PHALAMENNDE I ṊEA THENDELO …
Phalamennde ya Afurika Tshipembe yo bveledzisa Mbekanyamaitele ya Ndaulo ya Malaṱwa, sa tshipiḓa tsha pulane yo dzudzanyiwaho zwavhuḓi ya u laula vhupo ha mushumo ho tsireledzeaho.  
Mulayotewa u amba uri vhathu vha Afurika Tshipembe vha na pfanelo ya u vha kha mupo une u si vhaise mutakalo wavho kana vhuvha havho. Hezwi zwi katela tsireledzo ya mupo nga milayo yo teaho na maṅwe maga u thivhela tshikafhadzo ya mufhe na tshinyadzo  kha vhudzulavhathu, u ṱuṱuwedza ndondolamupo, na u tsireledza mveledziso ya vhudzulavhathu yo khwaṱhaho. Ri nga kona u humisela murahu iṅwe ya tshinyadzo yo no iteaho kha pulanete yashu arali ra dzhia vhukando ha uri hu vhe na tshanduko.
Phalamennde yo ḓiimisela u khwaṱhisedza mutakalo na tsireledzo zwa Miraḓo na vhashumi vha Phalamenndeni vhoṱhe na vhathu vhoṱhe vhane vha shuma lwa mulayo na vhane vha dzhena vhuponi ha zwifhaṱo zwayo. Tshiimiswa tsho ḓiimisela u dzudza vhupo ha Phalamennde hu kha tshiimo tshavhuḓi u bveledza vhupo ha u shuma ho tsireledzeaho nahone havhudi, khathihi na u langa khombo ine ya nga ṱaha vhuponi ha mushumo phanḓa ha musi i sa athu u bvelela. 
MUSHUMO NA VHUḒIFHINDULELI ZWA PHALAMENNDE KHA U LONDOTA MUPO
Mulayo u ngaho Mulayo wa Mutakalo na Tsireledzo Mushumoni (OHSA) u kombetshedza Phalamennde u ṋetshedza na u dzudza u ya nga hune zwa konadzea, vhupo ha u shuma hune ha vha ho tsireledzeaho hu si na zwivhangakhombo kha mutakalo wa vhashumi vhayo. Hu na ndavhelelo ya uri vhashumi vha tea u shumisana na mutholi u vhona uri ṱhoḓea dza Mulayo uyu dzi a swikelelwa.  Phalamennde i na vhuḓifhinduleli ha u bveledza nzhele kha vhashumi vhayo vhoṱhe nga ha ndeme ya u vhulunga mupo na mushumo khathihi na vhuḓifhinduleli hu elanaho nawo.
 MAGA NA MAITELE
Phalamennde yo bveledza pulane yo dzudzanyiwaho zwavhuḓi u langa vhupo ha u shuma ho tsireledzeaho nahone ho teaho hu tshi katelwa na mveledziso ya Mbekanyamaitele ya Ndangulo ya Malaṱwa. 
 Ndivho ya mbekanyamaitele ndi u ṋea muhanga wa u bveledza tshumelo i re na ndingano, i swikeleleaho nahone yo khwaṱhaho kha vhashumi na vhathu vha re vhuponi ha Phalamennde. Ndivho ya mbekanyamaitele ndi u vhona uri hu vhe na u laṱwa ha malaṱwa ho tsireledzeaho u fhungudza tshikafhadzo ya mupo, na u engedza u bikululwa ha malaṱwa khathihi na u vhona uri malaṱwa a bveledzwaho Phalamenndeni a shumaniwa nao u ya nga ha tsumbedzelo dzi re khayo.   
U VHULUNGA MUḒAGASI
Phalamennde i ṱuṱuwedza tshumiso ya gulupu dzi vhulungaho muḓagasi u itela u fhungudza tshikafhadzo ya mupo, u vhulunga muḓagasi na mbadelo. Dzigulupu dzi vhulungaho muḓagasi dzi shumiswa u funga mavhone fhethu hoṱhe ha nnyi na nnyi na dziphasedzhini dza Phalamennde.
