Isondlo sokuluphala sompetjheni sibuyiselwe ngemva kokungena phakathi komVikeli womPhakathi

Umpentjheni weLimpopo weminyaka ema-86 yobudala isondlo sakhe sokuluphala esajanyiswa eminyakeni emithathu edlulileko ngezwa ngobatjho yokwabelana inomboro kamazisi nomunye umuntu we-Free State kwanjesi sele amomotheka yoke indlela yokuya ezikweni lokubhadela, sithokoza ukungena phakathi komVikeli womPhakathi.  

Isondlo saqobe yinyanga sakaMma Nyasedza Sophia Mphephu wedorajaneni leThononda eVenda sajanyiswa yiHlangano yokuBonelelwa komPhakathi yeSewula Afrika (SASSA) ngenyanga kaSewula 2005 ngaphandle kwananyana ngiyiphi ihlathululo kuye. Ubevakatjhela iziko lokubhadela pheze iminyaka emithathu, abuyela ekhaya angakaphathi litho ngasosoke isikhathi.  

Nanyana kunjalo ubujamo bathuthuka ngemva kokungena phakathi kwakaGcwetha Mushwana njengombana isondlo somhlalaphasi kaMma Mphephu sabuyiselwa. Wafumana yoke imali yeminyaka emithathu egade akolodwa yona begodu umVikeli womPhakathi waragela phambili nokuphakamisa ukuthi abhadalwe inzuzo akolodwa yona. UMma Mphephu wafumana namaphaselana wokudla kweenyanga ezintathu lokha i-SASSA nagade isatjheje umrarwakhe.

Ubujamo bakhe obubudisi bafika etjhejweni le-Ofisi yomVikeli womPhakathi (OPP) ngenyanga kaMrhayili.

Iphenyo lifumene kobana ukuziphatha kwe-SASSA gade kungakhambi ngokwehlelo begodu gade kunganasizathu esiliqiniso sokujanyiswa kwesondlo somfumani. Kwatjengiswa nokobana ayikho enye indlela yokondla eyasetjenziswako ukondla umfumani kanye nomndenakhe ngesikhathi isondlo sijanyisiwe. 

Ngemva kokufunyenweko uGcwetha Mushwana watlolela isiGungu esiKhulu se-SASSA aphakamisa kobana isondlo somhlalaphasi kaMma Mphephu sibuyiselwe kanye nokobana abhadalwe iinkolodo zeminyaka emithathu nenzuzo. 

"UmPhathi wesiGungu weenGodi we-SASSA ngeLimpopo kufanele aqhatjhe isiqhenyana sabasebenzii njengombana kuvunyelwene njengesibopho kobana siphenye khonokho indaba yezondlo ezijanyisiweko ngebanga lokwabiwa kweenomboro zabomazisi," kwatjho uGcwetha Mushwana. 

Uphakamise nokobana i-SASSA inikela abamukeli izondlo zabo ezijanyisiweko amaphaselana wokudla ngesikhathi soke sephenyo kobana bagcineke lokha ihlangano irarulula umraro orholele ekujanyisweni kwesondlo.

UGcwetha Mushwana uphakamise nokobana i-SASSA ihlela iindlela zokuqeda amaphenywayo eenyangeni ezintathu ngemva kokujanyiswa kwezondlo. 

   

