xhosa.2009.your_letters
Bhotani bahlobo
KUKHO umbhalo weBhayibhile (1 AbaseKorinte, 13:4) othetha ngokubaluleka kothando.
Le vesi ithi uthando luyanyamezela yaye lunomonde. Alunamona, aluzigwagwisi kwaye alunakratshi.
Akukho ndawo ethi uthando lukuvisa ubuhlungu.
Maninzi amabhinqa aphethwe gadalala kweli lizwe lethu - kuwo "uthando" luthetha ukubethwa, ukwenziwa ikhoboka nokuviswa ubuhlungu.
Imbalasane ekwikhava yethu, uKhanyi Mbau, ulelinye lamawaka ngamawaka amabhinqa aphathwe gadalala ngamadoda awathandayo. Kwiphepha lama-20 usiphalazela imbilini yakhe ngaloo mpatho gadalala emtshatweni wakhe.
Zinomdla izizathu zokuhlala kwakhe nokunyamezela loo mpatho. Ndiyacinga ukuba njengamabhinqa sifanele siwashiye amadoda asibethayo nasingxolisayo.
Amabhinqa makazi ukuba ukuvumela ukuphathwa gadalala kubulala uThixo ophila ngaphakathi kuthi.
Sifanele siqonde ukuba uthando alufanelanga lusivise ubuhlungu. Masazi ukuba sinako ukonwaba eluthandweni kwaye sinako nokufumana indoda elungileyo - kaloku maninzi anjalo.
Kwiphepha lama-24 sityelele emzini ozele uthando kaHashi Elimhlophe nenkosikazi yakhe
u-Ebony. Bangumzekelo omhle weendwalutho ezitshatileyo ezithandanayo neziphumeleleyo.
Amanye amaphepha emagazini yakho azele ifashoni, ezobuhle nokutya ongaziphekela kona.
Nixole ngokungasifaki isipho sekama ebendinithembise sona kwinyanga ephelileyo. Siza kusifaka kwiBONA yenyanga ezayo.
Ndiqwele ngezimnandi zokuba ndithiwe jize ngembasa yeVodacom Rising Star ka-2009.
Le mbasa itsho lukhulu kum kwaye kumnandi ukuwonga ngolu hlobo ngento oyenzayo.
Iluphawu lokuba ukusebenza nzima kunomvuzo nokuba endikuphumeze ukuza kuthi ga ngoku kube ngenxa yeqela endiphangela nalo, nani bafundi.
Enkosi.
USbu Mpungose: umhleli weBONA nozuze imbasa ye-2009 Vodacom Rising Star Award. Ukusuka ekhohlo: nguFlo Modikwe: ongumncedisi wabahleli beWag the Dog Publishers, uRedi Direko: ongumsasazi weTalk Radio 702, uDot Field: wakwaVodacom noLiesl Pretorius: ongumhleli weThe Media magazine.
IILETA ZENU
SIBHALELE IIMBONO ZAKHO
Iileta Eziya kuMhleli, Box 32083, Mobeni, 4060
fax: 031-912-2720 e-mail: bona@dbn.caxton.co.za
Ungalisebenzisa igama elingelilo elokwenyani, kodwa sicela usinike igama lakho lokwenene nedilesi. Izimvo ezikweli khasi zezabafundi, ayizozethu kwaye lilungelo lethu ukuzihlela iileta esizikhuphayo.
Oomedem nabancedisi
Emva kokufunda iThe Maids And The Madam (yeBONA, ka-Aprili 2009), ndingathi ubudlelwane obuhle phakathi kwakho nomntu oncedisayo ekhaya sisiphiwo esivela kuThixo. Elona thuba lide endakha ndalihlala nomntu oncedisayo yiminyaka emibini. Ndade ndadibana nemfundiso yamaKrestu, yokuphatha umntu oncedisayo ekhaya.
Phatha umsebenzi ngendlela nawe ofuna ukuphathwa ngayo. Naye ungumntu kwaye kufuneka ahlonitshwe amalungelo akhe. Emva kokufunda oku, nditshintshile. Oko ndiqeshe umntu omnye ukusuka ngo-Aprili 2007 kwaye ubudlelwane bethu buhle.
