IVeke yeemFunda, mhlazi - 07  11 kuSeptemba 2009

Ukwakheka kwePalamende yethu
IPalamende yeSewula Afrika ineziNdlu ezimbili:  
INdlu yesiBethamthetho seNarha (NA), enamalunga  ama-400, begodu, no
mKhandlu weNarha oNgamele iimFunda (NCOP), onamalunga ama-90

UmKhandlu weNarha oNgamele iimFunda kunye nomsebenzi wawo

UmThethosisekelo weSewula Afrika unikela umKhandlu weNarha oNgamele iimFunda (NCOP) kobana uqinisekisa bona iimfuno zeemfunda ziyatjhejwa ngurhulumende ophezulu. Lokhu kufinyelelwa ngokuzibandakanya ekambisweni yokwenziwa komthetho wenarha  nangokuthi kubandakanywe umphakathi eendabeni ezithinta iimfunda.   
Umsebenzi omkhulu womKhandlu weNarha oNgamele iimFunda (NCOP) kubamba iinkulumopikiswano, ukubetha umthetho, begodu nokutjheja ukwenza kwakarhulumende.  
UmKhandlu weNarha oNgamele iimFunda zeNarha ujamele iimfunda ukuqinisekisa kobana iimfuno zeemfunda ziyatjhejwa ngurhulumende ophezulu.
Umsebenzi womKhandlu weNarha oNgamele iimFunda (NCOP) eendabeni zeemfunda naborhulumende bemakhaya. 


Iyini iVeke yeemFunda yomKhandlu weNarha oNgamele iimFunda?

UmKhandlu weNarha oNgamele iimFunda wathoma iVeke yeemFunda ukuqinisekisa bona iimfunda zibanendima ekulu eziyidlalako emisebenzini eyenzeka ePalamende yenarha.
Phakathi kwevekele iinthunya zeemfunda zomKhadlu weNarha oNgamele iimFunda (NCOP) nabalingani bazo beemfunda bathatha ikhambo lokutjheja ngokuvakatjhela iimphakathi ukwenzela kobana bafumana ilwazi bunqopha ebantwini malungana neendingo zabo neentjhijilo ebahlangabezana nazo. 
IVeke yeemFunda ithinta indinyana yomThethosisekelo, okatelela umKhandlu weNarha oNgamele iimFunda (NCOP) kobana uqinisekise bona iimfuno zeemfunda ziyatjhejwa ngurhulumende ophezulu.
IVeke yeemFunda iqinisekisa bona iinthunya zeemfunda zomKhandlu weNarha oNgamele iimFunda (NCOP) zihlala zazi ngetuthuko eyenzekako, nangeentjhijilo eziqalene neemfunda zazo.  
Inikela iinthunywa ithuba lokuthintana neemfunda begodu ziletha umbiko obuyako ngezikwenzako kumKhandlu weNarha oNgamele iimFunda (NCOP) ngomnqopho wokufuma amangunya amatjha eendabeni ekufuze kubonisanwe ngazo.  
IVeke yeemFunda indlala itafula yokukhulumisana bekwabelwane ngemibono eendabeni ezimalungana nokulethwa kweensiza, begodu nentjhijilo eziqalene neemfunda ekuzaliseleni umsebenzi wazo.   
Iragela phambili ngokwakhela amathuba iPalamende neemfunda bona zisebenze ngokuhlanganyela ekufuneni iinsombululo begodu zize neendlela ezitjha zokulungisa iindingo zabantu beSewula Afrika.

Kuzokwenzekani ngesikhathi seVeke yeemFunda ?

Ngesikhathi seVeke yeemFunda, iinthunywa zasafuthi zesifunda ngasinye zizokuhlangana namagatja ahlukahlukaneko weemfunda zawo, ekufaka phakathi: 
Aborhulumende beemfunda  aboNdunakulu begodu namaLunga wesiGungu somKhandlu wesiFunda (MECs) kunye nemiNyango yawo
IimBethamthetho zeemFunda begodu naboSomlomo bazo, 
AboSosibebhe abaKhulu begodu naboSihlalo bamaKomiti, kunye 
Nezinye iinhlangano; ezifana nabarholi bendabuko, Iinhlangano ekungasizo zakarhulumende (NGOs), neenhlangano zomphakathi CBOs, begodu neHlangano eNgamele aboRhulumende bemaKhaya yeSewula Afrika (SALGA). 

Iinthunywa zeemFunda zomKhandlu weNarha oNgamele iimFunda (NCOP), kunye nabalingani bazo beemfunda, bazakuvakatjhela imiphakathi. 

Iinthunywa zizakuvakatjhela amaphrojekthi enziwa borhulumende bobabili ophezulu newesifunda, eemfundeni zabo.

IVeke yeemFunda izakuzuzisa bunjani isifunda sakho?

Ngokwevakatjho lokutjhejisisa leVeke yeemFunda, iinthunywa zeemfunda zomKhandlu weNarha oNgamele iimFunda (NCOP) zizokufumana ilwazi bunqopha malungana neendingo zabantu eemfundeni. 

IVeke yeemFunda yenza bona umKhandlu weNarha oNgamele iimFunda (NCOP) ukghone ukufaka isandla kurhulumende ukuqinisekisa bona iinlilo zeemfunda begodu nezaborhulumende bemakhaya ziyatjhejwa ekwenziweni kwemigomo yombuso ophezulu.  

Iragela phambili ngokukghonakalisa bona aborhulumende beemfunda nebemakhaya kunye norhulumende ophezulu basebenza ngokubambisana kuhle nangepumeleo ukuqinisekisa bona iinsiza ziyalethwa.     

MKHANDLU WENARHA ONGAMELE IIMFUNDA WAKHO!
YIPALAMENDE YAKHO!
ZIBANDAKANYE  KIYO!



