Mafhungo nga u pfufhifhadza



GEPF i badela vhe vha vha vha pholisa ḽa kale



Mufumakadzi vhe vha vha vha pholisa vho vha vho tea u badelwa tshelede yavho ye ya vha yo bvisiwa kha phensheni sa tshipiḓa tsha u dzhiulula  tshikolodo tsha muhasho. Vho Mushwana vho themendela uri muvhilaeli a badelwe tshelede yawe na nzwalelo dzayo u bva nga datumu ye ya bviswa ngayo u swika nga datumu ya mbadelo. 



Izwi zwo itea nga murahu ha musi ṱhoḓisiso nga Ofisi ya Mutsireledzi wa Tshitshavha yo sumbedza uri  maitele o randelwaho nga Tshikwama tsha Phensheni tsha Vhashumi vha Muvhuso Government Employees Pension Fund (GEPF) kha Manyuala wawo wa u dzhiulula tshikolodo tsha muhasho u ya nga khethekanyo 21(3) ya Mulayo wa Phensheni ya Vhashumi vha Muvhuso, wa 1996 (Mulayo wa GEP)  wo vha u songo tevhedzelwa.   



Ho dovha hafhu ha waniwa uri tsheo ya u dzhiulula  tshikolodo tsha muhasho kha mbuelo dza muvhilaeli dza phensheni a yo ngo tevhedzela ṱhoḓea dza Khethekanyo ya vhu3 ya Ṱhuṱhuwedzo ya Mulayo wa Vhulamukanyi ha Ndaulo, wa 2000, nahone zwo vha zwi songo itwa nga nḓila yo teaho. 



Tshiambi tsho ṱuṱuwedzwa u dzhia maga malugana na Mufarisa Minisṱa 



Tshiambi tsha Buthano ḽa Lushaka tsho ṱuṱuwedzwa u dzhia maga malugana na Mufarisa Minisṱa wa zwa Muno Vho Malusi Gigaba malugana na u sa tevhedzela mbofho dza ndayotewa dza u shumisana na Ofisi ya Mutsireledzi wa Tshitshavha (OPP). 



Hezwi zwo itea nga murahu ha musi Vho Gigaba vho kundwa u shumisana na ṱhoḓisiso nga OPP malugana na mahumbulelwa a uri vho rengela mufumakadzi wavho maluvha nga tshelede ya muvhuso na uri vho rengela vhathu vha re na tshivhalo thikhithi dza bupo na u vha hirela dzigoloi lwo vhalaho. 



U ya nga ṱhoḓisiso, Mutsireledzi wa Tshitshavha Vho Lawrence Mushwana vho themendela uri Tshiambi tshi dzhie maga o teaho u khwaṱhisedza uri hu shumaniwa na u kundelwa ha Vho Gigaba u shumisana zwi a thasululwa. 



Musi ṱhoḓisiso dzo sumbedza uri mbadelo dzo itwaho nga Ofisi ya Vho Gigaba a dzo ngo tea, nahone a dzo ngo thusa nga tshithu na uri ho vha hu u tambisa tshelede, dzo dovha hafhu dza sumbedza uri u humbulelwa malugana na mbadelo dza u tshimbila dzo badelwaho nga ofisi ya Mufarisa Minisṱa a si hone.   



Vho Adv. Mushwana vho dovha hafhu vha themendela uri Mulangi-Dzhenerala wa Muhasho, Vho Mavuso Msimang, vha khwinise nḓila dza u langa masheleni kha ofisi ya Vho Gigaba. 



Phalamennde i ḓo lavhelesa u shumiswa ha themendelo dza NERSA kha ‘u dzimelwa ha muḓagasi musi ṱhoḓea ya muḓagasi i tshi fhira une wa ṋetshedzwa’ ‘load shedding’ 



Komiti ya Phothifolio ya Phalamennde i re na vhuḓifhinduleli  kha fulufulu i tea u lavhelesa na u vhiga tshifhinga tshoṱhe tshumiso yavhuḓi ya themendelo dzo itwaho nga Ndaulo ya Fulufulu ya Lushaka ya SA (NERSA) nga Shundunthule 2008 nga murahu ha musi ho itwa ṱhoḓisiso dza ṱhahelelo ya muḓagasi.  



Vha tshi khou themendela maga nga murahu ha ṱhoḓisiso dza tshifhinganyana dze vha tou ḓithomela kha zwiwo zwa ṱhahelelo ya muḓagasi na u dzimiwa ha muḓagasi zwi tshi khou vhangiwa nga “load shedding” nga tshumelo ya muḓagasi ya muvhuso, Mutsireledzi wa Tshitshavha Vho Lawrence Mushwana vho ṱuṱuwedza Tshiambi tsha Buthano ḽa Lushaka u dzhia vhukando malugana na izwi. 





Tshipiḓa tshihulwane tsha Afrika Tshipembe tsho vha na ṱhahelelo ya muḓagasi na u dzimelwa ha muḓagasi zwi tshi khou itiswa nga “load shedding” u bva nga Lara 2007 u swika nga Phando 2008.  



“Mahumbulwa na tsheo dzo dzhiiwaho u bva kha ṱhoḓisiso o vha a uri ho vha na u lenga kha sia ḽa muvhuso malugana na u khwinisa vhukoni ha Eskom ha u bveledza muḓagasi na uri wo humbela pfarelo kha tshitshavha malugana na u khakhisea kana thaidzo dzo vhangiwaho nga “load shedding,” vho ralo Vho Mushwana.  



Vho dovha hafhu vha bula uri NERSA, sa muṱhogomeli na mukonanyi kana mulanguli kana muimeleli wa u vhona uri  mutheo wa ndaulo yo ṋetshedzwaho nga Mulayo wa Ndaulo ya Muḓagasi, wa 2006 u a shumiswa, i na maanḓa a u vhona uri themendelo dzo ṋetshedzwaho kha muvhigo wayo dzi a shumiswa na uri Eskom i tevhedzela nyimele dza ḽaisentsi yayo na Mbetshelo dzo teaho dza Mulayo. 







 