NguThembile Phute, eHarare
Vuk'uzenzele!
Ndikhuthaza amantombazana aselula ukuba aphakame azenzele! Musani ukumosha ubomi benu ngokukhulelwa nisebancinci. Qiqani, ningavumi amakhwenkwe anenzise izinto eningazifuniyo. Ngamanye amazwi, zihlonipheni! Amaxesha atshintshile, nani ninganqandwa ziinkwekhwezi ngoku. NguMD, eMadinyane
Makuqeqeshwe ngakumbi!
Siva iziganeko ezininzi zabantwana ababetha okanye babulale ootitshala babo kule mihla. Njengokuba lapheliswa nje uswazi, kufuneka sivele neendlela ezintsha zokuqeqesha abantwana bethu. Inqabe nasemakhaya ingqeqesho. Aba bantwana sithi balingomso lethu, kodwa ingathi sakha ingomso labemi abangenayo ingqeqesho.
Ngu-Alice Ntloko, eLibode
Amadoda angalunganga
Aza kuyeka nini amadoda ukuphatha gadalala amabhinqa" Aza kuyeka nini ukuthatha amakhosikazi akugqiba awagcine emakhaya" Aza kuyiqonda nini into yokuba, amabhinqa afuna ukwenza lukhulu kunokukhulelwa nokuhlalela iimbiza" Oku kundlandlathekiswa akupheleli ekhaya. Ukuba ulibhinqa wonakalelwa yimoto, ubasisisulu sokuhlawuliswa kakhulu ngoomakhenikhi, badlale nje ngawe.
NguZB, eSprings
Yiba sisilumko ngemali
Kumele sivuke, sisebenzise imali ngokufanelekileyo.Ukuzifundisa ukuthi "hayi" ebantwaneni bakho sisiqalo esihle. Ngaloo ndlela uya kuba ubafundisa ukuphatha imali ngendlela. Eneneni ke, ucinga ukuba bangaqonda kanjani ukuba amaxesha anzima xa beyifumana yonke into abayifunayo" Ukuthenga izinto zokudlala nokutya kwexabiso eliphezulu akukwenzi umzali olungileyo. Umzali olungileyo ngulowo oqinisekisa ukuba abantwana banokutya nendawo yokuhlala.
Ngu-AN, eDurban
Bajongisise
Ulonyulo lugqithile, ngoku kufuneka siqinisekise ukuba abo sibonyulileyo abathembisi kuphela nje, koko bayazigcina izithembiso zabo!
NguCS, eJouberton
Ileta egqwesileyo
Z ININZI iinkqubo ezenziwayo ukunqanda ubundlobongela nezikhuthaza ubuntu, kodwa noxa kunjalo kusekho ulunya, ukunganyamezelani nentiyo phakathi kwabantu beli abathetha iilwimi ezohlukeneyo.
Enye yezinto esazilwelayo kule minyaka mininzi kangaka lilungelo lokuba sibengabemi beli loMzantsi Afrika sonke, kungabi ngabathile.
Kubuhlungu ukubona ukuba emva kweminyaka eli-15 sikhululekile, kusabuya uqhushululu lwakudala.
Kwimicimbi echaphazela ukuhlala okanye ilizwe lethu, sifanelwe kukubeka ecaleni ukubandlululana ngokobuzwe sizibobe njengabemi boMzantsi Afrika.
Sinoxanduva lokwenza indawo yethu ibenabantu abanothando nentlonipho.
Ewe, sifanele sizingce ngobuzwe bethu, kodwa loo nto ayithethi kuthi masizibone sibhetele kunabanye. Yenzekile loo nto ngexesha lobandlululo, jonga ukuba loo nto yakhokelela phi.
Masiyiyekeni le nto sizingce ngokuba ngabemi boMzantsi Afrika. Masimanyane, ukuze singatshabalali.
