a 30 le 80. Palo ya maloko, yeo e ka fapanago go ya ka profense, e swanetše go bewa go ya ka fomula yeo e beilwego go ya ka molao wa naga. 
106	Boleloko 
(1)	Moagi yo mongwe le yo mongwe yo a loketšwego ke go boutela Kopano ya Maloko a Palamente ka Moka o na le tshwanelo ya go ka ba leloko la lekgotlapeamelao la profense, ka ntle le ge-
(a)	mang le mang yo a thwetšwego ke, goba a le tirelong ya mmušo mme a amogela tefo ya go thwalwa moo goba tirelo, ka ntle le- 
(i)	Tonakgolo le maloko a mangwe a Khuduthamaga ya profense; le 
(ii)	bahlankedi ba bangwe bao mešomo ya bona e sepelelanago le mešomo ya leloko la lekgotlapeamelao la profense, gomme ebile molao wa naga o begile gore e sepelelana le mediro yeo ke; 
(b)	maloko a Kopano ya Maloko a Palamente ka Moka, maloko a go ya go ile a Khansele ya Setšhaba ya Diprofense goba maloko a Khansele ya Bommasepala; 
(c)	boradikoloto bao ba ka se tsošološwego; 
(d)	mang le mang yo kgorotsheko ya Repabliki e laetšego gore ke wa monagano wa go se felele; goba; 
(e)	mang le mang yo, morago ga go thoma go šoma ga karolo ye, a bonwago molato a romelwa kgolegong nako ya go feta dikgwedi tše 12 ntle le go ikgethela go lefa faene Repabliking goba ka ntle ga Repabliki, ge e le gore mediri	yeo ya molato e be e tšewa bjalo ka molato ka Repabliking,	efela ga go na motho yo a ka tšewago bjalo ka yo a rometšwego kgolegong go fihla boipiletšo bja gagwe kgahlanong le kotlo bo šetše bo kwelwe goba go fihla ge kahlolo e šetše e dirilwe. Go lahlegelwa ke ditshwanelo tše di lego temaneng ye go fela morago ga mengwaga ye mehlano morago ga ge kotlo e fedile. 
(2)	Motho yo a se nago le tshwanelo ya go ba leloko la lekgotlapeamelao la profense go ya ka karolwana ya (1)(a)	goba (b)	a ka ba nkgetheng wa lekgotlapeamelao, go hlokometšwe mellwane ye itšego goba mabaka ao a beilwego ke molao wa naga. 
(3)	Motho o lahlegelwa ke go ba leloko la lekgotlapeamelao la profense ge motho yoo- 
(a)	a sa hlwe a na le ditshwanelo tša go ba leloko;
(b)	a sa be gona ka go lekgotlapeamelao ka ntle le tumelelo ka mabaka a melawana le ditaelo tša lekgotlapeamelao di bolela go lahlegelwa ke boleloko; goba
(c)	a sa hlwe a na le ditshwanelo tša go ba leloko la phathi yeo e mo kgthilego bjalo ka leloko la lekgotlapeamelao, ntle le ge leloko leo e le leloko la phathi e nngwe go ya ka Šetulo ya 6A.
[Karolwana ya (3)	e tšeetšwe legato ke karolwana ya 4 ya Molao wa 2 wa 2003.]
(4)	Dikgoba ka go lekgotlatheramelao la profense di swanetše go tlatšwa go ya ka molao wa naga.
107	Keno goba boitlamo
	Pele ga ge maloko a lekgotlapeamelao la profense a thoma go phethagatša mešomo ya bona, ba swanetše go ikana le go itlama go botegela Repabliki le ka go obamela Molaotheo go ya ka Šetulo 2. 
108	Lebaka la Makgotlapeamelao a Diprofense
(1)	Lekgotlapeamelao la profense le kgethwa go ba mošomong mengwaga e mehlano.
(2)	Ge lekgotlapeamelao la profense le phatlalatšwa go ya ka karolo ya 109, goba ge lebaka la go ba modirong ga lona go fihla mafelelong, Tonakgolo ya profense, go ya ka kgoeletšo, o swanetše go bitša le go bega matšatšikgwedi a dikgetho, tšeo di swanetšego go swarwa mo matšatšing a 90 morago ga go phatlalatšwa ga lekgotlapeamelao goba ge go ba modirong ga lona go fihla mafelelong. Kgoeletšo yeo e ipiletšago e beago matšatšikgwedi a dikgetho e ka dirwa pele goba morago ge go ba modirong ga lekgotlapeamelao go fihla mafelelong.
[Karolwana ya (2)	e tšeetšwe legato ke karolwana ya 1 ya Molao wa 3 wa 1999.]
(3)	Ge dipoelo tša dikgetho tša lekgotlapeamelao la profense di sa begwe mo nakong ye e beilwego mo karolong ya 190, goba ge dikgetho di ka beelwa ka thoko ke kgorotsheko, Mopresidente, ka kgoeletšo, o swanetše go bitša le go bega matšatšikgwedi a dikgetho tše dingwe, tšeo di swanetšego go swarwa mo matšatšing a 90 morago ga go fela ga nako ye e beilwego goba morago ga nako ye dikgetho di ilego tša beelwa ka thoko. 
(4)	Lekgotlapeamelao la profense le dula le na le maatla a go šoma go tloga nako ya ge e phatlalatšwa goba ge nako ya lona ya go šoma e fihla mafelelong go fihla letšatši pele ga letšatši la mathomo la dikgetho tša Lekgotlapeamelao le le latelago.
109	Phatlalatšo ya Makgotlapeamelao a diprofense pele pakatiro ya	wona e fela 
(1)	Tonakgolo ya profense o swanetše go phatlalatša lekgotlapeamelao ge-
(a)	lekgotlapeamelao le amogetše sephetho sa go phatlalala seo se thekgwago ke bontši bja diboutu tša maloko;	
(b)	mengwaga e meraro e fetile morago ga go kgethwa ga lekgotlapeamelao.
(2)	Tonakgolo ya motšwaoswere o swanetše go phatlalatša lekgotlapeamelao ge- 
(a)	go na le sekgoba kantorong ya Tonakgolo; ge 
(b)	lekgotlapeamelao le palelwa ke go kgetha Tonakgolo ye mpsha mo matšatšing a 30 morago ga ge sekgoba se hlolegile.
110	Dinako tša go dula le tša maikhutšo
(1)	Ka morago ga dikgetho, tulo ya mathomo ya lekgotlapeamelao la profense e swanetše go direga ka nako le letšatši leo le laotšwego ke moahlodi yoo a beilwego ke Moahlodimogolo eupša e se be matšatši a 14 morago ga ge dipoelo tša dikgetho di begilwe. Lekgotlapeamelao la profense le ka no tšea sephetho ka ga nako le lebaka la go dula go gongwe ga lona le dinako tša lona tša maikhutšo. 
[Karolwana (1)	e tšeetšwe legato ke karolwana ya 8 ya Molao wa 34 wa 2001.]
(2)	Tonakgolo ya profense e ka no bitša lekgotlapeamelao go tla pitšong yeo e sego ya mehleng go tlo ahlaahla merero ye e ikgethago. 
(3)	Lekgotlapeamelao le ka no tšea sephetho sa gore le ka kopanela kae ka mehla.
111	Spikara le Motlatšaspikara
(1)	Ge e dula la mathomo morago ga go kgethwa, goba ge go tsomega go tlatša sekgala se se itšego, lekgotlapeamelao la profense le swanetše go kgetha Spikara le Motlatšaspikara go tšwa malokong a yona.	
(2)	 Moahlodi yo a rometšwego ke Moahlodimogolo o swanetše go swara marapo ge go kgethwa Spikara. Spikara sona se swara marapo ge go kgethwa Motlatšaspikara. 
[Karolwana ya (2)	e tšeetšwe legato ke 9 ya Molao wa 34 wa 2001.]
(3)	Tshepedišo yeo e beilweng go Karolo ya A ya Šetulo 3 e šomišwa ge go kgethwa Spikara le Motlatšaspikara. 
(4)	Lekgotlapeamelao la profense	le ka tloša Spikara goba Motlatšaspikara mošomong ka go tšea sephetho se se bjalo. Bontši bja maloko a lekgotlapeamelao la profense ba swanetše go ba gona ge go tšewa sephetho. 
(5)	Go ya ka melawana le ditaelo tša yona, lekgotlapeamelao la profense le ka kgetha batho bao ba ka swarago marapo go tšwa malokong a lona go thuša Spikara le Motlatšaspikara. 
112	Diphetho
(1)	Ka ntle le ge Molaotheo o laela ka tsela e nngwe -
(a)	bontši bja maloko a lekgotlapeamelao la profense bo swanetše go ba gona pele ga ge bouto e ka tšewa mabapi le Molaokakanywa goba go fetolwa ga Molaokakanywa;
(b)	bonyane bja maloko a teetharong bo swanetše go ba gona pele ga ge go ka boutelwa taba efe goba efe pele ga lekgotlapeamelao la profense; gomme 
(c)	ditaba ka moka tšeo di lego pele ga lekgotlapeamelao la profense di phethwa ka bontši bja dibouto tšeo di dirilwego.
(2)	Leloko la Lekgotlapeamelao la profense leo le swerego marapo kopanong ya lekgotlapeamelao la profense ga le na bouto ya ngangišano, efela- 
(a)	le swanetše go dira bouto ya makgaolakgang ge go na le palo ya diboutu tša go lekana mahlakoreng ka moka a taba; gomme
(b)	a ka dira bouto ya ngangišano ge taba e swanetše go phethwa ka thekgo ya dibouto tša bonyane bja peditharong ya maloko a lekgotlapeamelao la profense. 
113	Ditokelo tša baemedi ba go ya go ile ba makgotlapeamelao a diprofense 
	Ditokelo tša baemedi ba go ya go ile ba makgotlapeamelao a diprofense ba go ya go Khansele ya Setšhaba ya Diprofense ba ka tla, ebile ba ka bolela ka, makgotlapeamelao a diprofense a tšona le dikomiti tša yona, efela ba ka se boute. Lekgotlapeamelao le ka nyaka moemedi wa go ya go ile go tla ka lekgotlapeamelaong goba dikomiting tša lona. 
114	Maatla a Makgotlapeamelao a diprofense 
(1)	Ge e šomiša maatla a yona a go hlama melao, lekgotlapeamelao la profense e ka- 
(a)	hlokomela, hlama, fetola goba go gana molao wo itšego pele ga lekgotlapeamelao la profense ka; le
(b)	thoma goba go rulaganya melao, ka ntle le Melaokakanywa ya ditšhelete.
(2)	Lekgotlapeamelao la profense le swanetše go loga maano a-
(a)	go kgonthišiša gore ditho ka moka tša khuduthamaga ya profense lekaleng la mmušo wa setšhaba di ikarabela go yona; le 
(b)	go dula e hlokometše diphošo tša- 
(i)	tirišo ya maatla a khuduthamaga ya profense,	go akaretšwa tiragatšo ya melao; le	
(ii)	lefapha le lengwe le le lengwe la profense la mmušo.
115	Bohlatse goba tshedimošo pele ga makgotlapeamelao a diprofense 
	Lekgotlapeamelao la profense goba e nngwe ya dikomiti tša lona e ka-
(a)	bitša motho yo mongwe le yo mongwe go tla pele ga yona go fa bohlatse ka boikano goba ka go itlama, goba go tliša ditokumente; 
(b)	nyaka gore motho yo mongwe le yo mongwe goba sehlongwa sa profense go bega go lona; 
(c)	gapeletša, go ya ka molao wa profense goba ka melawana le ditaelo, motho yo mongwe le yo mongwe goba sehlongwa se sengwe go obamela dipitšo goba senyakwa go ya ka temana ya (a)	goba ya (b); le 
(d)	go amogela dingongorego, dikgopelo goba ditšhišinyo go tšwa go batho ba bangwe bao ba nago le kgahlego goba dihlongwa.
116	Dithulaganyo tša ka gare, ditherišano le ditshepedišo tša makgotlapeamelao a diprofense	
(1)	Lekgotlapeamelao la profense le ka-
(a)	beakanya le go laola dithulaganyo tša yona tša ka gare, ditshepetšo le ditshepedišo; le go 
(b)	hlama melawana le ditaelo tšeo di amago mešomo ya yona, go lebeletšwe temokrasi ya kemedi le go kgatha tema, maikarabelo, ponagatšo le go ba le seabe setšhabeng. 
(2)	Melawana le ditaelo tša lekgotlapeamelao la profense di swanetše go beakanyetša-
(a)	go hlongwa, tlhamo, maatla, mešomo, tshepedišo, le lebaka la dikomiti tša yona;
(b)	go kgathatema ditshepedišong tša lekgotlapeamelao la profense le dikomiti tša yona tša diphathi ka moka tše nnyane tše di emetšwego ka go lekgotlapeamelao, ka tsela yeo e sepelelanago le temokrasi;
(c)	thušo ya ditšhelete le ya taolo go phathi ye nngwe le ye nngwe yeo e emetšwego ka go lekgotlapeamelao go ya ka tekatekano ya boemedi, go dira gore phathi le moetapele wa yona e phethe mediro ya yona ka go lekgotlapeamelao ka tshwanelo; le
(d)	 	kamogelo ya moetapele wa phathi e kgolo ya kganetšo ka go lekgotlapeamelao bjalo ka Moetapele wa Kganetšo. 
117	Tshwanelo
(1)	Maloko a lekgotlapeamelao la profense le maloko a profense a go ya go ile ka go Khansele ya Setšhaba ya Diprofense -
a na le tokologo ya go bolela ka go lekgotlapeamelao le ka dikomiting tša lona, ge fela go šetšwa melawana le ditaelo tša yona; gomme
ba ka se išwe tshekong ka melato ya segae goba ya bosenyi, go swarwa, go golegwa goba ditshenyo tša- 
	 (i)	se sengwe le se sengwe seo ba se boletšego, ba se tšweleditšego pele goba ba se išitšego go lekgotlapeamelao goba go e nngwe ya dikomiti tša lona; goba	
se sengwe le se sengwe seo se utullotšwego ka lebaka la seo ba se boletšego, ba se tšweleditšego pele goba ba se išitšego go lekgotlapeamelao goba go e nngwe ya dikomiti tša lona. 
(2)	Ditshwanelo le ditokologo tše dingwe tša lekgotlapeamelao le maloko a lona di tla laolwa ke molao wa naga. 
(3)	Meputso, diputseletšo le mehola tšeo di lefelwago maloko a lekgotlapeamelao la profense di dirwa thwii go tšwa Sekhwameng sa Profense sa Ditšhelete. 
118	Phihlelelo le go tšea karolo ga setšhaba ka go Kopano ya Maloko a Palamente ka Moka 
(1)	Lekgotlapeamelao la profense le swanetše go-
(a)	nolofatša go tšea karolo ga setšhaba go hlameng ga melao le ditshepedišo tše dingwe tša lekgotlapeamelao le dikomiti tša lona; le 
(b)	go dira mediro ya yona phatlalatša le go dula ga yona, le tša dikomiti tša yona pepeneneng, eupša go ka tšewa magato a go kwala- 
(i)	go laola go tsena ga batho, go akaretšwa le go tsena ga boraditaba ka go lekgotlapeamelao le ka dikomiting tša lona; le	
(ii)	go beakanyetša go phuruphutšwa ga motho o mongwe le o mongwe, mo go swanetšego, kganetšo ya go tsena ka, goba go ntšhiwa ga motho ofe goba ofe.	
(2)	Lekgotlapeamelao la profense le ka se kgetholle batho, go akaretšwa boraditaba, tulong ya komiti ka ntle le ge seo se kwešišega ebile go le molaong go dira bjale setšhabeng seo se lokologilego sa temokrasi. 
119	Tšweletšo ya Melaokakanywa 
	Ke fela maloko a Khuduthamaga ya profense goba komiti goba leloko la lekgotlapeamelao la profense leo le ka tšweletšago Molaokakanywa ka go lekgotlapeamelao, gomme ke fela leloko la Khuduthamaga le le rwelego maikarabelo a merero ya ditšhelete tša profense le le ka tšweletšago Molaokakanywa wa ditšhelete ka go lekgotlapeamelao la profense.	
120	Melaokakanywa ya Ditšhelete
(1)	Molaokakanywa ke Molaokakanywa wa ditšhelete ge o- 
(a)	lekanyetšago ditšhelete;
(b)	lefiša metšhelo ya setšhaba, makgetho, metšhelo ya dithoto goba metšhelo ya tlaleletšo; 
(c)	fediša le go fokotša, go se sa amogela dithekgo go tšwa go, metšhelo e mengwe le e mengwe ya setšhaba makgetho, metšhelo ya dithoto goba goba metšhelo ya tlaleletšo; goba
(d)	o dumelela ditefedišothwii go tšwa go Sekhwama sa Profense sa Ditšhelete.
(2)	Molaokakanywa wa ditšhelete ga se wa swanela go šoma ka taba ye itšego ka ntle le ge-
(a)	taba yeo e sepelelana le tekanyetšo ya tšhelete;
(b)	e gapeletša, e fediša goba e fokotša metšhelo ya setšhaba, makgetho, metšhelo ya dithoto le metšhelo ya tlaleletšo;
(c)	go se sa amogela dithekgo go tšwa go metšhelo ya profense, makgetho, metšhelo ya dithoto le metšhelo ya tlaleletšo; goba
(d)	go dumelela ditefedišothwii go tšwa go Sekhwama sa Profense sa Ditšhelete.
(3). Molao wa profense o swanetše go hlagiša tshepedišo yeo lekgotlapeamelao la profense le ka fetošago Molaokakanywa ya ditšhelete.
[Karolo ya 120 e tšeetšwe legato ke karolwana ya 3 ya Molao wa 61 wa 2001.]
 121	Kamogelo ya Melaokakanywa
(1)	Tonakgolo e swanetše go amogela le go saena Molaokakanywa wo o fetišitšwego ke lekgotlapeamelao la profense go ya ka Kgaolo ye goba, ge Tonakgolo a na le kgonono ka go ba molaong ga Molaokakanywa, a o bušetše morago go lekgotlapeamelao gore o lekolwe lefsa.
(2)	Ge e le gore ka morago ga go lekola lefsa, Molaokakanywa o akaretša ka botlalo dikgonono tša Tonakgolo, gona Tonakgolo o swanetše go amogela le go saena Molaokakanywa woo; ge go se bjalo, Tonakgolo	e swanetše go-
(a)	amogela le go saena Molaokakanywa; goba 
(b)	a o fetišetše go Kgorotsheko ya Molaotheo go tšea sephetho ka ga go ba molaong ga wona. 
(3)	Ge Kgorotsheko ya Molaotheo e ka fetša ka gore Molaokakanywa o mo molaong, Tonakgolo e swanetše go o amogela le go o saena. 
122	Kgopelo ya maloko ka go Kgorotsheko ya Molaotheo
(1)	Maloko a lekgotlapeamelao la profense a ka dira kgopelo go Kgorotsheko ya Molaotheo go fiwa taelo ya gore Molao wa profense ka moka ga wona, goba karolo ya wona ga e molaong. 
(2)	Kgopelo -
(a)	e swanetše go thekgwa ke bonyane teetharong ya maloko a lekgotlapeamelao la profense; gape 
(b)	e swanetše go dirwa matšatšing a 30 morago ga ge Tonakgolo a amogetše le go saenela molao woo. 
(3)	Kgorošotsheko ya Molaotheo e ka laela gore Molao ka moka goba karolo ya wona e lego yona taba ya kgopelo go ya ka karolwana ya (1)	ga o na le maatla go fihla ge Kgorotsheko e tšere sephetho ka kgopelo ge-
(a)	kgahlego ya toka e nyaka se; le	
(b)	kgopelo e na le kgonagalo ye e bonalago ya katlego.
(4)	Ge kgopelo e se ya atlega, ebile e ile ya se be le kgonagalo ye e bonalago ya katlego, Kgorotsheko ya Molaotheo e ka laela gore bakgopedi ba lefe ditshenyegelo. 
 123	Phatlalatšo ya Melao ya profense
	Molaokakanywa wo o amogetšwego le go saenelwa ke Tonakgolo e ba Molao wa profense, ebile o swanetše go phatlalatšwa ka pela gomme o thoma go šoma le seemetseng ge o phatlaladitšwe goba go tloga nakong yeo o beilwego ke Molao. 
124	Go lota ga Melao ya profense
	Khopi ya Molao wa profense yeo e saennwego ke bohlatse bjo bo feletšego bja ditlagišo tša Molao woo gomme, morago ga go phatlalatšwa, o swanetše go išwa go Kgorotsheko ya Molaotheo go lotwa.
Dikhuthamaga tša Diprofense (krl 125-141)
125	Maatlaphetiši a diprofense
(1)	Maatlaphetiši a profense	a filwe Tonakgolo ya profense yeo.
(2)	Tonakgolo o diragatša maatlaphetiši, gammogo le maloko a mangwe a Khuduthamaga, ka go-
(a)	diragatša melao ka moka ka profenseng; 
(b)	 	diragatša melao ka moka ya naga ka gare ga mollwane wa yona wa mešomo woo o beilwego ka go Šetulo 4 goba 5 ka ntle le ge Molaotheo goba Molao wa Palamente o hlagiša ka tsela e nngwe.
laola ka profenseng, melao ya naga ka ntle ga mellwane ya yona ya mešomo yeo e beilwego ka go Šetulo 4 goba 5, taolo yeo e filwego khuduthamaga ya profense go ya ka Molao wa Palamente.
 go dira le go diragatša melaotshepetšo ya profense
(e)	kgokaganya mediro ya taolo ya profense le dikgoro tša yona; 
(f)	go rulaganya le go thoma melao ya profense; le 
(g)	 	phethagatša mediro e mengwe le e mengwe yeo e filwego khuduthamaga ya profense go ya ka Molaotheo goba ka Molao wa Palamente.
(3)	Profense e na le maatla a phetišo go ya ka karolwana ya (2)(b)	fela go fihla moo profense e nago le bokgoni bja taolo bja go tšea maikarabelo gabotse. Mmušo wa setšhaba, ka go diriša molao le dikgato tše dingwe, o swanetše go thuša diprofense go hlabolla bokgoni bja taolo bjo bo nyakegago mo phethagatšong ya bolaodi, e lego go phetheng mediro yeo e laeditšwego go karolwana ya (2).
(4)	Phapano e nngwe le ye nngwe mabapi le bokgoni bja profense bja taolo ya merero ka moka e swanetše go romelwa go Khansele ya Setšhaba ya Diprofense gore e rarollwe mo matšatšing a 30 morago ga go romelwa go Khansele. 
(5)	Go ya ka Karolo 100, go tsenywa tšhomišong ga molao wa profense mo profenseng ke maatla ao a lebanego Khuduthamaga ya profense e nnoši. 
(6)	Khuduthamaga ya profense e swanetše go šoma go ya ka- 
(a)	Molaotheo; le 
(b)	Molaotheo wa profense ge e le gore molaotheo wa profense o šetše o fetišitšwe.
126	Kabo ya mešomo
	Leloko la Khuduthamaga ya profense le ka abela maatla a itšego goba mošomo ofe goba ofe wo o swanetšego go diragatšwa goba go phethagatšwa go ya ka Molao wa Palamente goba Molao wa profense, go Khansele ya Mmasepala. Kabo- 
(a)	e swanetše go ba bjalo ka tumelelano magareng ga leloko leo la Khuduthamaga le leloko la Khansele Mmasepala;
(b)	e swanetše go sepelelana le Molao woo maatla le mešomo ya maswanedi di dirwago le go phethagatšwa go latela wona; gomme 
(c)	o thoma go šoma ge Tonakgolo e se no dira kgoeletšo. 
127	Maatla le mešomo ya Ditonakgolo
(1)	Tonakgolo ya profense e na le maatla le mešomo tšeo a di filwego ke Molaotheo le melao.
(2)	Tonakgolo ya profense e na le maikarabelo a-
(a)	go amogela le go saena Melaokakanywa;
(b)	go bušetša Molaokakanywa go lekgotlapeamelao la profense gore o lekolwe lefsa go kgonthišiša gore o molaong; 
(c)	go fetišetša Malaokakanywa go Kgorongtsheko ya Molaotheo gore e fe sephetho sa gore Molaokakanywa o molaong;
(d)	go bitša lekgotlapeamelao la profense go tlo tsenela tulo ye e sego ya mehleng go tlo rera ditaba tše di ikgethilego;
(e)	go hloma dikomišene tša dinyakišišo; le
(f)	go goeletša referentamo ka profenseng go ya ka molao wa naga;
128 Go kgetha ga Ditonakgolo	
1) Ge e dula la mathomo morago ga go kgethwa, goba ge go tsomega go tlatša sekgala se se itšego, lekgotlapeamelao la profense le swanetše go kgetha Spikara le Motlatšaspikara go tšwa malokong a yona.	
(2)	 Moahlodi yo a rometšwego ke Moahlodimogolo o swanetše go swara marapo ge go kgethwa Spikara. Spikara sona se swara marapo ge go kgethwa Motlatšaspikara. 
[Karolwana ya (2)	e tšeetšwe legato ke karolwana ya 10 ya Molao wa 34 wa 2001.]
(3)	Dikgetho tša go tlatša sekgoba ka kantorong ya Tonakgolo di swanetše go swarwa nako le letšatšikgwedi tšeo di beilwego ke Moahlodimogolo, e fela e sego ka morago ga matšatši a 30 morago ga ge sekgoba se hlolegile.
[Karolwana ya (3)	e tšeetšwe legato ke karolwana ya 10 ya Molao wa 34 wa 2001.]
129	Go thoma modiro ga Ditonakgolo
	Tonakgolo ye e kgethilwego e swanetše go thoma modiro mo matšatšing a mahlano morago ga go kgethwa, ka go ikana goba go itlama gore o tla botegela Repabliki le go obamela Molaotheo go ya ka Šetulo 2. 
130	Pakatiro ya Ditonakgolo
(1)	Pakatiro ya Tonakgolo e thoma ge Tonakgolo e thoma modiro gomme e felela ge go eba le sekgoba goba ge motho yo a latelago a kgethilwe go ba Tonakgolo a thoma modiro.
(2)	Ga go motho yo a swanetšego go dula setulo sa BoTonakgolo makga a go feta a mabedi, eupša ge motho a kgethwa go tlatša sekgoba ka kantorong ya botonakgolo; sebaka sa magareng a go kgethwa ga gagwe le go kgethwa ga Tonakgolo yo a latelago ga se tšewe bjalo ka pakatiro.
(3)	Lekgotlapeamelao la profense, ka sephetho seo se tšerwego sa bontši bja bonnyane bja peditharong ya maloko a lona, le ka tloša Tonakgolo setulong fela mabakeng a-	
(a)	go tlola Molaotheo le melao mo go šiišago; 
(b)	maitshwaro ao a tlogago a le bohlaswa; goba 
(c)	go šitwa ke go phethagatša mešomo ya setulo sa gagwe. 
(2)	Mang le mang yo a tlošitšwego setulong sa BoTonakgolo go ya ka karolwana ya 3 (a)	goba (b)	a ka se neelwe ditshwanelo tša kantoro yeo, le gona ga a swanela go šoma mošomo ofe goba ofe wa setšhaba. 
131	Ditonakgolo tša Motšwaoswere 
(1)	Ge Tonakgolo e se gona Repabliking goba a šitišwa ke mabaka a mangwe go phetha mešomo ya gagwe ya BoTonakgolo, goba nakong yeo go nago le sekgoba setulong sa BoTonakgolo, mohlankedi go ya ka tatelano ye e latelago, o tla šoma bjalo ka Tonakgolo:
(a)	Leloko la Khuduthamaga ya profense leo le kgethilwego ke Tonakgolo.
(b)	Leloko Khuduthamaga ya profense leo le kgethilwego ke maloko a mangwe a Khuduthamaga.
(c)	Spikara, go fihlela ge lekgotlapeamelao la profense le kgethile le lengwe la maloko a lona.
(2)	Tonakgolo ya Motšwaoswere e na le maikarabelo, maatla le mešomo ya Tonakgolo. 
(3)	Pele a tšea maikarabelo, maatla le mediro ya Tonakgolo,	Tonakgolo ya Motšwaoswere o swanetše go ikana goba go itlama gore o tla botegela Repabliki le go obamela Molaotheo go ya ka Šetulo 2. 
132 Dikhuduthamaga
(1)	Khuduthamaga ya profense e bopša ke Tonakgolo, bjalo ka hlogo ya Khuduthamaga, le maloko ao a sego ka fase ga ba bahlano bao ba sa fetego ba lesome bao ba kgethilwego ke Tonakgolo go tšwa go maloko a lekgotlapeamelao la profense.
(2)	Tonakgolo ya profense e kgetha maloko a Khuduthamaga, o ba nea maatla le mešomo gomme o kgona le go ba raka mošomong. 
133	Maikarabelo le mešomo
(1)	Maloko a khuduthamaga ya profense ba na le maikarabelo a mešomo ya phetišo yeo ba e filwego ke Tonakgolo.
(2)	Maloko a Khuduthamaga ya profense a na le maikarabelo a mohlakanelwa le ka bonoši go lekgotlapeamelao phethagatšong ya maatla a bona le go diragatša mešomo ya bona.
(3)	Maloko a Khuduthamaga ya profense a swanetše go- 
(a)	šoma go ya ka Molaotheo, le ge molaotheo wa profense o amogetšwe ka profenseng, gape go ya ka molatheo woo; le 
	fa lekgotlapeamelao dipego ka botlalo le gona nako le	nako, ka ga merero ye e welago taolong ya bona. 
134	Tšwetšopele ya Dikhuduthamaga ka morago ga dikgetho
	Ge dikgetho tša lekgotlapeamelao la profense di swarwa, Khuduthamaga le maloko a yona ba dula ba na le maatla a go šoma go fihla motho yoo a kgethilwego go ba Tonakgolo ke lekgotlapeamelao leo le latelago a thoma modiro.
135	Keno goba boitlamo
	Pele ga ge maloko a Khuduthamaga ya profense a thoma go phethagatša mešomo ya bona, ba swanetše go ikana le go itlama go botegela Repabliki le ka go obamela Molaotheo go ya ka Šetulo 2. 
136	Maitshwaro a maloko a Khuduthamaga 
(1)	Maloko a Khuduthamaga ya profense ba swanetše go itshwara go ya ka mokgwa wa boitshwaro woo o beilwego ke molao wa naga. 
(2)	Maloko a Khuduthamaga ya profense ga ba swanela go-
(a)	amogela mošomo o mongwe o ba lefiwago go wona; 
(b)	itshwara ka tsela yeo e lego kgahlanong le mešomo ya bona goba go ipea maemong ao a ka tlišago kotsi ya thulano magareng a maikarabelo a bona a semmušo le dikgahlego tša bona tša ka ntle; goba 
(c)	go šomiša maemo a bona goba tshedimošo yeo ba e filwego, go ikhumiša goba go hola motho yo mongwe ka tsela yeo e sa lokago. 
137	Phetišetšo ya mediro 
	Tonakgolo ka kgoeletšo, a ka fetišetša go leloko le lengwe la Khuduthamaga-
(a)	tiragatšo ya molao ofe goba ofe woo o lego matsogong a leloko le lengwe; goba
(b)	maatla goba mošomo ofe goba ofe woo o filwego leloko le lengwe ke molao. 
138	Kabo ya nakwana ya mešomo
	Tonakgolo ya profense a ka abela leloko la Khuduthamaga maatla a itšego goba mošomo wo mongwe le wo mongwe wa leloko le lengwe leo le sego gona mošomong goba leo le šitwago ke go diragatša maatla ao goba go phetha mošomo woo. 
139	Tsenogare ya mmušo wa profense go dipušoselegae
(1)	Ge mmasepala o sa kgone goba e sa phethagatše mešomo ya wona wa phetišo go ya ka Molaotheo goba molao, khuduthamaga ya profense ye e swanetšego e tla tsena taba yeo ka go tšea magato a go swanela go kgonthišiša phethagatšo ya mošomo woo, go akaretšwa- 
(a)	go ntšha taelo yeo e lebišitšwego go Khansele ya Mmasepala, moo go hlalošwago bogolo bja go palelwa go phetha mešomo ya yona le go bolela ka magato ao a swanetšego go tšewa phethagatšong ya tshwanelo yeo; le	
(b)	go tšea maikarabelo a go phethagatša mošomo woo mmasepaleng woo go fihlela moo go swanetšego go-	
(i)	tšwetšapele maemo a bohlokwa a naga goba go beya maemo a bonyane go phetheng ga ditirelo;	
(ii) 		thibela Khansele yeo ya Mmasepala go tšea magato ao a sa kwagalego ao e ka bago ditšhitišo go dikgahlego tša mmasepala o mongwe goba nageng ka moka. 
(iii)	tšwetšapele botee bja ekonomi; goba
(c)	go phatlalatša Khansele ya Mmasepala le go kgetha molaodi go fihlela ge Khanseele e mpsha ya Mmasepala go begilwe gore e kgethilwe, ge e le gore mabaka ao e sego a tlwaelo e dumelela seo.	
(2)	Ge khuduthamaga ya profense e ka tsena taba ya mmasepala ka bogare go ya ka karolwana ya (1)(b)	– 
e swanetše go romela Tsebišo ya tsenogare ye e ngwadilwego go- 
(i)	 leloko la Kabinete leo le nago le maikarabelo a pušoselegae; 
(ii)	lekgotlapeamelao la profense leo le amegago le Khansele ya Setšhaba ya Diprofense,
mo matšatšing a 14 ka morago ga ge tsenogare e thomile;
tsenogare e swanetše go fela ge-
(i)		leloko la Kabinete leo le nago le maikarabelo a merero ya pušoselegae le sa dumele tsenogare yeo mo matšatšing a 28	morago ga ge tsenogare e thomile goba mafelelong nako yeo ge e se ya dumelelwa tsenogare yeo; goba 
(ii)	Khansele e sa dumele tsenogare yeo mo matšatšing a 180 morago ga ge tsenogare e thomile goba mafelelong nako yeo ge e se ya dumelelwa tsenogare yeo; gomme
(c)	Khansele e swanetše, ge tsenogare e ntše e tšwelapele, go lekola lefsa tsenogare nako le nako e bile e ka dira ditigelo tše itšego tša maleba go khuduthamaga ya profense.
(3)	Ge Khansele ya Mmasepala e phatlalatšwa go ya ka karolwana ya (1)(c)	– 
	khuduthamaga ya profense e swanetše go romela semeetseng Tsebišo ya tsenogare ye e ngwadilwego go- 
(i)	 leloko la Kabinete leo le nago le maikarabelo a merero ya pušoselegae; le 
(ii)	lekgotlapeamelao la profense leo le amegago le Khansele ya Setšhaba ya Diprofense; gomme
(b)	 ge phatlalatšo e diragala mo matšatšing a 14 go tloga letšatšikgweding leo Tsebišo e amogetšwego ka lona ke Khansele ka ntle le ge le phaetšwe thoko ke leloko leo la Kabinete goba Khansele pele ga ge matšatši ao a 14 a fela;
(4)	Ge mmasepala o sa kgone goba o sa phethagatše mošomo go ya ka Molaotheo goba ka molao go amogela ditekanyetšo goba magato a go tšweletša ditseno ao a swanetšego go diragatša ditekanyetšo, khuduthamaga ye e amegago ya profense e swanetše go tsenagare ka go tšea magato ao a swanetšego go kgonthišisa gore ditekanyetšo goba magato ao a go tšweletša ditseno a a amogelwa, go akaretšwa Khansele ya Mmasepala le go-
(a)	 go kgetha molaodi go fihlela ge Khansele e mpsha ya	Mmasepala e begilwe gore e kgethilwe; le 
(b)	go amogela ditekanyetšo tša motšwaoswere goba magato a go tšweletša ditseno go thuša go šoma ga go tšwelapele ga mmasepala.
(5)	Ge mmasepala, ka lebaka la mathata ka mererong ya wona ya ditšhelete, e tlolong ya go šiiša ya go tšwelapele ya ditlamego tša yona go aba ditirelo tša motheo goba go fihlelela maikarabelo a wona a ditšhelete, goba e amogela gore e palelwa ke go fihlelela ditlamego tša yona goba maikarabelo a yona a ditšhelete, khuduthamaga ye e amegago e swanetše go-
(a)	gapeletša maano a go tsoga gape ao a ikemišeditšego go šireletša bokgoni bja mmasepala bja go fihlelela ditlamego	tša yona go go aba ditirelo tša motheo goba go fihlelela maikarabelo a wona a ditšhelete, ao-
(i)	ao a tla beakanywa go go ya ka molao wa naga; le go
(ii)	tlama mmasepala tiragatšong ya wona ya maatla a molao le a taolo, eupša go bogolo bjo bo nyakegago go rarolla mathata mererong ya wona ya ditšhelete; le
go phatlalatša Khansele ya Mmasepala, ge mmasepala o sa kgone go amogela magato a molao, go akaretša ditekanyetšo goba magato a mangwe le a mangwe a go tšweletša ditseno, ao a nyakegago go diragatša maano a go tsoga gape, le
(i)	go kgetha molaodi go fihlela ge Khansele e mpsha ya	Mmasepala e begilwe gore e kgethilwe; le 
(ii) go amogela ditekanyetšo tša motšwaoswere goba magato a mangwe a go tšweletša ditseno go thuša go šoma ga go tšwelapele ga mmasepala; goba
(c)	ge Khansele ya Mmasepala e sa phatlalatšwe go ya ka temana ya (b), ya tšea maikarabelo a go diragatša magato a go tšweletša ditseno moo e lego gore mmasepala o ka se goba wa se diragatše magato a go tsoga gape.
(6)	Ge khuduthamaga ya profense e ka tsena taba ya mmasepala ka bogare go ya ka karolwana ya (4)	goba ya (b), e swanetše go romela Tsebišo ya tsenogare ye e ngwadilwego go- 
(i)	 leloko la Kabinete leo le nago le maikarabelo a merero ya pušoselegae; 
(ii)	lekgotlapeamelao la profense leo le amegago le Khansele ya Setšhaba ya Diprofense,
mo matšatšing a šupa ka morago ga ge tsenogare e thomile.
(7)	Ge khuduthamaga ya profense e ka se kgone goba e sa goba e sa diragatše maatla a yona gabotse goba e sa phethagatše mešomo yeo e beilwego karolwaneng ya (4)	goba ya(5), khuduthamaga ya setšhaba e swanetše go tsenagare go ya ka karolwana ya (4)	goba ya(5)	legatong la khuduthamaga ya profense ye e amegago.
(8)	Molao wa setšhaba o tla laola tiragatšo ya karolo ye, go akaretša tshepedišo ye e hlamilwego ke karolo ye.
[Karolo ya 139 e tšeetšwe legato ke karolwana ya 4 ya Molao wa 3 wa 2003.]
140	Diphetho tša phethišo
(1)	Sephetho se se tšerwego ke Tonakgolo se swanetše go ba se se ngwadilwego ge se- 
(a)	tšerwe go latela molao; goba	
(b)	se na le ditlamorago tša semolao.
(2)	Sephetho se se ngwadilwego sa go tšewa ke Tonakgolo se swanetše go saenelwa gape ke leloko le lengwe la Khuduthamaga ge e le gore sephetho seo se ama mošomo wo o abetšwego leloko leo. 
(3)	Dikgoeletšo, melawana le didirišwa tše dingwe tša melawana ye mengwe ya profense di swanetše go hwetšagala setšhabeng ka moka.	
