UmVikeli womPhakathi utjhaphulula umnyango elwazini elingasilo iqiniso lehlangano yepolotiki

Izwangobatjho yokobana iimali zakarhulumende zasetjenziswa mNyango wezokuThuthukiswa komPhakathi weRhawuteni ukuphumelelisa iindaba zehlangano yepolotiki gade ingasilo iqiniso, kuvezwe liphenyo elenziwe yi-Ofisi yomVikeli womPhakathi (OPP).

I-OPP iphenye indaba lapho iLunga lePalamende linghonghoyila khona bona isikhombiso se-African National Congress (ANC) ku-MEC waleso sikhathi, ikulumo kaKgaolelo Lekgoro yesabelo seemali gade ingakafaneli begodu ingasisemthethweni. Umhlobo wekulumo olungisiweko wakhutjhwa njengomkhangiso ephephandabeni.

Umghonghoyili wanghonghoyila bona umkhangiso wangezelela elwazini elingasilo iqiniso lehlangano yepolotiki elibhadalwe ngeemali zakarhulumende.

Nanyana kunjalo, iphenyo lifumane bona "kujayelekile namkha kufanele" bona iinhloko zepolotiki zikhulume ngelemuko lazo lepumelelo yehlangano yepolotiki abayijameleko, nabethula ikulumo eembethamthethweni ngeendaba zekareko lomphakathi. 

"UmNyango ukatelelwa mthethosisekelo kobana wazise umphakathi ngokwenziwa kwemisebenzawo kanye nangendlela iimali zakarhulumende ehlinzekelwe zona izisebenzise ngayo," kubika i-OPP ngokulandela iphenyo elimenyezelweko.

" Iindleko ezenziweko nakwenziwa umkhangiso okukhulunywa ngawo emaphephandabeni kobana wazise umphakathi ngokumunyethwe yikulumo ka-MEC, ngeze zathathwa njengezingasisemthethweni namkha ezingakhambi ngokwehlelo."

UmVikeli womPhakathi wafumana bona iindleko ezenziweko manqophana nomkhangiso azikenziwa ngokunganapumelelo begodu ngalokho ngeze zathathwa njengezinganamsebenzi nezimotjhako.