NDANGULO YA MALAṰWA
“Malaṱwa” zwi amba zwithu zwiṅwe na zwiṅwe u fana na zwithu zwi re na gese, tshiluḓi kana zwo omaho kana zwiṅwe na zwiṅwe zwo ṱanganyelaho izwi, zwine nga tshiṅwe tshifhinga zwa tiwa nga Minisiṱa wa zwa Mupo na Vhuendelamashango nga nḓivhadzo kha Gazete ya Muvhuso.
Ndangulo ya Malaṱwa o Omaho
Malaṱwa o Omaho
Malaṱwa o omaho a dzhiiwa ḓuvha na ḓuvha a dzheniswa kha bege dza  puḽasiṱiki na kha zwifaredzi u bva fhethu hoṱhe a iswa fhethu ha u laṱa malaṱwa ho tendelwaho lwa mulayo.
Malaṱwa a mishonga
Malaṱwa a mishonga a dzheniswa kha zwifaredzi zwa puḽasiṱiki zwo tiwaho (zwa muvhala wa dzivha) na u bviswa nga muṋeyatshumelo o ṋewaho khonṱhiraka ya u ita mushumo uyu tshifhinga tshoṱhe kana hu na ṱhoḓea
Malaṱwa a muḓagasi
Mavhone oṱhe ane a si tsha shuma a tea u kuvhanganyiwa a poswa fhethu hune a ḓo gaiwa hone nga nḓila yo tsireledzeaho
Malaṱwa maṋu
Malaṱwa maṋu a dzheniswa kha zwifaredzi /mabini o tiwaho nahone a bviswa tshifhinga tshoṱhe 
Malaṱwa a Khemikhala
Dzikhemikhala dzi dzheniswa kha tshitolo tsha dzikhemikhala tsho loḓelwaho u thivhela u shumiswa hu siho mulayoni. Khemikhala dzoṱhe dzi tea u vhulungwa kha zwifaredzi zwo swaiwaho, nahone dzikhemikhala ṱhukhu dza khombo dzi tea u ṅwaliwa nga nḓila yo lulamaho.
Dzisilinda dza Gese 
Muṋeyatshumelo u tea u bvisa dzisilinda dza gese dzi si tsha shumaho vhuponi ha zwifhaṱo na u vhona uri dzisilinda dzi laṱwa u ya nga ha ṱhoḓea ya mulayo u thivhela u shumiswa hafhu zwi songo tea.
NYITO DZA TSHIFHINGA TSHIḒAHO
U laṱwa ha Mapfura a u Bika
Phalamennde i kha nzudzanyo dza u wana zwifaredzi zwa mvusuludzo ya malaṱwa a mapfura a u bika zwine  zwa shandukisa malaṱwa aya a mapfura a u bika a vha dizili. Maitele a u shela malaṱwa a mapfura a u bika kha dziḓireini dza maḓi a mvula a zwi ṱuṱuwedziwi.
U bviswa ha malaṱwa a mabambiri na u bikulula
Phalamennde i kha nzudzanyo ya u wana muṋeyatshumelo wa u bvisa mabambiri a malaṱwa uri a bikululwe. Ofisi dzoṱhe dza Phalamennde dzi ḓo ṋewa makhadibogisi a u kuvhanganyela mabambiri a malaṱwa. Makhadibogisi aya a ḓo shululwa vhege iṅwe na iṅwe.
Vhukando vhuṅwe na vhuṅwe ha u tsireledza mupo washu, hu u vhulunga muḓagasi na u fhungudza tshivhalo tsha malaṱwa ndi ha ndeme. Ndi vhuḓifhinduleli ha lushaka lwa vhadzulapo vhoṱhe vha Afurika Tshipembe, hu tshi katelwa Miraḓo na vhashumi vha Phalamenndeni vhoṱhe u vhulunga mupo washu u itela mirafho i ḓaho na u ṱuṱuwedza mvelele ya mveledziso yo khwaṱhaho.
