Mutsireledzi wa Tshitshavha u ṱanzwa dzina ḽa muhasho kha mafhungo a phuredzelo ‘prophaganda’ kha dzangano ḽa zwa poḽotiki

Mahumbulelwa a u ri tshelede ya muvhuso yo shumiswa nga Muhasho wa Mveledziso ya Matshilisano wa Gauteng u bveledza muhumbulo wa dzangano ḽa zwa polotiki zwo wanala zwi si zwone, zwo bviselwa khagala nga ṱhoḓisiso ya Ofisi ya Mutsireledzi wa Tshitshavha ‘Office of the Public Protector’ (OPP).

OPP yo ita ṱhoḓisiso ya mafhungo e muraḓo wa phalamennde a vhilalela a tshi khou amba o zwi livhisa kha ‘African National Congress’ (ANC) kha MEC o fhiraho, uri tshipitshi tsha mugaganyagwama tsha Vho Kgaogelo Lekgoro tsho vha tshi songo tea na u sa vha mulayoni. Tshipitshi tsho khakhululwaho tsho anḓadziwa sa khungedzelo kha gurannḓa

Muhweleli o gwalabela uri khungedzelo ya u galatshela dzangano ḽa zwa poḽotiki yo badelelwa nga tshelede dza muvhuso.

Hone ha, ṱhoḓisiso yo wana uri “ zwo ḓowelea kana zwi mulayoni” uri ṱhoho dza zwa poḽotiki dza mihasho  dzi shumise kuvhonele kwadzo kha tswikelelo dza dzangano ḽa zwa poḽotiki ḽine vha ḽi imelela, musi vha tshi amba kha vhusimamilayo nga ha mafhungo a dzangalelo ḽa lushaka.

“Muhasho u kombetshedziwa nga Ndayotewa u ḓivhadza tshitshavha nga ha kushumele kwa mishumo yayo na uri masheleni ayo a muvhuso o ṋetshedzwaho o shumiswa hani, “ muvhigo wa OPP wa nga murahu ha ṱhoḓisiso wo sumbedza izwi.

“Masheleni o badeliwaho kha u anḓadzwa ha khungedzelo kha gurannḓa u ḓivhadza tshitshavha nga ha zwi re kha tshipitshi tsha MEC, zwi nga si dzhiiwe sa zwi songo tendelwaho kana zwi songo ḓoweleaho.”

Mutsireledzi wa tshitshavha o wana uri masheleni o badeliwaho zwi tshi ya nga khungedzelo  a zwo ngo vha zwa ḽifhedzi sa zwenezwo zwi nga si dzhiiwe sa zwi songo vhuedzaho na u tambisa. 

