Mapholisa vha tea u badela tsevhi sa zwe vha fhulufhedzisa zwone  - Vho Mushwana

Mutsireledzi wa Tshitshavha Vho Lawrence Mushwana vho eletshedza Tshumelo ya Tshipholisa ya Afrika Tshipembe (SAPS) u badela tsevhi, ye ya thusa mapholisa na Maanḓalanga a Vhutshutshisi ha Lushaka (NPA) u thasulula mulandu wa vhuvhava, mbadelo ye vha fhulufhedzisa ya R75, 000. 

Nga murahu ha u ita ṱhoḓisiso malugana na izwi, Vho Adv. Mushwana vho tsivhudza SAPS uri i litshe u ṋetshedza phulufhedziso dzine ya sa ḓo dzi swikelela kha dzitsevhi vhunga izwi zwi tshi ṱapanyedza kana u tshinyadza dzina ḽavho. “Uvhu vhuḓifari vhu nyadzisa SAPS,” vha ralo.  

Muhweleli o kwama OPP nga 2007, miṅwahani miraru yo fhelaho nga murahu ha musi kheisi kana mulandu wo khunyeledzwa, a tshi khou amba uri SAPS ngei Gauteng yo kundwa u mu badela mbadelo ye vha mu fhulufhedzisa.  

Mapholisa vho vha vho fhulufhedzisa mbadelo muṅwe na muṅwe ane a nga  thusa NPA navho malugana  na u fara muhwelelwa na u mu haṱula kana u mu valela dzhele malugana na mulandu wonoyo, une wa kwama mafobvu a tshelede ine ya khou iswa huṅwe, mabulayo na u lingedza u vhulaha. Muhweleli o dovha hafhu a ṱanziela khothe malugana na izwi.   

Hu khou humbulelwa uri mbadelo yo fhiwa SAPS nga Khulani Security, naho tshelede yeneyo yo vha yo fhulufhedziswa nga mapholisa vho imela khamphani. 

Muhwelelwa o vha o vhewa nga fhasi ha mbekanyamushumo ya tsireledzo ya dziṱhanzi. Nga tshifhinga tsha ṱhoḓisiso, OPP yo wana uri ndi zwa vhukuma uri Muhweleli o ṋetshedza SAPS mafhungo e a ita uri hu vhe na u fariwa na u vhona mulandu vhahwelelwa kha mulandu wa vhufhura. 

Ho dovha hafhu ha waniwa uri ndi zwa vhukuma SAPS yo kundwa u badela Muhweleli mbadelo yeneyo. 

Vho Adv. Mushwana vho rumela mawanwa avho na themendelo dzavho kha Minisṱa wa Tsireledzo na Vhutsireledzei (une zwa zwino wa vhidzwa Tshipholisa) Vho Nathi Mthethwa na Khomishinari wa Mapholisa Vho Perumal Naidoo.   



