U lindela tshifhinga tshilapfu ha nnḓu dza RDP hu tsini na u fhela

Vhadzulapo vha Yuniti R na S vha tshikolobulasi tsha Lebowakgomo ngei Limpopo , vhane vhaṅwe vhavho vha vha vho lindela nnḓu dza Mbekanyamushumo ya Mveledziso na u Fhaṱulula nga Vhuswa u bva 1996, vha nga vha vho swika magumoni a u lindela dzinnḓu. 

Izwi zwi khou itiswa nga ṱhoḓisiso yo itwaho nga Mutsireledzi wa Tshitshavha malugana na u kundelwa ha Muhasho wa zwa dzinnḓu na Muvhuso Wapo u bveledza phulufhedziso dzavho dza u fhaṱela itshi tshitshavha nnḓu dza RDP. 

Aya mafhungo o thoma a ḓivhadzwa OPP nga Mukhantseḽara wapo, Vho Frans Letwaba, vho imela vhadzulapo. 

Vhavhilaeli vho ita khumbelo ya mutikedzelo kana sabusidi ya dzinnḓu nga 1996 u swika nga 2006. Khumbelo dzavho dzo ṱanganedzwa nga Muhasho nga fhasi ha phurogireme ya sabusidi ine ya vhidzwa Sabusidi dzo ṱanganyiswaho na Thandela. 

Thandela yo vha yo ṋetshedzwa khamphani ine ya vhidzwa COMDEV, ye ya kundelwa u fhaṱa dzinnḓu kana u ṋetshedza matheriala wa u fhaṱa. Ho waniwa uri dziṅwe dzinnḓu a dzo ngo fhela na uri hafu ya matheriala yo ṋetshedzwa vhaṅwe vha vhathu vhane vha khou fhaṱelwa dzinnḓu. 

Hu khou humbulelwa uri Muhasho wo kundwa u fhaṱela vhavhilaeli dzinnḓu kana u vha fha matheriala wa u fhaṱa uri vha kone u ḓifhaṱela dzinnḓu. 

Ṱhoḓisiso dza OPP dzo sumbedza uri khumbelo dza vhavhilaeli dza sabusidi dza dzinnḓu dzo ṱanganedzwa kana u tendelwa u bva nga 1997 u swika kha 2006.  Vhavhilaeli vho mbo ḓi dzhia tsheo ya u ḓifhaṱela dzinnḓu nga vhone vhaṋe, hone hu uri vhaṅwe vho fhedzisa nnḓu dze dza vha dzi songo fhela vha tshi khou shumisa matheriala kana tshomedzo dza vhone vhaṋe. 

Mutsireledzi wa Tshitshavha o themendela uri Muhasho u tea u fhaṱela vhathu vhoṱhe vhe khumbelo dzavho dza ṱanganedziwa kana u tendelwa nga kana phanḓa ha 2006. Muhasho u tea u fhedzisa dzinnḓu dze dza vha dzi songo fhela na u ṋetshedza matheriala wa u fhaṱa kha vhathu vhoṱhe vhe khumbelo dzavho dza ṱanganedzwa.  

Ho dovha hafhu ha themendelwa uri Muhasho u thusa vhavhilaeli vho no thomaho u fhaṱa nnḓu dzavho, fhedzi wo kundelwa u dzi fhedzisa na u lilisa vhathu vhoṱhe vhe vha ḓifhaṱela nnḓu dzavho nga nnḓa ha thuso ya Muhasho, nga murahu ha musi khumbelo dzavho dza u wana dzinnḓu dzo ṱanganedzwa.