(4)	Melao ya profense e ka laetša ka mokgwa wo e lego gore, le bokgole bjo, didirišwa tše di ukangwego karolwaneng ya (3)	di swanetše go-
(a)	ahlaahlwa ka lekgotlapeamelao la profense; le go
(b)	amogelwa ke lekgotlapeamelao la profense.
141	Ditšhišinyo tša go hloka kholofelo 
(1)	Ge lekgotlapeamelao la profense, ka bouto ye e thekgwago ke bontši bja maloko a yona e ka fetiša tšhišinyo ya go hloka kholofelo go Khuduthamaga ya profense, go sa akaretšwe Tonakgolo, Tonakgolo e tla swanela ke go bea Khuduthamaga lefsa. 
(2)	Ge lekgotlapeamelao la profense, ka bouto ye e thekgwago ke bontši bja maloko a yona e ka fetiša tšhišinyo ya go hloka kholofelo go Khuduthamaga ya profense, Tonakgolo le maloko a mangwe a Khuduthamaga ba swanetše go rola modiro.
Melaotheo ya Diprofense (krl 142-145)
142	Kamogelo ya Melaotheo ya Diprofense
	Khuduthamaga ya profense le tla fetiša molaotheo wa profense goba, ge go kgonega, la fetoša molaotheo, ge bonyane bja peditharong ya maloko a lona ba boutela go amogela Molaokakanywa.
143	Dikagare tša melaotheo ya diprofense
(1)	Molaotheo wa profense, goba phetošo ya molaotheo, ga se ya swanela go se latele Molaotheo wo, e fela e ka hlagiša- 
(a)	Khuduthamaga ya profense goba mafapha a khuduthamaga le ditshepedišo tšeo di fapanago le tšeo di hlagišitšwego ka mo Karolong ye; goba 
(b)	sehlongwa, tema, taolo le maemo a kgoši ya setšo, ge go kgonega.
(2)	Ditlhagišo tšeo di lego ka go molaotheo wa profense goba phetošo ya molaotheo go ya ka temana ya (a)	goba (b)	ya karolwana ya (1)-
(a)	di swanetše go latela melao ka go karolo ya 1 le Kgaolo ya 3; le
(b)	di ka se fe profense maatla afe goba afe goba mešomo yeo e welago- 
(i)	ka ntle ga mešomo ya profense go ya ka Šetulo 4 le 5; goba
(ii)	ka ntle ga maatla le mešomo yeo e filwego profense ke dikarolo tše dingwe tša Molaotheo.
144	Tlhatselo ya melaotheo ya diprofense
(1)	Ge lekgotlapeamelao la profense le phasišitše goba e fetošitše molaotheo, Spikara sa lekgotlapeamelaose o swanetše go neela sengwalwa seo sa molaotheo goba diphetošo tša molaotheo go Kgorotsheko ya Molaotheo gore o hlatselwe. 
(2)	Ga go sengwalwa sa molaotheo wa profense goba diphetogo tšeo di dirwago molaotheong se se tla bago molaong go fihlela ge Kgorotsheko ya Molaotheo e hlatsetše- 
(a)	gore sengwalwa se fetišitšwe go ya ka karolo ya 142; le 
(b)	gore sengwalwa ka moka se dumelelana le karolo ya 143.
145	Go saenwa, go phatlalatšwa le go lotwa ga melaotheo ya diprofense
(1)	Tonakgolo ya profense e swanetše go amogela le go saena sengwalwa sa molaotheo wa profense goba diphetošo tšeo di hlatsetšwego ke Kgorotsheko ya Molaotheo.
(2)	Sengwalwa seo se amogetšwego le go saenwa ke Tonakgolo se swanetše go phatlalatšwa kuranteng ya Mmušo gomme se tsene tirišong ge se seno phatlalatšwa goba nakong ye sa tlago bjalo ka ge go rerilwe go ya ka molaotheo woo goba diphetošo.
(3)	Sengwalwa se se saennwego sa molaotheo wa profense goba diphetošo tša molaotheo ke bohlatse bjo bo feleletšego bja ditlhagišo tša sona gomme, ka morago ga phatlalatšo, se swanetše go išwa go Kgorotsheko ya Molaotheo go lotwa. 
Melao ye e fapanago (krln 146-150)
146	Diphapano gare ga melao ya naga le ya profense 
(1)	Karolo ye e dirišwa mo phapanong gare ga melao ya naga le ya profense ye e welago lekaleng la tirišo le le tšwelelago go Šetulo 4. 
(2)	Melao ya naga yeo e dirišwago ka go swana malebana le naga ka bophara e laola melao ya profense ge fela le lengwe le le lengwe la mabaka a a latelago le ka šetšwa:
(a)	Molao wa naga o swaragane le morero woo o ka se kgonego go laolega ka tshwanelo ke molao wo o theilwego ke diprofense di ikemetše ka botšona. 
(b)	dikgahlego tša setšhaba ka moka di tsoma gore morero woo o lekolwe ka go swana nageng ka bophara, gomme molao wa setšhaba o fa tshwano yeo ka go thea- 
(i)	dikelo le maemo;
(ii)	ditlhako; goba
(iii)	melawana ya setšhaba.
(c)	Molao wa naga o bohlokwa go- 
(i)	tlhokomelo ya tšhireletšo ya setšhaba;
(ii)	tlhokomelo ya botee bja ekonomi;
(iii)	tšhireletšo ya mmaraka wa bohle go ya ka tšhutišo ya dithoto, ditirelo, matlotlo le mešomo; 
(iv)	go tšwetša pele ditiro tsa ekonomi go tshela mellwane ya diprofense;
(v)	go tšwetšapele dibaka tše di swanago goba diphihlelelo tše di lekanago ditirelong tša mmušo; goba
(vi)	tšhireletšo ya tikologo.
(3)	Molao wa naga o laola molao wa profense ge molao wa naga o ikemišeditše go thibela tiragalo ye e sa swanelago ya profense ye- 
(a)	e kgethollago go tša ekonomi, tša maphelo goba dikgahlego tša tšhireletšo ya profense e nngwe goba naga ka bophara; goba 
(b)	e šitiša tiragatšo ya molawana wa ekonomi ya setšhaba. 
(4)	Ge go na le ngangišano mabapi le tlhokego ya molao wa naga morerong wo o tšweleditšwego karolwaneng ya (2)(c)	gomme ngangišano yeo ya tlišwa pele ga kgorotsheko go rarollwa, Kgorotsheko e swanetše go hlompha tumelo goba go ganwa ga molao ke Khansele ya Setšhaba ya Diprofense. 
(5)	Molao wa profense o na le maatla godimo ga molao wa naga ge karolwana ya (2)	goba (3)	e sa šome.
(6)	Molao wo o hlamilwego go ya ka Molao wa Palamente goba Molao wa profense o ka ba le maatla ge fela molao woo o amogetšwe ke Khansele ya Setšhaba ya Diprofense.
(7)	Ge Khansele ya Setšhaba ya Diprofense e sa tšee sephetho mo matšatšing a 30 a tulo ya yona ya mathomo morago ga ge molao woo o tlišitšwe go yona, molao woo o swanetše go swanetše go sekasekwa mabakeng ka moka gore o amogetšwe ke Khansele. 
(8)	Ge Khansele ya Setšhaba ya Diprofense e sa amogele molao woo o umakilwego, karolwaneng ya (6), mo e swanetše, matšatšing a 30 a go tšea sephetho ga yona, mabaka a yona a go se amogele molao woo go bolaodi bjoo bo rometšego molao woo go yona. 
147	Diphapano tše dingwe
(1)	Ge go na le phapano magareng ga molao wa naga le tlhagišo ya molaotheo wa profense mabapi le- 
(a)	taba yeo Molaotheo o tlogago o e nyaka goba o e ukamago mo tirišong ya molao wa naga, molao wa naga o laola tlhagišo yeo e dirilwego mo go molaotheo wa profense;
(b)	tsenatseno ya molao wa naga go ya ka karolo ya 44(2), molao wa naga o laola ditlhagišo tša molaotheo wa profense; goba 
(c)	taba yeo e lego lekaleng la tirišo leo le lego lenaneong la Šetulo 4, karolong ya 146 o šoma bjalo ka ge nke tlhagišo yeo e amegago ya molaotheo wa profense ke molao wa profense wo o ukangwego karolong yeo.
(2)	Molao wa naga wo o ukangwego mo karolong ya 44(2)	o laola molao wa profense wa mabapi le ditaba tše di ukangwego mo lekaleng la tirišo le le tšweleditšego ka go Šetulo 5. 
148	Diphapano tšeo di ka se rarollwego
	Ge ngangišano mabapi le phapano e ka se rarollwe ke kgorotsheko, molao wa naga ke wona o dirišwago sebakeng sa molao wa profense goba molaotheo wa profense.
149	Maemo a molao wo o se nago maatla
	Sepheto sa kgorotsheko sa gore molao o na le maatla go feta o mongwe ga se bolaye molao woo o hlokago maatla, fela molao woo o no se šome nakong yeo ge phapano yeo e ntše e le gona. 
150	Tlhathollo ya diphapano
	Ge go sekasekwa phapano yeo e lego pepeneneng magareng ga molao wa naga le wa profense, goba gare ga molao wa naga le molaotheo wa profense, kgorotsheko ye nngwe le ye nngwe e swanetše go sekamela tlhathollong yeo e kwalago ya molao goba molaotheo yeo e efogago phapano, godimo ga tlhathollo ye itšego ye e hlolago phapano.
KGAOLO YA 7
PUŠOSELEGAE (krl 151-164)
151	Maemo a bommasepala
(1)	Lekala la mmušo wa gae le bopilwe ke bommasepala bao ba swanetšego go hlongwa nageng ka moka ya Repabliki. 
(2)	Bolaodi bja phethišo le bja go hlama melao bja mmasepala bo beilwe godimo ga Khansele ya Mmasepala. 
(3)	Mmasepala o na le tokelo ya go buša, ka bokgoni bja wona, go laola merero ya pušoselegae ya batho ba wona, go ya ka melao ya naga le ya diprofense, bjalo ka ge go laeditšwe ka molaotheong. 
(4)	Mmušo wa naga le wa profense ga ya swanela go nyatša goba go šitiša mmasepala bokgoni goba tokelo ya wona ya go diriša maatla goba go phethagatša mešomo ya wona. 
152	Maikemišetšo a pušoselegae
(1)	Maikemišetšo a pušoselegae ke- 
(a)	go tliša mmušo wa temokrasi le wa maikarabelo bathong ba tikologo;
(b)	go kgonthišiša kabo ya ditirelo go ditšhaba ka tsela ye e swarelelago;
(c)	go tšwetšapele kago ya setšhaba le ya ekonomi;
(d)	go tšwetšapele tikologo ye e bolokegilego le ye e hlwekilego; le 
(e)	go hlohleletša setšhaba le mekgatlo ya setšhaba go tšea karolo mererong ya pušoselegae.
(2)	Mmasepala o swanetše go leka, go ya ka bokgoni bja wona bja ditšhelete le bja taolo, go fihlelela maikemišetšo ao a tšweleditšwego karolwaneng ya (1). 
153	Mehola ya tlhabollo ya bommasepala 
	Mmasepala o swanetše go-
(a)	rulaganya le go laola tshepedišo ya wona le ditekanyetšo le tshepetšo ya peakanyo go fa šedi ya pele dinyakwa tša motheo tša setšhaba, le go tšwetšapele tlhabollo ya setšhaba le ekonomi ya setšhaba; le 
(b)	kgatha tema mananeong a tlhabollo a setšhaba le a profense. 
154	Bommasepala mmušong wa tirišano
(1)	Mmušo wa naga le dipušo tša diprofense, ka molao le ditsela tše dingwe, e swanetše go thekga le go kgwahliša maatla a bommasepala go laola merero ya bona, go diriša maatla le go phetha mešomo ya bona. 
(2)	Molaokakanywa wa naga goba wa profense wo o amago maemo, dihlongwa, maatla goba mediro ya pušoselegae o swanetše go phatlalatšwa go sekasekwa ke setšhaba pele o ka tsebišwa Palamenteng goba go lekgotlapeamelao la profense, ka tsela yeo e kgontšhago bommasepala ba pušoselegae bao ba ipopilego, le batho ba bangwe bao ba nago le kgahlego go ba le monyetla wa go ntšha maikutlo ka ga Molaokakanywa woo. 
155	Sebopego sa bommasepala
(1)	Go na le mehuta ye e latelago ya:
(a)	Mohuta wa A: Mmasepala wo o nago le taolophethišo le melao ye ikgethago ya bommasepala tikologong ya wona. 
(b)	Mohuta wa B: Mmasepala wo o abelanago taolophethišo le melao ya bommasepala tikologong ya wona le mmasepala wa mohuta wa C wa mmasepala wo o welago ka fase ga tikologo ya wona. 
(c)	Mohuta wa C: Mmasepala wo o nago le taolophethišo le melao ya bommasepala mo tikologong ye e akaretšago mmasepala wa go feta o tee. 
(2)	Melao ya naga e swanetše go hlatholla mehuta ye e fapanego ya bommasepala ye e ka hlongwago mohuteng wo mongwe le wo mongwe.
(3)	Melao ya setšhaba e swanetše go- 
(a)	go hloma dikelo go laetša gore tikologo e ka ba neng le mohuta o tee wa mmasepala wa A goba gore o ka ba neng le bommasepala ba mohuta wa B le woo wa C;
(b)	go hloma dikelo le ditshepetšo go laetša mellwane ya mmasepala ke setsebi seo se ikemetšego; gomme 
(c)	go latela karolo ya 229, o dire dipeakanyetšo tša karoganyo ya maatla le mešomo bommasepala ge tikologo e na le bommasepala ba mehuta ya B le C. Karoganyo ya maatla le mešomo magareng a mmasepala wa mohuta wa B le wa C e ka no fapana le karolelano ya maatla le mešomo gare ga mmasepala wa mohuta wo mongwe wa B le wa C. 
(4)	Melao ye e ukangwego karolwaneng ya (3)	e swanetše go šetša tlhokego ya kabo ya ditirelo tša mmasepala ka tsela ya tekatekano le ya sebaka se setelele.
(5)	Melao ya profense e swanetše go laetša mehuta ye e fapanego ya bommasepala yeo e swanetšego go thewa ka profenseng.
(6)	Mmušo wa profense ye nngwe le ye nngwe o swanetše go hloma bommasepala profenseng ya wona ka mokgwa wo o sepelelanago le molao wo o beilwego go ya ka dikarolwana tša (2)	le (3)	le, ka magato a semolao goba a mangwe, o swanetše go- 
(a)	go beakanyetaša tlhokomelo le thekgo ya pušoselegae ka profenseng; le 
(b)	tšwetšapele tlhabollo ya pušoselegae le go kgontšha bommasepala go phethagatša mešomo le go laola merero ya wona. 
	(6A) Ge dikelo tšeo di beilwego go karolwana ya (3)(b)	di sa phethagatšwe ntle le mollwane wa mmasepala wo o fihlago go mellwane ya diprofense-
(a)	mollwane woo wa mmasepala o tla laolwa ke diprofense tšeo, fela-
(i)	ka tumelelano ya diprofense tšeo di amegago; le
(ii)	ka morago ga dikhuduthamaga tšeo di amegago di dumeletšwe ke molao wa naga go hlama mmasepala ka gare ga lefelo leo la mmasepala; le
(b)	molao wa naga o ka-
(i)	go latelwa karolwana ya(5), go hlagiša tlhamo ya mokgwa wa tumelelano ka moo lefelong leo la mmasepala gareng ga diprofense tšeo di amegago;
(ii)	go beakanyetša tlhako ya go diragatša taolo ya khuduthamaga ya profesne ka moo lefelong la mmasepala le go ya ka mmasepala woo; le
(iii)	go beakanyetša peakanyolefsa ya mellwane ya mmasepala moo e lego gore e nngwe ya diprofense tšeo di amegago e tloša thekgo ya yona ya mollwane wa mmasepala woo o beilwego go ya ka temana ya (a)	.
[Karolwana ya (6A) e tšentšwe ke karolwana ya 1 ya Molao wa 87 wa 1998.]
(7)	mmušo wa naga, go latela karolo ya 44, le dipušo tša profense di na le maatla a go hlama melao le a phetišo go kgontšha go šoma gabotse ga bommasepala mešomong ya yona go ya ka merero yeo e beilwego Dišetulong tša 4 le 5, ka go laola tirišo ya maatla a phetišo a bommasepala ao a ukangwego karolong ya 156 (1).
156	Maatla le mešomo ya bommasepala
(1)	Mmasepala o na le maatlaphethiši mabapi le, gomme o na le tokelo ya go laola –
(a)	merero ya selegae yeo e lego lenaneong la Karolo ya B ya Šetulo 4 le ya Karolo ya B ya Šetulo; le 
(b)	morero ofe goba ofe woo o o filwego ke molao wa naga goba wa profense.
(2)	Mmasepala o ka dira le go laola melawana ya bommasepala go sepediša gabotse merero yeo o nago le tokelo ya go e laola. 
(3)	Go ya ka taelo ya Karolo ya 151 (4), molawana wo o thulanago le molao wa naga goba wa profense ga o na le maatla. Ge e le gore go na le thulano gare ga molawana le molao wa naga goba wa profense woo o sa šomego ka lebaka la thulano ye e šupilwego karolong ya 149, molawana woo o swanetše go tšewa o na le maatla ge fela molao wo o sa šome.
(4)	Mmušo wa naga le dupušo tša diprofense di swanetše go abela goba go fa mmasepala, ka kwano le go ya ka mabaka afe goba afe, bolaodi bja morero woo o tšwelelago mo go Karolo ya A ya Šetulo 4 goba Karolo ya A ya Šetulo 5 yeo e amanago le pušoselegae, ge- 
(a)	morero woo o ka laolwa gabotse mmušong wa selegae; le	
(b)	mmasepala o na le bokgoni bja go o laola. 
(5)	Mmasepala o na le tokelo ya go šomiša maatla afe goba afe ao a amanago le morero wo o swanetšego wa, o sepelelanago le, go dira mešomo ya wona ka tshwanelo. 
157	Sebopego le dikgetho ya Dikhansele tša Bommasepala
(1)	Go ya ka Šetulo 6A, Mmasepala wa Khansele o bopša ke- 
(a)	maloko ao a kgethilwego go latela dikarolwana tša (2)	le (3)	goba 
(b)	ge go hlagišitšwe go molao wa naga- 
(i)	maloko ao a kgethilwego ke Dikhansele tše dingwe tša Mmasepala go emela Dikhansele tšeo; goba 
(ii)	maloko ka bobedi ao a kgethilwego go latela tema (a)	le maloko ao a kgethilwego go ya ka temana (i)	ya temana ye. 
[Karolwana ya (1)	e tšeetšwe legato ke 1 (a)	ya Molao wa 18 wa 2002.]
(2)	Go kgethwa ga maloko a Khansele ya Mmasepala bjalo ka ge go lebeletšwe karolwaneng ya (1)(a)	go swanetše go dirwa go latela molao wa naga, woo o swanetšego	go rulaganya mokgwa-
(a)	wa boemedi bja tekatekano bjo bo theilwego godimo ga karolo ya bakgethi ba mmasepala woo o tšwelelago lenaneong la bohle la bakgethi, leo le hlagišago go kgethwa ga maloko go tšwa mananeong a bonkgetheng ba diphathi ao a rulagantšwego go ya ka kgetho ya phathi yeo; goba	
(b)	boemedi bja tekatekano bjalo ka ge go laeditšwe	temaneng ya (a)	go hlakantšhitšwe le tshepedišo ya boemedi bja diwate go ya ka karolo ya mmasepala woo ya lenaneo la bakgethi bohle. 
(3)	Mokgwa wa dikgetho go ya ka karolwana y (2)	o swanetše go feleletša, ka kakaretšo, go boemedi bja tekatekano.
[Karolwana ya (3)	e tšeetšwe legato ke karolwana ya 1 (b)	ya Molao wa 18 wa 2002.]
(4)(a)	Ge mokgwa wa dikgetho o akaretša boemedi bja diwate, gona go segwa ga mellwane ya diwate go swanetše go dirwa ke taolo ye e ikemetšego	bjo bo kgethilwego go ya ka, le go go šoma go latela tshepedišo le dikelo tša molao wa naga.
(b)	Ge mollwane wa mmasepala o laotšwe go ya ka karolo ya 155 (6A), wate yeo e segilwego ka gare ga mollwane woo wa mmasepala o ka se fihle mollwaneng wa diprofense tšeo di amegago.
[Karolwana (4)	e tšeetšwe legato ke karolwana ya 2 ya Molao wa 87 wa 1998.]
(5)	Motho a ka bouta mmasepaleng fela ge a ngwadišitšwe karolong yeo ya mmasepala go lenaneo la setšhaba le le swanago la bakgethi.
(6)	Molao wa naga wo o ukangwego karolwaneng ya (1)(b)	o swanetše go hloma lenaneo leo le dumelelago diphathi le dikgahlego tše di laeditšwego go Khansele ya Mmasepala yeo e dirago kgetho, go emelwa ka toka Khanseleng ya Mmasepala moo kgetho e dirwago gona.
158	Boleloko bja Dikhansele tša Mmasepala
(1)(1)	Moagi yo mongwe le yo mongwe yo a loketšwego ke go boutela Khansele ya Mmasepala o na le tshwanelo ya go ka ba leloko la Khansele yeo, ka ntle le ge-	
(a)	mang le mang yo a thwetšwego ke, goba a le tirelong ya mmasepala mme a amogela tefo ya go thwalwa moo goba tirelo, gomme yoo a sego a iletšwa go ya ka molao wa naga; 
(b)	mang le mang yo a thwetšwego ke, goba a le tirelong ya mmasepala mme a amogela tefo ya go thwalwa moo goba tirelo, gomme yoo a sego a iletšwa ka boleloko bja Khansele ya Mmasepala go ya ka molao wa naga ; 
(c)	mang le mang yo a ganeditšwego go boutela Kopano ya Maloko a Palamente ka Moka goba a ileditšwego go ya ka karolo ya 47(1)(c)	, (d)	goba (e)	go ba leloko la Kopano ya Maloko a Palamente ka Moka; 
(d)	leloko la Kopano ya Maloko a Palamente ka Moka, Khansele ya Setšhaba ya Diprofense goba leloko la lekgotlapeamelao la profense; eupša kiletšo ye ga e ame leloko la Khansele ya Mmasepela le le emetšego pušoselegae ka Khanseleng ya Setšhaba; goba 
(e)	leloko la Khansele e nngwe ya Mmasepala; eupša kiletšo ye ga e ame leloko la Khansele ya Mmasepala leo le emetšego Khansele yeo Khanseleng ya Mmasepala wo mongwe wa mohuta o šele. 
(2)	Motho yo a se nago le tshwanelo ya go ba leloko la Khansele ya Mmasepala go ya ka karolwana ya (1)(a), (b), (d)	goba (e)	a ka ba nkgetheng wa Khansele, go hlokometšwe mellwane ye itšego goba mabaka ao a beilwego ke molao wa naga. 
Mešomo ka go Khansele ya Mmasepala e swanetše go tlatšwa go ya ka  molao wa bosetšhaba.
[Karolwana (3) e okeditšwe ke karolwana 4 ya Molao wa Bomasomehlano wa  Go fetoša Molaotheo wa 2008 le Molao wa Bomasometshela wa Go fetoša Molaotheo wa 2009.] 
159	Pakatiro ya Dikhansele tša Mmasepala	
(1)	Pakatiro ya Khansele ya Mmasepala ga ya swanela go feta mengwaga e mehlano bjalo ka ge go beakantšwe go ya ka molao wa naga. 
(2)	Ge Khansele ya Mmasepala ae phatlaladitšwe go ya ka molao wa naga, goba nako ya wona e fedile, dikgetho di swanetše go swarwa mo matšatšing a 90 a letšatšikgwedi leo Khansele e phatlaladitšwego ka lona goba ge nako ya wona e fedile.
(3)	Khansele ya Mmasepala, ka ntle le Khansele yeo e phatlaladitšwego go latela tsenogare go ya ka	karolo ya 139, e tšwelapele go ba le tshwanelo ya go šoma go tloga nako yeo e phatlalatšwago ka yona goba ge nako ya wona e fela, go fihlela ge Khansele e mpsha ye e kgethilwego go begilwe gore e kgethilwe.
[Karolo ya 159 e tšeetšwe legato ke karolwana 1 ya Molao wa 65 wa 1998.]
160	Ditshepedišo tša ka gare
(1)	 Khansele ya Mmasepala e ka-
(a)	dira diphetho tša mabapi le tirišo ya taolo ya maatla ka moka le tiragatšo ya mešomo ka moka ya mmasepala;
(b)	kgetha modulasetulo wa yona;
[Letšatšikgwedi la go thoma temaneng ya (b): 30 Juni 1997.]
(c)	kgetha komiti ya khuduthamaga le dikomiti tše dingwe go ya ka molao wa naga; gomme 
(d)	thwala badiredi bao ba hlokegago go dira mešomo ya wona ka tshwanelo.
(2)	Mešomo ye e latelago ga ya swanela go laelwa ke Khansele ya Mmasepala: 
(a)	go fetiša melawana;
(b)	go amogela ditekanyetšo;
(c)	tefišo ya direiti le metšhelo e mengwe, makgetho le metšhelo ya diphahlo; 
(d)	go oketša dikadimo.
(3)(a)	Bontši bja maloko a Khansele ya Mmasepala bo swanetše go ba gona pele bouto ka ga taba ye itšego e ka dirwa.
(b)	Merero ka moka ye e amago ditaba tše di ukamilwego karolwaneng ya (2)	di laolwa ke sephetho seo se tšerwego ke Khansele ya Mmasepala yeo e thekgwago ke bouto ya bontši bja maloko a yona.
(c)	Merero e mengwe ka moka ye e lego pele ha Khansele ya Mmasepala e ahlolwa go ya ka bontši bja dibouto tše di dirilwego. 
(4)	Ga go na molawana wo o swanetšego go fetišwa ke Khansele ya Mmasepala ka ntle le ge-
(a)	maloko ka moka a Khansele a filwe temošo ye e kwagalago; le 
(b)	molawana wo o šišinywago o phatlaladitšwe go hwetša ditshwayo tša setšhaba. 
(5)	Molao wa naga o ka thuša kelong ya go laola-
(a)	bogolo bja Khansaele ya Mmasepala;
(b)	ge e ba Dikhansele tša Mmasepala di ka kgetha komitiphethišo goba komiti e nngwe ye itšego; 
(c)	bogolo bja komitiphethišo goba komiti e nngwe le ye nngwe ya Khansele ya Mmasepala.
(6)	Khansele ya Mmasepala e ka dira melawana ye e beago melawana le ditaelo tša-
(a)	dipeakanyetšo tša yona tša ka gare; 
(b)	merero ya yona le tšwelopele ya yona; le	
(c)	tlhomo, tlhamo, tshepetšo, maatla le mešomo ya dikomiti tša yona.
(7)	Khansele ya Mmasepala e swanetše go sepediša mediro ya yona ka tsela ye e lego pepeneneng, le goba e ka no emiša dikopano tša yona goba tša dikomiti tša yona, ge fela go na le mabaka a go kwala mme go šeditšwe mohuta wa morero woo o swerwego.
(8)	Maloko a Khansele ya Mmasepala a na le ditokelo tša go kgatha tema mererong ya yona le ya dikomiti tša yona ka tsela yeo e- 
(a)	dumelelago diphathi le dikgahlego tše di laetšwego ka khanseleng go emelwa ka tshwanelo; 
(b)	sepedišana le temokrasi; gomme	
(c)	e ka laolwago go ya ka molao wa naga. 
161	Tshwanelo
	Molao wa profense wo o lego ka gare ga tlhako ya molao wa naga o ka fa tumelelo ya ditshwanelo le ditokologo go Dikhansele tša Mmasepala le maloko a tšona.
162	Phatlalatšo ya melawana ya mmasepala 
(1)	Molawana wa mmasepala o ka šomišwa fela ge e le gore o šetše o phatlaladitšwe kuranteng ya semmušo ya profense yeo. 
(2)	Kuranta ya mmušo ya profense e swanetše go gatiša molawana wa mmasepala ge e kgopelwa ke mmasepala.
(3)	Melawana ya Mmasepala e swanetše go hwetšagala gabonolo bathong.
163	Pušoselegae ye e ipopilego
	Molao wa Palamente wo o dirišwago go ya ka tshepedišo ye e theilwego karolong ya 76 o swanetše go- 
(a)	beakanyetša go amogelwa ga mekgatlo ya setšhaba le ya diprofense yeo e emelago bommasepala; le	
(b)	o beakanye ditshepedišo tšeo ka tšona mmušogae o ka-
(i)	rerišanago le mmušo wa naga goba wa profense 
(ii)	go bea baemedi go kgatha tema Khanseleng ya Setšhaba ya Diprofense; le go 
(iii)	kgatha tema tshepedišong yeo e hlalošitšwego ka go molao wa naga wo o ukamilwego karolong ya 221 (1)(c).
[Temana ya (b)	e tšeetšwe legato ke karolwana 4 ya Molao wa 61 wa 2001.]
164	Ditaba tše dingwe
	Ditaba ka moka mabapi le pušoselegae tšeo di sego tša ukangwa ka Molaotheong di ka no hlalošwa ke molao wa naga goba molao wa profense ka gare ga tlhako ya molao wa naga. 
KGAOLO YA 8
DIKGOROTSHEKO LE TSHEPEDIŠO YA TOKA (krl 165-180)
165	Maatla a boahlodi
(1)	Maatla a boahlodi a Repabliki a beilwe go dikgorotsheko.
(2)	Dikgorotsheko di ikemetše ka botšona gomme di ikarabela go Molaotheo le go molao, woo di swanetšego go o diriša ka ntle le kgethollo le go se tšhabe selo, go emela sepitša goba lehufa. 
(3)	Ga go motho goba setho sa mmušo seo se swanetšego go šunya nko modirong wa dikgorotsheko. 
(4)	Ditho tša mmušo, ka tirišo ya dikgato tša semolao goba tše dingwe, di swanetše go thuša le go šireletša dikgorotsheko go kgonthišiša go ikemela ka noši, go se kgetholle, seriti, phihlelelo le go šoma gabotse ga dikgorotsheko. 
(5)	Taelo goba sephetho seo se tšerwego ke kgorotsheko se tlema batho ka moka le ditho tša mmuŠo tšeo taelo le sephetho di di amago.
166	Tshepedišo ya toka
	Dikgorotsheko ke-
(a)	Kgorotsheko ya Molaotheo;
(b)	Kgorokgolo ya Tsheko ya Boipiletšo;
(c)	Dikgorokgolo tša Tsheko, go akaretšwa kgorokgolo ye nngwe le ye nngwe ya boipiletšo yeo e ka hlongwago go ya ka Molao wa Palamente go theeletša boipiletšo go tšwa go Dikgorokgolo tša Tsheko;
(d)	Dikgorotsheko tša boMmaseterata; le 
(e)	Kgorotsheko efe goba efe yeo e hlomilwego goba ye e amogelwago ke Molao wa Palamente, go akaretša kgoro ye nngwe le ye nngwe ya maemo a go swana le a Dikgorokgolo tša Tsheko goba Dikgorotsheko tša boMmaseterata.
167	Kgorotsheko ya Molaotheo
(1)	Kgorotsheko ya Molaotheo e bopša ke Moahlodimogolo wa Afrika Borwa, Motlatšamoahlodimogolo le baahlodi ba bangwe ba senyane.
[Karolwana ya (1)	e tšeetšwe legato ke karolwana ya 11 ya Molao wa 34 wa 2001.]
(2)	Taba yeo e lego pele ga Kgorotsheko ya Molaotheo e swanetše go theeletšwa ke bonyane baahlodi ba seswai. 
(3)	Kgorotsheko ya Molaotheo-
(a)	ke kgorotsheko ye e phagamego go di feta mererong ka moka ya Molaotheo; 
(b)	e ka fa sephetho fela mererong ya molaotheo le ditaba tšeo di amanago le diphetho tša merero ya molaotheo; gomme
(c)	e ka tšea sephetho sa mafelelo mabapi le gore taba e molaotheong goba mabapi le gore taba ye itšego e sepelelana le sephetho ka ga taba ya molaotheo.
(4)	Ke fela Kgorotsheko ya Molaotheo yeo e ka- 
(a)	fago sephetho phapanong yeo e lego gona magareng ga ditho tša mmušo lekaleng la mmušo wa naga goba wa diprofense mabapi le maemo a molaotheo, maatla goba mediro ya ditho tše dingwe tša mmušo; 
(b)	tšeago sephetho ka ga go ba molaotheong ga Molaokakanywa ofe goba ofe wa palamente goba wa profense; eupša e ka dira bjalo fela mo mabakeng a a ukangwego karolong ya 79 goba 121;
(c)	tšeago sephetho ka ga dikgopelo tše di ukangwego karolong ya 80 goba 122; 
(d)	 	tšeago sephetho ka ga go ba molaotheong ga phetošo ye nngwe le ye nngwe ya Molaotheo; 
(e)	tšeago sephetho sa gore Palamente goba Mopresitente o paletšwe ke go phethagatša tlamego ya gagwe go molaotheo; goba
(f)	hlatsela molaotheo wa profense go ya ka karolo ya 144.
(5)	Kgorotsheko ya Molaotheo e tšea sephetho sa mafelelo mabapi le ge eba Molao wa Palamente, Molao wa profense goba maitshwaro a Mopresitente a Molaotheong, gomme e swanetše go tiišetša taelo ya taelo ya mabapi le go se loke yeo e filwego ke Kgorokgolo ya Tsheko ya Boipiletšo, Kgorokgolo ya Tsheko goba kgoro ye nngwe le ye nngwe ya maemo a go swana le a tšona, pele taelo yeo e ka ba le maatla a itšego..
(6)	Molao wa naga goba melawana ya Kgorotsheko ya Molaotheo e swanetše go dumelela motho, ge seo se le kgahlegong ya toka le tumelelong ya Kgorotsheko ya Molaotheo- 
(a)	go tliša taba thwii go Kgorotsheko ya Molaotheo; goba	
(b)	go dira boipiletšo thwii go Kgorotsheko ya Molaotheo go tšwa go kgorotsheko e nngwe le e nngwe. 
(7)	Taba ya Molaotheo e akaretša morero o mongwe le wo mongwe wo o akaretšago tlhathollo, tšhireletšo goba tirišo ya Molaotheo. 
168	Kgorokgolo ya Tsheko ya Boipiletšo
(1)	Kgorokgolo ya Tsheko ya Boipiletšo e na le Presitente, Motlatšapresitente le palo ya baahlodi ba boipiletšo bao ba laolwago go ya ka Molao wa Palamente. 
[Karolwana ya (1)	e tšeetšwe legato ke karolwana ya 12 ya Molao wa 34 wa 2001.]
(2)	Taba yeo e lego pele ga Kgorokgolo ya Tsheko ya Boipiletšo e swanetše go ahlolwa ke palo ya baahlodi yeo e laolwago go ya ka Molao wa Palamente. 
[Karolwana ya (2)	e tšeetšwe legato ke 12 ya Molao wa 34 wa 2001.]
(3)	Kgorokgolo ya Tsheko ya Boipiletšo e ka no tšea sephetho ka boipiletšo bofe goba bofe. Ke Kgorotsheko e kgolokgolo ya Boipiletšo ka ntle le mererong ya Molaotheo gomme e ka tšea sephetho fela mabapi le: - 
(a)	boipiletšo; 
(b)	ditaba tšeo di amanago le boipiletšo; le	
(c)	 	taba ye nngwe le ye nngwe yeo e ka romelwago go yona go ya ka mabaka ao a hlalošwago ke Molao wa Palamente. 
169	Dikgorokgolo tša Tsheko
	Kgorokgolo ya Tsheko e ka tšea sephetho ka-
(a)	taba efe goba efe ya molaotheo ka ntle le taba yeo-
(i)	e lego fela Kgorotsheko ya Molaotheo ye e kago tšea sephetho ka yona; goba 
(ii)	e fetišeditšwego ke Molao wa Palamente go kgorotsheko e nngwe ya maemo a go swana le a Kgorokgolo ya Tsheko; le 
(b)	taba efe goba efe yeo e sego ya fetišetšwa go kgorotsheko e nngwe ke Molao wa Palamente. 
170	Dikgorotsheko tša Bommaseterata le dikgorotsheko tše dingwe
	Dikgorotsheko tša Bommaseterata le dikgorotsheko tše dingwe di ka tšea sephetho ka taba ye nngwe le ye nngwe yeo e laolwago ke Molao wa Palamente, eupša kgorotsheko ya maemo a ka fase ga a Kgorokgolo ya Tsheko ga se ya swanela go dira dinyakišišo goba go tšea sephetho ka ga go ba molaotheong ga molao wo mongwe le wo mongwe goba maitshwaro a Mopresitente.
171	Ditshepedišo tša dikgorotsheko
	Dikgorotsheko ka moka di šoma go ya ka molao wa naga, gomme melawana le ditshepedišo tša tšona di swanetše go hlagišwa ka molaong wa naga.
172	Maatla a dikgorotsheko mererong ya molaotheo 
(1)	Ge e tšea sephetho mabapi le taba ya molaotheo maatleng a yona, kgorotsheko- 
(a)	o swanetše go bega gore molao wo mongwe le wo mongwe goba maitshwaro a a sa sepelelanego le Molaotheo ga a šome ka lebaka la go se be tshepedišong ga wona; ebile 
(b)	e ka dira taelo ye nngwe le ye nngwe ye e lokilego le ya	maswanedi, go akaretšwa- 
(i)	taelo ye e fokotšago khuetšo ya go lebelela morago ya pego ya go se be tshepedišong; le	
(ii)	taelo ye e fegago pego ya go se be tshepedišong	lebakeng le maemong a mangwe le a mangwe, go dumelela taolo ya bokgoni go lokiša phošo yeo. 
(2)(a)	Kgorokgolo ya Tsheko ya Boipiletšo, Kgorokgolo ya Tsheko goba kgorotsheko ya maemo a a swanago le a tšona e ka ntšha taelo mabapi le go ba molaotheong ga Molao a Palamente, Molao wa Profense goba maitshwaro a mangwe le a mangwe a Mopresitente eupša taelo ya mabapi le taba ye e sa sepelelanego le Molaotheo ga e na maatla ka ntle le ge e tiišetšwa ke Kgorotsheko ya Molaotheo. 
(b)	Kgorotsheko ye e fago taelo ya mabapi le taba ya go se sepelelane le molaotheo e ka ntšha thibelo ya nakwana goba kimollo ya nakwana go yo a amegago, goba e ka emiša tshepedišo nakwana go sa letetšwe sephetho sa Kgorotsheko ya Molaotheo ka ga go ba molaong ga Molao goba maitshwaro.
(c)	Molao wa naga o swanetše go hlagiša phetišetšo ya taelo ya taba ya go se sepelelane le molaotheo go Kgorotsheko ya Molaotheo.
(d)	Motho mang le mang goba setho se sengwe le se sengwe sa mmušo seo se nago le kgahlego ye e lekanego, se ka dira boipiletšo, goba sa kgopela thwii go Kgorotsheko ya Molaotheo go tiišetša goba go fapanya taelo ya taba ya go se sepelelane le molaotheo ke kgorotsheko go ya ka karolwana ye. 
173	Maatla ao a abetšwego
	Kgorotsheko ya Molaotheo, Kgorokgolo ya Tsheko ya Boipiletšo le Dikgorokgolo tša Tsheko di na le maatla ao a abetšwego a go šireletša le go laola ditshepetšo tša tšona, le go hlabolla molaokakaretšo, di lebeletše kudu kgahlego ya toka.