Matome Kubu, Menlo Park
Khawuzicinge uvakalisa zonke iimvakalelo zakho ngeSamsung M620. AbakwaNashua Mobile bakunika iindlela zokuqhagamshelana nabantu ngeemveliso neenkonzo zeeselfowuni. Ngeziny' iinkcukacha fowunela ku-0861-531-531 okanye uye ku-www.nashuamobile.co.za
Isizathu sokuba siyeke ukubandlululana ngokobuzwe kweli size sizibone njengabantu boMzantsi Afrika
Indlela ende ebuyela ebuntwini
Isizathu sokungancami
Ibali elinika ithemba elisuka komnye wabafundi bethu
N DINQWENELA ukubalisela abafundi beBONA eli bali lifutshane elingokukhula kwam. Ndiyathemba ukuba liza kuba khuthaza ukuze baqhubele phambili ngobomi nokuba bajongene nobunzima obungakanani.
UTata wayesebenza kude egoduka rhoqo emva kweenyanga ezimbalwa. Mna ndandishiyeka nomama, owayenxila endiphethe gadalala. Maxa wambi ubendigxotha ndize ndilale ehokweni yeenkuku.
Ekuqaleni utata ubengakwazi okuqhubekayo. Ndithe ndakuba mdala ndamxelela baze banengxabano enkulu benomama. Emva koko umama wafunela utata abantu bokumbulala. Emva kokugwintwa kukatata umama uhlel' iminyaka emibini kuphela entolongweni.
Ngelixa esentolongweni ndiye ndaya kuhlala notat' omkhulu kwaye kulapho ndiye ndaqala ukufumana uthando nenkathalo yokwenene, okokuqala ebomini bam.
Umama usweleke kanye emva kokuphuma entolongweni. Ndandineminyaka eli-11 ngoko ndaze ndakhuliswa ngutat' omkhulu nomakhulu.
Iminyaka yokuqala yayinzima - kwaye ndisafikelwa ziinyembezi nangoku xa ndicinga ngayo - kodwa ndiye ndazibonela ngokwam ukubaluleka kokungancami, kuba izinto ziye zaya ngokubabhetele.
Mtunzi Xolisa, Cala
SIVUYISANA nalo mfundi ulandelayo ophumelele ubusuku obune babantu abathandathu kukhuphiswano lwe-Alpine Heath Resort obelukhutshwe kwiBONA kaJuni 2009. Igama lakhe nguDan K. Masimong waseBrits. Ulonwabele ikhefu elimyoli lwasezintabeni.
Sithi huntshu kwaba bafundi bangama-25 abazizuzela iCD kaBenjamin Dube umntu ngamnye kukhuphiswano lweBlock Puzzle No 92 ekhutshwe kwiBONA kaJuni 2009.
Amagama abo ngala : Phindiwe Leshoeli, Vanderbijlpark; Pearl Mbambo, Zakariya Park; Nonkosi Portia Nyathela, Wesley; Lutendo L. Ramabulana, Sinthumule; A.M. Norman, Ixopo; Moyagabo Agnes Mmadi, Witbank; Thobekile Masinga, Pietermaritzburg; Rorisang Pule, Batlharos; David Nkabinde, Villiers; Nomonde Mahlanza, Butterworth; Daniel Mabasa, Komatipoort; Maria Madihlaba, Groblersdal; Regina Maleka, Motula; P.D. Nkomo, Bloemfontein; Abraham Makanzela, Vredefort; Veliswa Mlomzamo, Peddie; Quinton Zwane, Carltonville; Jacob Shikaya, Kabokweni; Martha Maabane, Middelburg; Mkangeli Mpego, Matatiele; Constance Pshwene, Garankuwa; Nandiswa Qogadashe, Ashton; Sibusisiwe Shoke, Olifantsfontein; Nomsa Makhanya, Badplaas, kunye noSibongile Nduli, Winklespruit. Niwonwabele umculo wenu! Impendulo: Meshack Mavuso [x]
Phumelela ne-
Umbhali weleta egqwesileyo kule nyanga uya kuzuza iSamsung M620 yakwaNashua Mobile exabisa i-R1 200
