Gavhelo ḽa vhaaluwa ḽa mundende ḽo vhuedzedzwa nga murahu ha musi ho vha na u dzhenelela nga Mutsireledzi wa Tshitshavha

Mukegulu vha miṅwaha ya 86 vha Limpopo, vhe mundende wavho wa vha wo imiswa lwa miṅwaha miraru nge ha vha hu tshi khou humbulelwa uri nomboro yavho ya vhuṋe i fana na ya muṅwe muthu ngei Fureisitata, vha khou hola hafhu nahone vha livhuwa thuso ye vha i wana u bva kha Mutsireledzi wa Tshitshavha.  

Vho Nyasedza Sophia Mphephu vha muḓini wa Thononda ngei Venda gavhelo ḽavho ḽa mundende ḽo vha ḽo imiswa nga vha Zhendedzi ḽa Tsireledzo ya zwa Matshilisano ḽa Afrika Tshipembe (SASSA) nga Tshimedzi 2005 vha songo ṱalutshedzwa uri ndi ngani. Vho bvela phanḓa na u ya mundendeni lwa miṅwaha miraru yoṱhe vha tshi vhuya vha si na tshithu tshifhinga tshoṱhe.  

Fhedzi nyimele yo ḓa ya shanduka ya vha khwine nga murahu ha thuso ya Vho Adv.Mushwana musi gavhelo ḽavho ḽa mundende ḽi tshi vhuedzedzwa. Vho dovha hafhu vha wana tshelede ye ya vha yo salela ya miṅwaha miraru. Mutsireledzi wa Tshitshavha o dovha hafhu a themendela uri vha dovhe vha ṋewe nzwalelo dza tshelede yeneyo ye ya vha yo salela. Vho Mphephu vho dovha hafhu vha fhiwa phasela dza zwiḽiwa dza miṅwedzi miraru musi SASSA i tshi khou ralo u shumana na thaidzo yavho.  

Tshililo tshavho tsho swika Ofisini ya Mutsireledzi wa Tshitshavha (OPP) nga Shundunthule 2008 nga murahu ha musi gurannda ya dzingu, Capricorn Voice, i tshi anḓadza tshiṱori tshavho. OPP yo mbo ḓi thoma fulo ḽa u ṱoḓisisa malugana na iḽi fhungo.  

Ṱhoḓisiso yo sumbedza uri vhuḓifari ha SASSA ho vha hu si hone vhunga ho vha hu si na ṱhalutshedzo i pfalaho malugana na u imiswa ha gavhelo. Ho dovha hafhu ha waniwa uri ho vha hu si na dziṅwe nḓila dze dza vha dzi tshi khou shumiswa malugana na u unḓa muvhuelwa na muṱa wawe lwa tshifhinga tshe gavhelo ḽa vha ḽo imiswa.  

U ya nga mawanwa, Vho Adv Mushwana vho ṅwalela Muhulwane wa Khorotshitumbe ya SASSA, vha tshi khou themendela uri gavhelo ḽa mundende ḽa Vho Mphephu ḽi vhuyedzedzwe na uri tshelede ya miṅwaha miraru ine vha khou kolodiwa yone i badelwe na nzwalelo dzayo.  

Vho Adv. Mushwana vho dovha hafhu vha amba uri Mulanguli wa Khorotshitumbe ya Dzingu wa SASSA u tea u thola thimu kana tshigwada tsha mushumo, u thoma u ita ṱhoḓisiso malugana na u imiswa ha magavhelo zwi tshi khou itiswa nga u fana ha nomboro dza vhuṋe nga u ṱavhanya,” vho ralo Vho Mushwana. 

Vho dovha hafhu vha themendela uri SASSA i tea u ṋetshedza vhathu vhenevho vhe magavhelo avho a imiswa phasela dza zwiḽiwa lwa tshifhinga tshoṱhe tsha musi ṱhoḓisiso dzi tshi kha ḓi itwa uri vha kone u tshila musi zhendedzi ḽi tshi kha ḓi tandulula thaidzo yavho ya u imiswa ha gavhelo. 

Vho Adv. Mushwana vho dovha hafhu vha themendela uri SASSA i tea u vhona uri i khunyeledza dziṱhoḓisiso hu sa athu fhela miṅwedzi miraru nga murahu ha musi magavhelo o imiswa.  

   