174	Go thwalwa ga bahlankedi ba toka
(1)	Mosadi goba monna yo mongwe le yo mongwe yo a nago le tshwanelo a loketše le go swanela, a ka thwalwa go ba mohlankedi wa toka. Motho ofe goba ofe yo a tla thwalwago Kgorongtsheko ya Molaotheo o swanetše go ba gape moagi wa Afrika Borwa.
(2)	Go bohlokwa gore boahlodi bo laetše ka bophara tlhamego ya morafe le bong ya Afrika Borwa ge go thwalwa bahlankedi ba toka.
(3)	Mopresidente bjalo ka hlogo ya khuduthamaga ya naga, morago ga go rerišana le Khomišene ya Ditirelo tša Toka le baetapele ba diphathi tšeo di emetšwego ka go Kopano ya Maloko a Palamente ka Moka, o thwala Moahlodimogolo le Motlatšamoahlodimogolo le morago ga go rerišana le Khomišene ya Ditirelo tša Toka, o thwala Presitente le Motlatšapresitente wa Kgorokgolo ya Tsheko ya Boipiletšo.
[Karolwana ya (3)	e tšeetšwe legato ke karolwana ya 13 ya Molao wa 34 wa 2001.]
(4)	Baahlodi ba bangwe ba Kgorotsheko ya Molaotheo ba thwalwa ke Mopresitente bjalo ka hlogo ya khuduthumaga ya naga, morago ga go rerišana le Moahlodimogolo wa Kgorotsheko ya Molaotheo le baetapele ba diphathi tšeo di emetšwego Kopanong ya Maloko a Palamente ka Moka, ka go latela tshepedišo ye e latelago: 
(a)	Khomišene ya Tirelo ya Toka e swanetše go rulaganya lenaneo la bonkgetheng gotee le maina a mangwe a mararo go feta palo ya bao ba swanetšego go thwalwa, gomme e fe Mopresitente lenaneo leo.	
(b)	Mopresitente a ka thwala baahlodi go tšwa lenaneong leo, gomme o swanetše go tsebiša Khomišene ya Tirelo ya Toka, ka mabaka, gore go reng ge maina a mangwe a sa amogelege gomme go sa na le dikgoba tšeo di sa swanetšego go tlatšwa. 
(c)	Khomišene ya Tirelo ya Toka e swanetše go oketša lenaneo ka maina a bonkgetheng ba bangwe gomme Mopresitente o swanetše go tlaša dikgala tše di šetšego go tšwa lenaneong leo la koketšo. 
[Karolwana ya (4)	e tšeetšwe legato ke karolwana ya 13 ya Molao wa 34 wa 2001.]
(5)	Ka dinako tšohle, bonnyane maloko a mane a kgorotsheko ya Molaotheo e swanetše go ba batho bao e bego e le baahlodi ka nako yeo ba kgethwago go Kgorotsheko ya Molaotheo.
(6)	Mopresitente o swanetše go kgetha baahlodi ba dikgorotsheko ka moka ka keletšo ya Khomišene ya Tirelo ya Toka. 
(7)	Bahlankedi ba bangwe ba semolao ba swanetše go kgethwa go ya ka Molao wa Palamente woo o swanetšego go netefatša gore kgetho, tlhatlošo, tšhutišo goba go raka ga, goba go tšeelwa magato a kgalemo kahlolong, le bahlankedi ba ba tša toka go dirwa ka ntle le mogau goba lehloyo.
(8)	Pele ga ge bahlankedi ba ka thoma go dira mešomo ya bona, ba swanetše go ikana goba go itlama go ya ka Šetulo 2, gore ba tla thekga le go šireletša Molaotheo.
175	Baahlodi ba motšwaoswere
(1)	Mopresitente a ka thwala mosadi goba monna go ba moahlodi wa motšwaoswere wa Kgorotsheko ya Molaotheo ge go na le sekoba goba ge moahlodi o mongwe a se gona. Go thwalwa g swanetše go dirwa ka tumello ya leloko la Kabinete leo le nago le maikarabelo a tirišo ya molao yo a šomišanago mmogo le Moahlodimogolo.
[Karolwana ya (1)	e tšeetšwe legato ke karolwana ya 14 ya Molao wa 34 wa 2001.]
(2)	Leloko la Kabinete leo le nago le maikarabelo a tiragatšo ya molao o swanetše go thwala baahlodi ba mošwaoswere go ya dikgorotsjhekong tše dingwe ka morago ga go rerišana le moahlodi wa godimo wa kgorotsheko moo moahlodi wa motšwaoswere a tlilego go šoma gona.
176	Dipakatiro le meputso
(1)	Moahlodi wa kgorotsheko ya Molaotheo o kgethwa go šoma mo mengwageng e sa mpshafatšwego ye 12 eupša o swanetše go rola modiro ge a na le mengwaga ye 70, go eya ka gore ke efe e tlago pele, ka ntle le ge Molao wa Palamente o katološa pakatiro ya Mahlodi wa Kgorotsheko ya Molaotheo.
[Karolwana ya 1 e tšeetšwe legato ke karolwana 15 ya Molao wa 34 wa 2001.]
(2)	Baahlodi ba bangwe ba swara modiro go fihla ba rolwa modiro go ya ka Molao wa Palamente.
(3)	Meputso, diputseletšo le dikholo tša baahlodi di ka no se fokotšwe.
177	Go tlošwa
(1)	Moahlodi a ka tlošwa setulong ge fela-
(a)	 	Khomišene ya Ditirelo tša Toka e ka hwetša gore go na le se se mo šitišago, o tloga palelwa ke modiro wa gagwe, goba ge a bonwa molato ka ga maitshwaro a sa lokago; gomme 
(b)	Kopano ya Maloko a Palamenete ka Moka e dira boipiletšo bja gore moahlodi yoo a tlošwe setulong, go ya ka sephetho seo se amogetšwego ke bonnyane peditharong ya maloko a yona.
(2)	Mopresitente o swanetše go tloša moahlodi setulong ge go se na go amogelwa sephetho seo e lego boipiletšo bja gore moahlodi yoo a rolwe modiro.
(3)	Mopresitente, ka keletšo ya Khomišene ya Ditirelo tša Toka, a ka no kgaotša nakwana mošomo wa moahlodi yoo a sa nyakišišwago go ya ka karolwana ya (1).
178	Khomišene ya Ditirelo tša Toka 
(1)	Go na le Khomišene ya Ditirelo tša Toka, yeo e bopilwego ke- 
(a)	Moahlodimogolo, yoo a swarago marapo ge go na le dikopano tša Khomišene;
(b)	Mopresidente wa Kgorokgolo ya Tsheko ya Boipiletšo;
[Temana ya (b)	e tšeetšwe legato ke karolwana ya 16 (a)	ya Molao wa 34 wa 2001.]
(c)	Moahlodimopresitente o tee yo a kgethilwego ke Mopresitente wa Baahlodi;
(d)	leloko la Kabinete leo le rwelego maikarabelo a tshepedišo ya toka, goba mohlatlolani naye yo a beilwego ke leloko leo la Kabinete;
(e)	baboleledi ba babedi bao ba lego mošomong bao ba kgethilwego go tšwa mo boithuteding bja baboleledi go emela boithutelo bjo ka kakaretšo, gomme ba kgethwa ke Mopresitente;
(f)	boramelao ba babedi bao ba kgethilwego go tšwa boithuteding bja boramelao go emela boithutedi bjo ka kakaretšo, gomme ba kgethwa ke Mopresidente;
(g)	morutiši o tee wa Molao yo a kgethilwego ke barutiši ba molao go tšwa diyunibesithing tša Afrika-Borwa; 
	(h)	batho ba ba tshelelago bao ba kgethilwego ke Kopano ya Maloko a Palamente ka Moka go tšwa malokong a yona, bao bonnyane maloko a mararo e swanetšego go ba maloko a diphathi tša kganetšo tšeo di nago le boemedi Kopanong ya Maloko a Palamente ka Moka; 
(i)	Boramelao ba ruri ba bane bao e lego maloko a Khansele ya Setšhaba ya Diprofense bao ba beilwego gotee le Khansele, ka thekgo ya dibouto tša diprofense tše tshelelago;
	(j)	batho ba bane bao ba kgethilwego ke Mopresidente bjalo ka ge e le hlogo ya khuduthamaga ya setšhaba, ka morago ga therišano le baetapele ba diphathi ka moka tšeo di lego Kopanong ya Maloko a Palamente ka Moka; le 
	(k)	ge go sekasekwa merero yeo e amanago le Kgorokgolo ya Tsheko ye itšego, Moahlodimopresitente wa Kgorotsheko yeo le Tonakgolo goba mohlatlolani yo a kgethilwego ke yo mongwe le yo mongwe wa bona.
[Temana ya (k) e tšeetšwe legato ke karolwana ya 2 ya Molao wa 65 wa 1998.]
(2)	Ge palo ya batho bao ba šišintšwego mo gare ga boithutedi bja baboleledi go ya ka ditaelotša karolwana (1)(e)	goba (f)	e lekana le ya dikgoba tše di swanetšego go tlatšwa, Mopresitente o swanetše go ba kgetha. Ge palo ya batho bao ba šišintšwego e feta palo ya dikgoba tšeo di swanetšego go tlatšwa, Mopresitente, morago ga go rerišana le boithutedi bja maswanedi, o swanetše go kgetha ba ba lekanego bao ba šišintšwego go tlatša dikgoba, go hlokomelwa tlhokego ya go netefatša gore bao ba kgethilwego ba emela boithutedi bjoo ka botlalo. 
(3)	 Maloko a Khomišene a a kgethilwego ke Khansele ya Setšhaba ya Diprofense a šoma go fihla ge a tlošwa sammaletee, goba go fihla ge go hlolega sekgala se sengwe palong ya bona. Maloko a mangwe ao a kgethilwego goba a hlaotšwego go ba khomišeneng, a šoma go fihla ge a amogetšwa ke bao ba kgethilego goba ba ba hlaotšego.
(4)	Khomišene ya Ditirelo tša Toka e na le maatla le mešomo tseo e di abetšwego mo Molaotheong le go molao wa naga.
(5)	Khomišene ya Tirelo tša Toka e ka eletša mmušo wa setšhaba ka ga morero wo mongwe le wo mongwe wo o amanago le toka goba tshepedišo ya toka; eupša ge e sekaseka morero wo mongwe ka ntle le kgetho ya moahlodi, e swanetše go dula ka ntle le maloko ao a kgethilwego go ya ka karolwana ya (1)	(h)	le (i). 
(6)	Khomišene ya Ditirelo tša Toka e ka rera thulaganyo ya yona, eupša diphetho tša Khomišene di swanetše go thekgwa ke bontši bja maloko a yona. 
(7)	Ge moahlodimogolo goba Mopresitenete wa Kgorokgolo ya Tsheko ya Boipiletšo a palelwa nakwana go šoma Khomišeneng, Motlatšamoahlodimogolo goba Motlatšamopresitente wa Kgorokgolo ya Tsheko ya Boipiletšo, ka ge go le ka gona, a šoma bjalo ka mohlatlolani wa gagwe ka Khomišeneng.	
[Karolwana ya (7)e tlaleleditšwe ka karolo ya 2 (b)	ya Molao wa 65 wa 1998 ebile e tšeetšwe legato ke karolwana 16 (c)	ya Molao wa 34 wa 2001.]
(8)	Mopresitente le batho bao ba kgethago, ba a kgetha goba ba thwala maloko a Khomišene go ya ka karolwana ya (1)(c)	, (e)	, (f)	le (g)	, ba ka, ka tsela ya go swana ba kgetha, ba kgethela goba ba thwala mohlatlolani wa yo mongwe le yo mongwe wa maloko ao, go šoma ka Khomišeneng nako le nako ge leloko le le amegago le palelwa nakwana ke go šoma ka lebaka la go palelwa ke mošomo goba ge a se gona ka Repabliking goba ka mabaka a mangwe a go kwala.
[Karolwana ya (8)	e tlaleleditšwe ka karolo ya 2(b)	ya Molao wa 65 wa 1998.]
179	Bolaodi bja Botšhotšhisi 
(1)	Go na le bolaodi bo tee bja botšhotšhisi mono Repabliking, bjoo bo hlamilwego go ya ka Molao wa Palamente, gomme bo bopša ke-	
(a)	Molaodi wa Setšhaba wa Botšhotšhisi bja setšhaba yoo e lego hlogo ya bolaodi bja botšhotšhisi, mme o kgethwa ke Mopresidente bjalo ka setho sa khuduthamaga ya setšhaba; le
(b)	Balaodi ba Botšhotšhisi bja Setšhaba le batšhotšhisi bjalo ka ge go laeditšwe Molaong wa Palamente. 
(2)	Bolaodi bja botšhotšhisi bo na le maatla a go tliša ditatofatšo tša melato ya bosenyi legatong la naga, le go dira mediro ye e nyakegago yeo e sepelelanago le go tšea magato ditatofatšong tša bosenyi. 
(3)	Molao wa setšhaba o swanetše go kgonthiša gore Balaodi ba Botšhotšhisi bja Setšhaba-
(a)	ba na le boithutelo bja maleba; gomme 
(b)	ba na le maikarabelo a go tšhotšhisa makaleng a a itšego, fela go laolwa ke karolwana ya (5).
(4)	Molao wa naga o swanetše go netefatsa gore bolaodi bja go botšhotšisi bo diragatša mešomo ya bjona ka ntle le letšhogo, kgaugelo goba kgethollo.
(5)	Molaodi wa Setšhaba wa Botšhotšhisi bja Setšhaba -
(a)	o swanetše go phetha, ka kwano le leloko la Kabinete leo le rwelego boikarabelo bja tiragatšo ya toka, le ka morago ga therišano le Molaodi wa Botšhotšhisi bja Setšhaba maikemišetšo a tshekišo yeo e swanetšego go fiwa šedi tshepedišong tša tshekišo;
(b)	o swanetše go ntšha ditaelo tša maikemišetšo tše di swanetšego go šetšwa tshepedišong ya tshekišo;
(c)	a ka no tsenagare tshepedišo ya tshekišo ge ditaelo tša morero di sa latelwe; gomme 
(d)	a ka lekodišiša sephetho sa go sekiša	goba go se sekiše, ka morago ga go rerišana le Molaodi wa Botšhotšhisi bja Setšhaba yo a amegago le ka morago ga ge a amogetše boipiletšo mo nakong ye e beilwego ke Molaodi wa Setšhaba wa Bolaodi bja Setšhaba bja Botšhotšhisi, go tšwa go bao ba latelago: 
(i)	Molatofatšwa. 
(ii)	Molli. 
(iii)	Motho yo mongwe le yo mongwe goba bao ba amegago bao Molaodi wa Setšhaba a bonago ba swanetše.
(6)	Leloko la Kabinete leo le nago le maikarabelo taolong ya merero ya toka le swanetše go šomiša maikarabelo a lona a mafelelo godimo ga bolaodi bja botšhotšhisi. 
(7)	Ditaba ka moka tšeo di sepelelanago le bolaodi bja botšhotšhisi di swanetše go laolwa ke molao wa naga. 
180	Ditaba tše dingwe tšeo di amago taolo ya toka 
	Molao wa naga o ka no rulaganyetša taba ye nngwe le ye nngwe yeo e amanago le taolo ya toka yeo go sa bolelwego ka yona ka mo Molaotheong, go akaretšwa- 
(a)	mananeo a tlhahlo ya bahlankedi ba tša toka; 
(b)	ditshepedišo tša go sekaseka dipelaelo mabapi le bahlankedi ba tša toka; le 
go kgatha tema ga batho ka ntle le bahlankedi ba toka go tšea diphetho ka kgorong ya tsheko.
KGAOLO YA	9
DIHLONGWA TŠA MMUŠO TŠE DI THEKGAGO TEMOKRASI YA MOLAOTHEO (krl 181-194)
181	Metheo ya tlhomo le pušo
(1)	Dihlongwa tše di latelago tša mmušo di tiiša temokrasi ya Molaotheo ka Repabliking: 
(a)	Mošireletši wa Setšhaba. 
(b)	Khomišene ya Ditokelo tša Botho ya Afrika Borwa.
[Temana ya (b)	e fetošitšwe ke karolwana 4 ya Molao wa 65 wa 1998.]
(c)	Khomišene ya Tšwetšopele le Tšhireletšo ya Ditokelo tša Ditšo, Bodumedi le Maleme a Ditšhaba. 
(d)	Khomišene ya Tekatekano ya Bong. 
(e)	Mohlakišikakaretšo. 
(f)	Khomišene ya Dikgetho.
(2)	Dihlongwa tše di ikemetše ka noši, gomme di laolwa fela ke Molaotheo le molao, ebile di swanetše go se tšee lehlakore le go šomiša maatla a tšona le go dira mešomo ya tšona ka ntle le poifo, go tšea lehlakore goba kgethollo.
(3)	Ditho tše dingwe tša mmušo, ka go šomiša magato a semolao le magato a mangwe, di swanetše go thuša le go šireletša dihlongwa tše go kgonthiša boikemelanoši, go se tšee lehlakore, tlhompho le go dira mešomo ya tšona gabotse.
(4)	Ga go motho goba setho sa mmušo seo se swanetšego go tsenatsena mešomong ya dihlongwa tše.
(5)	Dihlongwa tše di ikarabela go Kopano ya Maloko a Palamente ka Moka fela, gomme di swanetše go dira dipego ka mešomo le maikarabelo a tšona go Kopano ya Maloko a Palamente ka Moka bonnyane gatee ka ngwaga.
Mošireletši wa Setšhaba (krl 182-183)
182	Mešomo ya Mošireletši wa Setšhaba 
(1)	Mošireletši wa Setšhaba, go ya ka molao wa naga o na le maatla a- 
(a)	go nyakišiša maitshwaro a mangwe le a mangwe	mererong ya mmušo, goba taolong ya setšhaba makaleng ka moka a mmušo, moo go ukangwago goba go gononwago gore ditaba ga di sepele gabotse goba tšeo di ka feleletšago ka bosodi goba kgethollo ;
(b)	go bega ka maitshwaro ao; le
(c)	go tšea magato a maswanedi a go lokiša taba yeo.
(2)	Mošireletši wa Setšhaba o na le maatla le mešomo ya tlaleletšo yeo e beilwego ke molao wa naga.
(3)	Mošireletši wa Setšhaba ga a na le tshwanelo ya go nyakišiša diphetho tša kgorotsheko. 
(4)	Mošireletši wa Setšhaba o swanetše go fihlelelwa ke batho bohle le ditšhaba ka moka.
(5)	Pego ye nngwe le ye nngwe yeo e dirwago ke Mošireletši wa Setšhaba e swanetše go bewa pepeneneng moo e ka lekolwago ke batho, ka ntle le ge mabaka ao a sego a tlwaelega, go laolwa go ya ka molao wa naga, a nyaka gore pego e be sephiri.
183	Pakatiro
	Mošireletši wa Setšhaba o thwalwa lebaka la go se mpshafatšwe la mengwaga e šupago.
Khomišene ya Ditokelo tša Botho ya Afrika Borwa (k 184)
184	Mešomo ya Khomišene ya Ditokelo tša Botho ya Afrika Borwa 
(1)	Khomišene ya Ditokelo tša Botho ya Afrika Borwa e swanetše go -
(a)	tšwetšapele tlhompho ya ditokelo tša botho le setlwaedi sa ditokelo tša botho;
(b)	tšwetšapele tšhireletšo, tlhabollo le phihlelelo ya ditokelo tša botho; le go
(c)	hlokomela le go lekola gore ditokelo tša botho di a obamelwa ka Repabliking.
(2)	Khomišene ya Ditokelo tša Botho ya Afrika Borwa e na le maatla, go ya ka ditaelo tša molao wa naga, a a loketšego go dira mešomo ya yona, go akaretšwa maatla a- 
(a)	go nyakišiša le go bega ka ga go obamela ga ditokelo tša botho;
(b)	go tšea magato go dira peakanyolefsa ya maleba moo ditokelo tša botho di ilego tša gatakwa;
(c)	go dira dinyakišišo; le 
(d)	go ruta.
(3)	Ngwaga ka ngwaga Khomišene ya Ditokelo tša Botho ya Afrika Borwa e swanetše go kgopela ditho tša mmušo tše di amegago go fa Khomišene tshedimošo ka ga magato ao di a tšerego go kgonthišiša phethagatšo ya ditokelo tšeo di lego Molaong wa Ditokelo tše di amago kago ya dintlo, tlhokomelo ya tša maphelo, dijo, meetse, tšhireletšo ya setšhaba, thuto le Tikologo.
(4)	Khomišene ya Ditokelo tša Botho ya Afrika Borwa e na le maatla a tlaleletšo le mešomo yeo e beilwego ke molao wa naga.
[Karolo ya 184 e fetošitšwe ke karolwana ya 4 ya Molao wa 65 wa 1998.]
Khomišene ya Tšwetšopele le Tšhireletšo ya Ditokelo tša Ditšo, Bodumedi le Maleme a Ditšhaba (krl 185-186)
185	Mešomo ya Khomišene
(1)	Maikemišetšo a magolo a Khomišene ya Tšwetšopele le Tšhireletšo ya Ditokelo tša Ditšo, Bodumedi le Maleme a Ditšhaba ke- 
(a)	go tšwetšapele tlhompho ya ditokelo tša ditšo, bodumedi le maleme a ditšhaba;
(b)	go tšwetšapele le go godiša khutšo, setswalle, botho, kgotlelelo le botee bja setšhaba gareng ga ditšhaba tša ditšo, bodumedi le ditšhaba tša maleme, go ya ka metheo ya tekano, go se kgetholle le kwano ye e lokologilego; 
(c)	go eletša ka ga go hlongwa goba go amogelwa ga, go ya ka molao wa naga, khansele ya ditšo goba khansele e nngwe goba dikhansele tša setšhaba goba ditšhaba tša Afrika-Borwa.
(2)	Khomišene e na le maatla, bjalo ka ge go beilwe molaong wa naga, ao a swanetšego go kgona go fihlelela maikemišetšomagolo a yona, go akaretšwa	maatla a go hlokomela, go nyakišiša, go ruta, go goketša, go eletša le go bega ka ga merero ye e amago ditokelo tša ditšo, bodumedi le ditšhaba tša maleme.
(3)	Khomišene e ka bega taba ye nngwe le ye nngwe yeo e welago	maatleng le mešomong ya yona gore Khomišene ya Ditokelo tša Botho ya Afrika Borwa e di nyakišiše. 
[Karolwana ya (3)	e fetošitšwe ke karolwana ya 4 ya Molao wa 65 wa 1998.]
(4)	Khomišene e na le maatla a tlaleletšo le mešomo ye e beilwego ke molao wa naga.
186	Sebopego sa Khomišene
(1)	Palo ya maloko a Khomišene ya Tšwetšopele le Tšhireletšo ya Ditokelo tša Ditšo, Bodumedi le Maleme a Ditšhaba le go thwalwa ga bona le pakatiro di swanetše go bewa ke molao wa naga.
(2)	Sebopego sa Khomišene se swanetše go-
(a)	go emela ka bophara dihlopha tše dikgolo tša setšo, bodumedi le maleme Afrika Borwa; le	
(b)	go bontšha ka kakaretšo sebopego sa bong Afrika Borwa.
Khomišene ya Tekatekano ya Bong (k 187)
187	Mešomo ya Khomišene ya Tekatekano ya Bong
(1)	Khomišene ya Tekatekano ya Bong e swanetše go tšwetšapele tlhompho ya tekatekano ya bong le tšhireletšo, tšwetšopele le phihlelelo ya tekatekano ya bong.
(2)	Khomišene ya Tekatekano ya Bong e na le maatla, bjalo ka ge go beilwe ke molao wa naga, a a hlokegago go dira mešomo ya yona, go akaretšwa maatla a go hlokomela, go fatišiša, go nyakišiša, go ruta, go goketša, go eletša le go bega ka ga ditaba tše di amago tekatekano ya bong.
(3)	Khomišene ya Tekatekano ya Bong e na le maatla a tlaleletšo le mešomo ye e beilwego ke molao wa naga.
Mohlakišikakaretšo (krl 188-189)
188	Mešomo ya Mohlakišikakaretšo
(1)	Mohlakišikakaretšo o swanetše go hlakiša le go bega ka ga tšhupamatlotlo, ditatamente tša ditšhelete le taolo ya ditšhelete tša -
(a)	dikgoro ka moka tša mmušo wa setšhaba le tša diprofense le;
(b)	bommasepala ka moka; le
(c)	sehlongwa se sengwe le se sengwe goba kemedi ye nngwe le ye nngwe ya tša tšhupamatlotlo ye e kgopelwago ke molao wa naga goba wa profense gore e hlakišwe ke Mohlakišikakaretšo.
(2)	Tlaleletšong go mešomo ye e beilwego mo karolwaneng ya (1), le go ya ka molao wo itšego, Mohlakišikakaretšo a ka hlakiša le go bega ka ga ditšhupamatlotlo, ditatamente tša ditšhelete le taolo ya ditšhelete ya-	
(a)	sehlongwa sefe goba sefe seo se thušwago go tšwa Sekhwameng sa Ditseno tša Setšhaba goba Sekhwameng sa Ditseno tša Profense goba tša mmasepala; goba	
(b)	sehlongwa se sengwe le se sengwe seo se dumeletšwego go ya ka molao o itšego go amogela tšhelete ya go thuša setšhaba.
(3)	Mohlakišikakaretšo o swanetše go tliša dipego tša tlhakišo go lekgotlapeamelao le lengwe le le lengwe leo le nago le kgahlegothwii tlhakišong, le go taolo ye nngwe le ye nngwe ye e beilwego ke molao wa naga. Dipego ka moka di swanetše go tlišwa setšhabeng.
(4)	Mohlakišikakaretšo o na le maatla a tlaleletšo le mešomo ye e beilwego ke molao wa naga.
189	Pakatiro
	Mohlakišikakaretšo o swanetše go thwalwa pakatlengwa ya go se mpshafatšwe ya mengwaga ya magareng ga e mehlano le e lesome.
Khomišene ya Dikgetho (krl 190-191)
190	Mešomo ya Khomišene ya Dikgetho
(1)	Khomišene ya Dikgetho e swanetše go- 
(a)	laola dikgetho tša setšhaba, tša diprofense le tša makgotlataolo a bommasepala go ya ka molao wa naga; 
(b)	kgonthišiša gore dikgetho tšeo ke tše di lokologilego tša go se be le bomenetša; le	go
(c)	phatlalatša dipoelo tša dikgetho tšeo mo nakong ye e swanetšego go bewa ke molao wa naga ebile e lego yeo e lego e kopana ka mo go kgonagalago.
(2)	Khomišene ya Dikgetho e na le maatla a tlaleletšo le mešomo ye e beilwego ke molao wa naga.
191	Sebopego sa Khomišene ya Dikgetho
	Khomišene ya Dikgetho e swanetše go bopša ke bonyane bja batho ba bararo. Palo ya maloko le pakatiro ya bona di swanetše go bewa ke molao wa naga.
Bolaodi bjo bo Ikemetšego bja go Laola Kgašo (k 192)
192	Bolaodi bja Kgašo
	Molao wa naga o swanetše go hloma bolaodi bjo bo ikemetšego go laola kgašo go ya ka dikgahlego tša setšhaba, le go kgonthišiša go hloka bomenetša le maikutlo a a fapanego ao a emetšego setšhaba sa Afrika Borwa ka bophara.
Ditaba tša Kakaretšo (krl 193-194)
193	Go thwala
(1)	Mošireletši wa Setšhaba le maloko a Khomišene ye nngwe le ye nngwe yeo e theilwego ke Kgaolo ye e swanetše go ba basadi goba banna bao-	
(a)	e lego baagi ba Afrika-Borwa are South African citizens; 
(b)	e lego batho ba maswanedi e bile ba loketše go tšea maemo a mošomo wo itšego; le 
(c)	go latela dinyakwa tše dingwe tše itšego tšeo di beilwego ke molao wa naga.
(2)	Tlhokego ya gore Khomišene ye e hlomilwego ke Kgaolo ye go laetša ka bophara morafe le bong bja sebopego sa Afrika Borwa e swanetše go elwa hloko ge maloko a thwalwa. 
(3)	Mohlakišikakaretšo e swanetše go ba mosadi goba monna yoo e lego moagi wa Afrika Borwa yoo e lego motho wa maswanedi ebile e le wa maleba go tšea mošomo woo. Tsebo ye ikgethago ya, goba maitemogelo, bohlakišing, ditšhelete tša mmušo le taolo ya setšhaba di swanetše go hlokomelwa ge go kgethwa Mohlakišikakaretšo. 
(4)	Mopresitente, ka dikeletšo tša Kopano ya Maloko a Palamente ka Moka, o swanetše go thwala Mošireletši wa Setšhaba, Mohlakišikakaretšo le maloko a- 
(a)	 Khomišene ya Ditokelo tša Botho ya Afrika Borwa; 
[Temana ya (a)	e fetošitšwe ke karolwana ya 4 ya Molao wa 65 wa 1998.]
(b)	Khomišene ya Tekatekano ya Bong; le	
(c)	Khomišene ya Dikgetho.
(5)	Kopano ya Maloko a Palamente ka Moka e swanetše go digela batho bao ba- 
(a)	kgethilwego ke Komiti ya Kopano ya Maloko a Palamente ka Moka ka tekatekano ye e bopšago ke maloko a diphathi ka moka tšeo di nago le baemedi ka go Kopano ya Maloko a Palamente ka Moka; le go 
(b)	dumetšwe ke Kopano ya Maloko a Palamente ka Moka ka sephetho seo se amogetšwego ke thekgo ya bouto-
(i)	ya bonyane bja diperesente tše 60 tša maloko a Kopano ya Maloko a Palamente ka Moka, ge ditigelo di ama go thwalwa ga Mošireletši wa Setšhaba goba Mohlakišikakaretšo; goba 
(ii)	ya bontši bja maloko a Kopano ya Maloko a Palamente ka Moka, ge ditigelo di ama go thwalwa ga leloko la Khomišene. 
(6)	Go ba le seabe ga setšhaba mo tshepedišong ya ditigelo go ka no beakanyetšwa bjalo ka ge go ukangwe karolong ya 59 (1)(a)	.
194	Go rolwa modiro
(1)	Mošireletši wa Setšhaba, Mohlakišikakaretšo goba leloko la Khomišene yeo e theilwego ke Kgaolo ye o tla	rolwa modiro fela- 
(a)	mabakeng a maitshwaro a go se loke, go palelwa ke mošomo goba go hloka tsebo; 
(b)	ge komiti ya Kopano ya Maloko a Palamente ka Moka e lemogile taba yeo; le
(c)	go tšea sephetho ke Kopano ya Maloko a Palamente ka Moka, e laela gore motho yoo a rolwe modiro. 
(2)	Sephetho sa Kopano ya Maloko a Palamente ka Moka mabapi le go rolwa modiro ga-
(a)	Mošireletši wa Setšhaba goba Mohlakišikakaretšo se swanetše go amogelwa ka thekgo ya bonyane bja peditharong ya dibouto tša maloko Kopano ya Maloko a Palamente ka Moka; goba
(b)	leloko la khomišene se swanetše go amogelwa ka thekgo ya bouto ya bontši bja maloko a Kopano ya Maloko a Palamente ka Moka.
(3)	Mopresitente-
(a)	a ka no fega motho mošomong	nako ye nngwe le ye nngwe morago ga go thoma go dula ga komiti ya Kopano ya Maloko a Palamente ka Moka ka ga go rolwa modiro ga motho yoo; gomme
(b)	o swanetše go rola motho modiro morago ga ge Kopano ya Maloko a Palamente ka Moka e se no tšea sephetho sa gore motho yoo a rolwe modiro.
KGAOLO YA 10
TAOLO YA MERERO YA SETŠHABA (krl 195-197)
195	Dikelo tše bohlokwa le metheo yeo e laolago taolo ya merero ya setšhaba
(1)	Taolo ya merero ya setšhaba e swanetše go laolwa ke dikelo tše bohlokwa le metheo ya temokrasi ye e betietšwego ka Molaotheong go akaretšwa le metheo ye e:
(a)	Maitshwaro a maleba a maemo a godimo	a seprofešene a swanetše go tšwetšwapele le go diragatšwa.
(b)	Tirišo ya methopo ka bokgoni, tsheketšo le go šomišwa ga methopo ka maleba go swanetše go tšwetšwapele.
(c)	Taolo ya merero ya setšhaba e swanetše go sekamela kudu ka lehlakoreng la tlhabollo.
(d)	Ditirelo di swanetše go abja ka ntle le go tšea lehlakore, ntle le kgethollo, ka tekatekano le go hloka go sekamela ka go gongwe.
(e)	Dinyakwa tša batho di swanetše go hlokomelwa gomme Setšhaba se swanetše go hlohleletšwa go kgatha tema go hlangweng ga melawana.
(f)	Taolo ya merero ya setšhaba e swanetše go ba le maikarabelo.
(g)	Ponagatšo e swanetše go dirwa ka go fa setšhaba tshedimošo ya ka pele, ye e fihlelelwago ya maswanedi.
	(h)	Ditiro tša taolo ye e nepagetšego ya badiredi le ya tlhabollo ya tša boiphedišo, kgodišong ya bokgoni bja batho, di swanetše go bjalwa.
(i)	Taolo ya merero ya setšhaba e swanetše go emela batho ba Afrika-Borwa ka bophara, le ditiro tša thwalo le tša taolo ya bahlankedi tšeo di swanetšego go thewa godimo ga bokgoni, tebano, go se kgetholle, le go nyaka go lokiša go se lekalekane ga matšatši a a fetilego go kgona go beakanyalefsa ditshekamo tša nako ye e fetilego go fihlelela kemedi ka bophara.
(2)	Metheo ye go boletšwego ka yona mo godimo e šoma go-	
(a)	taolo ya makala ka moka a mmušo; 
(b)	ditho tša mmušo; le 
(c)	dikgwebong tša setšhaba.
(3)	Molao wa naga o swanetše go kgonthišiša tšwetšopele ya dikelo le metheo yeo e tšweleditšwego lenaneong la karolwana ya (1)
(4)	Go thwalwa ga palo ya batho	taolong ya merero ya setšhaba go lekola maikemišetšo ga se gwa šikologwa, eupša molao wa naga o swanetše go laola dithwalo tšeo mo ditirelong tša setšhaba.
(5)	Melao ye e laolago taolo ya merero ya setšhaba e ka no fapantšha gareng ga mafapha ao a fapanego, ditaolo goba dihlongwa..
(6)	Mekgwa le mešomo ya mafapha ao a fapanego, ditaolo le dihlongwa tša tshepedišo ya merero ya setšhaba ke mabaka a maleba ao a swanetšego go šetšwa mo melaong yeo e laolago taolo ya merero ya setšhaba.
196	Khomišene ya Ditirelo tša Setšhaba
(1)	Go na le Khomišene e tee ya Ditirelo tša Setšhaba ya Repabliki.
(2)	Khomišene e ikemetše ka noši, ebile e swanetše go hloka tlhao, gomme e swanetše go diriša maatla a yona le go phethagatša mešomo ya yona ka ntle le poifo, sepitša goba kgethollo kgahlegong ya go diragatša taolo ya setšhaba ye e šomago gabotse le ka bokgoni le maitshwaro a profešene a maemo a godimo tirelong ya setšhaba. Khomišene e swanetše go laolwa ke molao wa naga.
(3)	Ditho tše dingwe tša mmušo, ka magato a semolao le tše dingwe, di swanetše go thuša le go šireletša Khomišene go kgonthišiša go ikemela ka bonoši, go hloka tlhao, tlhompo le go šoma gabotse ga Khomišene. Ga go motho goba setho sa mmušo seo se swanetšego go tsenatsena mešomo ya Khomišene. 
(4)	Maatla le mešomo ya Khomišene ke-
(a)	go tšwetšapele dikelo le metheo yeo e beilwego karolong ya 195, tirelong ka moka ya setšhaba;
(b)	go nyakišiša, go hlapetša le go ela mokgatlo le taolo, le ditirišo tša badiredi, tša tirelo ya setšhaba;
(c)	go šišinya magato a go kgonthišiša phethagatšo e kaone le ya bokgoni tirelong ya setšhaba ka moka; 
go fa ditaelo tšeo nepo ya tšona e lego go kgonthišiša gore ditshepedišo tša badiredi tše di amago go thwala, tšhutišo, ditlhatlošo le go raka di sepelelana le dikelo le metheo tše di beilwego karolong ya 195;
(e)	go bega mabapi le ditiro le diphethagatšo tša mešomo ya yona, go akaretšwa khwetšo efe le efe yeo e ka e dirago, le ditaetšo le keletšo yeo e ka fago, le go beakanyetša kelo go fihla moo e lego gore dikelo le metheo tše di beilwego karolong ya 195 di a latelwa;
(f)	gore ka boyona goba ka morago ga go amogela ngongorego efe goba efe-	
(i)	go nyakišiša le go ela tšhomišo ya ditiro tša bašomi le tša taolo ya setšhaba, le go bega go khuduthamaga ye e amgegago	le go lekgotlapeamelao; 
(ii)	go nyakišiša dingongorego tša bašomi tirelong tša setšhaba mabapi le ditiro tša semmušo goba ditlogelo, le	go digela dithušo tše di swanetšego; 
 (iii)	go hlokomela le go nyakišiša go latela tšhomišo ya ditshepedišo ka tirelong ya setšhaba	
 (iv)	go eletša ditho tša mmušo wa setšhaba le tša profense mabapi le ditiro tša bašomi tirelong ya setšhaba, go akaretšwa le tšeo di amago go kalatšo, go thwala, tšhutišo, go raka le mabaka a mangwe a mešomo ya bašomi ka	tirelong ya setšhaba.
	 (g)	go diriša goba go phathagatša maatla a tlaleletšo goba mešomo ye e beilwego ke Molao wa Palamente.
[Temana ya (g)	e tlaleleditšwe ka karolo ya 3 ya Molao wa 65 wa 1998.]
(5)	Khomišene e ikarabela go Kopano ya Maloko a Palamente ka Moka.
(6)	Khomišene e swanetše go bega bonyane gatee ka ngwaga go ya ka karolwana ya (4)(e)-
(a)	go Kopano ya Maloko a Palamente ka Moka; le
(b)	mabapi le ditiro tša yona ka profenseng, go lekgotlapeamelao la profense yeo.
(7)	Khomišene e na le dikomišenare tše di latelago tše 14 tšeo di beilwego ke Mopresitente:
(a)	Dikomišenare tše hlano tše di beilwego ke Kopano ya Maloko a Palamente ka Moka go ya ka karolwana ya (8)(a); le
(b)	Komišenare e tee ka profenseng ye nngwe le ye nngwe yeo e kgethilwego ke Tonakgolo ya profense go ya ka karolwana ya (8)(b)	.
(8)(a)	Komišenare ye e thetšwego go ya ka karolwana (7)(a)	e swanetše go ba e -
(i)	e digetšwe ke komiti ya Kopano ya Maloko a Palamente ka Moka yeo ka tekatekano e bopilwego ke maloko a diphathi ka moka tše di emetšwego ka go Kopano ya Maloko a Palamente ka Moka; le
(ii)	e amogetšwe ke Kopano ya Maloko a Palamente ka Moka ka sephetho se se tšerwego ka thekgo ya bouto ya bontši bja maloko a yona.
