Vho Adv. Thomas vha kha ḓi vha na dzangalelo nga murahu ha miṅwaha ya 11 

Naho ho no fhela miṅwaha ya fumithihi vho tholiwa sa ṱhoho ya Ofisi ya Mutsireledzi wa Tshitshavha (OPP) kha ḽa Kapa Vhubvaḓuvha, Vho Adv. Nomsa Thomas vha kha ḓi sumbedza u vha na dzangalelo ḽa u ita nga hune vha kona malugana na u khwinifhadza vhutshilo ha zwitshavha. 

Vho Advocate vha re na mavhudzi a dzingwasa vho bebiwaho Queenstown, vho ṱuṱuwedzea lune vha nga takalela u ita na zwine zwa sa vhe mushumo wavho malugana na u thusa vhane vha ṱoḓa thuso. 

U ṱuṱuwedza 

“Ndi a ṱuṱuwedzea musi ndi tshi kona u shandukisa zwifhaṱuwo zwine zwi si tsha vha na fhulufhelo zwa mwemwela zwa dovha zwa vha na fhulufhelo.  Hezwi ndi zwone zwine zwa nnyita uri nga ḽi tevhelaho ndi ḓiwane ndo lindela mudzulapo zwawe tshiṱaraṱani, “vho ralo. “Zwitshavha zwa mahayani zwine ra zwi shumela zwi ri vhona sa mesia kha nḓisedzo ya tshumelo.”

U bva vhuṱukuni havho, Vho-Adv Thomas vho vha vha tshi ḓi vha na dzangalelo kha u shela mulenzhe kha muhumbulo wa u vha na tshitshavha tshavhuḓi hune vhathu, hu sa sedzwi uri ndi vha muvhala kana lutendo lufhio vha dzula vho vhofholowa, vha na zwikhala zwi linganaho kha vhupo ho tsireledzeaho.  

Zwavhuḓivhuḓi ndi u sa lingana ho vhangiwaho nga muvhuso wa khethululo wo fhiraho zwe zwa vha ṱuṱuwedza uri vha tevhele buḓo ḽa mushumo kha zwa mulayo.  

Vha tenda uri Ofisi ya Mutsireledzi wa Tshitshavha ndi iṅwe ya zwiimiswa zwine zwa vha na vhuḓifhinduleli vhuhulwane u vhona uri muvhuso u ita mushumo wawo wa u khwaṱhisedza uri demokirasi i bvela phanḓa. 

Naho Vho Adv. Thomas vha na muhumbulo wa u ri kuitele kwa Ofisi kwa u bveledza vhushaka havhuḓi na miṅwe miraḓo ya muvhuso ndi zwa ndeme, vho dovha hafhu vha ombedzela uri Ofisi naho zwo ralo, i tea u vha yo ḓiimisa na u sa dzhia sia.   

“OPP i tea u vha iṅwe ya nḓila kha ndaulo ya muvhuso ine ya ḓo ḓisa zwivhuya nga u tevhedzela zwine ya zwi amba zwa u ita uri demokirasi i swikelelwe nga vhadzulapo zwavho,” vho ralo. 

Vho Adv. Thomas nga nḓila ine vha khou shuma ngayo a vha wani na tshifhinga tsha u awela, vha fhungadza nga u vhala na u humbula nga ha ḽifhasi”. 

Vha na dzangalelo ḽihulwane kha mafhungo ane a kwama u khwinifhadza kha tshitshavha tshavho nahone vho shela mulenzhe zwihulwane kha u thomiwa ha tshigwada tsha u tikedza tsha HIV/AIDS tshine tsha pfi Vukume. 

Zwiṅwe zwa zwithu zwine vha zwi takalela ndi u tamba tshikwashi, thenisi, tshese na ragibii na ṅwana wavho wa mutukana na u ya u ita nyonyoloso dzhimuni, hu tshi khou iteswa nga maanḓa nyonyoloso dza sekhethe (nyonyoloso dzo fhambanaho dzine dza itiwa nga u ṱavhanya dzi tshi tevhelelana).

 

