Mulaedza u bva kha Mutsireledzi wa Tshitshavha

Zwino zwi a ḓivhea zwavhuḓi uri shango ḽashu, u fana na maṅwe u mona na ḽifhasi ḽoṱhe, ndi zwa tshiofisi uri ikonomi yo tsela fhasi, zwenezwo roṱhe ri kwamea nga tshiimo itshi.

Musi ri tshi khou ralo u bvela phanḓa na u kwamea nga idzi mvelelo dzi si dzavhuḓi dza itshi tshiwo tsha ikonomi, tshine tsha ṱoḓa uri ri vhe ro tsireledzea kha zwa ikonomi, ofisi yanga i khou bvela phanḓa na u shumana na idzi mbilaelo dza u imiswa ha magavhelo a phensheni ya vhaaluwa. Vhathu vhane vha wana aya magavhelo ndi vhaaluwa vhane vha wela nga fhasi ha zwigwada zwine zwa si kone u ḓiitela zwithu kha shango ḽashu nahone vhane vha vha vhashai.  

Nthihi ya nyimele ya u imiswa ha gavhelo ndi ya Vho Mphephu vha miṅwaha ya 86 vha Vundu ḽa Limpopo, vhe gavhelo ḽavho ḽo vha ḽo imiswa lwa miṅwaha i no ṱoḓou swika miraru nge ha vha hu tshi khou humbulelwa uri nomboro yavho ya vhuṋe i fana na ya muṅwe muthu kha Vundu ḽa Fureisitata.  

Nga murahu ha musi ofisi yanga yo dzhenelela, gavhelo ḽa Vho Mphephu ḽa phensheni ḽo vhuedzedzwa vha badelwa na tshelede yoṱhe ye ya vha yo salela. Ndi dovha hafhu nda themendela uri Zhendedzi ḽa Tsireledzo ya zwa Matshilisano, ngei Limpopo, ḽi thole tshigwada kana thimu ya mushumo u ṱoḓisisa nga ha magavhelo o imiswaho, nge ha vha hu tshi khou humbulelwa uri hu na u fana ha nomboro dza vhuṋe vhunga izwi hu thaidzo ine ya khou bvela phanḓa na u bvelela. Hu ḓo tea u lavheleswa uri idzi themendelo dzi a shumiswa. 

Naho hu uri ho vha na mvelaphanḓa kha muvhuso malugana na u ṋetshedzwa ha dzinnḓu dza mutengo wa fhasi kha vhashai kha miṅwaha yo fhiraho, hu kha ḓi vha na khaedu kha zwenezwo. A si kale kale ofisi yanga yo ṱoḓisisa nga ha mbilaelo dza vhadzulapo vha Yuniti dza R na S ngei Lebowakgomo, malugana na Muhasho wa Muvhuso wapo na zwa Dzinnḓu malugana na u kundelwa u fhaṱa na u fhedzisa nnḓu dza RDP dza tshitshavha.  

Themendelo u bva kha ofisi yanga dzo vha dza uri Muhasho u tea u fhaṱa na u fhedzisa nnḓu dza vhavhuelwa vhoṱhe vhe khumbelo dzavho dza ṱanganedzwa. Tshiṅwe hafhu, tshelede ya sabusidi ine ya kha ḓi vha hone i tea u thusa vhahweleli vhunga mutengo wa matheriala wa u fhaṱa u tshi khou gonya ṅwaha nga ṅwaha.

U vhiga vhugevhenga zwi nga ita uri zwitshavha zwi dzule zwo tsireledzea, zwenezwo ofisi yanga yo ṱoḓisisa nga ha mbilaelo ya tsevhi malugana na Tshumelo dza Tshipholisa dza Afrika Tshipembe (SAPS) malugana na u kundelwa u swikelela phulufhedziso yavho ya u badela mbadelo ya R75 000 nga murahu ha musi o ṋetshedza mafhungo e a ita uri hu vhe na u fariwa na u haṱulwa malugana na mulandu wa vhuvhava kana vhufobvu. Nga murahu ha ṱhoḓisiso, ndo themendela uri SAPS i badele muhweleli mbadelo nga vhuḓalo sa zwe zwa fhulufhedziswa na uri tshifhingani tshi ḓaho, SAPS i vhone uri i badela mbadelo hune phulufhedziso dza vha dzo itiwa. 

Vha khou humbelwa uri vha bvisele khagala mbilaelo dzavho, ofisi yanga i wanala fhethu ho fhambanaho ha shango nahone ri dovha hafhu ra vha na luṱingo lwa mahala, 0800 11 20 40, lune vha tea u lu shumisa musi vha tshi vhiga mbilaelo. Ro ḓiimisela u shuma na vhone u itela u khwaṱhisedza demokirasi ya ndayotewa yashu. 



U swikela tshifhinga tshi ḓaho  



Vho Adv ML Mushwana