(b)	Komišenare ye e kgethilwego ke Tonakgolo ya profense e swanetše go ba- 
(i)	e digetšwe ke komiti ya lekgotlapeamelao ka Moka yeo ka tekatekano e bopilwego ke maloko a diphathi ka moka tše di emetšwego ka go Kopano ya Maloko a Palamente ka Moka; le	
(ii)	e amogetšwe ke Kopano ya Maloko a Palamente ka Moka ka sephetho se se tšerwego ka thekgo ya bouto ya bontši bja maloko a yona.
(9)	Molao wa Palamente o swanetše go laola tshepedišo ya go thwala ga dikomišenare.
(10)	Komišenare o thwalwa pakatiro ya mengwaga e mehlano, yeo e mpshafatšegago pakatiro e tee fela ya tlaleletšo, gomme e swanetše go ba mosadi goba monna yo e lego -
(a)	moagi wa Afrika Borwa; gomme 
(b)	motho wa maswanedi wa go a itekanetšego wa tsebo ya, goba maitemogelo a,	tshepedišo, taolo goba kabo ya ditirelo tša setšhaba.
(11)	Komišenare a ka tlošwa modirong wa gagwe fela- 
(a)		mabakeng a maitshwaro a go se loke, go palelwa ke mošomo goba go hloka tsebo; 
(b)	ge komiti ya Kopano ya Maloko a Palamente ka Moka e lemogile taba yeo goba ge e le gore komišenare e kgethilwe ke Tonakgolo ya Profense, ke komiti ya lekgotlapeamelao la profense yeo; le
(c)	 	go tšea sephetho ke Kopano ya Maloko a Palamente ka Moka goba lekgotlapeamelao la profense yeo, di laela ka thekgo ya bouto ya maloko a yona gore komišenare yeo e rolwe modiro.	
(12)	Mopresidente o swanetše go tloša komišenare yo a amegago ge- 
(a)	ge komiti ya Kopano ya Maloko a Palamente ka Moka e tšere sephetho sa gore komišenare yeo e rolwe modiro; goba
(b)	Tsebišo ye e ngwadilwego ke Tonakgolo ya gore lekgotlapeamelao la profense le tšere sephetho sa gore komišenare e rolwe modiro.
(13) Dikomišenare tše di ukangwego karolwaneng ya (7)(b)	di ka diriša maatla le go phethagatša mešomo ya Khomišene diprofenseng tša tšona ka ge go beilwe ke molao wa naga.
197	Tirelo ya Setšhaba
(1)	Ka gare ga tshepedišo ya merero ya setšhaba go na le tirelo ya Setšhaba ya Repabliki, yeo e swanetšego go šoma le go bopša go latela molao wa naga, gomme ye e swanetšego go phethagatša ka potego merero ya semolao ya mmušo wa nako yeo. 
(2)	Dipeelano le mabaka a thwalo tirelong ya setšhaba di swanetše go laolwa ke molao wa naga. Bašomedi ba swanetšwe ke diphenšene tša maleba bjalo ka ge go laolwa ke molao wa naga.
(3)	Ga go na le mošomedi wa setšhaba yo a swanetšego go direlwago sepitša goba a kgethollwa fela ka gore motho yoo o thekga phathi ye itšego ya dipolitiki goba mabaka a yona.
(4)	Mebušo ya diprofense e na le maikarabelo a go kalatša, go thwala, tlhatlošo, tšhutišo le go raka maloko a tirelo ya setšhaba ditaolong tša yona go ya ka tlhako ya go swana ya melao le dikelo tše di dirišwago go tirelo ya setšhaba. 
KGAOLO YA 11
DITIRELO TŠA TŠHIRELETŠO (krl 198-210)
198	Metheotaolo
	Metheo ye e latelago e laola tšhireletšo ya setšhaba ya Repabliki:
(a)	Tšhireletšo ya setšhaba e swanetše go bontšha maikemišetšo a MaAfrika Borwa, bjalo ka batho ka sebele le bjalo ka setšhaba, go phela bjalo ka batho bao ba lekanago, ba go phela ka khutšo le kagišo, ba go phela ka ntle le letšhogo le tlhaelelo le go tsoma bophelo bjo bokaone.
(b)	Maikemišetšo a go phela ka khutšo le kagišo a thibela moagi yo mongwe le yo mongwe wa Afrika Borwa go kgatha tema dithulanong tša marumo, ka nageng ya rena goba
ditšhabatšhabeng, ka ntle le ge seo se dumeletšwe ke Molaotheo goba molao wa naga. 
(c)	Tšhireletšo ya setšhaba e swanetše go dirwa go latelwa molao; go akaretšwa le molao wa boditšhabatšhaba.
(d)	Tšhireletšo ya setšhaba e ka fase ga taolo ya Palamente le khuduthamaga ya setšhaba.
199	Tlhomo, tlhamo le maitshwaro a dirirelo tša setšhaba
(1)	Ditirelo tša tšhireletšo tša Repabliki di bopilwe ke lesolo le tee la sešole, tirelo e tee ya sephodisa, le ditirelo dife goba dife tša bohlodi tše di hlomilwego go ya ka Molaotheo.
(2)	Mašole a tšhireletšo ke lesolo le nnoši la bošole ka Repabliking.
(3)	Ka ntle le ditirelo tša tšhireletšo tšeo di hlomilwego ke Molaotheo, mekgatlo goba ditirelo tše di itlhamilego di ka tlongwa fela go ya ka molao wa naga.
(4)	Ditirelo tša tšhireletšo di swanetše go bopša le go laolwa go ya ka molao wa naga.
(5)	Ditirelo tša tšhireletšo di swanetše go phethagatša, gomme di be di rute le go gapeletša gore maloko a tšona a phethagatše go ya ka Molaotheo le molao, go akaretšwa molaosetlwaedi wa boditšhabatšhaba le dikwano tša boditšhabatšhaba tšeo di tlamago Repabliki.
(6)	Ga go leloko lefe goba lefe la tirelo ya tšhireletšo leo le swanetšego go obamela taelo yeo go bonalago e tloga e se molaong. 
(7)	Ga go ditirelo tša tšhireletšo goba ba bangwe ba maloko a tšona, di ka, phethagatšong ya mešomo ya tšona- 
(a)	kgethollago dikgahlego tša phathi ya dipolitiki yeo e lego molaong go ya ka Molaotheo; goba	
(b)	 	tša tšwetšapele, ka mokgwa wa go tšea lehlakore, dikgahlego tše itšego tša phathi ya dipolitiki.
(8)	Go diragatša metheo ya ponagatšo le maikarabelo, dikomiti tša palamente tša diphathintši, go hlokomela ditirelo tša tšhireletšo ka tsela yeo e beilwego ke molao wa naga goba melawana le ditaelo tša Palamente.
Tšhireletšo (krl 200-204)
200	Mašole a tšhireletšo
(1)	Mašole a tšhireletšo a swanetše go bopša le go laolwa bjalo ka sešole seo se itshwerego gabotse. 
(2)	Maikemišetšomagolo a mašole a tšhireletšo ke go phemela le go šireletša Repabliki, seriti sa mellwane ya yona le batho ba yona go ya ka Molaotheo le metheo ya molao wa boditšhabatšhaba yeo e laolago tšhomišo ya madira.
201	Maikarabelo a Sepolitiki	
(1)	Leloko la Kabinete le swanetše go rwala maikarabelo a mašole a tšhireletšo.
(2)	Ke Mopresitente fela, bjalo ka hlogo ya khuduthamaga ya setšhaba yoo a ka dumelelago go šomišwa ga mašole a tšhireletšo-
(a)	ka tšhomišano le tirelo ya maphodisa; 
(b)	tšhireletšong ya Repabliki; goba 
(c)	 	phethagatšong ya boitlamo bja boditšhabatšhaba.
(3)	Ge mašole a tšhireletšo a šomišetšwa lebaka le lengwe le le lengwe le lego karolwaneng ya (2), Mopresitente o swanetše go tsebiša Palamente ka bonako le gona botlalo ka ga- 
(a)	mabaka a go šomišwa ga mašole a tšhireletšo; 
(b)	lefelo lefe goba lefe moo	mašole a šomišwago gona; 
(c)	palo ya batho bao ba amegago; le 
(d)	nako yeo go emetšwego gore a tlo šomišwa ka yona. 
(4)	Ge Palamente e sa dule mo matšatšing a šupago morago ga go šomišwa ga mašole bjalo ka ge go ukangwe karolwaneng ya (2), Mopresitente o swanetše go tšweletša tshedimošo ye e nyakegago go ya ka karolwana ya (3)	go komiti ya maleba ye e hlokometšego taba ye. 
202	Taolo ya Mašole a Tšhireletšo
(1)	Mopresitente, bjalo ka hlogo ya khuduthamaga ya setšhaba ke Molaodimogolo wa mašole a tšhireletšo, gomme o swanetše go kgetha Molaodi wa Sešole wa mašole a tšhireletšo.
(2)	Taolo ya mašole a tšhireletšo e swanetše go phethagatšwa go ya ka ditaelo tša leloko la kabinete le le rwelego maikarabelo a tšhireletšo ka tlase ga bolaodi bja Mopresitente.
203	Maemo a tšhireletšo ya setšhaba
(1)	Mopresitente, bjalo ka hlogo ya khuduthamaga ya setšhaba a ka goeletša seemo sa tšhireletšo ya setšhaba, gomme o swanetše go tsebiša Palamente ka bonako le gona ka botlalo ka ga- 
(a)	mabaka a kgoeletšo yeo; 
(b)	lefelo lefe goba lefe moo mašole a šomišwago gona; le 
(c)	palo ya batho bao ba amegago. 
(2)	Ge Palamente e sa dule nakong yeo maemo a tšhireletšo a goeletšwago, Mopresitente o swanetše go biletša Palamente tulong ye e sego ya mehleng mo matšatšing a a šupago morago ga kgoeletšo.
(3)	Kgoeletšo ya seemo sa tšhireletšo ya setšhaba e a fela ntle le ge go amogetšwe ke Palamente mo matšatšing a šupago morago ga kgoeletšo.
204	Bongwaledi bja tšhireletšo ya baagi
	Bongwaledi bja tšhireletšo ya baagi bo swanetše go hlomiwa go ya ka molao wa naga go šoma ka fase ga taolo ya leloko la Kabinete le le rwelego maikarabelo a tšhireletšo. 
Maphodisa (krl 205-208)
205	Tirelo ya Maphodisa
(1)	Tirelo ya Setšhaba ya maphodisa e swanetše go hlangwa gore e šome mo makaleng a setšhaba, profense, le moo go lebanego, lekaleng la tikologo la mmušo.
(2)	Molao wa naga o swanetše go beakanya maatla le mediro ya tirelo ya maphodisa gomme o kgontšhe tirelo ya maphodisa go phethagatša maikarabelo a yona ka bokgoni, go lebeletšwe kudu dinyakwa tša diprofense.
(3)	Maikemišetšo a tirelo ya maphodisa ke go thibela, go lwantšha le go nyakišiša bosenyi, go lota kagišo ya setšhaba, go šireletša le go boloka baagi ba Repabliki le dithoto tša bona le go thekga le go phethagatša molao.
206	Maikarabelo a sepolitiki 
(1)	Leloko la Kabinete le swanetše go rwala maikarabelo a bophodisa gomme le swanetše go rulaganya molaotshepetšo wa setšhaba wa bophodisa morago ga go rerišana le mebušo ya diprofense go mme le hlokometše dikgahlego le dinyakwa tša diprofense ka ge go laolwa ke khuduthamaga ya profense. 
(2)	Molaotshepetšo wa setšhaba wa bophodisa o ka fa peakanyetšo ya melaotshepetšo ya go fapana mabapi le diprofense tša go fapana morago ga go ela hloko dinayakwa tša bophodisa le ditlapele tša diprofense tše.
(3)	Profense ye nngwe le ye nngwe e na le tokelo ya-
(a)	go hlapetša maitshwaro a maphodisa; 
(b)	go hlokomela go šoma gabotse le phethagatšo ya bona ka bokgoni, go akaretšwa go amogela dipego tša tirelo ya maphidisa; 
(c)	go tšwetšapele moya wo mobotse gare ga maphodisa le setšhaba;
(d)	go sekaseka go šoma gabotse ga go ba pepeneneng ga tlhapetšo ya maphodisa;
(e)	go kgokagana le leloko la Kabinete leo le rwelego maikarabelo bja sephodisa mabapi le bosenyi le bophodisa ka profenseng.
(4)	Khuduthamaga ya profense e na le maikarabelo a mešomo ya bophodisa - 
(a)	ye e e filwego ke kgaolo ye; 
(b)	ye e e filwego go ya ka molao wa naga; le 
(c)	ye e e abetšwego ka go molaotshepetšo wa setšhaba wa bophodisa.
(5)	Gore e tle e kgone go phethagatša mešomo ye e beilwego ka go karolwana ya (3), profense- 
(a)	e ka nyakišiša, goba ya hloma khomišene ya dinyakišišo mabapi le dingongorego dife goba dife tša go šitwa ga maphodisa goba tlhokego ya kgokagano gare ga maphodisa le setšhaba sefe goba sefe ; gomme	
(b)	e swanetše go dira ditigelo go setho sa Kabinete se amanego le bophodisa.
(6)	Ge e amogela ngongorego ye e tšwago go khuduthamaga ya profense, mokgatlo wo o ikemego ka noši wa dingongorego tša maphodisa, o swanetše go nyakišiša bosenyi bjoo bo ukangwago goba molato woo o obilwego ke leloko la tirelo ya maphodisa ka profenseng.
(7)	Molao wa naga o swanetše go beakanyetša tlhako ya go hloma, maatla, mešomo le taolo ya ditirelo tša maphodisa tša bommasepala.
(8)	Komiti ye e hlamilwego ke leloko la Kabinete le maloko a Khuduthamaga tše di nago le maikarabelo a maphodisa e swanetše go thewa go kgonthišiša tlemagano ye e nepagetšego ya tirelo ya maphodisa le tlemagano ye e nepagetšego ka gare ga makala a mmušo.
(9)	Lekgotlapeamelao la profense le ka nyaka gore komišenare wa profense go tšwelela pele ga yona goba ye nngwe le ye nngwe ya dikomiti tša yona go fetola dipotšišo.
207	Taolo ya Tirelo ya Maphodisa
(1)	Mopresitente bjalo ka hlogo ya khuduthamaga ya setšhaba o swanetše go bea monna goba mosadi bjalo ka Komišinare ya Setšhaba wa tirelo ya maphodisa, go laola le go sepediša tirelo ya maphodisa. 
(2)	Komišinare ya Setšhaba o swanetše go laola le go sepediša tirelo ya maphodisa go ya ka morero wa setšhaba wa bophodisa le ditaelo tša leloko la Kabinete le le rwelego boikarabelo bja bophodisa. 
(3)	Komišenare ya Setšhaba, ka tirišano le khuduthamaga ya profense, o swanetše go kgetha mosadi goba monna go ba Komišenare ya profense yeo, efela ge Komišenare ya Setšhaba le khuduthamaga ya profense di palelwa ke go kwana ga go thwalwa ga Komišinare, leloko la Kabinete leo le rwelego maikarabelo a bophodisa le swanetše go ba motseta gareng ga bao ba amegago.
(4)	Dikomišenare tša diprofense di na le maikarabelo a maphodisa diprofenseng tša tšona-
(a)	bjalo ka ge go beilwe molaong wa naga; le	
(b)	ka maatla a Komišenare ya Setšhaba, go laola le go sepediša tirelo ya maphodisa go ya ka karolwana ya (2).
(5)	Komišenare wa profense o swanetše go bega go lekgotlapeamelao la profense ngwaga ka ngwaga mabapi le bophodisa ka profenseng, gomme o swanetše go romela khopi ya pego go Komišenare ya Setšhaba.
(6)	Ge Komišenare ya profense e se sa tshepša ke khuduthamaga ya profense, khuduthamaga yeo e ka hloma ditshepedišo tša maleba tša go mo tloša goba go mo šutiša, goba go tšea magato a kgalemo, kgahlanong le Komišenare yeo, go ya ka molao wa naga.
208	Bongwaledi bja maphodisa a baagi 
	Bongwaledi bja maphodisa a baagi bo swanetše go hlomiwa go ya ka molao wa naga go šoma ka fase ga taolo ya leloko la Kabinete le le rwelego maikarabelo bja bophodisa.
Bohlodi (krl 209-210)
209	Tlhomo le taolo ya ditirelo tša bohlodi
(1)	Tirelo efe goba efe ya bohlodi, ka ntle le karolo ya bohlodi ya madira a tšhireletšo goba tirelo ya maphodisa, e ka hlongwa fela ke Mopresitente bjalo ka hlogo ya khuduthamaga ya setšhaba, le gona fela go ya ka molao wa naga. 
(2)	Mopresidente bjalo ka hlogo ya khuduthamaga ya setšhaba o swanetše go be a mosadi goba monna bjalo ka hlogo ya tirelo ya bohlodi yeo e hlomilwego go ya ka karolwana ya (1), ebile o swanetše go rwala maikarabelo a sepolitiki taolong le tšhupetšong ya ditirelo tše, goba go kgopela leloko la Kabinete go rwala maikarabelo ao. 
210	Maatla, mešomo le tlhokomelo
	Molao wa naga o swanetše go beakanya le go laola maatla le mešomo ya ditirelo tša botseka, go akaretšwa karolo ya mašole a tšhireletšo goba tirelo ya maphodisa, gomme o fe tumelelo ya-
(a)	go kgokaganya ditirelo ka moka tša bohlodi; le
(b)	tlhokomelo ya baagi mabapi le ditirelo ka mohlahlobi yo a beilwego ke Mopresitente, bjalo ka hlogo ya khuduthamaga ya setšhaba, gomme a amogetšwe ke sephetho se se tšerwego ke Kopano ya Maloko a Palamente ka moka ka bouto ya bonyane ye e thekgwago ke peditharong ya maloko a yona.
KGAOLO YA 12
BAETAPELE BA SETŠO (krl 211-212)
211	Kamogelo
(1)	Dihlongwa, maemo le bohlokwa bja boetapele bja setšo, go ya ka molaosetlwaedi, di a amogelwa, fela ka taolo ya Molaotheo. 
(2)	Pušo ya setšo yeo e latelago molaosetlwaedi, e ka dumelelwa go šoma, fela e swanetše go latela molao wa naga le ditlwaelo, go akaretšwa le go fetolwa goba go phumolwa ga molao woo goba ditlwaelo tšeo.
(3)	Dikgorotsheko di swanetše go šomiša molaosetlwaedi ge fela e le gore molao woo ke wona o šomago tabeng yeo; ka taolo ya Molaotheo le molao wo mongwe le wo mongwe wo o amago molaosetlwaedi. 
212	Tema ya baetapele ba setšo
(1)	Molao wa naga o ka beakanya tema ya boetapele bja setšo bjalo ka sehlongwa lekaleng la tikologo ditabeng tšeo di amago ditšhaba tša Tikologo.
(2)	Go rera ditaba tšeo di amanago le boetapele bja setšo, tema ya baetapele ba setšo, molaosetlwaedi le ditlwaelo tša ditšhaba tšeo di obamelago lenaneo la molaosetlwaedi-
(a)	molao wa naga goba wa diprofense o ka hloma go theiwa ga mengwako ya baetapele ba setšo; le 
(b)	molao ya naga o ka hloma khansele ya baetapele ba setšo.
KGAOLO YA 13
DITŠHELETE (krl 213-230A)
Merero ya Ditšhelete ka Kakaretšo (krl 213-219)
213	Sekhwama sa Ditseno sa Setšhaba
(1)	Go na le Sekhwama sa Ditseno sa Setšhaba seo ka go sona ditšhelete ka moka tše di amogetšwego ke mmušo wa naga di swanetšego go lefelwa gona, ka ntle le tšhelete yeo e beetšwego ka thoko ka mabaka a Molao wa Palamente.
(2)	Ditšhelete e ka ntšhiwa Sekhwameng sa Ditseno sa Setšhaba fela- 
(a)	go ya ka tekanyetšo yeo e theilwego Molaong wa Palamente; goba 
(b)	bjalo ka tefešothwii yeo e lebanego Sekhwama sa Ditseno sa Setšhaba, ge beakanyeditšwe ka Molaotheong goba Molao wa Palamente.
(3)	Kabelo ya go lekana ya profense go tšwa ditsenong tšeo di kgobokeditšwego setšhabeng ka bophara, ke tefišothwi yeo e lebanego Sekhwama sa Setšhaba sa Ditseno..
[Letšatšikgwedi la go thoma la karolo ya 213: 1 Janaware 1998.]
214	Dikabelo tša go lekana le dikabo tša ditseno
(1)	Molao wa Palamente o swanetše go beakanyetša- 
(a)	karogano ya go lekana ya ditseno tšeo di kgobokeditšwego setšhabeng ka bophara gare ga makala a mmušo a setšhaba, profense le a tikologo;
(b)	taetšo ya kabelo ya maswanedi ya profense ye nngwe le ye nngwe mo go kabelo ya profense ya ditseno tšeo; 
(c)		dikabelo tše dingwe tše itšego tša go ya go diprofense, pušoselegae goba bommasepala go tšwa kabelong ya ditseno go tšwa go mmušo wa setšhaba, le mabaka afe goba afe ao ka ona dikabelo tšeo di ka dirwago.
(2)	Molao woo o ukangwego go karolwana ya (1)	o ka dirišwa fela morago ga ge mebušo ya diprofense, dipušoselegae tšeo di ipopilego le Khomišene ya Ditšhelete le Matlole di ile tša rerišwa, le ge ditigelo dife goba dife tša Khomišene di šetše di lekodišitšwe, gomme di hlokomele mabaka a a latelago-
(a)	kgahlego ya setšhaba; 
(b)	peakanyetšo efe le efe yeo e swanetšego go dirwa mabapi le sekoloto sa setšhaba le ditlamego tše dingwe tša setšhaba;
dinyakwa le dikgahlego tša mmušo wa setšhaba, tšeo di laeditšwego go ya ka kelo ye e lebanego;
nyakego ya go kgonthišiša gore diprofense le	bommasepala di kgona go aba ditirelo tša motheo le go phethagatša mešomo yeo di e abetšwego;
bokgoni le go šomiša matlole gabotse ga diprofense le bommasepala;
(f)	tlhabollo le dinyakwa tše dingwe tša diprofense, dipušoselegae le bommasepala;
(g)	go se lekalekane ka gare le gareng ga diprofense;
	(h)	ditlamego tša diprofense le tša bommasepala go ya ka molao wa naga;
(i)	nyakego ya kakanyetšo ye e sa šuthigo le ya tshephagalago ya kabo ya dikabelo tša ditseno; le 
(j)	 	nyakego ya matšato mo boikarabelong bja mabaka a tšhoganetšo goba dinyakwa tše dingwe tša lebakanyana, le mabaka a mangwe ao a theilwego godimo ga kelo	ya go swana le ye.
[Letšatšikgwedi la go thoma la karolo ya 214: 1 Janaware 1998.]
215	Ditekanyetšo tša setšhaba, tša diprofense le tša bommasepala
(1)	Ditekanyetšo tša setšhaba, tša diprofense le tša bommasepala le tshepetšo ya tekanyetšo di swanetše go hlohleletša ponagatšo, maikarabelo, le taolo ye e swanetšego ya ditšhelete tša ekonomi, dikoloto le lefapha la setšhaba.
(2)	Molao wa naga o swanetše go beakanyetša- 
(a)	sebopego sa ditekanyetšo tša setšhaba, tša diprofense le tša bommasepala;	
(b)	gore ditekanyetšo tša setšhaba le tša profense di swanetše go begwa neng; le	
(c)	gore ditekanyetšo tša ditšhelete lefapheng le lengwe le le lengwe la mmušo le swanetše go laetša methopo ya ditseno le ka tsela yeo ditshenyegelo tše di šišintšwego di tlogo sepelelana le molao wa naga. 
(3)	Ditekanyetšo makaleng a mangwe le a mangwe a mmušo di swanetše go ba le- 
(a)	dikakanyetšo tša ditseno le ditshenyegelo, go fapantšhwa gare ga kapetlele le ditshenyegelo tša nako yeo; 
(b)	ditšhišinyo tša go lefela tlhaelelo yeo e akanywago lebakeng leo e diregago go lona; le
(c)	taetšo ya maikemišetšo mabapi le go adima le mekgwa e mengwe ya maikarabelo a setšhaba e tla godiša sekoloto sa setšhaba ngwageng wo o latelago.
[Letšatšikgwedi la go thoma la karolo ya 215: 1 Janaware 1998.]
216	Taolo ya Sešegotlotlo
(1)	Molao wa naga o swanetše go hloma šešegotlotlo sa setšhaba gomme o laetše dikgato tša go kgonthiša ponagatšo le taolo ya ditshenyagelo lekaleng le lengwe le le lengwe la mmušo, ka go tšweletša-	
(a)	mokgwa wo o amogetšwego ka bophara wa go hlakiša; 
(b)	dikaroganyo tša go swana tša ditshenyagelo; le 
(c)	dikelo le maemo a go swana a tša sešegomatlotlo.
(2)	Sešegotlotlo sa setšhaba se swanetše go diriša go latela magato ao a beilwego go ya ka karolwana ya (1), gape se ka thibela phetišetšo ya ditšhelete go ya go lefapha la mmušo ge e le gore lefapha leo la mmušo le ka dira ditlotlo tše šoro tša magato ao.
[Karolwana ya (2)	e tšeetšwe legato ke karolwana ya 5 (a)	ya Molao wa 61 wa 2001.]
(3)	Sephetho sa go thibela phetišetšo ya ditšhelete go ya profenseng go ya ka karolo ya 214 (1)(b)	se ka tšewa fela mabakeng ao a beilwego karolwaneng ya (2)	le, 
(a)	ga sa swanela go thibela phetišetšo ya ditšhelete matšatši a go feta 120; le	
(b)	se ka dirišwa semeetseng fela se tla felelwa ke maatla go tloga letšatši leo se dirilwego ka ntle le ge Palamente e amogela ka go latela tshepedišo yeo e swanago le yeo e hlomilwego go ya ka karolo ya 76(1)	mme e beilwe ke melao le ditaelo tša mohlakanelwa tša Palamente. Tshepedišo ye e swanetše go phethagala matšatšing a 30 morago ga sephetho sa sešegotlotlo sa setšhaba.
[Karolwana ya (3)	e tšeetšwe legato ke karolwana ya 5 (b)	ya Molao wa 61 wa 2001.]
(4)	Palamente e ka mpshafatša sephetho sa go thibela phetišetšo ya ditšhelete lebaka le le sa fetego matšatši a 120 ka nako e tee, go latelwa tshepedišo yeo e hlomilwego go ya ka karolwana ya (3).
(5)	Pele Palamente e ka dumelela goba ya tsošološa sephetho sa go thibela phetišetšo ya ditšhelete go ya profenseng- 
(a)	Mohlakišikakaretšo o swanetše go begela Palamente; gomme 
(b)	profense e swanetše go fiwa sebaka sa go fetola ditatofatšo kgahlanong le yona, le go tšweletša taba ya yona pele ga komiti.
[Letšatšikgwedi la go thoma la karolo ya 216: 1 Janaware 1998.]
217	Borekedi
(1)	Ge setho sa mmušo makaleng a setšhaba, a profense goba a tikologo goba sehlongwa se sengwe le sengwe se se laeditšwego mo molaong wa naga, se tšea dikontraka tša diphahlo goba tša ditirelo, gona se swanetše go dira bjalo go ya ka tshepedišo yeo e nago le maswanedi, ya go lekanela, ya ponagatšo, ya phadišano le ya tsheketšo.
(2)	Karolwana ya (1)	ga e thibele ditho tša mmušo goba dihlongwa tšeo di ukangwego karolwaneng yeo go diragatša morero wa borekedi wo o beakanyetšago –
(a)	 dikarolo tša kgetho mo kabong ya dikontraka; le	
(b)	tšhireletšo goba tšwetšopele ya batho, goba dihlopha tša	batho tšeo di hlokišitšwego ke kgethollo ye e sego maswanedi.
(3)	Molao wa naga o swanetše go bea tlhako yeo e lego gore molaotshepetšo wo o ukangwego karolwaneng ya (2)	o swanetšego go phethagatšwa. 
[Karolwana ya (3)	e tšeetšwe legato ke karolwana ya 6 ya Molao wa 61 wa 2001.]
218	Ditiišetšo tša mmušo
(1)	Mmušo wa setšhaba, mmušo wa profense goba mmasepala o ka tiišetša kadimo ge fela motiišetšwa a latela mabaka afe goba afe ao a beilwego molaong wa naga.
(2)	Molao wa naga wo o ukangwego go karolwana ya (1)	o ka dirišwa fela morago ga ge ditigelo tšeo di dirilwego ke Khomišene ya Ditšhelete le Matlotlo di etšwe hloko.
(3)	Ngwaga ka ngwaga, mmušo wo mongwe le wo mongwe o swanetše go phatlalatša pego ka ga ditiišetšo tšeo o di filego.
[Letšatšikgwedi la go thoma la karolo ya 218: 1 Janaware 1998]
219	Meputso ya batho bao ba šomelago setšhaba 
(1)	Molao wa Palamente o swanetše go hloma tlhako ya go beakanyetša-
(a)	meputso, diputseletšo le dikholego tša maloko a Kopano ya Maloko a Palamente ka Moka, baemedi ba go ya go ile	ka Khanseleng ya Setšhaba ya Diprofense, maloko a Kabinete, Batlatšatona, baetapele ba setšo le maloko a dikhansele tše dingwe le tše dingwe tša baetapele ba setšo; le	
(b)	magomo a ka godimo a meputso, diputseletšo goba dikholego tša maloko a lekgotlapeamelao la profense, maloko a Dikhuduthamaga le maloko a Dikhansele tša Bommasepala tša maemo a a fapanego. 
(2)	Molao wa naga o swanetše go hloma Khomišene ye e ikemetšego go dira ditigelo mabapi le meputso, diputseletšo le dikholego tše di ukangwego karolwaneng ya (1).
(3)	Palamente e ka fetiša molao wo o ukangwago karolwaneng ya (1), fela morago ga go ela hloko ditigelo tša khomišene ye e theilwego go ya ka karolwana ya (2).
(4)	Khuduthamaga ya setšhaba, khuduthamaga ya profense, mmasepala goba bolaodi bjo bongwe le bjo bongwe bja maswanedi bo ka phethagatša molao wa naga wo o ukangwego karolwaneng ya (1)	fela morago ga go ela hloko ditigelo tša khomišene ye e hlomilwego go ya ka karolwana ya (2).
(5)	Molao wa naga o swanetše go hloma ditlhako tše ka tšona o ka beakanyago meputso, diputseletšo le dikholego tša baahlodi, Mošireletši wa Setšhaba, Mohlakišikakaretšo, le maloko a khomišene ye nngwe le ye nngwe tšeo di beakanyeditšwego ka Molaotheong, go akaretšwa le bolaodi bja kgašo bjo bo ukangwego karolong ya 192.
Khomišene ya Ditšhelete le Matlotlo (krl 220-222)
220	Tlhomo le mešomo
(1)	Go na le Khomišene ya Ditšhelete le Matlotlo ya Repabliking yeo e dirago ditigelo tšeo di ukangwego Kgaolong ye, goba ka mo molaong wa baga, go Palamente, makgotlapeamelao a diprofense le bolaodi bjo bongwe le bjo bongwe bjoo bo laetšwego ke molao wa naga.
(2)	Khomišene e ikemetše ka noši gomme e laolwa fela ke Molaotheo le molao, gomme e swanetše go se tšee lehlakore. 
(3)	Khomišene e swanetše go šoma go latela Molao wa Palamente gomme,	phetagatšong ya mešomo ya yona, e swanetše go hlokomela mabaka ka moka a a lebanego, go akaretšwa ao a lego lenaneong karolong ya 214(2).
221	Go thwalwa le pakatiro ya maloko
(1)	Khomišene e bopša ke basadi le banna ba ba latelago bao ba kgethilwego ke Mopresitente bjalo ka hlogo ya khuduthamaga ya setšhaba:
(a)	Modulasetulo le motlatšamodulasetulo;
(b)	batho ba bararo, ka morago ga go rerišana le Ditonakgolo,	go tšwa lenaneong leo le thadilwego go ya ka tshepedišo yeo e beilwego ke molao wa naga; 
(c)	batho ba babedi bao ba kgethilwego, ka morago ga go rerišana le pušoselegae,	go tšwa lenaneong leo le thadilwego go ya ka tshepedišo yeo e beilwego ke molao wa naga; le
(d)	batho ba bangwe ba babedi.
[Karolwana ya (1)	e tšeetšwe legato ke karolwana ya 7 (a)	ya Molao wa 61 wa 2001.]
	(1A) Molao wa naga wo o ukangwego karolwaneng ya (1)	o swanete go beakanyetša go kgathatema ga-
(a)	Ditonakgolo go thaleng ga lenaneo leo le ukangwego karolwaneng ya (1)(b)	; le
(b)	pušoselegae ya go šoma gabotse go thaleng ga lenaneo leo le ukangwego karolwaneng ya (1)(c)	.
[Karolwana ya (1A) e tsentšwe ke 7 (b)	ya Molao wa 61 wa 2001.]
(2)	Maloko a Khomišene a swanetše go ba le bokgoni bjo bo lebanego.
(3)	Maloko a šoma pakatiro yeo e beilwego go ya ka molao wa naga. Mopresitente a ka tloša leloko modirong ka lebaka la go hloka maitshwaro, go palelwa ke mošomo goba go se kgone.
222	Dipego
	Khomišene e swanetše go begela Palamente le makgotlapeamelao a profense ka mehla.
Pankakgolo (krl 223-225)
223	Tlhomo
The South African Reserve Bank ke Pankakgolo ya Repabliki gomme e laolwa go ya ka Molao wa Palamente.
224	Maikemišetšomagolo
(1)	Maikemišetšomagolo a South African Reserve Bank ke go šireletša maatla a theko ya tšhelete kgahlegong ya kgolo ya ekonomi ye e lekalekanego le ya go ya go ile ka Repabliking.
(2)	The South African Reserve Bank, go fihlelela maikemišetšomagolo a yona, e swanete go phethagatša mešomo ya yona ntle le letšhogo, go rata goba tlhaolo; fela go swanetše go ba le ditherišano tša ka mehla gare ga Panka le leloko la Kabinete le le rwelego maikarabelo a merero ya ditšhelete.
225	Maatla le mešomo
	Maatla le mešomoa ya South African Reserve Bank ke ao ka tlwaelo a dirišwago ke dipanka tša gare, maatla ao le mešomo di swanetšego go laetšwa ke Molao wa Palamente gomme a swanetšego go dirišwa goba go phethagatšwa ka šedi ya mabaka ao a beilwego go latela Molaong woo. 
Merero ya Ditšhelete ya Diprofense le ya Tikologo	(krl 226-230A)
226	Sekhwama sa Ditseno tša Profense
(1)	Go na le Sekhwama sa Ditseno tša Profense ye nngwe le ye nngwe moo ditšhelete ka moka tše di amogetšwego ke mmušo wa profense di swanetšego go bewa ka go sona, ka ntle le tšhelete yeo e beetšwego ka thoko ka mabaka ka Molao wa Palamente.
(2)	Tšhelete e ka ntšhiwa go Sekhwama sa Ditseno tša Profense fela- 
(a)	go ya ka tekanyetšo ya Molao wa profense; goba
(b)	bjalo ka tefišothwii ya Sekhwama sa Ditseno tša Profense, ge seo se beakanyeditšwe ka Molaotheong goba ka Molaong wa profense.
(3)	Ditseno tšeo di abetšwego pušoselegae go tšwa profenseng ka profenseng yeo, go ya ka karolo ya 214(1), ke tefišothwii ya Sekhwama sa Ditseno tša Profense yeo.
(4)	Molao wa naga o ka beakanyetša tlhako yeo ka yona-
(a)	Molao wa profense o ka, go latela karolwana ya (2)(b), dumelela go ntšha ga tšhelete bjalo ka tefišothwii ya Sekhwama sa Ditseno tša Profense; le
(b)	ditseno tšeo di abilwego go tloga profenseng go ya go pušoselegae ka profenseng yeo go ya ka karolwana ya (3)	di swanetše go lefelwa bommasepala ka profenseng yeo.
[Karolwana ya (4)	e tsentšwe ke karolwana ya 8 ya Molao wa 61 wa 2001.]
[Letšatšikgwedi la go thoma la karolo ya 226: 1 Janaware 1998.]
227	Methopo ya setšhaba ya go thekga mebušo ya profense le dipušoselegae ka ditšhelete
(1)	Pušoselegae le profense e nngwe le e nngwe-
(a)	di lebanwe ke kabelo ye e lekana ya ditseno tše di kgobokeditšwego ke setšhaba gore e tle e kgone go aba ditirelo tša motheo le go phethagatša mešomo yeo e e abetšwego; gomme
(b)	di ka amogela dikabelo tše dingwe go tšwa ditsenong tša mmušong wa setšhaba, ka mabaka goba ka ntle le mabaka.
(2)	Ditseno tša tlaleletšo tše di kgobokeditšwego ke diprofense goba bommasepala ga di a swanela go ntšhiwa karolong ya tšona ya ditseno yeo e kgobokeditšwego ke setšhaba, goba go tšwa dikabelong tše dingwe tše di filwego go tšwa go ditseno tša mmušo wa setšhaba. Ka yona tsela yeo ga go tlamego ka thokong ya mmušo wa setšhaba go bušetša profense, goba bommasepala, tšeo di sa kgonego go kgoboketša ditšhelete tša go lekana le tekano ya bja tšona matlotlong le metšheleong.
(3)	Karolo ya go lekana ya profense ya ditseno tše di kgobokeditšwego ke setšhaba e swanetše go fetišetšwa go profense ka ntle le tikatiko le gona ka ntle le phokotšo, ka ntle le ge phetišetšo yeo e thibetšwe go ya ka dipeelano tša karolo 216.
(4)	Profense e swanetše go iphatela methopo efe goba efe yeo e e tsomago, go ya ka ditlhagišo tša molaotheo wa profense ya wona, tšeo e lego tlaleletšo go dinyakwa tša yona tšeo di ukangwego ka Molaotheong.
[Letšatšikgwedi la go thoma la karolo ya 227: 1 Janaware 1998.]
228	Metšhelo ya Profense
(1)	Lekgotlapeamelao la profense le ka bea- 
(a)	metšhelo, makgetho le metšhelo ya dithoto sebakeng sa motšhelo wa ditseno, motšhelo wa dithoto, motšhelo wa theko, metšhelo ya ditsha goba motšhelo wa ditšwantle; le 
(b)	ditefišo tša go lekana dikelong tša motšhelo, lekgetho goba motšhelo wa dithoto, tšeo di beilwego ke molao wa naga, sebakeng sa metšhelo ya mekgatlo ya ditseno, metšhelo ya theko, metšhelo ya ditsha goba metšhelo ya ditšwantle.
[Temana ya (b)	e tšeetšwe legato ke karolwana ya 9 ya Molao wa 61 wa 2001.]
(2)	Maatla a lekgotlapeamelao la profense a go bea metšhelo, makgetho, metšhelo ya dithoto le metšhelokoketšo-
(a)	ga a swanela go dirišwa ka tsela yeo e lego ka botšona le gona ka mo go sa kwalego di tshwenyana le merero ya ekonomi, le ditiro tša ekonomi tša setšhaba ka ntle ga mellwane ya profense yeo goba tšhitišo ya tshepedišo ya dithoto ya setšhaba, ditirelo, kapetlele goba modiro; gomme	
(b)	e swanetše go laolwa go ya ka Molao wa Palamente, woo o ka dirišwago fela morago ga ditigelo tša Khomišene ya Ditšhelete le Metšhelo di etšwe hloko.
