Iindaba ngobufitjhani



I-GEPF kufanele ibuyisele ogade alipholisa imali



Umma ogade alipholisa gade kufanele abuyiselwe imali edoswe esikhwameni sakhe somhlalaphasi njengengcenye yokufunyanwa kwesikolodo somnyango. UmVikeli womPhakathi u-Lawrence Mushwana waphakamisa kobana umnghonghoyili abuyiselwe imalakhe ihlanganise namakonyana, ibalwe ukusuka ngedeyithi yokubhadalwa.



Lokhu kuze ngemva kwephenyo le-Ofisi yomVikeli womPhakathi elifumene kobana ikambiso eqintelwe siKhwama somHlalaphasi sabaSebenzi bakaRhulumende (GEPF) ngeManuwalinaso yeKambiso yokufunyanwa kwesikolodo somnyango ngokwesigaba 21 (3) somThetho, 1996 (umThetho we-GEPF) somHlalaphasi wabaSebenzi bakaRhulumende akukakhanjisanwa nayo.  



Kuragelwe phambili kwafunyanwa kobana isiqunto sokufunyanwa kwesikolodo somnyango eenrhubhelweni zomhlalaphasi zomnghonghoyili asikakhambisani neemfuneko zesiGaba 3 somThetho, 2000 wokuThuthukiswa kobuLungiswa bokuPhatha begodu ngalokho gade "ikambiso ayikalandela ngefanelo". 





USomlomo uphakamise ukuthathela iSekela lakaNgqongqotjhe amagadango 



USomlomo wendlu yesiBethamthetho seNarha wakhuthazwa ukuthathela iSekela lakaNgqongqotjhe weenDaba zeKhaya uMalusi Gigaba amagadango ngokukhambisani nesibopho sakhe somthethosisekelo sokusebenzisana ne-Ofisi yomVikeli womPhakathi (OPP). 



Lokhu kwaba ngemva kobana uMnu. Gigaba abhalelwe kusebenzisana nephenyo le-OPP ngezwangobatjho yokobana wathumela umkhakhe amathuthumbo athengwe ngemali yombuso kanye nokobana wabhadala amathikithi wesiphaphamtjhini kanye nokuqhatjhelwa kwabantu abambalwa iimodere ezehlakalweni ezimbalwa. 



Ngokulandela iphenyo, umVikeli womPhakathi u-Lawrence Mushwana waphakamisa kuSomlomo kobana athathe amagadango afaneleko ukuqinisekisa kobana ukubhalelwa kokusebenzisana kwakaMnu. Gigaba kuyethulwa.



Lokha iphenyo lifumene kobana iindleko ezibangwe li-ofisi lakaGigaba manqophana namathuthumbo athunyelwa kumkakhe gade zingakhambi ngokwehlelo, zinganamsebenzi begodu zikumotjha, liveze kobana izwangobatjho ephathelene neendleko zokukhamba ezenziwe li-ofisi leSekela lakaNgqongqotjhe gade zingasilo iqiniso.  



UGcwetha Mushwana uragele phambili waphakamisa bona umNqophisi-Zombelele womNyango uMavuso Msimang athuthukise indlela yokulawula imali ye-ofisi lakaMnu. Gigaba.



IPalamende kufanele itjheje ukwenziwa kweemphakamiso ze-NERSA 'ekucimeni kwegezi'



IKomidi yePalamende yomsebenzi omayelana  namandla wegezzi kufanele itjheje begodu ibike ukwenziwa ngesikhathi nangepumelelo kweemphakamiso ezenziwe yiHlangano yeliZweloke eLawula Amandla  weGezi yeSewula Afrika (NERSA) ngenyanga kaMrhayili 2008 ngokulandela iphenyo lokutlhayela kwegezi.  



Ingcenye ekulu yeSewula Afrika yahlangabezana nokutlhayela kwegezi kanye nokuthikamezeka kwamandla ngebanga "lokucinywa kwegezi" yikhamphani esebenzela umphakathi, i-Eskom. UmVikeli womPhakathi uLawrence Mushwana ukhuthaze uSomlomo wendlu yesibethemthetho senarha kobana athathe amagadango manqophana nalokhu.

 

Ingcenye ekulu yeSewula Afrika yahlangabezana nokutlhayela kwegezi kanye nokuthikamezeka kwamandla ukusuka ngenyanga kaSinyikhaba 2007 ukufika kuTjhirhweni 2008. 



"Itjhejo kanye neenqunto ezenziwe ephenyweni gade zikukuthi gade kunokuriyada engcenyeni karhulumende kobana athuthukise ikghono le- Eskom lokwenza igezi ngesikhathi esifaneleko nokobana isincancabezo somphakathi sanikelwa manqophana nemiraro eyabangwa kucima kwegezi," kwatjho uGcwetha Mushwana. 



Wangezelela wathi i-NERSA njengomtlhogomeli kanye nomjameli osebenzela urhulumende wephahla lamandla wokulawula elinikelwe mThetho, 2006 womThetholawulo weGezi inamandla negunya lokuqinisekisa bona iimphakamiso ezenziwe embikwenayo ziyasetjenziswa begodu nokobana i-Eskom ikhambisana nemibandela yelayisensayo kanye namalungiselelo afaneleko womThetho.







 

