Umlayezo obuya kumVikeli womPhakathi

Sele kuliqiniso elaziwako lokobana inarhethu njengezinye iinarha ezinengi isebujamweni obumbi bomnotho. Kwanjesi ubujamo obumbi bomnotho buligama esele liyifetjheni begodu elisetjenziswa khulu ziimbikiindaba begodu ngendlela yinye namkha ngenye siyathinteka ngesenzekwesi.

Njengombana siragela phambili nokuzwa ubuhlungu bobujamo obubudisobu bomnotho obufuna kobana sivikeleke ngokweemali, i-ofisami iragela phambili nokusebenza ngeenghonghoyilo zezondlo zomhlalaphasi ezijanyisiweko. Abamukeli bezondlwezi zizakhamuzi ezidala eziphakathi kweenqhema ezibuthakathaka enarhenethu begodu kanengi ezihlala emtlhagweni.  

Umlandu onjalo wesondlo esajanyisiwako ngileso sakaVho Mphephu oneminyaka ema-86 ubudala wesiFunda seLimpopo isondlo sakhe esajanyiswa pheze iminyaka emithathu ngezwangobatjho yokwabelana inomboro kamazisi nomunye umuntu esiFundeni se-Free State.  

Ngokulandela ukungena phakathi kwe-ofisami isondlo somhlalaphasi kaVho Mphephu sabuyiselwa godu begodu wafunyana inani elipheleleko akolodwa lona.  Ngiragele phambili nokuphakamisa kobana iHlangano yokuVikelwa komPhakathi yeSewula Afrika eLimpopo iqhatjhe isiqhenyana esizokuphenya indaba yezondlo ezijanyisiweko ngebanga lezwangobatjho yakwabelanwa kweenomboro zabomazisi njengombana lokhu kubonakala kumraro owenzeka kanengana. Ukusetjenziswa kweemphakamiswezi kuzokutjhejwa ngobuduze.

Lokha urhulumende enze iragelo phambili manqophana nokunikelwa kwabantu abatlhagako izindlu zentengo ephasi eminyakeni edlulileko, kuseseneenqabo ehlangothinelo.  Mhlapha nje i-ofisami iphenye isinghonghoyilo sabahlali beYunidi R no S eLebowakgomo ngokuphikisana nomNyango waboRhulumende beKhaya kanye nezeZindlu ngeLimpopo ngokubhalelwa kukwakhela nokuqeda izindlu ze-RDP zomphakathi.  

Iimphakamiso ezibuya e-ofisanami gade zikobana umNyango kufanele wakhe bewuqede izindlu zabo boke abamukeli iimbawo zabo eziphasiswe ngesikhathi.  Ukungezelela, amanani weenhlinzekelo ezisasebenzisekako kufanele zisetjenziselwe ukusiza abanghonghoyili njengombana intengo yezinto zokwakha ingezelelekile eminyakeni edlulileko. 

Ngesiqiniseko ukubika ubulelesi kuzokuba nomphumela wemiphakathi ephephileko ngesizathu leso i-ofisami yaphenya isinghonghoyilo somuntu obika ubulelesi esiphikisana neZiko lomSebenzi wesiPholisa seSewula Afrika (SAPS) ngokubhalelwa kuhlonipha isithembiso salo sokubhadala umtlomelo we-R75 000 ngemva kokunikela ilwazi elarholela ekubotjhweni kanye nokufunyanwa umlandu emlandwini wokudlelezela.  Ngemva kwephenyo ngaphakamisa bona i-SAPS ibhadale umghonghoyili umtlomelo ozeleko njengombana kwathenjiswa begodu nokobana esikhathini esizako i-SAPS ihloniphe ukubhadalwa kwemitlomelo lapho kwenziwe khona iinthembiso. 

Sibawa uze ngaphambili neenghonghoyilo zakho, i-ofisami itholakala eendaweni ezihlukahlukeneko zenarha begodu sinenomboro yomrhala engabhadalelwako, 0800 11 20 40   ongayisebenzisela ukwenza iinghonghoyilo.  Silindele ukuba nobudlelwano bokusebenza kanye nawe ukuqinisa intandoyenengi yomthethosisekelwethu. 



Bekube sikhathi esizako  



Gcwetha ML Mushwana