[Letšatšikgwedi la go thoma la karolo ya 228: 1 Janaware 1998.]
229	Maatla le mešomo ya mmasepala metšhelong 
(1)	Go ya ka dikarolwana tša (2), (3)	le (4), mmasepala o ka bea-
metšhelo ya dithoto le ditefokoketšo godimo ga ditefo tša ditirelo tše di abjago ke goba legatong la mmasepala; le 
(b)	ge o dumeletšwe ke molao wa naga, metšhelo ye mengwe, metšhelwana le metšhelo ya dithoto ye e swanetšego mmušogae goba karolong ya mmušogaee woo mmušotikologo woo o lego ka fase ga wona, eupša ga go mmasepala wo o ka tšhedišago motšhelo wa ditseno, motšhelo wa theko, motšhelokakaretšo wa thekišo goba motšhelo wa ditšwantle.
(2)	Maatla a mmasepala a go bea metšhelo ya dithoto, metšhelokoketšo ya ditefo tša ditirelo tše di abjago ke goba legatong la mmasepala, goba metšhelo e mengwe le makgetho goba metšhelo ya dithoto-
(a)	ga a swanela go dirišwa ka tsela yeo e amago ditšwammeleng le ka mona, merero ya ekonomi ya setšhaba, ditiro tša ekonomi ka ntle ga mellwane ya mmasepala, goba tshepetšo ya setšhaba ya dithoto, ditirelo, kapetlele goba mošomo; le
(b)	a ka laolwa ka molao wa naga. 
(3)	Ge bommasepala ba babedi ba na le maatla a go swana a motšhelo le mešomo mabapi le tikologo e tee, karoganyo ye maswanedi ya maatla le mehola yeo e swanetše go dirwa go ya ka molao wa setšhaba. Karoganyo ye e ka dirwa fela morago ga go ela hloko bonnyane, dikelo tše di latelago:	
(a)	Tlhokego ya go latela metheo ya maleba ya metšhelo. 
(b)	Maatla le mešomo ye e phethagatšwago ke mmasepala wo mongwe le wo mongwe. 
(c)	Maatla a metšhelo a mmasepala o mongwe le o mongwe. 
(d)	Go kgona le go šoma gabotse ga go kgoboketša metšhelo, metšhelwana le metšhelo ya dithoto; le. 
(e)	Tekatekano.
(4)	Ga go seo se thibelago kabelano ya ditseno tše di kgobokeditšwego go ya ka karolo ye gare ga bommasepala bao ba nago le maatla le mešomo ya metšhelo ka tikologong e tee.
(5)	Molao wa naga wo o ukangwego mo karolong ye o ka dirišwa fela morago ga ge pušoselegae le Khomišene ya Ditšhelete le Metšhelo di rerišitšwe le ge ditigelo dife goba dife tša Khomišene di etšwe hloko.
[Letšatšikgwedi la go thoma la karolo ya 229: 1 Janaware 1998.]
230	Dikadimo tša Profense
(1)	Profense e ka dire dikadimo tša kapetlele goba tša ditshenyegelo tša nako yeo go ya ka molao wa naga, efela dikadimo tša tshenyegelo ya nako yeo di ka dirwa fela ge go hlokega mabakeng a go ikhola ngwageng wa ditšhelete; le go 
(2)	Molao wa naga wo o ukangwego karolwaneng ya (1)	o ka dirišwa fela morago ga ge ditigelo tše itšego Khomišene ya Ditšhelete le Metšhelo di etšwe hloko. 
[Karolo ya 230 e tšeetšwe legato ke karolwana ya 10 ya Molao wa 61 wa 2001.]
[Letšatšikgwedi la go thoma la karolo ya 230: 1 Janaware 1998.]
230A	Dikadimo tša Mmasepala
(1)	Khansele ya Mmasepala e ka, go ya ka molao wa naga-
(a)	adima ditšhelete tša kapetlele goba ditshenyegelo tša nako yeo tša mmasepala, efela dikadimo tša tshenyegelo ya nako yeo di ka dirwa fela ge go hlokega mabakeng a go ikhola ngwageng wa ditšhelete; le go 
(b)	itlama le go tlama Khansele ya ka moso tirišong ya maatla a yona a go bea melao le a khuduthamaga go dira dikadimo goba go dira dipeeletšo tša mmasepala.
(2)	Molao wa naga woo o ukangwego karolwaneng ya (1)	o ka dirišwa fela morago ga ge ditigelo tše itšego tša Khomišene ya Ditšhelete le Metšhelo di šetše di etšwe hloko.
[Karolo ya 230A e tsentšwe ke karolwana ya 17 ya Molao wa 34 wa 2001.]
KGAOLO YA 14 
DITLHAGIŠOKAKARETŠO (krl 231-243)
Molao wa Ditšhabatšhaba (krl 231-233)
231	Dikwano tša ditšhabatšhaba
(1)	Ditherišano le go saena ga dikwano ka moka tša ditšhabatšhaba ke maikarabelo a khuduthamaga ya setšhaba.
(2)	Kwano ya ditšhabatšhaba e tlama Repabliki fela morago ga ge e amogetšwe ka sephetho ka bobedi Kopano ya Maloko a Palamente ka Moka le ka go Khansele ya Setšhaba ya Diprofense, ka ntle le ge e le kwano yeo e ukangwego mo go karolwana ya (3). 
(3)	Kwano ya ditšhabatšhaba ya mohuta wa teknikhale, ya taolo goba ya phethiši, goba kwano yeo e sa nyakego kamogelo goba tumelelo, ye e tsenetšwego ke khuduthamaga ya setšhaba, e tlama Repabliki ka ntle le kamogelo ya Kopano ya Maloko a Palamente ka Moka le Khansele ya Setšhaba ya Diprofense, e fela o swanetše go begwa ka Kopanong ya Maloko a Palamente ka Moka le ka Khanseleng mo nakong ye e kwalago.
(4)	Kwano efe goba efe ya ditšhabatšhaba e fetoga molao Repabliking ge e dirilwe molao go ya ka molao wa naga; efela pegelo ye e iphethagatšago ya kwano yeo e šetšego e amogetšwe ke Palamente ke molao mo Repabliking ka ntle le ge pegelo yeo e le kgahlanong le Molaotheo goba Molao wa Palamente.
(5)	Repabliki e tlama ke dikwano tša ditšhabatšhaba tšeo di bego di e tlema nakong ya ge Molaotheo wo o thoma go šoma.
232	Molaosetlwaedi wa ditšhabatšhaba
	Molaosetlwaedi wa ditšhabatšhaba ke molao mo Repabliking ka ntle le ge o sa sepelelane le Molaotheo goba Molao wa Palamente.
233	Tirišo ya molao wa ditšhabatšhaba
	Ge e hlatholla molao ofe goba ofe, kgorotsheko ye nngwe le ye nngwe e swanetše go sekamela tlhathollong efe goba efe ye e kwalago ya go sepelelana le molao wa ditšhabatšhaba go feta tlhathollo yeo e sa sepelelanego le molao wa ditšhabatšhaba.
Ditaba tše dingwe (krl 234-243)
234	Melaokakanywa ya Ditikelo
	Gore go tle go tiišetšwe seemo sa temokrasi se se hlomilwego ke Molaotheo wo. Palamente e ka amogela Melaokakanywa ya Ditokelo yeo e sepelelanago le dipeakanyetšo tša Molaotheo.
235	Boipopo
	Tokelo ya batho ba Afrika Borwa ka bophara mo go ipopeng bjalo
ka ge e laeditšwe ka go Molaotheo, ga e gafele ka thoko, ka gare ga tlhako ya tokelo ye, kamogelo ya kgopolo ya boipopo ya setšhaba sefe goba sefe seo se aroganago setšo se tee le bohwa bja polelo, ka gare ga naga ya Repabliki goba ka tsela ye nngwe, yeo e laetšwago ke molao wa naga.
236	Thekgo ya ditšhelete go diphathi tša dipolitiki 
	Go godiša temokrasi ya diphathintši, molao wa naga o swanetše go beakanyetša thekgo ya ditšhelete ya diphati tša dipolitiki tšeo di kgathago tema makgotlapeamelaong a setšhaba le a diprofense ka tsela ya go lekana le ya tekatekano.
237	Phethagatšo ya ditshwanelo ka mafolofolo
	Ditshwanelo ka moka tša Molaotheo di swanetše go phethagatšwa ka mafolofolo le gona ka ntle le tiego.
238	Boemedi le boromedi
	Setho sa mmušo sa khuduthamaga lekaleng le lengwe le le lengwe la mmušo se ka-
gafela maatla goba mošomo ofe goba ofe wo o tlogo šomišwa goba go phethagatšwa go ya ka molao go setho sefe goba sefe sa khuduthamaga, ge fela kgafelo yeo e sepelelana le molao woo go ya ka woma maatla a dirišwago goba mohola o 	phethagatšwago; goba
(b)	go šomiša maatla afe goba afe goba go phethagatša mošomo ofe goba ofe wa setho sefe goba sefe sa khuduthamaga maemong a boemedi goba boromedi.
239	Ditlhalošo
	Ka Molaotheong, ka ntle le ge dikagare di laetša ka tsela e nngwe- 
	'molao wa setšhaba' o akaretša-
(a)	melawana ya ka fase ye e dirilwego go ya ka Molao wa Palamente; le
(b)	molao wo o bego o šoma ge Molaotheo o thoma go šoma mme o dirišwago ke mmušo wa naga;
	'setho sa mmušo ' se ra gore-
(a)	kgoro efe goba efe ya mmuso, goba taolo mo lekaleng la mmušo la setšhaba, profense goba tikologo; goba
(b)	mokgatlo ofe goba ofe goba sehlongwa- 
(i)	seo se phethagatšago maatla goba mošomo go ya ka Molaotheo goba molaotheo wa profense; goba
(ii)	seo se šomišago maatla a setšhaba goba se phetagatšago mošomo wa setšhaba go latela molao o mongwe le o mongwe, 
eupša o sa akaretse kgorotsheko goba mohlankedi wa tša semolao;
	'molao wa profense' o akaretša-
(a)	melawana ya ka fase ye e dirilwego go ya ka Molao wa profense; le
(b)	molao wo o bego o šoma ge Molaotheo o thoma go šoma mme o dirišwago ke mmušo wa naga;
240	Diphapano magareng ga dingwalwa tša go fapana 
	Ge go na le phapano magareng ga dingwalwa tša Molaotheo, gona sengwalwa sa Seisimane se tla šoma.
241	Dithulaganyo tša nakwana
	Šetulo 6 e šoma phetišetšong go maemo a mafsa a molaotheo ao a hlomilwego ke Molaotheo wo, le taba efe goba efe ye e amanago le phetišetšo yeo. 
242	Go phumulwa ga melao
	Melao yeo e ukangwego go Šetulo 7 e phumotšwe, go šeditšwe karolo ya 243 le Šetulo 6.
243	Thaetlelekopano le go thoma
(1)	) Molao wo o bitšwa Molaotheo wa Repabliki ya Afrika Borwa, wa 1996, gomme o thoma go šoma ka bonako ge letšatšikgwedi leo le beilweng ke Mopresitente ka kgoeletšo, fela e sego letšatšikgwedi la morago ga la 1 Julae 1997. 
(2)	Mopresitente a ka bea matšatšikgwedi a go fapana pele ga ge letšatšikgwedi leo le ukangwego karolwaneng ya (1)	go ya ka ditlhagišo tša go fapana tša Molaotheo.
(3)	Ka ntle ga ge dikagare di laetša ka tsela e nngwe, tšhupetšo tlhagišong ya Molaotheo mabapi le nako yeo Molaotheo o thomilego	go šoma e swanetše go hlalošwa bjalo ka tšhupetšo ya nako yeo tlhagišo yeo e thomilego go šoma ka yona.
(4)	Ge letšatšikgwedi la go fapana le beilwe mabapi le tlhagišo efe goba efe ya Molaotheo go ya ka karolwana ya (2), peakanyetšo ye nngwe le ye nngwe yeo e lebanego nayo ya Molaotheo wa Repabliki ya Afrika Borwa, 1993 (Molao wa 200 wa 1993), yeo e ukangwego mo kgoeletšong, e phumotšwe go thoma lona letšatšikgweding leo.
(5)	Dikarolo tša 213, 214, 215, 216, 218, 226, 227, 228, 229 le 230 di tsena tirišong ka la 1 Janaware 1998, eupša se ga se thibele go tsentšhwa ga molao wo o holofetšweng mo go tše dingwe le tše dingwe tša dipeakanyetšo tše pele ga letšatšikgwedi leo. Go fihla mo letšatšikgweding leo, ditlhagišo tše dingwe le tše dingwe tšeo di swanago le tše le tšeo di swanago ka sewelo le ditlhagišo tša Molaotheo wa Repabliki ya Afrika Borwa, wa 1993, di dula di le tirišong.
Šetulo 1
FOLAGA YA SETŠHABA
(1)	Folaga ya setšhaba e khutlonnethwii ka sebopego; botelele bja yona bo feta bophara gatee le seripagare.
(2)	Mebala ya yona ke boso, gauta, botalamorogo, bošweu, bohwibidu bja tšhilisi, le botalalerata.
(3)	E na le mokgako wa o motalamorogo wa sebopego sa Y woo bophara bja wona bo fetwago ke folaga ka teehlanong. Methaladi ya gare ya mokgako e thoma dikhutlong tša godimo le tša ka tlase kgauswi le kota ya folaga, ya hlakana gare ga folaga, gomme ya tšwelela ka go rapama go leba bogareng bja seripa seo se se nago selo.
(4)	Mokgako wo motalamorogo o rumilwe ka godimo le ka fase ka bošweu, gomme go ya mafelelong a kota ya folaga e kgakilwe ka gauta. Mokgako wo mongwe le wo mongwe o fetwa ke bophara bja folaga ka tee-lesomehlanong.
(5)	Khutlotharo ya kgauswi le kota ya folaga ke ye ntsho.
(6)	Mokgako wa go rapama wa ka godimo ke wa bohwibidu bja tšhilisi gomme wa ka tlase wa go rapama ke wa botalalerata. Mokgako wo mongwe wo mongwe ke teetharong ya bophara bja folaga.
Black 	= Ntsho
Gold	= Gauta
White	= Tšhweu
Green 	= Talamorogo
Red 	= Khubedu
Blue	= Talalerata
Šetulo 1A
MAFELO AO DIPROFENSE DI HWETŠAGALAGO GO WONA 
[Šetutulo 1A e tsentšwe ke karolo 4 ya Molao wa Bolesomepedi wa Go fetolwa ga Molaotheo wa 2005 gomme ya emelwa ke  karolo ya 1 ya  Molao wa Bolesometharo wa Go fetoša Molaotheo wa 2007 le Molao wa Bolesometshela wa Go fetoša Molaotheo wa 2009.] 
Profense ya Kapa Bohlabela 
[Kgaoganyo ya Profense ya Kapa Bodikela e emelwa ke Molao wa Bolesometharo wa Go fetolwa ga Molaotheo wa 2007.]
Mmepe wa. 3 wa Šetulo ya 1 go Tsebišo ya 1998 ya 2005
Mmepe wa 6 wa Šetulo ya 2 go Tsebišo ya 1998 ya 2005
Mmepe wa 7 wa Šetulo ya 2 go Tsebišo ya 1998 ya 2005
Mmepe wa 8 wa Šetulo ya 2 go Tsebišo ya 1998 ya 2005
Mmepe wa 9 wa Šetulo ya 2 go Tsebišo ya 1998 ya 2005
Mmepe wa 10 wa Šetulo ya 2 go Tsebišo ya 1998 ya 2005
Mmepe wa 11 wa Šetulo ya 2 go Tsebišo ya 1998 ya 2005
Profense ya Freistata
Mmepe wa 12 wa Šetulo ya 2 go Tsebišo ya 1998 ya 2005
Mmepe wa 13 wa Šetulo ya 2 go Tsebišo ya 1998 ya 2005
Mmepe wa 14 wa Šetulo ya 2 go Tsebišo ya 1998 ya 2005
Mmepe wa 15 wa Šetulo ya 2 go Tsebišo ya 1998 ya 2005
Mmepe wa 16 wa Šetulo ya 2 go Tsebišo ya 1998 ya 2005
Profense ya Gauteng
[Kgaoganyo ya Profense ya Gauteng e fetiolwa ke Molao wa Bolesometshela wa Go fetoša Molaotheo wa 2009.]
Mmepe wa 4 ka go Tsebišo 1490 ya 2008 ya Šetulo 1 go Tsebišo 1998 ya 2005
[Tšhupetšo go Mmepe wa 4 e emelwa ke karolo 1(a) Molao wa Bolesometshela wa Go fetoša Molaotheo wa 2009.]
Mmepe wa 17 wa Šetulo ya 2 go Tsebišo ya1998 ya 2005
Mmepe wa 18 wa Šetulo ya 2 go Tsebišo ya 1998 ya 2005
Mmepe wa 19 wa Šetulo ya 2 go Tsebišo ya 1998 ya 2005
Mmepe wa 20 wa Šetulo ya 2 go Tsebišo ya 1998 ya 2005
Mmepe wa 21 wa Šetulo ya 2 go Tsebišo ya 1998 ya 2005
Profense ya KwaZulu-Natal
[Kgaoganyo ya Profense ya Leboa-Bodikela e emelwa ke Molao wa Bolesometharo wa Go fetoša Molaotheo wa 2007]
Mmepe wa 22 wa Šetulo ya 2 go Tsebišo ya 1998 ya 2005
Mmepe wa 23 wa Šetulo ya 2 go Tsebišo ya 1998 ya 2005
Mmepe wa 24 wa Šetulo ya ya 2 go Tsebišo ya 1998 ya 2005
Mmepe wa 25 wa Šetulo ya 2 go Tsebišo ya 1998 ya 2005
Mmepe wa 26 wa Šetulo ya 2 go Tsebišo ya 1998 ya 2005
Mmepe wa 27 wa Šetulo ya 2 go Tsebišo ya 1998 ya 2005
Mmepe wa 28 wa Šetulo ya 2 go Tsebišo ya 1998 ya 2005
Mmepe wa 29 wa Šetulo ya 2 go Tsebišo ya 1998 ya 2005
Mmepe wa 30 wa Šetulo 2 go Tsebišo ya 1998 ya 2005
Mmepe wa 31 wa Šetulo ya 2 go Tsebišo ya 1998 ya 2005
Mmepe wa 32 wa Šetulo ya 2 go Tsebišo ya 1998 ya 2005
Profense ya Limpopo
Mmepe wa 33 wa Šetulo ya 2 go Tsebišo ya 1998 ya 2005
Mmepe wa 34 wa Šetulo 2 go Tsebišo ya 1998 ya 2005
Mmepe wa 35 wa Šetulo ya 2 go Tsebišo ya 1998 ya 2005
Mmepe wa 36 wa Šetulo ya 2 go Tsebišo ya 1998 ya 2005
Mmepe wa 37 wa Šetulo ya 2 go Tsebišo ya 1998 ya 2005
Profense ya Mpumalanga
Mmepe wa 38 wa Šetulo ya 2 go Tsebišo ya 1998 ya 2005
Mmepe wa 39 wa Šetulo ya 2 go Tsebišo ya 1998 ya 2005
Mmepe wa 40 wa Šetulo ya 2 go Tsebišo 1998 ya 2005
Profense ya Kapa Leboa 
Mmepe wa 41 wa Šetulo ya 2 go Tsebišo ya 1998 ya 2005
Mmepe wa 42 wa Šetulo ya 2 go Tsebišo ya 1998 ya 2005
Mmepe wa 43 wa Šetulo ya 2 go Tsebišo ya 1998 ya 2005
Mmepe wa 44 wa Šetulo ya 2 go Tsebišo ya 1998 ya 2005
Mmepe wa 45 wa Šetulo ya 2 go Tsebišo ya 1998 ya 2005
Profense ya Leboa Bodikela
[Kgaoganyo ya Profense ya Leboa-Bodikela e fetolwa ke Molao wa Bolesometshela wa Go fetoša Molaotheo wa 2009.]
Mmepe wa 5 ka go Tsebišo 1490 ya 2008 ya Šetulo 1 go Tsebišo 1998 ya 2005
Tshupetšo go Mmepe wa 5 2009.]
Mmepe wa 46 wa Šetulo ya 2 go Tsebišo ya 1998 ya 2005
Mmepe wa 47 wa Šetulo ya 2 go Tsebišo ya 1998 ya 2005
Mmepe wa 48 wa Šetulo ya 2 go Tsebišo ya 1998 ya 2005
Profense ya Kapa Leboa
Mmepe wa 49 wa Šetulo ya 2 go Tsebišo ya 1998 ya 2005
Mmepe wa 50 wa Šetulo ya 2 go Tsebišo ya 1998 ya 2005
Mmepe wa 51 wa Šetulo ya 2 go Tsebišo ya 1998 ya 2005
Mmepe wa 52 wa Šetulo ya 2 go Tsebišo ya 1998 ya 2005
Mmepe wa 53 wa Šetulo ya 2 go Tsebišo ya 1998 ya 2005
Mmepe wa 54 wa Šetulo ya 2 go Tsebišo ya 1998 ya 2005
Šetulo 2
DIKANO LE MAITLAMO A MMAKGONTHE
[Šetulo 2 e fetošitšwe ke karolwana ya 2 ya Molao wa 35 wa 1997 (Seisemane fela) gape e tšeetšwe legato ke karolwana ya 18 ya Molao wa 34 wa 2001.]
1	Kano goba boitlamo bja mmakgonthe bja Mopresitente le Mopresitente wa motšwaoswere 
	Mopresidente, goba Mopresitente wa Motšwaoswere, pele ga Moahlodimogolo, goba pele ga moahlodi o mongwe yoo a rometšwego ke Moahlodimogolo, o swanetše go ikana/go itlama ka tsela ye e latelago: 
	Pele ga mang le mang yo a kgobakanego mo, e bile ke kwešiša bohlokwa bja maikarabelo ao ke a tšeago a go ba Mopresitente/Mopresitente wa motšwaoswere wa Repabliki ya Afrika Borwa, Nna, A.B., ke ikana/itlama ka mmakgonthe gore ke tla botegela Repabliki ya Afrika Borwa, gomme ke tla obamela, ka sekegela, ka lota Molaotheo le melao e mengwe ka moka ya Repabliki; gomme ka mmakgonthe le ka boikokobetšo ke tshepiša gore ka dinako tšohle ke tla-
 	tšwetšapele tšohle tšeo di tlogo godiša Repabliki, mme ka lwantšha tšohle tšeo di ka e kwešago bohloko;
		šireletša le go tšwetšapele ditokelo tša Maafrika Borwa ka moka;
		phetha mešomo ya ka ka maatla a ka ka moka, le ka bokgoni bjaka ka moka, gomme ke tla dira tšeo ka go šomiša tsebo le bokgoni bja ka, ka dira tšeo letswalo la ka le dumelelanago natšo;
		dira toka go bohle; gomme	
		ka ikgafela go tliša boitekanelo go Repabliki le go batho ka moka ba yona 
(Lebakeng la kano: Ka bjalo Modimo Nthuše.)
2	Kano goba boitlamo bja mmakgonthe bja Motlatšamopresitente 
	Motlatšamopresitente, pele ga Moahlodimogolo, goba pele ga moahlodi o mongwe yoo a rometšwego ke Moahlodimogolo, o swanetše go ikana/go itlama ka tsela ye e latelago: 
	Pele ga mang le mang yo a kgobakanego mo, e bile ke kwešiša bohlokwa bja maikarabelo ao ke a tšeago a go ba Mopresitente/Mopresitente wa motšwaoswere wa Repabliki ya Afrika Borwa, Nna, A.B., ke ikana/itlama ka mmakgonthe gore ke tla botegela Repabliki ya Afrika-Borwa, gomme ke tla obamela, ka sekegela, ka lota Molaotheo le melao e mengwe ka moka ya Repabliki; gomme ka mmakgonthe le ka boikokobetšo ke tshepiša gore ka dinako tšohle ke tla-
 	tšwetšapele tšohle tšeo di tlogo godiša Repabliki, mme ka lwantšha tšohle tšeo di ka e kwešago bohloko;
		go ba moeletši wa mmakgonthe le wa go botega;
		phetha mešomo ya ka ka maatla a ka ka moka, le ka bokgoni bjaka ka moka, gomme ke tla dira tšeo ka go šomiša tsebo le bokgoni bja ka, ka dira tšeo letswalo la ka le dumelelanago natšo;
		dira toka go bohle; gomme	
		ka ikgafela go tliša boitekanelo go Repabliki le go batho ka moka ba yona 
(Lebakeng la kano: Ka bjalo Modimo Nthuše.)
3	Kano goba boitlamo bja mmakgonthe bja Ditona le Batlatšatona 
	Tona ye nngwe le ye nngwe le Motlatšatona, pele ga Moahlodimogolo, goba pele ga moahlodi yo a rometšwego ke Moahlodimogolo, o swanetše go ikana/go itlama ka tsela ye e latelago: 
	Nna, A.B., ke ikana/itlama ka mmakgothe gore ke tla botegela Repabliki ya Afrika Borwa, gomme ke tla obamela, ka sekegela, ka lota Molaotheo le melao e mengwe ka moka ya Repabliki; ke ikana gore ke tla phethagatša mešomo ya ka bjalo ka Tona/Motlatšatona ka tlhompho le seriti; ke tla ba moeletši wa nnete le potego; nka se utolle phatlalatša goba ka tharedi taba efe goba efe yeo ke e filwego; le go phetha mešomo ya maemo a ka ka mafolofolo le ka bokgoni bja ka ka moka.
(Lebakeng la kano: Ka bjalo Modimo Nthuše.),
4	Kano goba boitlamo bja mmakgonthe bja maloko a Kopano ya Maloko a Palamente ka Moka, Baemedi ba go ya go ile ba Khansele ya Setšhaba ya Diprofense le maloko a makgotlapeamelao a diprofense 
(1)	Maloko a Kopano ya Maloko a Palamente ka Moka, Baemedi ba go ya go ile ba Khansele ya Setšhaba ya Diprofense le maloko a makgotlapeamelao a diprofense, pele ga Moahlodimogolo, goba pele ga moahlodi yo a rometšwego ke Moahlodimogolo, ba swanetše go ikana/go itlama ka tsela ye e latelago:	
Nna, A.B., ke ikana/itlama ka mmakgothe gore ke tla botegela Repabliki ya Afrika Borwa, gomme ke tla obamela, ka sekegela, ka lota Molaotheo le melao e mengwe ka moka ya Repabliki; ke ikana ka mmakgonthe gore ke tla phethagatša mešomo ya ka bjalo ka leloko la Kopano ya Maloko a Palamente ka Moka/leloko la go ya go ile la Khansele ya Setšhaba ya Diprofense/ leloko la lekgotlapeamelao la profense ya Temokrasi ya Molaotheo ka bokgoni bja ka ka moka.
(Lebakeng la kano: Ka bjalo Modimo Nthuše.)
(2)	Batho bao ba tlatšago dikgoba tše di tšweletšego ka go Kopano ya Maloko a Palamente ka Moka, boemeding bja go ya go ile bja Khansele ya Setšhaba ya Diprofense goba lekgotlapeamelao la profense ba ikana/itlama go ya ka karolwana ya (1)	pele ga modulasetulo wa Kopano ya Maloko a Palamente ka Moka, Khansele goba lekgotlapeamelao.
5	Kano goba boitlamo bja mmakgonthe bja Ditonakgolo, Ditonakgolo tša Motšwaoswere le maloko a Khuduthamaga ya profense
	Tonakgolo goba Tonakgolo ya Motšwaoswere le maloko a Khuduthamaga ya profense, pele ga Moahlodimogolo, goba pele ga moahlodi yo a rometšwego ke Moahlodimogolo, o swanetše go ikana/go itlama ka tsela ye e latelago: 
	Nna, A.B., ke ikana/itlama ka mmakgothe gore ke tla botegela Repabliki ya Afrika Borwa, gomme ke tla obamela, ka sekegela, ka lota Molaotheo le melao e mengwe ka moka ya Repabliki; ke ikana gore ke tla phethagatša mešomo ya ka bjalo ka Tonakgolo/Tonakgolo ya Motšwaoswere/ leloko la khuduthamaga ya profense ka tlhompho le seriti; ke tla ba moeletši wa nnete le potego; nka se utolle phatlalatša goba ka tharedi taba efe goba efe yeo ke e filwego; le go phetha mešomo ya maemo a ka ka mafolofolo le ka bokgoni bja ka ka moka.
(Lebakeng la kano: Ka bjalo Modimo Nthuše.),
6	Kano goba boitlamo bja mmakgonthe bja Bahlankedi ba Toka
(1)	Moahlodi yo mongwe le yo mongwe goba moahlodi wa motšwaoswere, pele ga Moahlodimogolo, goba pele ga moahlodi yo a rometšwego ke Moahlodimogolo, o swanetše go ikana/go itlama ka tsela ye e latelago:
Nna, A.B., ke ikana/itlama ka mmakgothe gore, bjalo ka Moahlodi wa Kgorotsheko ya Molaotheo/Kgorokgolo ya Tsheko ya Boipiletšo/ Kgorokgolo ya Tsheko/ Kgorotsheko ya EF, ke tla botegela Repabliki ya Afrika-Borwa mme ke tla latela le go šireletša Molaotheo; le tokelo tša botho tse di bitietšwego ka go wona, gomme ke tla šomiša toka go batho bohle ka go swana, ke se na letšhogo, go kgetholla goba mona, go ya ka Molaotheo le Molao.
(Lebakeng la kano: Ka bjalo Modimo Nthuše.)
(2)	Motho yo a beilwego maemong a Moahlodimogolo efela e se moahlodi ka nako yeo a bewago maemong a gagwe o swanetše go ikana/itlama pele ga Motlatšamoahlodimogolo, goba ge moahlodi yoo a segona, moahlodi wa go latela wa maemo a godimodimo wa Kgorotsheko ya Molaotheo yo a lego gona.
(3)	Bahlankedi ba toka, le bahlankedi ba motšwaoswere ba toka, bao e sego baahlodi, ba swanetše go ikana/itlama go ya ka molao wa naga.
Šetulo 3
DITSHEPEDIŠO TŠA DIKGETHO
[Šetulo 3 e tšeetšwe legato ke karolwana ya 2 ya Molao wa Bone wa Go fetolwa ga Molaotheo wa 1999,
karolwana ya 19 ya Molao wa Botshela wa Go fetolwa ga Molaotheo wa 2001
le karolwana ya 3 ya Molao wa Go fetolwa ga Molaotheo  wa 2002.]
Karolo ya A - Ditshepedišo tša go kgetha Bahlankedi ba Molaotheo
1	Tirišo
	Tshepedišo ye e beilwego šetulong ye e šoma nakong ye nngwe le ye nngwe ge-
Kopano ya Maloko a Palamente ka Moka e kopana go tlo kgetha Mopresitente, goba Spikara goba Motlatšaspikara wa Kopano ya Maloko a Palamente ka Moka;
Khansele ya Setšhaba ya Diprofense e kopana go kgetha	Modulasetulo goba Motlatšamodulasetulo wa yona; goba ge
(c)	lekgotlapeamelao la profense le kopana go tlo kgetha Tonakgolo ya Profense goba Spikara goba Motlatšaspikara wa lekgotlatheramelao. 
2	Go kgetha
	Motho yoo a swerego marapo mo kopanong ye e angwago ke Šetulo ye o swanetše gogoeletša gore go kgethwe bonkgetheng kopanong yeo.
3	Dinyakwa tša molao 
(1)	Kgetho e swanetše go dirwa foromong yeo e hlamilwego go ya ka melawana yeo e ukangwego go temana ya 9.
(2)	Foromo ye go yona go dirilwego kgetho e swanetše go saenwa- 
(a)	ke maloko a mabedi a Kopano ya Maloko a Palamente ka Moka, ge go swanetše go kgethwa Mopresitente goba Spikara goba Motlatšaspikara wa Kopano ya Maloko a Palamente ka Moka;
(b)	 	legatong la baemedi ba diprofense tše pedi, ge Modulasetulo goba Motlatšamodulasetulo wa Khansele ya Setšhaba ya Diprofense a swanetše go kgethwa; goba
(c)	ke maloko a mabedi a lekgotlapeamelao leo, ge go swanetše go kgethwa Tonakgolo ya Profense goba Spikara goba Motlatšaspikara wa lekgotlapeamelao.
(3)	Motho yo a kgethilwego o swanetše go laetša kamogelo ya kgetho ka go saena foromo ya kgetho goba ka go ngwala ka tsela ye nngwe le ye nngwe ya kamogelo. 
4	Tsebišo ya maina a bonkgetheng
	Mo kopanong yeo e angwago ke Šetulo ye, Modulasetulo o swanetše go tsebiša maina a batho bao ba ilego ba kgethwa go ba bonkgetheng, efela ga a swanela go dumelela ngangišano ye itšego.
5	Nkgetheng o tee
	Ge go kgethilwe nkgetheng o tee fela, modulasetulo o swanetše go bega motho yoo gore ke yena a kgethilwego.
6	Tshepedišo ya go kgetha
	Ge go kgethilwe go feta nkgetheng o tee-	
(a)	bouto e swanetše go dirwa sephiring kopanong yeo;
(b)	leloko le lengwe le le lengwe leo le lego gona, goba ge e le kopano ya Khansele ya Setšhaba ya Diprofense, profense ye nngwe le ye nngwe yeo e emetšwego ka kopanong, e ka bouta gatee; gomme 
(c)	modulasetulo o swanetše go tsebiša nkgetheng yoo a hweditšego dibouto tše dintši go feta tša ba bangwe gore ke yena yo a kgethilwego.
7	Tsela ya go ntšha
(1)	Ge go se na nkgetheng yoo a hweditšego dibouto tša go feta tša ba bangwe, nkgetheng yoo a nago le dibouto tše dinnyane go fetwa ke tša ba bangwe o swanetše go tlošwa, gomme go boutwe gape go ya ka karolo 6. Tshepedišo ye e swanetše go bušeletšwa go fihla go na le nkgetheng yo a hwetšago dibouto tša go feta tša ba bangwe.
(2)	Ge go šomišwa seka-temana ya (1), gomme go na le bonkgetheng ba babedi goba go feta bao ba nago le dibouto tše dinnyane motho ka o tee ka o tee, go swanetše go swarwa bouto ye nngwe mabapi le bonkgetheng bao, e fele e bušeletšwa go fihlela go tšweletše gore ke nkgetheng ofe yo a swanetšego go ntšhiwa.
8	Dikopano tše dingwe gape 
(1)	Ge go kgethilwe fela bonkgetheng ba babedi, goba ge go šetše bonkgetheng ba babedi morago ga go ntšhiwa ga ba bangwe, gomme bonkgetheng bao ba babedi ba hwetša palo ya dibouto tša go lekana, gona kopano ye nngwe e swanetše go swarwa magareng a matšatši a šupa lefelong leo le beilwego ke modulasetulo.
(2)	Ge kopano e nngwe gape e ka swarwa go ya ka karolwana (1), tshepedišo yeo e laeditšwego mo šetulong ye e swanetše go latelwa kopanong yeo, go no swana fela le ge e le gore kopano yeo e ka be e le ya mathomo ya dikgetho tšeo.
9	Melawana
(1)	Moahlodimogolo o swanetše go dira melawana yeo
e laolago-
(a)	tshepedišo ya dikopano tšeo di angwago ke Šetulo ye;
(b)	 	maikarabelo a motho yo e lego modulasetulo kopanong, mmogo le a motho ofe goba ofe yo a mo thušago; 
(c)	 foromo yeo go maina a bonkgetheng a swanetšego go romelwa ka yona; le
(d)	ka mokgwa woo go bouta go swanetšego go sepedišwa ka gona.
(2)	Melawana ye e swanetše go tsebišwa ka tsela yeo Moahlodimogolo a laelago ka gona.
[Temana ya 9 e tšeetšwe legato ke karolwana ya 19 ya Molao wa 34 wa 2001.]
Karolo B - Fomula ya go laetša go kgatha tema ga diphathi ka boemeding bja profense ka go Khansele ya Setšhaba ya Diprofense
1.	Palo ya baemedi mo go boemedi bja profense Khanseleng ya Setšhaba ya Diprofense moo phathi e nago le tokelo, e swanetše go laetšwa ka go atiša palo ya ditulo yeo phathi e nago natšo ka go theramelao ya profense ka lesome mme dipoelo di arolwe ka palo ya ditulo ka go theramelao go oketšwa ka tee. 
2.	Ge palelo go ya ka temana 1 e tliša mašalela ao a sego a balelwa go baemedi bao ba filwego phathi go ya ka temana ye, gona mašalela ao a swanetše go phenkgišana le mašalela a go swana nawo a go tšwa go phathi efe goba efe goba diphathi, mme baemedi bao ba sego ba abelwa ditulo mo boemedinbg, ba swanetše go fiwa phathi goba diphathi ka go latela palokgolo ya mašalela a tšona.
3.	Ge mašaledi a go phadišana ao a ukangwago go temana ya 2 a lekana, gona baemedi bao ba sego ba hlwa ba abja ka boemeding ba swanetše go abelwa phathi goba diphathi, go akaretšwa phathi ye nngwe le ye nngwe yeo e kopantšwego ka ge go beilwe karolong ya 61 (2)(b)	, ka mašalela a tatelano ya diboutu tšeo di ngwadilwego, go thoma ka phathi goba phathi ye e kopantšwego yeo e hweditšego palo ya diboutu tša godimodimo, go akaretšwa diboutu tšeo di kopantšwego lebakeng la ge phathi e kopantšwe, nakong ya dikgetho tša mafelelo tša lekgotlapeamelao la profense, efela ge ye nngwe ya diphathi tša mašalela a go lekana e-
(a)	e ba gona ka lebaka la diphetogo tša boleloko bja phathi	goba karoganyo ya diphathi ka gare ga lekgotlapeamelao leo ka ge go beilwego karolong ya 61 (2)(b)	; gomme
(b)	e se ya kgatha tema dokgethong tšeo di fetilego tša lekgotlapeamelao la profesne leo le amegago,
		lekgotlapeamelao le swanetše go aba baemedi bao ba sego ba abja	ka boemeding bja phathi goba bja diphathi tša go ba le mašalela a go swana ka tsela yeo e sepelelanago le temokrasi.
[Temana ya 3 e okeditšwe ka karolo ya 2 ya Molao wa Bone wa Go fetoša Molaotheo wa 1999 ebile o tšeetšwe legato ke karolo ya 3 ya Molao wa Bosenyane wa Go fetoša Molaotheo wa 2002 le karolo 5 (a) ya Molao wa Bolesomenne wa Go fetoša Molaotheo wa 2008 .]
	4. Ge e le gore diphathi tša go feta e tee tšeo di nago le kabo ye e swanago di ngwadišitše ka nako tša dikgetho tša peleng tša lekgotlatheramolao le le amegago, lekgotlatheramolao le le amegago le swanetše go aba dikemedi tšeo di sego tša išwa go baemedi ba phathi ka mokgwa wa kabo ye e swanago woo o sepelelanago le temokrasi.
