xhosa.1683.beauty
ezobuhle
BONA XHOSA - August 2007
kubhale uCHRISTINE HAMMANN
kufote uCHRISTOPHER LAURENZ
imodeli CAROL of Models International
imake-up neenwele zilungiswe nguCATHERINE VEER
Amathanga athambileyo
Amathanga athambileyo angabumbeka ngokukhawuleza.
Sebenzisa amanzi abandayo eshawa uwatshintshanise nashushu ukuzithoba, zihlikihle ngebrashi okanye iglavu yonke imihla ukuphelisa amathuthuva nokususa okunye ukungcola.
n Ungasebenzisa icream yamathuthuva okanye igel enjengeEnviron's Alpha Hydroxy Derma-Lac Lotion (R130), okanye iJustinen's Skin Refine Body Sculpt.
n Qaphela indlela otya ngayo.
Ukutya okunestatshi neswekile kuyawenza amathuthuva.
Ungayityi inyama ebomvu, utye kakhulu iziqhamo, intlanzi nemifuno, usele namanzi amaninzi.
n Ukwenza umthambo ngokubaleka, ukuxhuma nokujikeleza kuluncedo ekuqiniseni amathanga.
n Ungayenza nale mithambo ilandelayo ekhaya:
Inyathelo 1: Ukuqinisa umphakathi wamathanga - lala ngecala ugobise umlenze ongaphezulu, unyawo lwakho ulubeke edolweni lomlenze ongaphantsi. Ngqalisa umzimba.
Inyathelo 2: Wehlise uwenyusa lo mlenze ongaphantsi uwugcine ungqalile, uphinda-phinde. Tshintsha wenze nangelinye icala.
Inyathelo 3: Ukuqinisa umphandle wamathanga - lala ngecala, ungqalise umlenze ongaphezulu ugobise lo ongaphantsi. Wehlise uwenyusa lo ungaphezulu. (Kwenze ngokucothayo nangononophelo)
Inyathelo 4: Phinda-phinda nangelinye icala. Ngokuya uqhela yenza izihlandlo ezingama-50 ngemini.
Iingalo ezithambileyo
Ngokuya usaluphala izihlunu zengalo ziyayekelela.
n Ukuthintela oku ungenza umthambo wokuqinisa isihlunu esingasemva sengalo ejimini okanye ekhaya:
Inyathelo 1: Yiba neenkonkxa zembotyi ezimbini!
Inyathelo 2: Yima nkqo, phatha inkonkxa kwisandla ngasinye, gobela ngaphambili kancinci ugobe amadolo.
Inyathelo 3: Goba iingalo, phakamisa iingqiniba zibe ngasemva kwakho ungqalise iingalo ngasemva.
Inyathelo 4: Phinda-phinda uphumla umzuzwana.
Kwenze oko kathathu yonke imihla kusasa, uzowubona umehluko.
Isisu esikhulu
Okunye ukutya namaxesha athile kuya kwenza uqunjelwe, nto leyo ingaba yenye yezinto ezikwenza ubenesisu esikhulu.
n Ukunciphisa ityuwa oyityayo kwenza umzimba ungagcini amanzi amaninzi kwaye ungaqunjelwa kakhulu. Qaphela ityuwa esekutyeni okunkonxiweyo, kwinyama ethengwa ivuthiwe, itshizi, isonka (ewe!), amandongomane anetyuwa kunye namashwam-shwam.
n Ungayityi ikhaphetshu, ibroccoli, iimbotyi namaqanda kuba zikwenza uqunjelwe.
n Xa upheka sebenzisa imithi yokunonga enjengerosemary, ithyme, ifeneli neseji.
n Sela amanzi xa uqunjelwe, amanzi ayakukhulula ekuqunjelweni
n Ungasinciphisa isisu sakho ngokwenza umthambo ngokufanelekileyo.
Inyathelo 1: Lala ngomqolo umise amadolo.
Inyathelo 2: Beka izandla ngaphantsi kwesinqe wonyuse umlenze ngamnye kali-15.
Inyathelo 3: Dibanisa iinyawo, uzijikelezise emoyeni.
Inyathelo 4: Gobisa amadolo, phakama uziphathe emadolweni uphinde ulale. Phinda-phinda ukwenza oku izihlandlo ezingama-20. (Hlala usilambisile isisu.)
Amabele ahlileyo
Isikhumba samabele sesona sithambileyo kwaye xa ungasihoyanga sikhawuleza sibonise iimpawu zokwaluphala.
n Imizuzu emihlanu yemasaji yonke imihla ngento yokuwaqinisa ingakunceda ukuqinisa isikhumba nokuyekelela. Okanye umasaje ngesandla esinye ujikeleze amabele.
n Sebenzisa Firm & Sculpt Bust Confouring Cream, (R99)
n Nazi iindlela ongazizama:
Inyathelo 1: Thatha iinkonkxa ezimbini zembotyi, yima nkqo.
Inyathelo 2: Phakamisa iingalo ngaphandle emacaleni, zingqamane namagxa. Dibanisa izandla iingalo zakho zingqalile.
Inyathelo 3: Izandla zisangqamene namagxa, yenza izangqa ezincinane, uzenzele kumacala angafaniyo. Yenza lo mthambo kangangoko unako.
n Nokwenza iipush-ups kuyanceda ekomeleliseni izihlunu.
Inyathelo 1: Bambelela phantsi ngezandla uphithanise iinyawo emaqatheni.
Inyathelo 2: Umzimba wakho wungqalise ukusuka emadolweni ukuya entloko, uze uphushele phantsi naphezulu.
Inyathelo 3: Kwenze oku yonke imihla uze wenze izihlandlo ezingama-20 ngeveki yesibini.[x]
Qala ngoku ukusebenzisa esi sikhokelo silula ukuzigcina ubukeka umncinci uqume neempawu zokwaluphala msinya
Umzimba omhle
BONA XHOSA - August 2007
Qaphela: Yonke le mithambo yenze ngononophelo ukuze ungazenzakalisi umqolo. Xa unengxaki yomqolo, thetha nogqirha wakho ngaphambi kokuba uyenze, kwaye yeka ukwenza umthambo xa usiva iintlungu.
