IVEKE YOKUZIBANDAKANYA KOMPHAKATHI 9 - 15 KUSINYIKHABA
[imilayezo eqakathekileko]
IVeke yokuziBandakanya komPhakathi kusikhathi sokudephisa ikulumo-pendulwano nokuthintana kukarhulumende nabantu. Inikela urhulumende ithuba  lokuhlathulula iHlelo lokuSebenza neragelo phambili esele lenziweko. Ithuthukisa ukuzibandakanya phakathi komphakathi norhulumende. 
IVeke yokuziBandakanya komPhakathi inikela urhulumende ithuba lokukhulumisana nemiphakathi, bekaziphendulele mayelana nokwenziwa kwemisebenzi evezwa liHlelo lokuSebenza. 
Ukuthintana okunqophileko phakathi kwemikhakha emithathu karhulumende (urhulumende wenarha, wesifunda newekhaya) begodu nomphakathi kuqinisekisa bonyana urhulumende uyathintana nabantu bakhe. 
Evekeni le kuzokuba nokuthintana phakathi kukarhulumende nemiphakathi okuzakwenziwa ngokweengungu ezinzinzileko ezinjengamakomiti wamawadi, imihlangano yamabubulo ngomnqopho wokuphakamisa iinselela nokwabelana ngeensombululo. 
Kuzakugandelelwa khulu iphuzu lokobana umphakathi kufanele kube ngiwo oza neensombululo, ngesekelo  likaRhulumende ozibandakanya ngekuthalo.
INomboro yokuRhabako kaMongameli yethule amagadango angezelelweko wokwenza ngcono ukuthintana phakathi kukarhulumende nabantu, nokurhabisa ukunikelwa kwezenzelwa emphakathini. 
Sitjheja iinselela esele zivele lokha nakuthintanwa nomphakathi  nangokwamarhubhululo. 
Sibe neragelo phambili elihle eminyakeni eli-15 yekululeko, kodwana iinselela zisaphikelele. 
Amakhaya anamanzi angezeleleke ngesibalo esi-61.7% ngonyaka we-1994 ukuya ku-91.8% ngenyanga kaNtaka 2009, kodwana kusese kunengi okufuneka bonyana kwenziwe ukufikelela abantu  abasatjhiyekileko.
Sele sitjhidele ekufikeleleni umnqopho wethu wokuphelisa ihlelo leendlwana ezimabhakede eendaweni zangokomthetho, begodu isikhathi esinqotjhiweko sephasiloke sokufikelela kilokhu kuzakuba ngunyaka we-2014. 
Sisese nomnako ngezinga eliphezulu lokutlhogeka kwemisebenzi, umtlhago, ukutekateka kwetjhejo lezamaphilo nokungakathuthuki, khulukhulu eendaweni zemakhaya nemitlhatlhaneni yabazihlomeleko. 
Asisebenziseni iingungu lezi njengendlela yokuthintana nabajameli bomphakathi begodu sikhalime bonyana bangoni izakhiwo neensetjenziswa okuhlelwe ngazo ukubanikela izenzelwa.
Sitshwenyekile ngokuriyada kokunikelwa kwezenzelwa ezithenjiswe imiphakathi; siyazi bonyana ngokusebenzisana ngetjhebiswano elinobuhlakani singenza okunengi msinyazana.
“Ngokusebenzisana, singenza okunengi”