Šetulo 4 
MAKALATIRIŠWA AO A AMAGO SAMMALETEE BOLAODI BJA MEBUŠO YA DIPROFENSE LE WA SETŠHABA 
KAROLO A
		Taolo ya dithokgwa tša tlhago
		Bolemi
		Maemafofane, ka ntle le maemafofane a ditšhabatšhaba le a Setšhaba
	Taolo ya diphofolo le malwetši
Dikhasino, mekato, go tobola le go petša, ntle le matengwa le matangwana a dipapadi
	Tšhireletšo ya bareki
	Ditaba tša setšo
		Taolo ya masetlapelo
	Thuto maemong ka moka,ka ntle le thuto ya thešiari
	Tikologo
	Ditirelo tša maphelo
	Kago ya Dintlo
	Molao wa setšo, le molaosetlwaedi, fela go hlokometšwe Kgaolo 12	ya Molaotheo 
	Tšwetšopele ya diintaseteri
Molaotsepedišo wa maleme le taolo ya maleme a semmušo go fihla mo e lego gore ditlhagišo tša Karolo 6 ya Molaotheo di abela thwii makgotlapeamelao a diprofense bokgoni bja peomelao 
Ditirelo tša kgašo ya ditaba tše di laolwago thwii ke mmušo wa profense, ka go laolwa ke karolwana ya 92
Pabalelo ya tlhago, go sa akaretšwe diphaka tša setšhaba, ditšhengwana	tša dimelatlhago tša setšhaba le methopo ya ka lewatleng
Maphodisa, go fihla ka mo dipeakanyetšo tša Kgaolo ya 11 ya Molaotheo di fago maatla a go bea molao go theramelao ya profense.
Taolo ya tšhilafatšo
Tlhabollo ya setšhaba
Tefo ya tšhutišo ya dithoto
Dikgwebo tša setšhaba tša profense mabapi le makalatirwa a a lego mo go Šetulo ye le go Šetulo 5
Dinamelwa tša setšhaba
Mediro ya setšhaba malebana le dinyakego tša dikgoro tša mmušo wa profense mo phethagatšong ya maikarabelo a tšona a go phetha mediro yeo di e filwego go ya ka mabaka a Molaotheo goba molao ofe goba ofe
Peakanyo le tlhabollo ya selete
Taolo ya trafiki ya tsela
Pabalelo ya mobu
Boeti
Kgwebo
Boetapele bja setšo, ka taolo ya Kgaolo ya 12 ya Molaotheo
Tlhabollo ya ditoropong le magaeng
Motšhelo wa dinamelwa
Ditirelo tša bobotlana
KAROLO B
 Ditaba tše di latelago tša pušoselegae go fihla ka moo go laeditšwego ka go karolo ya 155 (6)(a)	le ya (7):
Tšhilafatšo ya moya
Melawana ya kago
Ditlabelo tša tlhokomelo ya ngwana
Kabo ya mohlagase le gase
Ditirelo tša boraditimamello
Boeti bja tikologo
Maemafofane a bommasepala
Peakanyo ya bommasepala
Ditirelo tša maphelo tša mmasepala
Dinamelwa tša setšhaba tša mmasepela
	Mediro ya setšhaba ya mmasepala go ya ka dinyakwa tša bommasepala mo	phethagatšong ya maikarabelo a bona a go phetha mediro yeo e e filwego ka fase ga Molaotheo wo goba molao wo mongwe le wo mongwe
Diketswana, diketswana tša go fetišetša dithoto, ditšhireletšaboemakepe, mafelo a go namela le maemakepe go sa a karetšwe taolo ya go sepetša ka dikepe ga ditšhabatšhaba le ga setšhaba le ditaba tšeo di amanago natšo.
Lenaneo la taolo ya meetse a merwalela mo mafelong a go agilwego go wona
Melawana ya kgwebo
	Meetse le ditirelo tša tlhwekišo tšeo di di lebeletšego fela tshepedišo ya kabo	ya meetse a go rwalwa le ditshepedišo tša gae tša go lahla meetse a ditšhila le a disoretše
Šetulo 5
MAKALATIRIŠWA AO A AMAGO FELA BOLAODI BJA LEKGOTLAPEAMELAO LA PROFENSE 
KAROLO A
Maselagapale/Bohlabelo
Ditirelo tša diampulense
Diakhaebe, ka ntle le diakhaebe tša setšhaba
Makgobapuku, ka ntle le makgobapuku a setšhaba
Dilaesense tša bjala
Dimuseamo, ka ntle le dimuseamo tša setšhaba
Peakanyo ya profense
Merero ya setšo ya diprofense
Boitapološo le boithabišo profenseng
Dipapadi tša diprofense
Ditsela le trafiki ya diprofense
Ditirelo tša malwetši a diphoofolo ka ntle le taolo ya profešene
KAROLO B
Ditaba tše di latelago tša pušoselegae go fihla ka moo go laeditšwego ka go karolo ya 155 (6)(a)	le ya (7):	
Mabopo a lewatle le ditlabakelo tša go ithabiša
Diboroto tša papatšo le go bewa pepeneneng ga dipapatšo mo mafelong a batho ka moka
Mabitla, malotabahu le a phišo ya ditopo
Tlhwekišo
Taolo ya disenyi setšhabeng
Taolo ya mafelo ao a rekišetšago batho mabjala
Ditlabakelo tša go dula, tlhokomelo le poloko ya diphoofolo
Go ageletša le magora
Dilaesense tša dimpša
Dilaesense le taolo ya mafelo ao a rekišetšago batho dijo
Ditlabakelo tša boithabišo tša selegae
Ditlabakelo tša dipapadi tša selegae
Mebaraka
Maselegapala a bommasepala
Diphaka tša mmasepala le boitapološo
Ditsela tša bommasepala
Tšhilafatšo ya lešata
Phaonteng 
Mafelo a batho ka moka
Tlošo ya matlakala, mekgobo ya matlakala le dilahlwa tše thata
Kgwebo ya mekgotheng
Mabone a mebileng
Trafiki le go phaka.
Šetulo 6
DITHULAGANYO TŠA PHETELO
[Šetulo 6 e tšeetšwe legato ke karolwana 3 ya Molao wa Mathomo wa Go fetolwa ga Molaotheo wa 1997,
karolwana ya 5 ya Molao wa Bobedi wa Go fetolwa ga Molaotheo wa 1998,
le karolo ya 20 ya Molao wa Botshela wa Go fetolwa ga Molaotheo wa 2001.]
1	Ditlhalošo
	Mo šetulong ye, ka ntle le ge seo se sa sepelelane le dikagare-
	'nagalegae' e ra karolo ya Repabliki yeo pele ga ge Molaotheo wa go feta o thoma go šoma, yeo e lekodišišitšwego ka go molao wa Afrika Borwa bjalo ka lefelo leo le ipušago goba naga ye e ikemetšego ka boyona;
	'Molaotheo wo mofsa' o ra Molaotheo wa Repabliki ya Afrika Borwa, wa 1996;
	'melao ya nako ya kgale' e ra melao yeo e dirilwego pele ga go šoma ga Molaotheo wa peleng;
	'Molaotheo wa peleng' o ra Molaotheo wa Repabliki ya Afrika Borwa, wa 1993(Molao wa 200 wa 1993).
2	Tšwetšopele ya melao yeo e lego gona 
(1)	Melao ka moka yeo e bego e šoma pele ga go thoma go šoma ga Molaotheo wo mofsa, e tšwelapele ka go šoma, fela go swanetše go elwa hloko-
(a)	go fetolwa goba go phumolwa go go itšego; le 
(b)	go sepelelana le Molaotheo wo mofsa.
(2)	Melao ya nako ya kgale yeo e tšwelago pele go šoma go ya ka karolwana
ya (1)-
(a)	ga e na le tirišo ye e nabilego, nageng goba ka tsela ye nngwe, go feta ka moo e bego e le ka gona pele ga ge Molaotheo wa peleng o thoma go šoma, ge e se fela ge o ile wa fetolwa ka morago ga gore o tle o šome ka bophara; le 
(b)	go tšwelapele ka go dirišwa ke bolaodi bjo bo bego bo o šomiša ge Molaotheo wo mofsa o thoma go šoma, ka taolo ya Molaothoeo o mofsa.
3	Tlhathollo ya melao yeo e lego gona 
(1)	Ka ntle le ge o sa sepelelane le dikagare goba o tloga o sa swanela, kukamo ka go molao ofe goba ofe woo o bego o le gona ge Molaotheo wo mofsa o thoma go šoma-
(a)	go Repabliki ya Afrika-Borwa goba nagalegae (ka ntle le ge go bolelewa ka ga naga), e swanetše go hlathollwa bjalo ka kukamo ya Repabliki ya Afrika-Borwa ka fase ga Molaotheo wo mofsa;
(b)	go Palamenteng, Kopanong ya Maloko a Palamente ka Moka goba go Senate, e swanetše go hlathollwa bjalo ka kukamo ya Palamente, Kopano ya Maloko a Palamente ka Moka goba Khansele ya Setšhaba ya Diprofense ka tlase ga Molaotheo wo mofsa;
(c)	go Mopresitente, Motlatšamopresitente wa phethišo, Tona, Motlatšatona goba Kabinete e swanetše go hlathollwa bjalo ka Mopresidente, Motlatšamopresidente wa Phethišo, Tona, Motlatšatona goba Kabinete ka tlase ga Molaotheo wo mofsa, ka taolo ya temana 9 ya Šetulo ye;
(d)	go Mopresitente wa Senate, e swanetše go hlathollwa bjalo ka kukamo ya Modulasetulo wa Khansele ya Setšhaba ya Diprofense;
(e)	go lekgotlapeamelao la profense, e swanetše go hlathollwa bjalo ka kukamo ya lekgotlapeamelao la profense, tonakgolo, Khuduthamaga goba leloko la Khuduthamaga ka tlase ga Molaotheo wo mofsa, ka taolo ya temana ya 12 ya Šetulo ye; goba
(f)	go leleme goba maleme a semmušo, e swanetše go hlathollwa bjalo ka leleme lefe goba lefe la semmušo go ya ka Molaotheo wo mofsa. 
(2)	Ka ntle le ge seo se sa sepelelane le dikagare goba se sa swanelago, kukamo mo melaong ye e šetšego ya nako ya kgale- 
(a)	go Palamente, Ngwako wa Palamente goba Kopano ya lekgotlapeamelao goba ya setho sa Repabliki goba nagalegae, e swanetše go hlathollwa bjalo ka kukamo go-	
(i)	Palamente ka fase ga Molaotheo wo mofsa, ge e le gore tshepedišo ya molao wo e abetšwe goba e filwe go ya ka dipeelano tša Molaotheo wa peleng goba go ya ka Šetulo ye go khuduthamaga ya setšhaba; goba 
(ii)	lekgotlapeamelao la profense, ge e le gore tshepedišo ya molao woo e abetšwe goba e filwe go ya ka dipeelano tša Molaotheo wa peleng goba Šetulo ye go khuduthamaga ya profense; goba 
(b)	go Mopresitente wa Naga, Tonakgolo, Molaodi goba mohlankedimogolophetiši o mongwe o mogolo, Kabinete, Khansele ya ditona goba khuduthamaga ya Repabliki goba nagalegae, e swanetše go hlathollwa bjalo kukamo go-	
(i)	Mopresidente ka tlase ga Molaotheo wo mofsa ge e le gore tshepedišo ya molao woo e filwe goba e fološeditšwe go mmušo wa naga go ya ka Molaotheo wa peleng goba Šetulo ye go khuduthamaga ya setšhaba; goba	
(ii)	Tonakgolo ya profense ka tlase ga Molaotheo wo mofsa, ge taolo ya molao woo e gafetšwe goba e filwe go ya ka mabaka a Molaotheo wa peleng goba Šetulo ye go khuduthamaga ya profense 
4	Kopano ya Maloko a Palamente ka Moka
(1)	Motho mang le mang yoo e bego e le setho goba mohlankedi wa Kopano ya Maloko a Palamente ka Moka ge Molaotheo wo mofsa o thoma go šoma, e ba leloko goba mohlankedi wa Kopano ya Maloko a Palamente ka Moka ka tlase ga Molaotheo wo mofsa, mme o tšea maemo a gagwe bjalo ka leloko goba mohlankedi go ya ka mabaka a Molaotheo wo mofsa.
(2)	Kopano ya Maloko a Palamente ka Moka bjalo ka ge e hlamilwe go ya ka karolwana ya (1)	e swanetše go tšewa bjalo ka ge e kgethilwe ka tlase ga Molaotheo wo mofsa pakatiro ye e felelago ka la 30 Aprele, 1999.
(3)	Kopano ya Maloko a Palamente ka Moka e bopilwe ka maloko a 400 lebaka ka moka la pakatiro ya yona le le felelago ka la 30 Aprele, 1999 ka taolo ya karolo ya 49(4)	ya Molaotheo wo mofsa. 
(4)	Melawana le ditaelo tša Kopano ya Maloko a Palamente ka Moka tše di bego di šoma ge Molaotheo wo mofsa o thoma go šoma, di tšwelapele ka go šoma, ka taolo ya phetogo efe goba efe goba phumolo.
	5	Modiro wo o sa phethwago wa Palamente
(1)	Modiro ofe goba ofe wo o sego wa phethwa ka go Kopano ya Maloko a Palamente ka Moka pele ga ge Molaotheo wo mofsa o thoma go šoma, o swanetše go tšwetšwa pele go ya ka dipeelano tša Molaotheo wo mofsa.
(2)	Modiro ofe goba ofe wa Senate wo o sego wa fela ge Molaotheo wo mofsa o thoma go šoma, o swanetše go gafelwa go Khansele ya Setšhaba ya Diprofense, mme Khansele e swanetše go tšwelapele ka modiro wo go ya ka Molaotheo wo mofsa.
6	Dikgetho tša Kopano ya Maloko a Palamente ka Moka 
(1)	Ga go dikgetho tša Kopano ya Maloko a Palamente ka Moka tšeo di ka swarwago pele ga 30 Aprele 1999, ka ntle le fela ge Kopano ya Maloko a Palamente ka Moka e phatlaladitšwe go ya ka karolo 50(2)	morago ga tšhišinyo ya go hloka kholofelo go Mopresidente go ya ka karolo ya 102(2)	ya Molaotheo wo mofsa.
 (2)	Karolo ya 50(1)	ya Molaotheo wo mofsa e fegilwe go fihla ka 30	Aprele 1999.
 (3)	Le ge Molaotheo wa pele o phumotšwe, Šetulo 2 ya Molaotheo woo bjalo	ka ge e fetošitšwe ke Koketšo A ya Šetulo ye, e šoma –
(a)	godimo ga Kopano ya Maloko a Palamente ka Moka ya mathomo ya Melaotheo wo mofsa;
(b)	godimo ga go lahlegelwa ke boleloko bja Kopano ya Maloko a Palamente ka Moka mabakeng ao e sego ao a beilwe go karolong 47(3)	ya Molaotheo wo mofsa; le 
(c)	godimo ga go tlatšwa ga dikgala ka go Kopano ya Maloko a Palamente ka Moka, le go tlaleletšo, tekolo le tirišo ya mananeo a diphathi mo go tlatšweng ga dikgala, go fihla go kgetho ya bobedi ya Kopano ya Maloko a Palamente ka Moka ka tlase ga Molaotheo wo mofsa.
(4)	Karolo ya 47(4)	ya Molaotheo wo mofsa e fegilwe go fihla go eba le kgetho ya bobedi ya Kopano ya Maloko a Palamente ka Moka ka tlase ga Molaotheo wo mofsa.
7	Khansele ya Setšhaba ya Diprofense 
(1)	Mo lebakeng leo le felago pejana ga tulo ya mathomo ya lekgotlapeamelao la profense ye e swerwego morago ga kgetho ya yona ya mathomo ka tlase ga Molaotheo wo-
(a)	tekanyetšo ya boemedi bja diphathi mo boemeding bja profense go Khansele ya Setšhaba ya Diprofense, e swanetše go swana le tekanyetšo yeo basenatoro ba 10 ba profense ba kgethilwego go ya ka karolo ya 48 ya Molaotheo wa peleng; le	
(b)	kabelo ya baemedi ba go ya go ile le baemedi bao e sego ba mehleng go diphathi tšeo di emetšwego go lekgotlapeamelao la profense, e ka tsela ye e latelago:
PROFENSE
BAEMEDI BA GO YA GO ILE
BAEMEDI BAO E SEGO BA MEHLENG 
1. Kapa-Bohlabela 
ANC5
NP 1
ANC 4
2. Freistata
ANC 4
FF1
NP 1
ANC 4
3. Gauteng
ANC3
DP 1
FF 1
NP 1
ANC 3
NP 1
4. KwaZulu-Natala
ANC 1
DP 1
IFP 3
NP 1
ANC 2
IFP 2
5. Mpumalanga
ANC 4
FF 1
NP 1
ANC 4
6. Kapa-Leboa 
ANC 3
FF 1
NP 2
ANC 2
NP 2
7. Limpopo
ANC 6
ANC 4
8. Leboa-Bodikela
ANC 4
FF 1
NP 1
ANC 4
9. Kapa-Bodikela
ANC 2
DP 1
NP 3
ANC 1
NP 3
(2)	Phathi ye e emetšwego mo go lekgotlapeamelao la profense- 
(a)	e swanetše go kgetha baemedi ba yona ba go ya go ile go tšwa go batho bao e bego e le basenatoro ge Molaotheo wo mofsa o thoma go šoma mme ba ikgafela go šoma bjalo ka baemedi ba go ya go ile; gomme 
(b)	ba ka no kgetha batho ba bangwe bjalo ka baemedi ba go ya go ile ge fela go se na le o tee goba palo e sa lekane ya bao e bego e le basenatoro ba yona.
(3)	Lekgotlapeamelao la profense le swanetše go bea baemedi ba lona ba go ya go ile go ya ka dikgetho tša diphathi. 
(4)	Dikarolwana tša (2)	le (3)	di šoma fela go peo ya mathomo ya baemedi ba go ya go ile go Khansele ya Setšhaba ya Diprofense. 
(5)	Karolo ya 62 (1)	ya Molaotheo wo mofsa ga e šome go kgetho le peo ya basenatoro ba peleng bjalo ka baemedi ba go ya go ile go ya ka temaneng ye.
(6)	Melawana le ditaelo tša Senate tšeo di bego di šoma ge Molaotheo wo mofsa o thoma go šoma, di swanetše go dirišwa mabapi le mediro ya Khansele ya Setšhaba ya Diprofense go fihla moo di ka šomišwago, ka taolo ya phethošo goba phumolo efe goba efe.
8	Basenatoro ba peleng
(1)	Mosenatoro wa pele yo a sa kgethwago go ba leloko la go ya go ile la Khanseleya Setšhaba ya Diprofense o na le tshwanelo ya go ba leloko la go felela, la go ba le bouto ka theramelaong ya profense yeo motho yoo a kgethilwego go yona bjalo ka mosenatoro go ya ka karolo ya	48 ya Molaotheo wa peleng.
(2)	Ge mosenatoro wa pele a ikgethela go se be leloko la lekgotlapeamelao ya profense gona o tšewa bjalo ka motho yo a lebogilego modiro letšatši pele ga ge Molaotheo wo mofsa o thoma go šoma.
(3)	Moputso, diputseletšo le dikholo tša mosenatoro wa pele yo a beilwego go ba moemedi wa go ya go ile goba leloko la lekgotlapeamelao ya profense ga a swanela go fokotšwa ka lebaka fela la peo yeo.
9	Khuduthamaga ya setšhaba
(1)	Mang le mang yoo e bego e le Mopresitente, Motlatšamopresitente wa Phethišo, Tona goba Motlatšatona ka tlase ga Molaotheo wa peleng ge Molaotheo wo mofsa o thoma go šoma, o tšwelapele ka mošomo wo go ya ka Molaotheo wo mofsa, fela go šetšwa seka-temana ya (2).
(2)	Go fihlela ka la 30 Aprele 1999, dikarolwana tša 84, 89, 90, 91, 93 le 96 tša Molaotheo wo mofsa di swanetše go tšewa bjalo ka ge go beakantšwe go Koketšo B ya Šetulo ye. 
(3)	Karolwana ya (2)	ga e ganetše Tona yoo e bego e le mosenatoro ge Molaotheo wo mofsa o thoma go šoma, go tšwelapele bjalo ka Tona ye e ukangwego mo karolong ya 91(1)(a)	ya Molaotheo wo mofsa bjalo ka ge karolo yeo e balega go Koketšo B.
10	Makgotlapeamelao a diprofense
(1)	Mang le mang yo e bego e le mohlankedi wa lekgotlapeamelao ya profense ge Molaotheo wo mofsa o thoma go šoma, e ba leloko goba mohlankedi wa theramelao ya profense yeo ka tlase ga Molaotheo wo mofsa, mme o dula modirong wa gagwe bjalo ka leloko goba mohlankedi go ya ka mabaka a Molaotheo wo mofsa le molaotheo ofe goba ofe wa profense wo o ka dirwago.
(2)	Lekgotlapeamelao la profense bjalo ka ge e hlamilwe go ya ka dipeelano tša karolwana ya (1), e swanetše go tšewa bjalo ka ge e kgethilwe ka tlase ga Molaotheo wo mofsa pakatirong yeo e felago ka la 30 Aprele 1999.
(3)	Lebakeng ka moka la pakatiro ya yona yeo e felago ka la 30 Aprele 1999, ka taolo ya karolo ya 108(4), lekgotlapeamelao la profense le bopša ke palo yeo e bewago ke theramelao ka tlase ga Molaotheo wa pele le palo ya basenatoro ba pele bao e bilego maloko a lekgotlapeamelao go ya ka dipeelano tša karolwana 8 ya Šetulo ye.
(4)	Melawana le ditaelo tša lekgotlapeamelao ya profense tšeo di bego di šoma ge Molaotheo wo mofsa o thoma go šoma, di tšwelapele ka go šoma, ka taolo ya phetošo goba phumolo efe goba efe.
11	Dikgetho tša makgotlapeamelao a diprofense
(1)	Le ge go phumotšwe Molaotheo wa pele, Šetulo 2 ya Molaotheo woo, bjalo ka ge e fetošitšwe ke Koketšo A ya Šetulo ye, e a šoma –
(a)	go kgetho ya mathomo ya lekgotlapeamelao ka tlase ga Molaotheo wo mofsa;
(b)	go tahlegelo ya boleloko bja lekgotlapeamelao mabakeng a itšego ka ntle le ao a beakanyeditšwego mo go karolo 106(3)	ya Molaotheo wo mofsa; le
(c)	mo go tlatšweng ga dikgala ka go lekgotlapeamelao, le tlaleletšo, tekolo le tirišo ya mananeo a diphathi a go tlatša dikgala, go fihla mo go bago le kgetho ya bobedi ya lekgotlapeamelao ka tlase ga Molaotheo wo mofsa.
(2)	Karolo 106 (4)	ya Molaotheo wo mofsa e fegilwe malebana le lekgotlapeamelao la profense go fihla kgethong ya bobedi ya lekgotlapeamelao ka tlase ga Molaotheo wo mofsa.
12	Dikhuduthamaga tša diprofense
(1)	Mang le mang yo e bego e le Tonakgolo goba leloko la Khuduthamaga ya profense ge Molaotheo wo mofsa o thoma go šoma, o tšwela pele le go ba maemong a gagwe go ya ka dipeelano tša Molaotheo wo mofsa le molaotheo wo mongwe le wo mongwe wa profense wo o ka dirwago, fela ka taolo ya karolwana ya (2).
(2)	Go fihla ge Tonakgolo a thoma modiro morago ga kgetho ya mathomo ya lekgotlapeamelao la profense ka tlase ga Molaotheo wo mofsa, goba profense e dira molaotheo wa yona, seo se tlago pele ga tšona, karolo ya 132 le 136 tša Molaotheo wo mofsa di swanetše go tšewa bjalo ka ge di beakantšwe mo go Koketšo C ya Šetulo ye.
13	Melaotheo ya diprofense
	Molaotheo wa profense woo o amogetšwego pele ga ge Molaotheo wo mofsa o thoma go šoma o swanetše go kwana le karolo ya 143 ya Molaotheo wo mofsa.
14	Kabo ya melao ya diprofense
(1)	Molao mabapi le taba yeo e welago ka go lekalatirišwa leo le lego lenaneong la Šetulo 4 goba 5 go Molaotheo wo mofsa, woo, ge Molaotheo wo mofsa o thoma go šoma, o bego o dirišwa ke bolaodi bjoo bo lego, ka gare ga khuduthamaga ya setšhaba, o ka gafelwa ke Mopresitente, ka kgoeletšo, go bolaodi bjo bo welago ka fase ga khuduthamaga ya profense ka taelo ya Khuduthamaga ya khansele ya profense.
(2)	Go fihla moo e lego gore go bohlokwa mo kabong ya molao ka fase ga karolwana ya (1)	gore o šomišwe ka tshwanelo, Mopresitente, ka kgoeletšo, a ka-
(a)	a ka fetola goba a amantšha molao woo go laola tlhathollo goba tirišo goba taolo ya wona;
(b)	ge kabo e sa šome molaong ka moka goba karolong ya wona, phumolo le tirišolefsa, ka goba ka ntle le phetošo goba kamantšho ye e ukangwego go temana ya (a), dipeakanyetšo tšeo kabo e šomago go tšona, goba bokgole bjoo kabo e šomago go fihla go tšona; goba
(c)	 a ka laola taba efe goba efe yeo e nyakegago ka baka la kabo	yeo, go akaretšwa tšhutišo goba kadimo ya badiredi, goba tšhutišo ya dithoto, dikoloto, ditokelo le ditlamego, go ya go goba go tšwa go khuduthamaga ya setšhaba goba ya profense goba kgoro ye nngwe le ye nngwe ya mmušo, taolo, tirelotšhireletšo goba sehlongwa se sengwe.
(3)(a)	Khopi ya kgoeletšo ye nngwe le ye nngwe ye e tšwelego go ya ka	dipeelano tša karolwana ya (1)	goba (2)	e swanetše go neelwa Kopano ya Maloko a Palamente ka Moka le Khansele ya Setšhaba ya Diprofense mo matšatšing a 10 morago ga go phatlalatšwa ga kgoeletšo.
(b)	Ge Kopano ya Maloko a Palamente ka Moka le Khansele ya Setšhaba, ka bobedi go ya ka sephetho, di ka gana kgoeletšo goba peakanyetšo ya yona, kgoeletšo goba peakanyetšo yeo e a fela, eupša ka ntle ga go ama –
(i)	 kgonthe ya se sengwe le se sengwe seo se dirilwego go ya ka kgoeletšo goba peakanyetšo pele e fela; goba
(ii)	tokelo goba tshwanelo ye e hweditšwego goba tshwanelo goba tlamego ye e ikhweleditšego yona pele ga go fela.
(4)	Ge molao o abilwe go ya ka karolwana ya (1), kukamo efe goba efe ka molaong go bolaodi bjoo bo o šomišago, e swanetše go hlalošwa bjalo ka kukamo ya bolaodi bjoo bo abetšwego molao woo.
 (5)	Kabo efe le efe ya molao ka fase ga karolo ya 235 (8)	ya Molaotheo wa peleng, go akaretšwa phetošo efe goba efe, kamantšho goba phumolo le tirišolefsa ya molao ofe goba ofe le kgato efe goba efe yeo e tšewago ka tlase ga karolo ye, go tšewa gore e dirilwe ka fase ga temana ye.
15	Melao yeo e lego gona ka ntle ga maatla a go dira melao ya Palamente 
(1)	Bolaodi bjo bo lego ka gare ga khuduthamaga ya setšhaba bjoo bo laolago molao ofe goba ofe wo o welago ka ntle ga maatla a go dira melao a Palamente, ge Molaotheo wo mofsa o thoma go šoma, ba fela ba na le maatla a go laola melao yeo go fihla ge e abetšwe bolaodi bjo lego ka fase ga khuduthamaga ya profense go ya ka karolo ya 14 ya Šetulo ye.
(2)	Karolwana ya (1)	e fela mengwaga ye mebedi morago ga go thoma go šoma ga Molaotheo wo mofsa.
16	Dikgorotsheko
(1)	Kgorotsheko e nngwe le e nngwe, go akaretšwa dikgorotsheko tša baetapele ba setšo, tše di bego di le gona ge Molaotheo wo mofsa o thoma go šoma, di sa tšwelapele ka go šoma le go phethagatša toka go ya ka molao tšeo di šomago go tšona, mme mang le mang yo a šomago bjalo ka mohlankedi wa toka o tšwela pele ka go ba modirong wa gagwe go ya ka dipeelano tša molao woo o dirišwago maemong ao, go hlokometšwe- 
(a)	phetošo goba phumolo efe goba efe ya molao woo; le	
(b)	go sepelelana le Molaotheo wo mofsa.
(2)(a)	Kgorotsheko ya Molaotheo yeo e hlomilwego ke Molaotheo wa peleng e fetoga Kgorotsheko ya Molaotheo ka tlase ga Molaotheo wo mofsa. 
(b)	......
[Karolwana ya (b)	e ntšhitšwe ke karolwana ya 20 (a)	ya Molao wa 34 wa 2001.]
(3)(a)	Karolo ya Boipiletšo ya Kgorokgolo ya Tsheko ya Afrika Borwa, e ba Kgorokgolo ya Tsheko ya Boipiletšo ka tlase ga Molaotheo wo mofsa. 
(b)	......
[Karolwana ya (b)	e ntšhitšwe ke karolwana ya 20 (a)	ya Molao wa 34 wa 2001.]
(4)(a)	Karolo ya profense goba ya tikologo ya Kgorokgolo ya Tsheko ya Afrika Borwa goba kgorokgolo ya tsheko ya nagalegae goba karolokakaretšo ya kgoro ye bjalo, e ba Kgorokgolo ya Tsheko ka tlase ga Molaotheo wo mofsa go sa dirwe diphetogo dife goba dife tša bodirelo bja yona bja toka, ka taolo ya phokotšo yeo e ukangwago mo karolwaneng ya (6)
(b)	Mang le mang yo a lego maemong goba go akanywa gore o maemong a Moahlodimopresitente, Motlatšamoahlodimopresitente goba moahlodi wa kgorotsheko ye e ukangwego mo temaneng ya (a)	ge Molaotheo wo mofsa o thoma go šoma, e ba Moahlodimopresitente, Motlatšamoahlodimopresitente goba moahlodi wa kgoro ye bjalo ka tlase ga Molaotheo wo mofsa, ka taolo ya phokotša yeo e ukangwago mo karolwaneng ya (6).
 (5)	Ka ntle le ge e sa sepelelane le dikagare goba e tloga e sa swanela, kukamo mo molaong ofe goba ofe goba tshepetšo go –
(a)	Kgorotsheko ya Molaotheo ka tlase ga Molaotheo wa peleng,	e swanetše go hlaloswa bjalo ka kukamo ya Kgorotsheko ya Molaotheo ka tlase ga Molaotheo wo mofsa;
(b)	Karolo ya Boipiletšo ya Kgorokgolo ya Tsheko ya AfrikaBorwa, e swanetše go hlalošwa bjalo ka kukamo go Kgorokgolo ya Tsheko ya Boipiletšo; le
(c)	Karolo ya profense goba ya tikologo ya Kgorokgolo ya Tsheko ya Afrika Borwa goba Kgorokgolo ya Tsheko ya nagalegae goba karolokakaretšo ya kgorotsheko yeo, e swanetše go hlaloswa bjalo ka kukamo go Kgorokgolo ya Tsheko.
(6)(a)	Ka pelapela ka moo go kgonegago ka morago ga ge Molaotheo wo mofsa o seno thoma go šoma, go akaretšwa le dibopego, tlhamo, go šoma le maatlataolotoka le melao ka moka ya maleba, di swanetše go fokotšwa ka nepo ya go hloma lenaneo la toka leo le kwanago le dinyakwa tša Molaotheo wo mofsa.
(b)	Leloko la Kabinete le le rwelego maikarabelo a taolo ya toka, morago ga ditherišano le Khomišene ya Tirelo ya Toka, le swanetše go laola phokotšo yeo e ukangwago mo go temana ya (a).
	(7)(a)	Mang le mang yo a lego mošomong, ge Molaotheo wa Molao wa Phetošo wa Repabliki ya Afrika Borwa, wa 2001, o thoma go šoma, bjalo ka ge-
(i)	 	Mopresitente wa Kgorotseko ya Molaotheo,	e ba Moahlodimogolo bjale ka ke go ukangwa karolong ya 167 (1)	ya Molaotheo wo mofsa;
(ii)	Motlatšamopresitente wa Kgorotsheko ya Molaotheo, e ba Motlatšamoahlodimogolo bjale ka ge go ukangwa karolong ya 167 (1)	ya Molatheo o mofsa;
(iii)	Moahlodimogolo, e ba Mopresitente wa Kgorokgolo ya Tsheko ya	Boipiletšo ka ge go ukangwa karolong ya 168 (1)	ya Molatheo o mofsa; le
(iv)	Motlatšamoahlodimogolo, e ba Motlatšamopresitente wa Kgorokgolo ya Tsheko ya Boipiletšo ka ge go ukangwa karolong ya 168 (1)	ya Molatheo o mofsa.
(b)	Melawana ka moka, melao goba ditaelo tšeo di dirilwego ke Mopresitente wa Kgorotsheko goba Moahlodimogolo di šoma ka pele pele ga ge Molao wa Phetošo ya Molaotheo wa Afrika Borwa, wa 2001, o šoma, o tšwelapele go šoma go fihlela ge o phumolwa goba o fetošwa.
(c)	Ka ntle le ge e sa sepelelane le dikagare goba e tloga e sa swanela, kukamo mo molaong ofe goba ofe goba tshepetšo go Moahlodimogolo goba go Mopresitente wa Kgorotsheko ya Molaotheo, o swanetšwe go hlathollwa bjalo ka kukamo go Moahlodimogolo ka ge go ukangwe karolong ya 167 (1)	ya Molaotheo wo mofsa.
[Karolwana ya (7)	e okeditšwe ke karolwana ya 20 (b)	ya Molao wa 34 wa 2001.]
17	Melato ka moka yeo e bego e sa tlo tlišwa go kgorotsheko
	Ditshekišo ka moka tšeo di bego di sa tlo tlišwa go kgorongtsheko ge Molaotheo wo mofsa o thoma go šoma, di swanetše go fetšwa bjalo ka ge nke Molaotheo wo mofsa ga se wa be wa dirwa, ge e se fela ge kgahlego ya toka e tsoma ka tsela ye nngwe.
18	Bolaodi bja botšhotšhisi
(1)	Karolo ya 108 ya Molaotheo wa pele e dula e na le maatla go fihla ge Molao wa Palamente wo o ukangwago karolong ya 179 wa Molaotheo wo mofsa o thoma go šoma. Karolwana ye ga e ame peo ya Molaodikakaretšo wa Botšhotšhisi bja Setšhaba go ya ka dipeelano tša karolo ya 179.
(2)	Mosekiši yo a bego a le maemong ao ge Molaotheo wo mofsa o thoma go šoma, o tšwela pele ka modiro wa gagwe go ya ka dipeelano tša molao tše di šomago kantorong yeo, ka taolo ya karolwana ya (1).
19	Dikano le maitlamo
	Motho yoo a tšwelago pele ka modiro wa gagwe go ya ka dipeelano tša Šetulo ye mme a tšerego kano ya modiro goba a dirile boitlamo bja mmakgonthe ka tlase ga Molaotheo wa pele, ga a tlamega go boeletša kano ya modiro goba boitlamo ka tlase ga Molaotheo wo mofsa.
20	Dihlongwa tše dingwe tša molaotheo
(1)	Mo karolong ye ' sehlongwa sa molaotheo ' e ra gore- 
(a)	Mošireletši wa Setšhaba; 
(b)	Khomišene ya Ditokelo tša Botho ya Afrika Borwa; 
[Temana ya (b)	e fetošitšwe ke karolwana ya 4 ya Molao wa 65 wa 1998.]
(c)	Khomišene ya Tekatekano ya Bong; 
(d)	Mohlakišikakaretšo; 
(e)	the South African Reserve Bank; 
(f)	Khomišene ya Ditšhelete le Metšhelo;
(g)	Khomišene ya Tirelo ya Toka; goba 
	(h)	Boto ya Maleme ka Moka a Afrika Borwa.
(2)	Sehlongwa sa Molaotheo seo se hlomilwego go ya ka dipeelano tša Molaotheo wa pele se tšwela pele ka go šoma go ya ka molao wo o šomago go sona, mme mang la mang yo a nago le modiro moo bjalo ka setho sa khomišene, setho sa boto ya Reserve Bank goba Boto ya Maleme ka Moka a Afrika Borwa, Mošireletši wa Setšhaba goba Mohlakišikakaretšo ge Molaotheo wo mofsa o thoma go šoma, o tšwelapele ka go šoma go ya ka molao woo o dirišwago maemong ao, ka taolo ya –
(a)	phetošo efe goba efe goba phumolo ya molao woo; le
(b)	tshepelelano le Molaotheo wo mofsa.
(3)	Dikarolo tša 199 (1), 200(1), (3)	le 5 go fihla go (11)	le 201 go fihla go 206 tša Molaotheo wa pele di tšwelapele ka go šoma go fihlela ge di phumotšwe ke Molao wa Palamente wo o dirilwego go ya ka karolo ya 75 ya Molaotheo wo mofsa.
(4)	Maloko a Khomišene ya Tirelo ya Toka ao a ukangwego karolong ya 105 (1)(h)	a Molaotheo wa pele a emiša go ba maloko a Khomišene ge maloko ao a ukangwego mo karolong ya 178 (1)(i)	ya Molaothoe o mofsa a beilwe.
(5)(a)	Khansele ya Volkstaat yeo e theilwego go ya ka dipeelano tša Molaotheo wa pele e tšwela pele ka go šoma go ya ka molao wo o šomago go yona, mme mang le mang yo a šomago go yona bjalo ka setho sa Khansele ge Molaotheo wo mofsa o thoma go šoma, o tšwela pele ka maemo a gagwe go ya ka dipeelano tša molao wo o šomago maemong ao, fela ka taolo ya –
(i)	phetošo efe goba efe goba phumolo ya molao woo; le
(ii) tshepelelano le Molaotheo wo mofsa.
(b)	Dikarolo tša 184A le 184B (1)(a), (b)	le (d)	tša Molaotheo wa pele, di tšwela pele ka go šoma go fihlela ge di phumotšwe ke Molao wa Palamente wo o dirlwego go ya ka karolo ya 75 ya Molaotheo wo mofsa.
21	Peo ya molao yeo e nyakwago ke Molatheo wo mofsa 
(1)	Moo Molaotheo wo mofsa o nyakago go beiwa ga molao wa naga goba wa profense, molao woo o swanetše go dirwa ke bolaodi bjo bo lebanego lebakeng le swanetšego go tloga tšatšikgweding leo Molaotheo wo mofsa o thomilego go šoma ka lona.
(2)	Karolo ya 198(b)	ya Molaotheo wo mofsa e ka no se dirišwe go fihla ge molao woo o ukangwago karolong yeo o beilwe.
(3)	Karolo ya 199(3)(a)	ya Molaotheo wo mofsa e ka no se dirišwe pele ga go fela ga dikgwedi tše tharo morago ga ge molao wo o ukangwago karolong yeo o beilwe.
(4)	Molao wa setšhaba wo o ukangwago mo karolong ya 217(3)	ya Molaotheo wo mofsa o swanetše go bewa lebakeng la nywaga ye meraro go tloga tšatšikgweding leo Molaotheo wo mofsa o thomilego go šoma, fela go se be gona ga molao wo nakong yeo ga go thibele tšhomišo ya morero wo o ukangwego mo go karolo 217(2.)
