xhosa.1799.tapestry
Kubhiyozelwa uMzantsi Afrika
BONA XHOSA - December 2007
NGEZANTSI: U-Edward ngomnye wamagcisa anesiphiwo avela kwiilali ezingama-20 zaKwaZulu-Natal naseMntla Ntshona enze imifanekiso eqingqiweyo ebalisa ngembali yeelali zawo yeenguqu nophuhliso.
U-EDWARD SETLHARE onama-20 eminyaka nongaphangeliyo uhlala kwiphondo loMntla Ntshona uyayithanda imeko yeli phondo xa iinkwenkwezi ziphumile ebusuku kwanentsingiselo yazo kwinkcubeko yabaTswana.
Uluntu lwelali yaseTlhakgameng ephakathi komda weVryburg neBotswana lwakhetha uEdward namanye amagcisa amathathu ukuba benze umfanekiso oqingqiweyo obalisa imbali yeenguqu zaseTlhakgameng, waza uEdward waqinisekisa ukuba isibhakabhaka siza kuba luphawu olukhulu kulo mfanekiso kuba siluphawu lwethemba namaphupha oluntu lwale ngingqi.
U-Edward uyenye yeengcali ezingama-80 ezinesiphiwo ezivela kwiilali ezingama-20 zaKwaZulu-Natal naseMntla Ntshona ezenze imifanekiso exhonywa eludongeni elingana neengcango eyenziwe ngentsimbi nebalisa amabali obomi boluntu neenguqu.
Imibhiyozo
Ukwenziwa kwale mifanekiso kuyinxalenye yephulo leNetherlands, iMedia In Education Trust (MiET) Africa nesebe lemfundo laKwaZulu-Natal nelaseMntla Ntshona kwaye ngayo babhiyozela "intsebenziswano yabo kuphuhliso lweelali."
Ngentsebenziswano yala maziko kusungulwe amaziko emfundo angama-200 kwiilali zala maphondo mabini kwaye izikolo zenziwa "amaziko okuxhasa nokukhathalela" abantwana neentsapho ezibhuqwa sisifo sikagawulayo nendlala.
Abantu abadlal' indima enkulu kula maphulo ophuhliso ngabantu abangahoywanga abahlala ezilalini abaphila phantsi kweemeko ezinzima nabenza iinguqu ezintle ngenxa yokuzimisela, ukukhalipha, uthando nobuchule babo.
Ukugxininisa "ekubhiyozeleni uphuhliso lweelali" kunika abantu basezilalini ithuba lokubalisa amabali abo ngemifanekiso eyenziwe ngentsimbi.
"Sifuna ukunika abantu ithuba lokubalisa amabali abo, babonise ubuchule babemi beli nobugorha nokuzimisela koluntu lweli phantsi kweemeko ezimaxongo," litsho igosa eliphezulu kwiMiET Africa uLynn van der Elst.
Kwaqalwa ngokuthi kwenziwe iindibano zokuncazelana ngolwazi kwilali nganye ethath' inxaxheba eMntla Ntshona naKwaZulu-Natal. Ezi ndibano zalunceda uluntu lwabona izinto ezenzekayo noludlule kuzo lwaza lwaveza umbono walo wengomso.
Ukuboniswa kwemifanekiso
Umfanekiso ngamnye unebali lawo elibhaliweyo nelixela indawo owenziwe kuyo, usenziwa ngubani kwanokuba umele ntoni.
Amabali ale mifanekiso athatyathelwe kwiitshathi ezenziwa ngamalungu oluntu kwiindibano zokuncazelana ulwazi, amaphepha anolwazi agcinwa ngamalungu eqela loluntu, iifoto zifotwa ngeekhamera ezilahlwayo zakusebenza kwaye amabali abaliswa ngabantwana basekuhlaleni.
Le mifanekiso iza kuboniswa eNational Cultural History Museum kwi-"African Window Museum" eseVisagie Street ePitoli ngomhla we-15 kuOktobha. Emva kweenyanga ezimbini iza kuboniswa kwiingingqi eziliqela zeli.
Kule miboniso kuza kubakho nezinto zobuchule zeentlanga ngeentlanga nemifanekiso yabantu abatsha nabadala abangamalungu oluntu.
"Siyathemba ukuba abantu abaza kuza kule miboniso baza kuwaqonda amabali akuyo baze bakhuthazeke. Le yindlela esibonisa ngayo iinguqu ezenzeka ezilalini nentsebenziswano yethu kuphuhliso," utsho uCornelius Hacking omele iNetherlands. [x]
Amabali
eenguqu zeelali
kubhale uMICHELLE GOVENDER
kufote uROY REED
Uthotho lwemifanekiso ebalisa ngeenguqu nophuhliso eMzantsi Afrika...
EKHOHLO: Le mifanekiso iza kuboniswa kwiNational Cultural History Museum's "African Window Museum" kuVisagie Street, ePitoli ukusukela ngowe-17 kuOktobha. Emva kweenyanga ezimbini iza kutyelela iindawo ezahlukeneyo zeli.
EZINGOLWENI
UNonhlanhla Cele neqela lakhe bona umfanekiso obalisa imbali yaseZingolweni, ilali ekumazantsi eKwaZulu-Natal eneenduli neentaba.
Umfanekiso wabo ubonisa indlu etshiswa ngamadangatye omlilo kukwakho nabantu abadubulayo. Phezulu kulo mfanekiso kukho ilanga.
UNonhlanhla neqela lakhe bathi lo mfanekiso ubonisa iinguqu ezafika kule ngingqi emva kodushe nempalalo-gazi eyenzeka kwiminyaka engaphaya kweshumi edlulileyo, kwaye ubonisa ukufika kwethemba nokuxola okukhatshwa kukumiliselwa kweenkqubo zophuhliso kule ngingqi.
BONA XHOSA - December 2007