 (5)	Go fihla ge Molao wa Palamente wo o umakilwego mo karolong 65(2)	ya Molaotheo wo mofsa o thoma go šoma , lekgotla la profense ye nngwe le ye nngwe, le ka itlhamela ditshepetšo tša lona go ya ka mabaka ao e lego gore maatla a abelwa baemedi ba lona go ka dira bouto legatong la yona mo Khanseleng ya Bosetšhaba ya Diprofense.
	(6)	Go fihla ge peomolao ye e ukangwego mo karolong 229(1)(b)	ya Molaotheo wo mofsa e thoma go šoma, mmasepala o sa ntše o ka tšwelapele go lefiša lekgetho le lengwe le le lengwe, makgethwana le makgetho a dithoto ao o dumeletšwego go a lefiša ge Molaotheo o thoma go šoma.
22	Kopano ya setšhaba le poelano
(1)	Go sa lebelelwe ditlhagišo dife goba dife ya Molaotheo wo mofsa gape ntle go sa lebelelwe phumolo ya Molaotheo wa peleng, ditlhagišo ka moka tšeo di amanago le tshwarelo yeo e lego ka Molaotheong wa pele ka tlase ga hlogo ya 'Kopano ya Setšhaba le Poelano' di tšewa gore ke karolwana ya Molaotheo wo mofsa maikemišetšong a Tšwetšopele ya Molao wa Kopano ya Setšhaba le Poelano, wa 1995 (Molao wa 34 wa 1995), bjalo ka ge di fetošitšwe, go akaretša le mohola wa maatla a tšona.
(2)	Mabakeng a karolwana ya (1), letšatšikgwedi la '6 Desemere 1993' moo le tšwelelago ka tlhagišong ya Molaotheo wa peleng ka tlase ga hlogo ya 'Kopano ya Setšhaba le Poelano', e swanetše go balwa bjalo ka '11 Mei 1994'.
[Karolwana ya (2)	e okeditšwe ke karolwana ya 3 Molao wa 35 wa 1997.]
23	Molao wa Ditokelo
(1)	Molao wa setšhaba wo o ukangwago mo go ya karolo 9(4), 32(2)	le	33(3)	ya Molaotheo wo mofsa o swanetše go bewa lebakeng la nywaga ye meraro go tloga tšatšikgweding leo Molaotheo wo mofsa o thomilego go šoma.
(2)	Go fihla ge molao wo o ukangwago mo dikarolong tša 32 (2)	le 33 (3)	tša Moilaotheo wo mofsa di bewa-
(a)	karolo 32 (1)	e swanetše go tšewa gore e balega ka tsela ye:
‘(1)motho yo mongwe le yo mongwe o na le tokelo ya go fihlelela	tshedimošo ka moka ye e swerwego ke mmušo goba setho se sengwe le se sengwe lekaleng lefe goba lefe la mmušo ge e le gore tshedimošo yeo e nyakelwa tšhomišo goba tšhireletšo ya ye nngwe ya ditokelo tša bona.”; le
(b)	Karolo ya 33(1)	le (2)	di swanetše go tšewa gore di balega ka tsela ye:
		‘Motho mang le mang o na le tokelo go-
(a)		go kgata tema ya semolao moo ye nngwe le ye nngwe ya ditokelo	 goba dikgahlego tša bona di angwago goba di tšhošetšwago;
(b)		kgatotaolo ye e sepedišwago thwii ka toka moo efe le efe ya ditokelo tša bona goba ditetelo tša mmakgonthe di angwago goba di tšhošetšwago;
(c)	 fiwa mabaka a a ngwadilwego mabapi le kgatotaolo yeo e	amago efe goba le efe ya ditokelo tša bona goba dikgahlego ge e se fela ge mabaka a kgato yeo a tsebišitšwe phatlalatša; le
(d)		kgatotaolo yeo e e swanetšego mabapi le mabaka ao a filwego go yona moo efe goba efe ya ditokelo tša bona e amegago goba e tšhošetšwago.’
(3)	Dikarolo 32(2)	le 33(3)	tša Molaotheo wo mofsa di a fela ge molao woo o ukangwago mo dikarolong tše, ka go latelana, o sa bewe lebakeng la nywaga ye meraro go tloga tšatšikgweding leo Molaotheo wo mofsa o thomilego go šoma.
24	Tshepedišo ya merero ya setšhaba le ditirelo tša tšhireletšo
(1)	Dikarolo	tša 82 (4)(b), 215, 218(1), 219(1), 224 go fihla go 228, 236(1), (2), (3), (6), (7)(b)	le (8), 237(1)	le (2)(a)	le 239(4)	le(5)	tša Molaotheo wa pele di tšwela pele ka go šoma bjalo ka ge nke Molaothoeo wa pele ga se wa phumolwa, fela ka taolo ya–
(a)	diphetošo tša dikarolo tšeo bjalo ka ge go laeditšwe mo go Koketšo D;
(b)	phetošo efe le efe gape goba phumolo efe le efe ya dikarolo tšeo ke Molao wa Palamente wo o bewago go ya ka dipeelano tša karolo 75 ya Molaotheo wo mofsa; le
(c)	tshepelelano le Molatotheo o mofsa.
(2)	Khomišene ya Tirelo ya Setšhaba le Dikhomišene tša tirelo ya diprofense tše di ukangwego mo go Kgaolo 13 ya Molaotheo wa pele, di sa tšwela pele ka go šoma go ya ka dipeelano tša Kgaolo yeo le molao woo o di amago bjalo ka ge nke Kgaolo yeo ga se be ya phumolwa, go fihla ge Khomišene le dikhomišene tša tirelo ya diprofense di fedišwa go ya ka dipeelano tša karolo 75 ya Molaotheo wo mofsa.
(3)	Go phumolwa ga Molaotheo wa pele ga go ame kgoeletšo efe goba efe yeo e dirilwego ka tlase ga karolo ya 237(3), ya Molaotheo wa peleng gomme kgoeletšo efe goba efe ya mohuta woo e tšwelapele ka go šoma, fela e laolwa ke –
(a)	phetošo efe goba efe goba phumolo; le
(b)	tshepelelano le Molaotheo wo mofsa.
25	Dithibelo tše dingwe go makgotlapeamelao
(1)	Mang le mang yo, ge Molaotheo wo mofsa o thoma go šoma, a bego a goga
sekwebo mono Repabliking sa dikgwedi tša go feta 12 ka ntle le go fiwa kgetho ya faene, ga a swanela go kgethwa go ba leloko la Kopan ya Maloko a Palamente ka Moka goba lekgotlapeamelao la profense.
(2)	Thibelo ya motho go ya ka dipeelano tša karolwana ya (1)	–
(a)	e a fela ge kotlo ye e beelwa ka thoko nakong ya boipiletšo, goba ge kotlo e fokoditšwe mo boipiletšong go ba kotlo yeo e sa thibelego motho yoo; gomme
(b)	e fela mengwaga ye mehlano morago ga ge kotlo e phethilwe.
26	Pušoselegae
 (1)	Go sa šetšwe ditlhagišo tša dikarolo tša 151, 155, 156 le 157 tša Molaotheo wo mofsa –
ditlhagišo tša Molao wa Phetišetšo wa Pušoselegae, wa 1993 (Molao wa 209 wa 1993), bjalo ka ge o ka fetošwa nako le nako ke molao wa naga wo o sepelelanago le Molaotheo wo mofsa, o fela o na le maatla go ya ka Khansele ya Mmasepala go fihlela ge Khansele ya Mmasepala yeo e ntšhago Khansele yeo e begilwego gore e kgethilwe ka morago ga dikgetho tša mathomo tša kakaretšo tša Dikhansele tša Bommasepala morago ga go thoma go šoma ga Molaotheo wo mofsa; le
	[Karolwana ya (a)	e tšeetšwe legato ke karolwana ya 5 (a)	ya Molao wa 65 wa 1998.]
(b)	 moetapele wa setšo wa setšhaba seo se latelago lenaneo la melao ya setšo mme a dulago nageng ye e lego ka fase ga khansele ya tikologo ya phetišetšo goba khansele ya phetišetšo ya Tikologo goba khansele ya baemedi ba phetišetšo, tšeo di ukangwago mo go Molao wa Phetišetšo wa Pušoselegae wa 1993, mme a hlaotšwego mo go karolo ya 182 ya Molaotheo wa peleng, ka maemo a gagwe, o na le tokelo ya go ba leloko la khansele go fihlela ge Khansele ya Mmasepala yeo e ntšhago Khansele yeo e begilwego gore e kgethilwe ka morago ga dikgetho tša mathomo tša kakaretšo tša Dikhansele tša Bommasepala morago ga go thoma go šoma ga Molaotheo o mofsa.
	[Karolwana ya (b)	e tšeetšwe legato ke karolwana ya 5 (a)	ya Molao wa 65 wa 1998.]
(2)	Karolo wa 245 (4)	ya Molaotheo wa pele e tšwela pele go šoma go fihlela ge tirišo ya karolo yeo e fela. Karolo ya 16(5)	le (6)	ya Molao wa Phetišetšo wa Pušoselegae, wa 1993, e ka no se phumolwe pele ga la 30 Aprele, 2000.
 [Karolo ya (2)	e fetošitšwe ke karolwana ya 5 (b)	ya Molao wa 65 wa 1998.]
27	Go lotwa ga Melao ya Palamente le Melao ya diprofense
	Dikarolo tša 82 le 124 tša Molaotheo wo mofsa ga di ame go lotwa ga Melao ya Palamente goba Melao ya diprrofense ye e beilwego pele ga ge Molaotheo wo mofsa o thoma go šoma.
28	Go ngwadiša ga thoto ye e sa šuthego yeo e lego ya mmušo 
(1)	Ka go tšweletšwa ga lengwalo la bohlatse ke bolaodi bofe goba bofe bjo nago le maswanedi a gore thoto ye e sa šuthego e lego ya mmušo e beilwego taolong ya mmušo wo o itšego go ya ka karolo ya 239 ya Molaotheo wa peleng, mongwadiši wa dithoto o swanetše go ela hloko dingwadišo goba ditshaeno goba mongwadiši ofe goba ofe yo a nago le maswanedi, lengwalo la thoto goba dingwalo tše dingwe tša gore thoto yeo e sa šuthego e ngwadišwe ka leina la mmušo. 
(2)	Ga go motšhelo, tefo goba tefišo ye nngwe ye e ntšhiwago mabapi le go ngwadišwa go ya ka karolwana ya (1). 
KOKETŠO A
DIPHETOŠO TŠA ŠETULO 2 YA MOLAOTHEO WA PELENG 
1.	Go bea temana ye e latelago sebakeng sa temana ya 1:
'1. Diphathi tšeo di ngwadišitšwego go ya ka molao wa naga gomme di phenkgišanago dikgethong tša Kopano ya Maloko a Palamente ka Moka, di tla kgetha bonkgetheng ba tšona ba kgetho ye mo lenaong la bonkgetheng le le lokišitšwego go ya ka Šetulo ye le molao wa naga.'.
2.	Go bea temana ye e latelago sebakeng sa temana ya 1:
'2. Ditulo ka go Kopano ya Maloko a Palamente ka Moka go ya ka mo di beakantšwego go ya ka karolo ya 46 ya Molaotheo wo mofsa, di tla tlatšwa ka tsela ye e latelago: 
 (a)	Seripagare sa ditulo go tšwa go mananeo a selete ao a tlišitšwego ke diphathi tše di angwago, ka palo ye e beilwego ya ditulo mme e beetšwego selete se sengwe le se sengwe ka thoko go ya ka mo go beakantšwego ke Khomišene ya dikgetho ye e latelago ya Kopano ya Maloko a Palamente ka Moka, go hlokometšwe go hwetšagala ga difiwa tšeo di botegago mabapi le babouti, le baemedi ba diphathi tšeo di nago le kgahlego.
(b)	Seripagare se sengwe sa ditulo go tšwa go mananeo a setšhaba ao a tlišitšwego ke diphathi tše di angwago, goba mananeong a selete moo mananeo a setšhaba a sego a tlišwa.'.
3.	Go bea temana ye e latelago sebakeng sa temana ya 1: 
	'3. Mananeo a bonkgetheng a a tlišitšwego ke phathi, ka moka a tla ba le maina a a sa fetego palo ya bonkgetheng ba lekanago le palo ya ditulo ka go Kopano ya Maloko a Palamente ka Moka, gomme lenaneo le lengwe le le lengwe la mohuta wo, le tla laetša maina a ka tatelano ya kgethopele go ya ka moo phathi e tlogo nyaka ka.'.
4.	Phetošo ya temana ya 5 ka go tloša mantšu a a lego pele ga temana ya (a)	mme gwa bewa mantšu a a latelago:
‘5. Ditulo tše di ukangwego mo temaneng ya 2 (a)	di tla abelwa diphathi tšeo di phenkgišanago mo kgethong go ya ka dilete ka tsela ye e latelago:”.
5. Phetošo ya temana ya 6 –
(a)	ka go tloša mantšu a a lego pele ga temana (a)	mme gwa bewa	mantšu a a latelago:
‘6.	Ditulo tše di ukangwego mo go temana 2(b)	di tla abelwa diphathi tšeo di tsenetšego kgetho, ka tsela ye e latelago:’;
le
(b)	 ka go tloša temana ya (a)	gomme gwa bewa temana ye e latelago:
‘(a)		khouta ya dibouto setulo ka setulo e tla laolwa ke go arola palomoka ya dibouto tše di dirilwego setšhabeng ka bophara ka palo ya ditulo ka go Kopano ya Maloko a Palamente ka Moka, le e tee, mme le dipoelo go tlatšwa ka tee, go sa hlokomelwe dipalophatlo, e tla ba khouta ya dibouto setulo ka setulo.’.
6. Phetošo ya temana ya 7(3)	ka go tloša temana ya (b)	mme gwa bewa temana ye e latelago:
‘(b)	Khouta ye e fetošitšwego ya setulo ka setulo e tla laetšwa ka go arola palomoka ya dibouto tše di dirilwego setšhabeng ka bophara, go ntšhiwa palo ya dibouto tše di dirilwego setšhabeng ka bophara go thekgwa phathi yeo e ukangwego temaneng ya (a), ka palo ya ditulo ka go Kopano ya Maloko a Palamente ka Moka, go tsenywa tee, go ntšhiwa palo ya ditulo tšeo mafelelong di abelwago phathi ye e ukangwego go ya ka temana ya (a).”.
7.	Go tlošwa ga temana ya 10 mme gwa bewa temana ye e latelago:
	‘10. Palo ya ditulo ka go lekgotlapeamelao le lengwe le le lengwe la profense e tla ba bjalo ka ge e laolwago go ya ka karolo ya 105 ya Molaotheo wo mofsa.’.
8.	Go tlošwa ga temana ya 11 gomme gwa bewa temana ye e latelago:
‘11. Diphathi tšeo di ngwadišitšwego go ya ka molao wa naga mme di tsenetšego kgetho ya theramelao ya profense, di tla kgetha bonkgetheng ba kgetho yeo ya profense go tšwa go mananeo a profense a a lokišitšwego go ya ka Šetulo ye le molao wa naga.’.
9.	Go tlošwa ga temana 16 gomme legatong lsa yona gwa bewa temana ye e latelago:
	‘16. Peo ya baemedi
(1)	Morago ga ge palo ya dibouto e phethilwe, palo ya baemedi ba phathi ye nngwe le ye nngwe e laeditšwe mme dipoelo tša dikgetho di begilwe go ya ka karolo ya 190 ya Molaotheo wo mofsa, khomišene e tla, mo matšatšing a mabedi morago ga tsebišso ya mohuta woo, kgetha go tšwa lenaneong le lengwe le le lengwe la bonkgetheng, le le phatlaladitšwego go ya ka molao wa setšhaba, baemedi ba phathi ye nngwe le ye nngwe ka theramelaong.
(2)	Morago ga peo go ya ka dipeelano tša karolwana (1), ge leina la nkgetheng le tšwelela godimo ga lenaneo la go feta le tee la Kgobokano ya Setšhaba goba mo maneneong a Kopano ya Maloko a Palamente ka Moka le a lekgotlapeamelao la profense (ge kgetho ya Kopano ya Maloko a Palamente ka Moka le ya Lekgotlapeamelao La Profense di swerwe nakong e tee), nkgetheng yo bjalo o lebanwe ke go bewa bjalo ka moemedi makgeng a go feta le tee, phathi yeo e tšweleditšego mananeo a mabjalo, mo matšatšing a mabedi morago ga pego ye bjalo, e tla laetša Khomišene gore nkgetheng yo bjalo o swanetše go bewa kae goba nkgetheng yoo o tla šoma ka theramelaong efe, go ya ka mo go ka bago ka gona, mme ge go le bjalo leina la nkgetheng le tla tlošwa mo mananeong a mangwe.
(3)	Go tloga moo Khomišene e tla phatlalatša maina a baemedi ka go theramelao goba makgotlapeamelao.’.
10. Phetošo ya temana 18 ka go tloša temana (b)	mme gwa bewa temana ye e latelago:
‘(b)	moemedi o bewa bjalo ka moromelwa wa go ya go ile wa Khansele ya Setšhaba ya Diprofense;”.
11. Go bea temana ye e latelago legatong la temana ya 19:
	‘19. Mananeo a bonkgetheng ba phathi ye e ukangwego go temana 16(1), a ka oketšwa gatee fela nakong ye e itšego lebakeng la dikgwedi tša mathomo tše 12 morago ga tšatšikgwedi la kgetho ya baemedi go ya ka temana ya 16 le phethilwe, gore go tle go kgonwe go tlatša dikgoba
tše ka tšwelelago: Ge fela tlaleletšo yeo e ka dirwa mafelelong a lenaneo.’.
12. Go bea temana ye e latelago legatong la temana ya 23:
‘Dikgala tše 23.
(1)	Ge go ka hlolega sekgala ka go theramelao yeo Šetulo ye e šomago, phathi yeo e kgethilego leloko leo le tšwago, e tla tlatša sekgala seo ka go kgetha motho –
(a)	 yoo leina la gagwe le lego lenaneong la bonkgetheng leo leloko le le tšwago le bego le kgethilwe go lona mathomong; le
(b)	 yo e lego yo a latelago wa maswanedi le gona e le yo a hwetšagalago lenaneong.
(2)	Tšhišinyo ya go tlatša sekgala e tla neelwa Spikara e ngwadilwe.
(3)	Ge phathi yeo e emetšwego ka theramelaong e ka phatlalala goba ya hwa, maloko a yona a tlogela ditulo tša ona go ya ka temana ya 23A(1), ditulo tšeo di angwago di tla abelwa diphathi tše di šetšego ka go lekana bjalo ka ge nke ditulo tše bjalo di be di lobilwe go ya ka temana ya 7 goba
14, ka moo go ka bago ka gona.’.
13. Go tsenywa ga temana ye e latelago morago ga temana ya 23:
‘23A. Mabaka a mangwe gape a tahlegelo ya boleloko bja lekgotlapeamelao.
(1)	Motho o lahlegelwa ke boloko ka go theramolao ye e angwago ke Šetulo ye ge motho yoo e sa hlwe e le leloko la phathi yeo e mo kgethilego bjalo ka leloko la lekgotlapeamelao.
(2)	Go sa šetšwe temana (1)	phathi efe le efe ya dipolitiki ye e lego gona,e ka kgona nakong ye nngwe go fetola leina la yona.
(3)	Molao wa Palamente, o ka kgona, lebakeng le le kwalago morago ga ge Molaotheo wo mofsa o seno thoma go šoma, o bewe go ya ka karolo 76(1)	ya Molaotheo wo mofsa go fetola temana ya 23 go beakanyetša tsela yeo go tlogo kgontšha leloko la theramelao, le le emišago go
ba leloko la phathi yeo e le kgethilego, le itshwarele boleloko bja lekgotlapeamelao le bjalo.
(4)	Molao wa Palamente wo o ukangwego go temana ya (3)	le wona o ka beakanyetša gore-
(a)	phathi ye e lego gona e ka kopana le phathi ye nngwe; goba
(b)	phathi efe goba efe e ikarole go ba diphathi tša go feta e tee.’.
14. Phumulo ya temana ya 24.
15. Phetošo ya temana ya 25 -
(a)	ka go tloša tlhalošišo ya “Khomišene” mme gwa bewa tlhalošo ye latelago: 
	'Khomišene’ e ra gore Khomišene ya Kgetho yeo e ukangwego go karoloya 190 ya Molaotheo wo mofsa'; gomme
(b)	ka go tsenya tlhalošo ye e latelago morago ga tlhalošo ya	'lenaneo la setšhaba':
	'Molaotheo wo mofsa' o ra Molaotheo wa Repabliki ya Afrika Borwa, wa 1996;'.
16.	Phumulo ya temana ya 26.
KOKETŠO B
MMUŠO WA MOHLAKANELWA:
LEFAPHA LA SETŠHABA
1.	Karolo ya 84 ya Molaotheo wo mofsa e tšewa gore e na le dikarolwana tša tlaleletšo tše di latelago:
	'(3)	Mopresitente o swanetše go rerišana le Batlatšamopresitente ba Phethišo-
(a)	tlhabollong le phethagatšong ya merero ya mmušo wa setšhaba;
(b)	ditabeng ka moka tše di amanago le taolo ya Kabinete le go phetha mešomo ga Kabinete ;
(c)	kabelong ya mediro go Batlatšamopresitente ba Phethišo;
(d)	pele ga ge a dira peo efe goba efe ka fase ga Molaotheo goba molao wo mongwe le wo mongwe, go akaretšwa le peo ya ambasatara goba baemedi ba bangwe ba ditiplomate;
(e)	pele ga ge a bea dikhomišene tša dinyakišišo;
(f)	pele ga ge a bitša referentamo;	le
(g)	pele ga ge a swarela goba a fega kotlo ya basenyi.'.
2.	Karolo ya 89 ya Molaotheo wo mofsa e tšewa gore e na le dikarolwana tša tlaleletšo tše di latelago:
	'(3)	Dikarolwana tša (1)	le (2)	le tšona di šoma go Motlatšamopresitente wa Phethišo.'.
3.	Temana ya (a)	ya karolo ya 90 (1)	ya Molaotheo wo mofsa e tšwewa gore e balega ka tsela ye.
	'(a)	Motlatšamopresitente wa Phethišo o beilwe ke Mopresitente;'.
4.	Karolo ya 91 ya Molaotheo wo mofsa e tšewa gore e balega ka tsela ye:
	'91	Kabinete
(1)	Kabinete e bopša ke Mopresitente, Motlatšamopresitente wa Phethišo le-
(a)	ditona tše di sa fetego tše 27 tšeo e lego maloko a Kopano ya Maloko a Palamente ka Moka mme ba beilwe go ya ka dipeelano tša karolwana ya (8)	go fihla go (12); le	
(b)	 ditona tše di sa fetego e tee yeo e sego leloko la Kopano ya Maloko a Palamente ka Moka mme a beilwe go ya ka dipeelano tša karolwana (13), ge fela Mopresitente, a dira ka ditherišano le Batlatšamopresitente ba Phethišo le baetapele ba diphathi tšeo di kgathago tema, a bona gore peo ya Tona ye bjalo e tloga e nyakega.
(2)	Phathi ye nngwe le ye nngwe ye e nago le ditulo tše di sego ka fase ga 80 ka go Kopano ya Maloko a Palamente ka Moka e na le tokelo ya go kgetha Motlatšamopresitente wa Phethišo go tšwa go maloko a Kopano ya Maloko a Palamente ka Moka.
(3)	Ge go se na le phathi goba phathi e tee e na le ditulo tše 80 goba ditulo tša go feta ka go Kopano ya Maloko a Palamente ka Moka, phathi ye e nago le palo ye kgolokgolo ya ditulo le phathi yeo ya bontši bja bobedi bja ditulo nngwe le nngwe e na le tokelo ya go kgetha Motlatšamopresitente wa Phethišo go tšwa malokong a Kopano ya Maloko a Palamente ka Moka.
(4)	Ge a kgethilwe, Motlatšamopresitente wa Phethišo a ka kgona go ikgethela gore o nyaka go ba goba ga a rate go tšwela pele go ba leloko la Kopano ya Maloko a Palamente ka Moka.
(5)	Motlatšamopresitente wa Phethišo a ka šomiša maatla mme o swanetše go phetha mediro yeo e abetšwego ofisi ya Motlatšamopresitente wa Phethišo ke Molaotheo goba e abetšwego ofisi ya gagwe ke Mopresitente.
(6)	Motlatšamopresitente wa Phethišo o ba modirong –
(a)		go fihla ka la 30 Aprele 1999 ge e se fela ge a tlošitšwe goba a	biditšwe ke phathi ya gagwe go pethagatša peo go ya ka karolwana ya (2 ) le (3); goba
(b)		go fihlela ge motho yo a kgethilwego go ba Mopresitente morago ga kgetho ya Kopano ya Maloko a Palamente ka Moka ye e swerwego pele ga la 30 Aprele,1999 a tšea modiro.
(7)	Sekgala ka kantorong ya Motlatšamopresitente wa Phethišo se ka no tlatšwa ke phathi yeo e kgethilego motlatšamopresitente yoo.
(8)	Phathi yeo e nago le ditulo tše di sego ka fase ga 20 ka go Kgobokano ya Setšhaba yeo e tšerego sephetho sa go kgatha tema mo go mmušo wa mohlakanelwa, e na le tokelo ya go fiwa e tee goba tše pedi tša dipotfolio tša Kabinete tše go tšona Ditona tše di ukangwego go karolwana (1)(a)	di ka bewago, ka tekanyetšo ya palo ya ditulo tšeo di swerwego ke phathi ka go Kopano ya Maloko a Palamente ka Moka, ka papetšo ya palo ya ditulo tšeo di swerwego ke diphathi tše dingwe tše di kgathago tema.
(9)	Dipothefolio tša Kabinete di swanetše go abelwa ka tshwanelo diphathi tšeo di kgathago tema go ya ka fomula ye e latelago:
(a)		Khouta ya ditulo potfolio ka potfolio e swanetše go laetšwa ka go arola palomoka ya ditulo ka go Kopano ya Maloko a Palamente ka Moka tše di swerwego ke diphathi tše di kgathago tema ka moka ka palo ya dipotfolio malebana le Ditona tše di ukangwego karolwaneng ya (1)(a)	di swanetšego go bewa, le e tee.
(b)		Dipoelo, go sa šetšwe desimale ya boraro le tše di latelago, ge di le gona, ke yona khouta ya dipalo potfolio ka pothefolio.
(c)		Palo ya ditulo tšeo di swanetšego go abelwa phathi ye e kgathago tema e hwetšwa ka go arola palomoka ya ditulo tše di swerwego ke phathi yeo ka go Kopano ya Maloko a Palamente ka Moka ka khouta ye e ukangwego temaneng ya (b).
(d)		Dipoelo, ka taolo ya temana (e), di laetša palo ya dipotflio tšeo di swanetšego go abelwa phathi.
(e)		Moo tirišo ya fomula ye go hlolago mašalela, ao a sa tsenego ka go palo ya dipothefolio tše di abetšwego phathi, mašalela ao a phenkgišana le mašalela a mangwe a go swana nawo a a tšwago go phathi ye nngwe goba diphathi, mme pothefolio efe goba efe goba dipothefolio tše di šalago di sa abja, di swanetše go abelwa phathi goba diphathi tšeo di angwago go ya ka tatelano ya mašalela a godimodimo.
(10)	Mopresitente morago ga go boledišana le Motlatšamopresitente wa Phethišo le baetapele ba diphathi tše di kgathago tema o swanetše-
(a)		go beakanya dipothefolio tše itšego gore di abelwe diphathi tše di kgathago tema go ya ka palo ya dipotfolio tšeo di di abetšwego go ya ka karolwana (9);
(b)	 a bea malebana le dipotfolio tše bjalo, leloko la Kopano ya Maloko a Palamente ka Moka yo e lego setho sa phathi yeo potfolio yeo e abilwego ka tlase ga temana (a), bjalo ka Tona ye e ikarabelago go potfolio yeo;
(c)	ge go ka nyakega malebana le mabaka a Molaotheo goba ka baka la kgahlego mmušong wo mokaone, a fetole taetšo efe goba efe ka tlase ga temana (a), fela ka taolo ya karolo (9);
(d)	fediša peo efe goba efe ka tlase ga temana (b)	–
(i)	ge Mopresitente a kgopetšwe go dira bjalo ke moetapele wa phathi yeo Tona ye e ukangwago e lego leloko; goba
(ii) 	ge go ka nyakega ka mabaka a Molaotheo goba ka phišegelo ya mmušo wo mokaone; goba
(e)	tlatša, ge go nyakega, fela ka taolo ya temana (b), sekgala ka ofising ya Tona.
(11)	Karolwana (10)	e swanetše go šomišwa ka moya wo o lego ka go kgopolo ya mmušo wa mohlakanelwa, mme Mopresitente le badirišani ba bangwe ba ba amegago, ba swanetše gore mo tirišong ya bona ya karolwana ye ba nyake go fihlelela kwano mabakeng ka moka: Ge fela go ka se fihlelelwe kwano mo go –
(a)		tirišo ya maatla ao a ukangwego go temana (a), (c)	goba (d)(ii) tša	karolwana yeo, sephetho sa Mopresidente se agelwa morako:
(b)		tirišo yeo ya maatla e ukangwego go temana (b), (d)(i)	goba (e)	ya karolwana ye e amago motho yo e sego leloko la phathi ya Mopresitente sephetho sa moetapele wa phathi yeo motho
yoo e lego leloko, se fiwa šedi; le
(c)	tirišo ya maatla a ukangwego temaneng (b)	goba (e)	ya karolwana ye e amago motho yo e lego setho sa phathi ya Mopresitente, gona sephetho sa Mopresitente se fiwa šedi.
(12)	Ge taetšo ya kabo ya dipothefolio e fapantšwe ka tlase ga karolwana ya (10)(c), Ditona tše di amegago di swanetše go tlogela dipothefolio tša tšona, eupša di ka kgethwa gape, mo go kgonegago, go bewa dipotfoliong tše dingwe tše di abetšwego diphathi tša tšona go ya ka mabaka a taetšo ye e fapantšwego.
(13) Mopresitente –
(a)		ka go rerišana le Motlatšamopresitente wa Phethišo	le baetapele ba diphathi tše di kgathago tema, o swanetše –
(i)	go laetša potfolio ye itšego ya Tona ye e ukangwego karolwaneng (1)(b)	ge go ka nyakega malebana le sephetho sa Mopresitente ka tlase ga karolwana ye;
(ii) 	a bee, mabapi le potfolio yeo, motho yo e sego leloko la Kopano ya Maloko a Palamente ka Moka, bjalo ka Tona ye e rwelego boikarabelo bja potfolio yeo; gomme go
(iii) tlatšwe, ge go nyakega, sekgala mabapi le potfolio yeo; goba
(b)		morago ga go rerišana le Motlatšamopresitente wa Phethišo, le baetapele ba diphathi tše di kgathago tema, a fediše peo ka tlase ga temana (a)	ge go ka nyakega, go hlokometšwe mabaka a Molaotheo goba phišegelo ya mmušo wo kaone.
(14)	Dikopano tša Kabinete di swanetše go hlahlwa ke Mopresitente, goba, ge Mopresitente a laela, ke Motlatšamopresitente wa Phethišo; ge fela motlatšamopresitente wa Phethišo a swara marapo dikopanong tša Kabinete ka tšhielano, ge e se ge mabaka a tšhoganetšo le moya wo o lego ka go kgopolo ya mmušo wa mohlakenelwa di tsoma go eba ka tsela ye nngwe.
(15)	Kabinete e swanetše go šoma ka tsela ye e lego gore e ela šedi moya wa go tsoma kwano wo o lego ka garee ga kgopolo ya mmušo wa mohlakanelwa gammogo le nyakego ya mmušo wo o šomago gabotse’
 5.	Karolo ya 93 ya Molaotheo wo mofsa e tšewa gore e balega ka tsela ye:
	'93	Peo ya Batlatšatona 
(1)	Mopresitente a ka, morago ga go rerišana le Motlatšamopresidente wa Phethišo le baetapele ba diphathi tše di kgathago tema ka Kabineteng, hloma diposo tša Batlatšatona.
(2)	Phathi e na le tokelo ya go abelwa poso e tee go ba diposo tše pedi tša batlatšatona ka tekanyetšo ya go swana le go ya ka fomula ya go swana le ya ka moo dipotfolio di abjago ka gona ka Kabineteng.
(3)	Ditlhagišo tša karolo 91(10)	go fihla go (12), ka diphetogo tše di nyakegago, mabapi le Batlatšatona, mme mo tirišong ye bjalo kukamo mo karolong yeo go Tona goba potfolio, di swanetše go balwa bjalo ka kukamo go Motlatšatona goba poso ya motlatšatona, ka go latelana.
(4)	Ge motho a beilwe go ba Motlatšatona wa pothefolio ye nngwe le ye nngwe ye e filwego Tona-
(a)	Motlatšatona yoo o swanetše go diriša maatla le go phethagatša mediro legatong la Tona ye e lebanego, maatla afe goba afe le mediro ye e filwego Tona yeo go ya ka molao goba go sego bjalo, ka taolo ya ditaelo tša Mopresitente, e fiwe Motlatšatona yoo ke Tona; le 
(b)	kukamo efe goba efe mo molaong go Tona yeo e swanetše go hlaloswa gore e akaretša kukamo go Motlatšatona yo a šomago go ya ka modiro wo a o filwego ka tlase ga temana (a)	ke Tona, yoo Motlatšatona a šomago legatong la gagwe.
	(5 Nako le nako ge Motlatšatona a se gona goba mabakeng afe goba afe a sa kgone go dire goba go phetha efe goba efe ya maatla goba mediro ya ofisi, Mopresitente a ka bea Motlatšatona yo mongwe le yo mongwe goba motho yo mongwe le yo mongwe go šoma sa motšwaoswere sa Motlatšatona yoo, e ka ba ka kakaretšo goba mo tirišong goba phetagatšong ya maatla a itšego goba mošomo..'.
6.	Karolo ya 96 ya Molaotheo wo mofsa e tšewa gore e balega ka tsela ye:
	'(3)	Ditona di na le maikarabelo mongwe le mongwe go Mopresidente le go Kopano ya Maloko a Palamente ka Moka mabapi le tshepedišo ya dipotfolio, mme maloko ka moka a Kabinete le ona a na le maikarabelo ka seboka mo pethagatšong ya mediro ya bona ya mmušo wa setšhaba le merero ya wona. 
(4)	Ditona di swanetše go laola dipothefolio tša tšona go ya ka morero wo o beilwego keKabinete.
(5)	Ge Tona e šitwa ke go laola pothefolio ya yona go ya ka morero wa Kabinete, Mopresitente a ka nyaka gore Tona yeo e amegago e dire gore taolo ya pothefolio ya gagwe e gate ka mošito o tee le morero woo.
(6)	Ge Tona ye e amegago e šitwa ke go ikamanya le senyakwa sa Mopresitente ka tlase ga karolwana ya(5), Mopresitente a ka no tloša Tona yeo modirong- 
(a)	ge e le gore ke tona ye e ukangwego mo go karolo (91)(1)(a), morago ga go rerišana le Tona mme, ge Tona e se setho sa phathi ya Mopresitente goba e se moetapele wa phathi ye e kgathago tema, le gona ka morago ga ditherišano le moetapele wa phathi ya Tona yeo; goba
(b)	ge e le gore ke tona ye e ukangwego karolong ya 91(1)(b), morago ga go rerišana le Batlatšamopresitente Ba Phethišo le baetapele ba diphathi tše di kgathago tema.'.
KOKETŠO C
MMUŠO WA MOHLAKANELWA:
LEFAPHA LA PROFENSE
1.	Karolo ya 132 ya Molaotheo wo mofsa e tšewa gore e balega ka tsela ye:
	'132	Dikhuduthamaga
(1)	Khuduthamaga ya Profense e bopša ke Tonakgolo le maloko a a sa fetego a 10 ao a beilwego ke Tonakgolo go ya ka karolo ye.
(2)	Phathi ye e nago le dipersente tše 10 tša ditulo tša theramelao ya profense yeo e tšerego sephetho sa go kgatha tema mmušong wa mohlakanelwa wa setšhaba, e na le tokelo ya go abelwa pothefolio goba go feta ka go Khuduthamaga ka tekanyetšo go ya ka palo ya ditulo tšeo di swerwego ke yona ka go theramelao ka papetšo le palo ya ditulo tše di swerwego ke diphathi tše dingwe tšeo di kgathago tema. 
(3)	Dipotfolio tša khuduthamaga di swanetše go abelwa diphathi tše di kgathago tema go ya ka fomula ya go swana le ye e beilwego mo go karolo ya 91(9), mme mo tšhomišong ya fomula kukamo mo karolong ye go-
(a)	Kabinete e swanetše go balwa bjalo ka kukamo go Khuduthamaga;
(b)	Tona, e swanetše go balwa bjalo ka kukamo go leloko la Khuduthamaga; le
 (c)	Kopano ya Maloko a Palamente ka Moka e swanetše go	balwa bjalo ka kukamo go lekgotlapeamelao la profense.
(4)	Tonakgolo ya profense ka morago ga go rerišana le baetapele ba	diphathi tše di kgathago tema o swanetše-
(a)	go laetša dipothefolio tše itšego tše di swanetšego go abelwa diphathi tše di kgathago tema go ya ka palo ya dipothefolio tše di di abetšwego go ya ka dipeelano tša karolwana ya (3);
(b)	go bea malebana le potfolio ye nngwe le ye nngwe leloko la theramelao ya profense yo e lego leloko la phathi yeo potfoliong yeo e abilwego ka tlase ga temana (a), bjalo ka leloko la Khuduthamaga le rwelego boikarabelo bja pothefolio yeo;
(c)	ge go ka nyakega, mabakeng a Molaotheo goba ka	phišegelo ya mmušo wo kaone, a fapantšhe taetšo ye nngwe le ye nngwe ka tlase ga temana (a), ka taolo ya karolwana (3);
(d)	a fediše efe goba efe ka tlase ga temana ya (b)- 
(i)	ge Tonakgolo a kgopetšwe go dira bjalo ke moetapele wa phathi yeo leloko le la Khuduthamaga e lego leloko la phathi ya gagwe; goba
(ii)	ge go ka nyakega, mabakeng a Molaotheo goba ka phišegelo ya mmušo wo kaone: goba (e)	go tlatša, mo go nyakegago, ka taolo ya temana ya (b), sekgala ka ofising ya leloko la Khuduthamaga;
(e)	tlatša, ge go kgonega, go ya ka temana ya (b), sekgoba ka kantorong ya	leloko la Khuduthamaga.
(5)	Karolwana ya (4)	e swanetše go dirišwa ka moya wo o akaretšwago ka kgopolong ya mmušo wa mohlakanelwa wa setšhaba, mme Tonakgolo le badirišani ba ba amegago ba swanetše, mo tšhomišong ya karolwana yeo, ba nyake go fihlelela kwano mabakeng ka moka: Ge fela kwano yeo e ka se fihlelelwe go -
(a)	tirišo ya maatla a a ukangwego temaneng ya (a), (c)	goba (d)(ii) ya karolwana yeo, sephetho sa Tonakgolo se a šoma; 
(b)	 	tirišo ya maatla ao a ukangwego mo go temana ya (b), (d)(i)	goba (e)	tša karolwana yeo mme di ama motho yo e sego leloko la phathi ya Tonakgolo, sephetho sa moetapele wa phathi yeo motho yo e lego leloko, ke sona se fiwago šedi; le	
(c)	 	tirišo ya maatla a a ukangwego go temana (b)	goba (e)	ya karolwana yeo mme a ama motho yo e lego leloko la phathi ya Tonakgolo, gona sephetho sa Tonakgolo se fiwa šedi.
(6)	Ge peakanyetso efe goba efe ya kabo ya dipothefolio e fapantšhitšwe ka tlase ga karolwana ya (4)(c), maloko ao a angwago a swanetše go tloga potfoliong tšeo eupša a ka kgethwa gape, moo go kgonegago, go bewa ka dipothefoliong tše dingwe le tše dingwe tšeo di filwego diphathi tša bona go ya ka dipeelano tša phapantšho.
(7)	Dikopano tša Khuduthamaga di swanetše go etwa pele ke Tonakgolo ya profense.
(8)	Khuduthamaga e swanetše go šoma ka tsela ye e lego gore e hlokomela bohlokwa bja go tsoma kwano ka moya wo o lego ka kgopolong ya mmušo wa mohlakanelwa, gammogo le bohlokwa bja pušo ye e šomago gabotse.'.
2.	Karolo ya 136 ya Molaotheo wo mofsa e tšewa gore e balega ka tsela ye:
	'(3)	Maloko a Dikhuduthamaga a ikarabela mongwe le mongwe go Tonakgolo le go thteramelao ya profense malebana le taolo ya dipotfolio tša bona, mme maloko a mangwe ka moka a Khuduthamaga, le wona bjalo, a ikrabela ka seboka mabapi le phethagatšo ya mediro ya mmušo wa profense le go melawana ya wona.
(4)	Maloko a Dikhuduthamaga a swanetše go laola dipoptfolio tša ona go ya ka morero wo o beilwego ke Khansele.
(5)	Ge leloko la Khuduthamaga le šitwa ke go laola potfolio ya lona go ya ka morero wa Khuduthamaga, Tonakgolo a nyaka gore leloko leo le amegago le kuke taolo ya potfolio ya lona gore e tle e nyalelane le molawana woo.
(6)	Ge leloko leo le amegago le šitwa ke go ikamanya le nyakego ya Tonakgolo ka tlase ga karolwana(5), Tonakgolo a ka tloša leloko leo modirong morago ga go rerišana le leloko, mme ge leloko leo e se leloko la phathi ya Tonakgolo goba e se moetapele wa phathi ye e kgathago tema, le gona morago ga ditherišano le moetapele wa phathi ya leloko leo.'.
KOKETŠO D
TSHEPEDIŠO YA MERERO YA SETŠHABA LE DITIRELO TŠA TŠHIRELETŠO: DIPHETOŠO GO DIKAROLO TŠA MOLAOTHEO WA PELENG
1.	Phetošo ya karolo ya 218 ya Molaotheo wa peleng-
(a)	ka go tloša mo karolwaneng (1)	mantšu ao a tlago pele ga	temana (a)	mme gwa bewa mantšu a a latelago:
	'(1)	Go ya ka ditaelo tša Tona ya Polokego le Tšhireletšo, Komišenare ya Setšhaba e tla rwala maikarabelo godimo ga-';
(b)	ka go tloša temana ya (b)	ya karolwana (1)	mme gwa bewa temana ye e latelago:
	'(b)	peo ya dikomišenara tša diprofense;';
(c)	ka go tlosa temana (d)	ya karolwana (1)	mme gwa bewa temana ye e latelago:
	'(d)	nyakišišo le thibelo bosenyi bja dihlopha goba bosenyi bjo bo nyakago nyakišišo le thibelo ya setšhaba goba botsebi bjo ikgethago; le;
(d)	ka go tloswa temana ya (k)	ya karolwana ya (1)	mme gwa bewa temana ye e latelago: 
	'(k)	go hlongwa le go lotwa ga kagišo setšhabeng, mephato ya maphodisa e swanetše go dirišwa go thekga le ge e kgopelwa ke Komišinare wa Profense;'.
2.	Phetošo ya karolo ya 218 ya Molaotheo wa peleng ka go tloša karolwaneng ya (1)	mantšu a temana ya (a)	ye e fetilego ka mantšu ao a latelago:
	'(1)	Go ya ka karolo ya 218(1), Komišenare wa Profense o tla rwala maikarabelo a-'.
3.	Phetošo ya karolo ya 224 ya Molaotheo wa peleng ka go tloša tlhagišo ya karolwaneng ya (2)	ka mantšu ao a latelago:
'Ge fela karolwana ye le yona e tlo šoma godimo ga maloko a madira afe goba afe ao a neetšego lenaneo la ona la bahlankedi morago ga go thoma go šoma ga Molaotheo wa Afrika Borwa, 1993 (Molao wa 200 wa 1993), eupša pele ga go amogelwa ga sengwalwa sa molaotheo bjalo ka ge go ukangwe mo karolong ya 73 ya Molaotheo woo, ge lekgotla la dipolitiki leo e lego ka fase ga bolaodi le taolo ya lona goba yeo e amanego le yona mme e tšwetšago pele maikemišetšo a yona mo go Khansele ya Khuduthamana ya Phetišetšo mme a kgathilego tema mo dikgethong tša mathomo tša Kgobokano ya Setšhaba, le ditheramelaong tša Diprofense ka tlase ga Molaotheo woo o boletšwego.'.
4.	Phetošo ya karolo ya 227 ya Molaotheo wa peleng ka go tloša karolwana ya (2)	ka mantšu ao a latelago:
	'(2)	Mašole a Tšhireletšo a Setšhaba a tla diriša maatla a ona mme a phethagatša mediro ya ona go thekga dikgahlego tša setšhaba fela go ya ka Kgaolo ya 11 ya Molaotheo wa Repabliki ya Afrika Borwa, wa 1996.'.
5.	Phetošo ya karolo ya 236 ya Molaotheo wa peleng-
(a)	Ka go tloša karolwana ya (1)	ka karolwana ye e latelago:
	'(1)	Tirelo ya setšhaba, kgoro ya mmušo, taolo goba tirelo ya tšhireletšo yeo pejana ga go thoma ga Molaotheo wa Repabliki ya Afrika-Borwa, 1996 (moragonyana o bitšwago “Molaotheo wo mofsa”), di bego di phetagatša mešomo ya mmušo, di tšwela pele ka mediro ya tšona go ya ka dipeelano tša molao wo o šomago go yona go fihla ge e fedišwa goba e kopanywa goba e amantšhwa le sehlongwa se maleba goba e ntšhiwa ka phokotšo goba e tlemagantšhwa le sehlongwa se sengwe le se sengwe.'; 
(b)	Ka go tloša karolwana ya (6)	ka karolwana ye e latelago: 
'(6)(a)	Mopresitente a ka bea khomišene go lekola phetšo goba phetošo ya kwano, peo goba tšwetšopele goba kabelo ya pakatiro goba peelano ya tirelo goba dikholo tše dingwe, tšeo di hlolegilego magareng a 27 Aprele 1993 le 30 Setemere 1994 malebana le motho mang le mang yo a ukangwego mo go karolwana (2)	goba batho ba mohuta woo.
(b)	Khomišene e ka bušetša morago goba ya fetola	kwano, peo, tlhatlošo goba kabo ge e sa loka goba ge e sa kgotsofatše mabakeng a taba yeo.'; gomme 
(c)	ka go tloša ‘Molaotheo wo,’ mo e lego gona karolong ya 236, gomme gwa bewa ‘Molaotheo wo mofsa'.
6.	Phetošo ya karolo ya 237 ya Molaotheo wa peleng -
(a)	ka go tloša temana ya (a)	ya karolwana ya (1)	ka karolwana ye e latelago:
	'(a)	Peakanyo ya dihlongwa ka moka tše di ukangwego mo karolong ya 236(1), ka ntle le mefato ya madira yeo e ukangwego karolong ya 224(2), e tla tšwela pele ka go šoma morago ga go go thoma go šoma ga Molaotheo wa Repabliki ya Afrika Borwa, wa 1996, ka nepo ya go hloma-
(i)	tshepedišo ye kaone makaleng a setšhaba a mmušo go phethagatša merero yeo e lego taolong ya lekala la setšhaba; le
(ii)	tshepedišo ye kaone ya profense ye nngwe le ye nngwe go šomana le merero yeo e welago taolong ya mmušo wa profense ye nngwe le ye nngwe.'; le
(b)	ka go tloša temanyana (i)	ya karolwana ya(2)(a)	gomme gwa bewa temanyana ye e latelago: 
'(i)	dihlongwa tšeo di ukangwego karolong ya 236(1), ka ntle le masolo a mašole, di tla ba magetleng a mmušo wa setšhaba, woo o tlogo šikara boikarabelo bja tšona ka thušano le mebušo ya diprofense ;'.
7.	Phetošo ya karolo ya 239 ya Molaotheo wa peleng ka go tloša karolwana ya (4)	ka karolwana ye e latelago:
	'(4)	Ka taolo ya le go latela molao ofe goba ofe wo o šomago, dithoto, ditokelo, metšhelo ya dithoto le dikoloto tša madira kamoka tše di ukangwego karolong ya 224(2)	di tla tšwa go Mašole a Tšhireletšo a Setšhaba go ya ka ditaelo tša Tona ya Tshireletšo.'.
Šetulo 6A
GO TŠWETŠAPELE BOLELOKO BJA KOPANO YA MALOKO A PALAMENTE KA MOKA GOBA BJA MALOKO A LEKGOTLAPEAMELAO LA PROFENSE, KA MORAGO GA PHETOGO YA BOLELOKO BJA DIPHATHI, GO KOPANA GA DIPHATHI, KAROGANO YA DIPHATHI LE KAROGANO LE GO KOPANA GA DIPHATHI 
[Šetulo 6A e tsentšwe ke karolwana ya 6 ya Molao wa 2 wa 2003.]
1	Tlhalošo
	Ka mo Šetulong ye 'lekgotlapeamelao' le ra Kopano ya Maloko a Palamente ka Moka goba legotlapeamelao le lengwe le le lengwe la profense.
2	Go tšwetšapele boleloko bja lekgotlapeamelao lebakeng la phetogo ya boleloko bja phathi
(1)	Go ya ka karolo ya 4, leloko la lekgotlapeamelao la profense leo e bago leloko la phathi (phathi e mpsha) yeo e sego phathi yeo e kgethilego motho yoo bjalo ka leloko (phathi yeo e kgethago), e ka ba e le gore phathi e mpsha e kgathile tema ka dikgethong goba aowa, o tla tšwelepele go ba leloko la lekgotlapeamelao ge leloko leo, e ka ba ka boyena goba gammogo le o tee goba maloko a mangwe ao,	nakong yeo e ukangwego go karolwana ya 4 (1)(a)	goba (b)	,	ba se sa ba maloko a phathi yeo e kgethago, ba emela dipersente tšeo di sego ka fase ga 10 tša palomoka ya palo ya ditulo tšeo di swerwego ke phathi yeo e kgethago ka lekgotlapeamelaong leo.
(2)	Setulo seo e swerwego ke leloko leo le ukangwego go karolwana ya (1)	se tšewa gore se abetšwe phathi e mpsha yeo leloko le e emelago.
3	Go tšwetšapele boleloko bja lekgotlapeamelao lebakeng la go kopana ga diphathi, karogano ya diphathi le karogano le go kopana ga diphathi
(1)	Go ka karolo ya 4, phathi efe goba efe (phathi ya peleng) yeo e emelwago ka lekgotlapeamelaong e ka-
(a)	kopana le phathi e nngwe, e ka ba phathi yeo e kgathile tema ka dikgethong goba aowa; goba
(b)	arogana ka diphathi tša go feta e tee goba ya arogana le karogano ye nngwe le ye nngwe e ka kopana le phathi e nngwe, e ka ba phathi yeo e kgathile tema ka dikgethong goba aowa, ge maloko a karogano ao a tlogelago phathi ya peleng a emela ba emela dipersente tšeo di sego ka fase ga 10 tša palomoka ya palo ya ditulo tšeo di swerego ke phathi ya peleng ka go lekgotlapeamelao leo.
(2)	Ge phathi e kopana le phathi e nngwe goba e arogana ka diphathi tša go feta e tee goba ya arogana le karogano ye nngwe le ye nngwe e ka kopana le phathi e nngwe go ya ka karolwana ya (1), maloko ao a amegago a tšwelapele go ba maloko a lekgotlapeamelao leo le ditulo tšeo di swerwego ke bona di tšewa bjalo ka tšeo di abetšwego phathi yeo ba e emelago	go latela kopano efe goba efe, karogano goba karogano le Kopano yeo e ukangwego karolwaneng ya (1).
4	Nako ya tiragatšo ya dikarolo tša 2 le 3 le dinyakego tše dingwe
(1)	Ditlhagišo tša dikarolo tša 2 le 3 di šoma fela-
(a)	mo nakong ya matšatši a 15 go tloga letšatšing la mathomo go ya letšatšing la bolesomehlano la Setemere ngwageng wa bobedi wo o latelago letšatšikgwedi la dikgetho tša lekgotlapeamelao; le
(b)	mo nakong ya matšatši a 15 go tloga letšatšing la mathomo go ya letšatšing la bolesomehlano la Setemere ngwageng wa bone wo o latelago letšašikgwedi la dikgetho tša lekgotlapeamelao.
(2)	Lebakeng la karolwana ya (1)	'ngwaga' o ra nako ya matšatši a 365.
(3)	Nako ye nngwe le ye nngwe yeo e ukangwego karolwaneng ya (1)(a)	le (b)	-
(a)	leloko la lekgotlapeamelao le ka fetoša boleloko bja phathi gatee fela, ka go tsebiša Spikara sa lekgotlapeamelao ka go ngwala le go tliša go Sipakara tiišetšo ya go tšwa go phathi yeo ya gore o amogetšwe bjalo ka leloko la phathi yeo; le
(b)	phathi e ka re gatee ya-
(i)	kopana le phathi e nngwe;
(ii)	arogana ka diphathi tša go feta e tee; goba
(iii)	arogana le karogano efe goba efe e ka kopana le phathi e nngwe, 
	ka go tsebiša Spikara sa lekgotlapeamelao ka go ngwala le go tliša go Sipakara tiišetšo ya go tšwa go phathi yeo maina a maloko ka moka ao a amegago ka kopanong goba ka karoganong, le gore phathi yeo e amogetše kopano yeo; le
(c)	ga go na phathi yeo e emetšwego ka lekgotlapeamelaong yeo e ka-
(i)	fegago goba ya fediša boleloko bja leloko leo le emelago phathi yeo ka lekgotlapeamelaong leo; goba
(ii)	dira tiro efe goba efe yeo e ka dirago gore leloko leo le rakwe mošomong le go ba leloko, 
	ka ntle ga tumelo ye e ngwadilwego ya leloko leo le amegago.
(4)	Phathi yeo e sego ya ingwadišago go ya ka molao wo itšego wa boingwadišo bja diphathi tša dipolotiki e tšewa bjalo ka phathi lebakeng la Šetulo ye, efela phathi yeo e swanetše go dira dikgopelo tša bingwadišo bjalo ka phathi go ya ka molao wo itšego mo nakong yeo e ukangwego karolwaneng ya (1)(a)	goba (b). Ge phathi e se ya ingwadiša mo dikgweding tše nne ka morago ga go fela ga nako yeo, e tšewa bjalo ka yeo e sa hlwago e le gona, gomme ditulo tšeo tša yona di swanetše go abelwa diphathi tšeo di šetšego go ya ka molao wo o amegago.
5	Sebopego sa lekgotlapeamelao se tšwelapele go fihlela dikgetho goba se hlangwa gape go ya ka Šetulo
(1)	Ka morago ga go fela ga nako yeo e ukangwago karolong ya 4 (1)(a)	goba (b), sebopego sa lekgotlapeamelao seo se hlamilwego gape ka lebaka la maitshwaro a itšego go ya ka karolo ya 2 goba 3 se tšwelapele go fihlela dikgetho tšeo di latelago tša lekgotlapeamelao leo goba go fihlela sebopego sa lekgotlapeamelao se hlangwa gape go ya ka karolo ya 2 goba 3.
(2)	Mo matšatšing a šupago ka morago ga go fela ga nako yeo e ukangwego karolong ya 4 (1)(a)	goba (b)	, phathi efe goba efe yeo e emetšwego ka lekgotlapeamelaong leo le ukangwego karolong ya (1)	le swanetše go tliša lenaneo la bonkgetheng go Mongwaledi wa lekgotlapeamelao.
(3)	Spikara sa lekgotlapeamelao leo le ukangwego karolong ya (1)	o swanetše, mo matšatšing a šupago ka morago ga go fela ga nako yeo e ukangwego karolong ya 4 (1)(a)	goba (b), go phatlalatša Tsebišo ka Kuranteng ya Mmušo yeo e swanetšego go laetša-
(a)	palo ya ditulo tšeo di filwego phathi ye nngwe le ye nngwe yeo e emetšwego ka lekgotlapeamelaong leo; le
(b)	leina la, le phathi yeo e emetšwego ke, leloko le lengwe le le lengwe.
6	Dithulaganyo tša phetelo mabapi le go tšwetšapele ga boleloko bja lekgotlapeamelao mabakeng a phetogo ya boleloko bja diphathi, karogano ya diphathi le karogano le go kopana ga diphathi 
(1)	Nakong ya matšatši a 15 ka bonako go latela letšatšikgwedi la go thoma go šoma ga Šetulo ye-
(a)	leloko la lekgotlapeamelao la profense le ka ba leloko la phathi e nngwe (phathi e mpsha), e ka ba e le gore phathi e mpsha e kgathile tema ka dikgethong goba aowa, mo la a tla tšwelepele go ba leloko la lekgotlapeamelao leo le amegago, gomme setulo seo se swerwego ke leloko leo se swantšwe go tšewa gore se abetšwe phathi yeo e mpsha yeo leloko leo e lego leloko la yona; le
(b)	phathi efe goba efe yeo e emetšwego ka go lekgotlapeamelao e ka-
(i)	kopana le phathi e nngwe, e ka ba phathi yeo e kgathile tema ka dikgethong goba aowa; goba
(ii)	arogana ka diphathi tša go feta e tee goba ya arogana le karogano ye nngwe le ye nngwe e ka kopana le phathi e nngwe, e ka ba phathi yeo e kgathile tema ka dikgethong goba aowa,
	mola maloko ao a amegago a tšwelapele go ba maloko a lekgotlapeamelao leo le ditulo tšeo di swerwego ke bona di tšewa bjalo ka tšeo di abetšwego phathi yeo ba e emelago	go latela kopano efe goba efe, karogano goba karogano le Kopano yeo e ukangwego temaneng ye.
(2)	Ditlhagišo tša dikarolo tša 4 (3)	le (4)	le karolo ya 5 gape di a šoma go ya ka karolwana ya (1), gomme kukamo efe goba efe ya nako yeo e ukangwego karolong ya 4 (1)(a)	goba (b)	e swanetše go tšewa bjalo ka kukamo ya nako yeo e ukanwgego karolwaneng ya (1).
Šetulo 6B
GO LAHLEGELWA GOBA GO TŠWETŠAPELE BOLELOKO BJA DIKHANSELE TŠA MMASEPALA, KA MORAGO GA PHETOGO YA BOLELOKO BJA DIPHATHI, GO KOPANA GA DIPHATHI, KAROGANO YA DIPHATHI LE KAROGANO LE GO KOPANA GA DIPHATHI, LE GO TLATŠA GA DIKGOBA
[Šetulo 6B, peleng e be e le Šetulo 6A, e tsentšwe ke karolwana ya Molao wa Boseswai wa Go fetoša Molaotheo wa 2002 , o fetotšwego ke karolwana ya Molao wa Bolesome wa Go fetoša Molaotheo wa 2003, ebile e nomorilwe gape ka karolo ya 6 ya Molao wa 2 wa 2003 gomme o phumotšwe ke Molao wa Bolesomenne wa Go fetoša Molaotheo wa 2008.]
1	Go lahlegelwa goba go tšwetšapele boleloko bja Khansele
(1)	Mokhanselara yoo a sa emelego wate o lahlegelwa ke go ba leloko la Khansele ya Mmasepala ge mokhanselara yoo, ka ntle le go ya ka dikarolo tša 2, 3 le 7, a lahlegelwa ke go ba leloko la phathi yeo e kgethilego mokhanselara yoo bjalo ka leloko la Khansele.
(2)	Mokhanselara yoo a emelago wate o lahlegelwa ke go ba leloko la Khansele ya Mmasepala ge mokhanselara yoo, ka ntle le go ya ka dikarolo tša 2, 3 le 7-
(a)	a lahlegelwa ke go ba leloko la phathi yeo e kgethilego mokhanselara yoo bjalo ka nkgetheng wa dikgetho tša wate; goba
(b)	a se a kgethwa ke phathi e fe goba efe bjalo ka nkgetheng wa dikgetho tša wate a e ba leloko la phathi.
2	Go tšwetšapele boleloko bja lekgotlapeamelao lebakeng la phetogo ya boleloko bja phathi 
(1)	Go ya ka karolo ya 4, mokhanselara-
(a)	yo a sa emelego wate, yoo e lego leloko la phathi yeo e emetšwego ka Khanseleng yeo ya Mmasepala (phathi ya peleng) e lego yoo e bago leloko la phathi e nngwe (phathi e mpsha), e ka ba e le gore phathi e mpsha e kgathile tema ka dikgethong goba aowa, o tšwelepele go ba mokhanselara wa Khansele yeo; goba
(b)	yoo a emelago wate ka Khanseleng yeo,	o tšwelapele go ba mokhanselara wa wate yeo, ge mokhaselara yoo-
(i)	a kgethilwe ke phathi yeo (phathi ya peleng) bjalo ka nkgetheng ka dikgethong tša wate le-
	(aa)	a lahlegelwa ke go ba leloko la phathi yeo ya peleng ebile a eba leloko la phathi e nngwe (phathi e mpsha), e ka ba e le gore phathi e mpsha e kgathile tema ka dikgethong goba aowa; goba
	(bb)	a lahlegelwa ke go ba leloko la phathi yeo ya peleng ebile a sa be leloko la phathi e nngwe; goba 
(ii)	a se a kgethwe ke phathi bjalo ka nkgetheng ka dikgethong tša wate ebile e e ba leloko la phathi, e ka ba e le gore phathi e kgathile tema ka dikgethong goba aowa,
	ge mokhanselara yoo a ukangwego ditemaneng tša (a)	le (b)(i), e ka ba ka boyena goba gammogo le o tee goba makhanselara a mangwe ao, nakong yeo e ukangwego go karolwana ya 4 (1)(a)(i)	goba (b)(ii),	ba se sa ba maloko a phathi ya peleng, ba emela dipersente tšeo di sego ka fase ga 10 tša palomoka ya palo ya ditulo tšeo di swerwego ke phathi ya peleng ka Khanseleng yeo.
(2)	Setulo seo e swerwego ke leloko leo le ukangwego go karolwana ya (1)(a)	se swanetše go tšewa gore se abetšwe phathi e mpsha yeo mokhanselara e bilego leloko la yona.
(3)	Wate yeo e emetšwego ke mokhanselara woo a ukangwego karolwaneng ya (1)(b)	o swanetše go tšewa gore o-
(a)	e abetšwe phathi yeo mokhanselara yoo e bilego leloko la yona; goba
(b)	e hweditšwe ke mokhanselara woo, ge e le gore mokhanselara woo ga se ya ba leloko la phathi e nngwe.
3	Go tšwetšapele boleloko bja Khansele lebakeng la go kopana ga diphathi, karogano ya diphathi le karogano le go kopana ga diphathi
(1)	Go ka karolo ya 4, phathi efe goba efe (phathi ya peleng) yeo e emelwago ka Khanseleng ya Mmasepala e ka-
(a)	kopana le phathi e nngwe, e ka ba phathi yeo e kgathile tema ka dikgethong goba aowa; goba
(b)	arogana ka diphathi tša go feta e tee goba ya arogana le karogano ye nngwe le ye nngwe e ka kopana le phathi e nngwe, e ka ba phathi yeo e kgathile tema ka dikgethong goba aowa, ge maloko a karogano ao a tlogelago phathi ya peleng a emela ba emela dipersente tšeo di sego ka fase ga 10 tša palomoka ya palo ya ditulo tšeo di swerego ke phathi ya peleng ka go Khansele yeo.
(2)	Ge phathi e kopana le phathi e nngwe goba e arogana ka diphathi tša go feta e tee goba ya arogana le karogano ye nngwe le ye nngwe e ka kopana le phathi e nngwe go ya ka karolwana ya (1), makhanselara ao a amegago a tšwelapele go ba maloko a Khansele ya Mmasepala le ditulo tšeo di swerwego ke bona di tšewa bjalo ka tšeo di abetšwego phathi yeo ba e emelago	go latela kopano efe goba efe, karogano goba karogano le kopano yeo e ukangwego karolwaneng ya (1).
4	Nako ya tiragatšo ya dikarolo tša 2 le 3 le dinyakego tše dingwe
(1)	Ditlhagišo tša dikarolo tša 2 le 3 di šoma fela-
(a)	mo nakong ya matšatši a 15 go tloga letšatšing la mathomo go ya letšatšing la bolesomehlano la Setemere ngwageng wa bobedi wo o latelago letšašikgwedi la dikgetho tša Dikhansele tša Bommasepala; le
(b)	mo nakong ya matšatši a 15 go tloga letšatšing la mathomo go ya letšatšing la bolesomehlano la Setemere ngwageng wa bone wo o latelago letšatšikgwedi la dikgetho tša Dikhansele tša Bommasepala.
	eupša ga di šome ngwageng wo o felago ka la 31 Desemere 2002.
(b)	Lebakeng la temana ya (1)	'ngwaga' o ra nako ya matšatši a 365.
(2)	Nako ye nngwe le ye nngwe yeo e ukangwego karolwaneng ya (1)(a)(i)	goba (ii)-
(a)	mokhanselara a ka re gatee-
(i)		a fetoša boleloko bja phathi;
(ii)	a ba leloko la phathi; goba
(iii)	a se sa ba leloko la phathi,
	ka go tsebiša mohlankedi yoo a kgethilwego ke Khomišene ya Dikgetho ka go ngwala, gomme ge mokhanselara woo a fetošitše boleloko bja phathi goba e bile leloko la phathi, ka go tliša tiišetšo ya go ngwalwa go mohlankedi woo yeo e tšwago go phathi yeo e amegago gore o amogetšwe bjalo ka leloko la phathi yeo; gomme
(b)	phathi e ka re gatee ya-
(i)	kopana le phathi e nngwe;
(ii)	arogana ka diphathi tša go feta e tee; goba
(iii)	arogana le karogano efe goba efe e ka kopana le phathi e nngwe, 
	ka go tsebiša mohlankedi yoo a kgethilwego ke Khomišene ya Dikgetho ka go ngwala, le ka go tliša tiišetšo ya go ngwalwa go mohlankedi woo yeo e tšwago go phathi-
	(aa)	maina a makhanselara ka moka ao a amegago ka kopanong goba ka karoganong yeo; le 
	(bb)	gore e amogetše kopano yeo; gomme
(c)	ga go na phathi yeo e emetšwego ka Khanseleng ya Mmasepala yeo e ka-
(i)	fegago goba ya fediša boleloko bja mokhanselara yo a emelago phathi yeo ka Khanseleng yeo; goba
(ii)	dira tiro efe goba efe yeo e ka dirago gore mokhanselara woo a rakwe mošomong bjalo ka mokhanselara ka Khanseleng yeo, 
	ka ntle ga tumelo ye e ngwadilwego ya mokhanselara yo a amegago.
5	Sebopego sa Khansele ya Mmasepala se tšwelapele go fihlela dikgetho goba ge dikgetho tša tikologo, goba se hlangwa gape go ya ka Šetulo
(1)	Ka morago ga go fela ga nako yeo e ukangwago karolong ya 4 (1)	(a, sebopego sa Khansele ya Mmasepala, seo se hlamilwego gape ka lebaka la maitshwaro a itšego go ya ka karolo ya 2 goba 3, se tšwelapele go fihlela dikgetho tšeo di latelago tša Makhanselara a Mmasepala ka moka goba go fihlela sebopego sa Khansele yeo ya Mmasepala se hlangwa gape go ya ka karolo ya 2 goba 3 goba go fihlela ge dikgetho tša tikologo di swarwa moo Khanseleng ya Mmasepala.
6	Go hlama gape ga Dikhansele tša Mmasepala 
(a)	Khansele ya Mmasepala yeo e ukangwago karolong ya 5 yeo e kgethago maloko a Khansele e nngwe ya Mmasepala, ka ge go ukangwe karolong ya 157 (1)(b), e swanetše gore mo matšatšing a 15 a go fela ga nako yeo e ukangwego karolong ya 4 (1)(a)(i)	goba (ii) e šomiše gape tshepedišo yeo e ukangwego ka molaong wa naga ya go kgetha maloko ao go emela Khansele yeo e kgethago.
(b)	Mo matšatšing a 30 a go fela ga nako yeo e ukangwego go karolo ya 4 (1)(a)(i)	goba (ii), mafapha ka moka le dikomiti tša-
(i)	Mmasepala wa Legoro la A le wa Legoro la B yeo e ukangwego karolong ya 5 e swanetšwe go hlangwa gape go ya ka molao woo o amegago; le
(ii)	Mmasepala wa Legoro la C wo o ukangwego karolong ya 5 o swanetšwe go hlangwa gape go ya ka molao woo o amegago ka morago ga ge dikgetho ka moka tšeo di ukangwego temaneng ya (a)	di dirilwe go ya ka mmasepala woo wa Legoro la C.
7	Dithulaganyo tša phetelo mabapi le go tšwetšapele ga boleloko bja Makhanselara a Mmasepala mabakeng a phetogo ya boleloko bja diphathi, karogano ya diphathi le karogano le go kopana ga diphathi 
(1)	Nakong ya matšatši a 15 ka bonako go latela letšatšikgwedi la go thoma go šoma ga Šetulo ye-
(a)	mokhanselara yo a kgethilwego go tšwa lenanenong la phathi la phathi yeo e emetšwego ka Khanseleng ya Mmasepala (phathi ya peleng, e ka ba leloko la phathi e nngwe (phathi e mpsha), e ka ba e le gore phathi e mpsha e kgathile tema ka dikgethong goba aowa, mola a tla tšwelepele go ba mokhanselara wa Khansele ya Mmasepala yeo e amegago gomme setulo seo se swerwego ke mokhanselara yoo se swantšwe go tšewa gore se abetšwe phathi yeo e mpsha yeo mokhanselara e lego leloko la yona; 
(b)	mokhanselara yoo a kgethilwego go emela wate ka Khanseleng ya Mmasepala ebile e le yoo a-
(i)	a kgethilwe ke phathi go ba nkgetheng ka dikgethong tša wate, a ka lahlegelwa ke go ba leloko la phathi ya peleng gomme ya ba leloko la phathi e mpsha, e ka ba e le gore phathi e mpsha e kgathile tema ka dikgethong goba aowa, goba a ka lahlegelwa ke go ba leloko la phathi ya peleng gomme ya se sa ba leloko la phathi e mpsha; goba 
(ii)	a se a kgethwa ke phathi bjalo ka nkgetheng wa dikgetho tša wate, e ka ba leloko la phathi, e ka ba e le gore phathi yeo e kgathile tema ka dikgethong goba aowa,
	 gomme wate yeo e emetšwego ke mokhanselara woo e swanetše go tšewa gore e-
(aa)	e abetšwe phathi	e mpsha yeo mokhanselara yoo e	bilego leloko la yona; goba
	 (bb)	e hweditšwe ke mokhanselara woo, ge e le gore mokhanselara woo ga se ya ba leloko la phathi e nngwe; gomme
(c)	phathi efe goba efe ya dipolotiki yeo e emetšwego ka Khanseleng ya Mmasepala e ka-
(i)	kopana le phathi e nngwe, e ka ba phathi yeo e kgathile tema ka dikgethong goba aowa; goba
(ii)	arogana ka diphathi tša go feta e tee goba ya arogana le karogano ye nngwe le ye nngwe e ka kopana le phathi ye nngwe, e ka ba phathi yeo e kgathile tema ka dikgethong goba aowa,
	mola makhanselara ao a amegago a tšwelapele go ba maloko a khansele yeo le ditulo tšeo di swerwego ke bona di tšewa bjalo ka tšeo di abetšwego phathi yeo ba e emelago	go latela kopano efe goba efe, karogano goba karogano le kopano yeo e ukangwego temaneng ye.
(2)	Ditlhagišo tša dikarolo tša 4 (2), 5 le 6 di a šoma go ya ka karolwana ya (1), gomme kukamo efe goba efe ya nako yeo e ukangwego karolong ya 4 (1)(a)(i)	goba (i)	e swanetše go tšewa bjalo ka kukamo ya nako yeo e ukangwego karolwaneng ya (1).
8	Go tlatšwa ga dikgoba
	Dikgoba ka Khanseleng ya Mmasepala di swanetše go tlatšwa go ya ka molao wa naga.
9	......
[Karolo ya 9 e phumotšwe ka karolo ya 5 ya Molao wa 2 wa 2003.]
Šetulo 7
MELAO YE E PHUMOTŠWEGO
Nomoro le Ngwaga wa Molao
Leina
Molao wa 200	wa 1993
Molaotheo wa Repabliki ya Afrika Borwa, 1993
Molao wa 2 wa 1994
Molao wa Go fetoša Molaotheo wa Repabliki ya Afrika Borwa, 1994
Molao wa 3 wa 1994
Molao wa Bobedi wa Go fetoša Molaotheo wa Repabliki ya Afrika Borwa, 1994
Molao wa 13 wa 1994
Molao wa Boraro wa Go fetoša Molaotheo wa Repabliki ya Afrika Borwa, 1994
Molao wa 14 wa 1994
Molao wa Bone wa Go fetoša Molaotheo wa Repabliki ya Afrika Borwa, 1994
Molao wa 24 wa 1994
Molao wa Botshelela wa Go fetoša Molaotheo wa Repabliki ya Afrika Borwa, 1994
Molao wa 29 wa 1994
Molao wa Bohlano wa Go fetoša Molaotheo wa Repabliki ya Afrika Borwa, 1994
Molao wa 20 wa 1995
Molao wa Go fetoša Molaotheo wa Repabliki ya Afrika Borwa, 1995
Molao wa 44 wa 1995
Molao wa Bobedi wa Go fetoša Molaotheo wa Repabliki ya Afrika Borwa, 1995
Molao wa 7 wa 1996
Molao wa Go fetoša Molaotheo wa Repabliki ya Afrika Borwa, 1996
Molao wa 26 wa 1996
Molao wa Boraro wa Go fetoša Molaotheo wa Repabliki ya Afrika Borwa, 1996
TŠHUPANE
(Hlokomela: Nomoro ye e tšwelelago ka morago ga tlhalošo, ke nomoro ya karolo yeo tlhalošo e hwetšwago go yona.)
Koša, 4
Mohlakišikakaretšo. 181, 188
Molao wa Ditokelo –
	Tumelelo go dikgorotsheko, 	34
	Tumelelo ya tshedimošo, 	32
	Tirišo, 8
	Batho bao ba swerwego, ba golegilwego le bao ba latofatšwago, 35
	Kgobokano, tšhupetšo, kgwabo le ngongorego, 17
	Bana. 28
	Boagi, 20
	Dihlopha tša setšo, bodumedi le tša polelo, 31
	Thuto, 29
Phethagatšo ya ditokelo, 38
Tikologo, 24
Tekano, 9
Seriti sa botho, 10
Tokologo ya tšhireletšo ya motho, 12
Tokologo ya kwano, 18
Tokologo ya mosepelo le madulo, 21
Tokologo ya go gweba, m ošomo le profešene,22
Tlhokomelo ya tša maphelo, dijo, meets le tšhireletšo ya leago, 27
Kago ya dintlo, 26
Tlhathollo, 39
Dikamano medirong, 23
Polelo le setšo, 30
Bophelo, 11
Phokotšo ya ditokelo, 36
Ditokelo le polotiki, 19
Sephiri, 14
Dithoto, 25
Kgatotaolo ye e lokilego, 33
Bokgoba, Bohlanka, le go šomišwa ka kgapeletšo, 13
Maemo a tšhoganetšo, 37
Kgašo, Bolaodi bjo bo Ikemetšego bja go Laola, 181, 192
Ditekanyetšo, 215
Pankakgolo, 223-225
Mmušo wa Mohlakanelwa, 41
Boagi, 3
Khomišene ya tekano yabong, 181, 187
Khomišene ya Tšwetšopele le Tšhireletšo ya ditokelo tša setho, sedumedi, le dihlopha tša Maleme, 181, 185, 186
Melao ye e fapanago, 146-150
Dikgorotsheko –
	Kgorotsheko ya Molaotheo, 167
	Kgorotsheko ya Godimo, 169
	Dikgorotsheko tša bomaseterata le tše dingwe, 170
	Maatla a dikgorotsheko mererong ya Molaotheo, 172
	Kgorokgolo ya Boipiletšo, 168
Tšhireletšo, 200-204
Khomišene ya Dikgetho, 181, 190, 191
Ditshepedišo tša kgetho tša Bahlankedi ba Molaotheo, Šetulo 3, Karolo A
Bolaodiphethiši
	Diprofense, 25
Repabliki, 85
Dikhansele tša Dikhuduthamaga, 132-142
Ditšhelete, setšhaba , 213, 214, 216, 217
Ditšhelete, profense le tikologo, 226-23
Khomišene ya Ditšhelete le Metšhelo, 220-222
Folaga ya Setšhaba, 5
Thekgo ya ditšhelete go diphathi tša polotiki, 236
Khomišene ya Ditokelo tša Botho, 181, 184
Bolaodi bjo ikemetšego bja go laola kgašo, 192
Botseka, 209, 210
Molao wa Boditšhabatšhaba, 231-233
Maatlaboahlodi
Bahlankedi ba toka, 174-177
Khomišene ya Ditirelo tša Toka, 178
Tshepedišo ya toka, 166
Maleme, 6
Go dira melao, 73-82
Maatla a go hloma Melao, 43, 44
Mmušoselegae, 152, 163
Bommasepala, 151-154
Kgobokano ya Setšhaba –
	Sebopego sa kgetho, 46
	Diphetho, 53
	Bohlatse goba tshedimošo pele ga Kgobokano ya Setšhaba, 56
	Maatla, 55
Tumelelo ya Setšhaba, 59
Khansele ya Setšhaba ya Diprofense –
	Kabo ya baemedi, 61
	Tlhamo, 60
	Diphetho, 65
	Bohlatse goba tshedimošo pele ga Khansele ya Setšhaba, 69
	Kgathotema ya baemedi ba mebušoselegae, 67
	Baemedi ba go ya go ile, 62
	Maatla, 68
	Tumelelo ya Setšhaba, 72
Plamente, 42
Maphodisa, 205-208
Ditonakgolo, 127-130
Mopresidente, 83-89
Bolaodi bja botšhotšhiši, 179
Diprofense, 103
Melaotheo ya diprofense, 142-145
Ditheramelao tša diprofense, 104-121
	Kgopelo ya Maloko go Kgorotsheko ya Molaotheo, 122
	Ditokelo tša baemedi ba go ya go ile ba ditheramelao tša diprofense, 113
	Tumelelo ya setšhaba, 118
Taolo ya merero ya Setšhaba, 195
Khomišene ya Ditirelo tša Setšhaba, 196
Tirfelo ya Setšhaba, 197
Mošireletši wa Setšhaba, 181, 182
Ditirelo tša Tšhireletšo, 198, 199
Boipopo, 235
Boglo bja Molaotheo, 2
Baetapele ba setšo, 211, 212
